Němcy (SiR/SN). Hižo ryzy optisce je spóznać, zo su plakaty a lětaki za 48. wjesne swjedźenske hry w Němcach wot 12. hač do 14. meje hinaše hač w zašłosći. Nowy layout, barbne wuzběhowanja a přewidne teksty swědča wo tym, zo bě tu dorost při dźěle a zo přichodna generacija zamołwitosć přewozmje.

Wjesne swjedźenske hry w Němcach organizuja wjesny klub, młodźinski klub a dobrowólna wohnjowa wobora zhromadnje. Po zwučenym wašnju přewjedu njedźelu tradicionalne wubědźowanje na Čornym Halštrowje. Za to dyrbja wobdźělnicy wubědźowanski parcours zmištrować. Na to dadźa čisłowanym plastikowym kačkam po rěce napřemo płuwać. Sobotu chcedźa po słowach sobu­organizatora Jensa Scheibe w regionje najwyšu z ruku nastajenu 38,5 metrow wysoku meju powalić a zwěsćić, štó drje budźetaj lětsa mejski kral a kralowna.

Na jutřišim pjatku wotměje so wosebitosć, kotruž we wsy jenož kóžde dźesać lět dožiwja, mjenujcy přiwzaće nowych wobydlerjow do wjesneje zhromadnosće. „Něhdźe 50 nowych wobydlerjow chce sej přisłušnosć do wsy kupić a za to wotpowědny obolus zapłaćić“, Jens Scheibe zdźěli.

Do dźěłaćerja zajěł a ćeknył

Kamjenej. Wobchadne njezbožo z twarskim dźěłaćerjom je so předwčerawšim pola Kamjenej blisko Radworja stało. Muž a jeho kolegojo zarjadowachu tam nadróžne twarnišćo. Byrnjež woni napadnu oranžojtu dźěłansku drastu woblečeni byli, njeznate ćmowe wosobowe awto wotboka do jednoho dźěłaćerja zajědźe. Na zbožo so muž při tym njezrani. Njeznaty šofer bjez zastaća dale jědźeše, hačrunjež potrjecheny dźěłaćer hišće prawe durje awta wočinił. Za ćeknjenym policija nětko slědźi.

Hišće dobry měsac wostanje zwjazkowa dróha B 96 dospołnje zawrjena

Łaz (AK/SN). Zwjazkowa dróha B 96 we Wulkich Ždźarach wostanje hišće hač do 16. junija dospołnje zawrjena. Tole podšmórny twarski nawoda Łazowskeje gmejny Jens Kieschnick předwčerawšim na posedźenju gmejnskeje rady. Wot wotbóčki Rachlowskeje dróhi hač ke kromje wsy do směra na Budyšin kładu tam wopłóčkowu syć. „Wjedra dla smy tam do časoweho zastatka přišli. Nimo toho je nam dnowna woda klubu činiła“, Kiesch­nick rozłoži. Dale rozprawješe wón wo wšelakich dźěłach, kotrež su w zwisku z wopłóčkami trěbne. Tak su pódlanske puće sobu asfaltowali, kromy pućow přiměrili, nowe busowe zastanišćo natwarili a stare wottorhali. Gmejnski radźićel Steffen Mühl so prašeše, kak so chódniki k nowej dróze přiměrja. ­Wjacori wobydlerjo su so pola njeho dla toho naprašowali. Po słowach sobudźěłaćerja gmejnskeho zarjadnistwa Svena Koppena chce gmejna wšitke so jewjace njedostatki krok po kroku wotstronić, wšako je wona za chódniki zamołwita.

Konjecy/Šunow. Z nadróžnej kopańcu a dźěćacym swjedźenjom zahaja sobotu, 13. meje, popołdnju lětuši wjesny swjedźeń Konjec/Šunowa. Z hudźbnej zabawu a wječornym programom wjesneje młodźiny jón wječor w swjedźenskim stanje pokročuja. Po njedźelnym rańšim piwku wubědźuja so wohnjowe wobory wokolnych wsow. W 10.30 hodź. před­staji so wojerske towarstwo 1885 Ko­njecy. Po zhromadnym wobjedźe budźe w 14.30 hodź. mejemjetanje w Šunowje, po tym w Konjecach. W 16.30 hodź. slěduja wjesne mišterstwa w ćahanju powjaza. Wječor skónči so ze zabawu a diskoteku. Wo jědźe a napoje na woběmaj dnjomaj staraja so wohnjowa wobora, Domowinska skupina, blidotenisowe ­towarstwo a młodźina.

Za pózdnju změnu so přizjewić

Budyšin. We wobłuku pózdnjeje změny móža zajimcy 9. junija w Budyšinje ze­znać 21 hospodarskich předewzaćow. Za to organizuje město wosom wšelakich busowych jězbow, kotrež stajnje k dwěmaj předewzaćomaj abo k třom powjedu. Jězby su darmotne, zajimcy pak ­dyrbja so přizjewić. Na stronje informuja wo firmach a wo móžnosćach přizjewjenja.