W meji započnu twarić
Prěnjej nadawkaj za nowu Ralbičansku pěstowarnju přepodali
Róžant (JK/SN). Wulki projekt a wjelelětne přeće gmejny Ralbicy-Róžant – nowotwar Ralbičanskeje pěstowarnje – nabywa dźeń a jasniše kontury. Na wčerawšim posedźenju tamnišeje gmejnskeje rady radźićeljo prěni nadawk za přihot twarnišća a hłubokotwar kaž tež dalši za hruby twar jednohłósnje přepodachu.
Bjez adresy žane myto
Budyšin. Mnozy čitarjo su mjeztym hižo křižowku w jutrownym wudaću Serbskich Nowin wuhódali a nam prawu wotmołwu připósłali. Bohužel we wjacorych dóšłych mejlkach adresa wotpósłarja pobrachuje. Tohodla na tymle městnje na to skedźbnjamy, zo maja wotpósłarjo na kóždy pad swoju adresu zapodać, jeli chcedźa so na wulosowanju wobdźělić. Štóž je nam mejlku hižo pósłał, njech kontroluje, hač je adresu podał. Jeli njeje, njech nam z adresu wudospołnjenu mejlku znowa pósćele.
Předstaja přiručku
Zhorjelc. Lipšćanska rěčespytnica dr. Inge Bily předstaji swoju w Ludowym nakładnistwje Domowina wušłu přiručku „Slawische Personennamen in Ortsnamen zwischen Saale und Bober/Queis“ pjatk, 21. apryla, w 19 hodź., w Barokowym domje w Zhorjelcu. Knižne předstajenje wotměje so we wobłuku nalětnjeho zetkanja Hornjołužiskeje towaršnosće wědomosćow jako zhromadne zarjadowanje z LND. Kniha wjedźe wuslědki slědźenjow wo serbskich/słowjanskich wosobowych a městnych mjenach hromadźe a je spušćomny zakład za dalše mjenowědne slědźenja.
Policija (14.04.23)
Pokradnjene awto namakali
Budyšin. Hižo 3. apryla běchu njeznaći w Załomskej sportowni tablet, awtowy kluč a před halu stejace awto pokradnyli. Předwčerawšim so wobsedźerjej tableta poradźi, swój nastroj w Budyšinje na Jordanowej lokalizować. W mjenowanym wobłuku wuhlada wón awto swojeho sobu-sportowca. Na nim bě mjeztym hinaše čisło přičinjene. Policija wšitke slědy zawěsći a wobsedźerjej jeho Suzuki wróći. Tablet pak namakali njejsu, dokelž lokalizowanje dokładne dosć njebě, kaž policija zdźěli.
Šćežka powjedźe po spušćadle
Delnja Hórka (UM/SN). Po woli Malešanskeje gmejny nima Sprjewiny kolesowanski puć w Delnjej Hórce přichodnje hižo po hrodowej kupje wjesć, ale po spušćadle. Kaž wjesnjanosta Matthias Seidel (CDU) wobkrući, chcedźa za to klětu abo 2025 móst za kolesowarjow a pěškow twarić. Tole je gmejnska rada hižo wobzamknyła. „Z wobsedźerjom hrodoweje kupy drje wobsteji dojednanje, zo smědźa ju jako kolesowansku šćežku wužiwać, šćežka pak prawje wěnowana njeje“, wjesnjanosta rozłoži. Nimo toho dźěl šćežki wot mosta nad pódlanskej rěčku Sprjewje a dróhu W Ryćerkuble wutwarjeny njeje. Sčasami bě wotrězk samo zawrjeny, tak zo dyrbjachu so kolesowarjo na zwjazkowu dróhu B 156 wuwinyć. Dźakowano dojednanju mjez gmejnu a wobsedźerjom pak tele połoženje dołho njetraješe.
Město Budyšin wuda něhdźe štwórć miliona eurow za tudyše ...
Postupuja zhromadnje
Dźěwin (AK/SN). Gmejny Slepo, Trjebin a Dźěwin chcedźa hladajo na problem „wjelk“ zhromadnje postupować. Tole podšmórny wjesnjanosta Dźěwina Sebastian Bertko (njestronjan) štwórtk na posedźenju tamnišeje gmejnskeje rady. „W Dźěwinje a cyłej Slepjanskej wosadźe mamy stupacu ličbu wjelčich nadpadow. Tež domjace zwěrjata su mjeztym wopory“, wón wujasni. „Tohodla smy so my tři potrjechene gmejny nětko na zhromadny pisomny apel dojednali.“ Cil toho je, na nuznosć skutkownych naprawow skedźbnić a zamołwite instancy k spěšnemu jednanju pohnuwać.
Gmejna Dźěwin informuje wo temje „wjelk“ tež na swojej internetnej stronje: www.grossdueben-online.de. W nocy wot 19. do 20. měrca je wjelk znowa Dźěwinske hajnišćo za dźiwinu nadpadnył a sornu zakusał. To je tež fachowy wotrjad „Wjelk“ Sakskeho krajneho zarjada za wobswět, ratarstwo a geologiju (LfULG) wopodstatnił. Dwaj dokumentowanej wjelčej nadpadaj mějachu lětsa tež hižo w Slepom. W Mułkecach a w Rownom su wobydlerjo wospjet wjelki wuhladali.
Krótkopowěsće (14.04.23)
Festiwal z nowej strukturu
Zhorjelc. Wot 1. apryla tutoho lěta je Festiwal Łužica powšitkownosći wužitna towaršnosć z wobmjezowanym rukowanjom. Jeje nowa jednaćelka je Zhorjelčanka Maria Schulz. Dohladowanskej radźe přisłušeja zastupjerjo Zwjazka, Braniborskeje a Sakskeje kaž tež městow Zhorjelc a Choćebuz. Łužiski festiwal wotměje so lětsa wot 25. awgusta do 10. septembra.
Spomnjeće na Waršawski zběžk
Zhorjelc/Zgorzelec. Składnostnje 80. róčnicy zběžka we Waršawskim geće 1943 wobdźělitej so towarstwo Meetingpoint Memory Messiaen a załožba Pamięć, edukacja a kultura na 11. socialno-kubłanskej akciji „Nartuše“. 19. apryla chcedźa z pólskimi a němskimi młodostnymi papjerjane narcisy „jako symbol kolektiwneho spomnjeća“ mjez wobydlerjemi a hosćemi europskeho města rozdźělić.
Njepřećelski pozadk
Twórby a wuměłcow zeznać
Nowa kolesowanska šćežka „Slědy kamjenjow“ we Wojerecach nastała
Wojerecy (SN/MWj). Na puć po nowej kolesowanskej šćežce móža so wobydlerjo a dowolnicy bórze we Wojerecach nastajić. Wona steji pod hesłom „Slědy kamjenjow“. Na dohromady sydom stacijach dožiwja kolesowarjo do kamjenja zadypane wuměłstwo, kotrež je we wobłuku mjezynarodnych rězbarskich sympozijach wot lěta 1975 nastało. „Čara je dźesać kilometrow dołha. Štóž po njej z kolesom jědźe, trjeba za to něhdźe hodźinu“, praji Marita Gatzlaff z Wojerowskeje iniciatiwy „Město k sobu činjenju“. Iniciatiwa je kónc lěta 2021 na ideju nawjazała, wo kotrejž bě Uwe Proksch hižo w lěće 2012 prěni raz rěčał. Z pomocu myta z wubědźowanja simul+ móžachu projekt nětko zwoprawdźić.
Policija (13.04.23)
Do stražnika zajěł
Běła Woda. Stražnikej Běłowodźanskeje kupnicy je paduch předwčerawšim popołdnju z awtom do nohi zajěł. 64lětny bě do toho twory w hódnoće 25 eurow kradnyć chcył, štož bě stražnik pytnył a sej twory wróćo kazał. Na to měješe paduch wotpohlad z awtom wotjěć, čemuž chcyše stražnik zadźěwać a so za awtom stupi. Muž přiwšěm wróćo jědźeše a do stražnika storči, ale jeho njezrani. Policija skućićela pozdźišo w jeho bydlenju wopyta. Móžnu dalšu rubiznu pak zastojnicy pola njeho njenamakachu.
