Radźićeljo wuradźuja
Chrósćicy. Změna porjada wo wužiwanju wjacezaměroweje hale „Jednota“ wot 1. januara 2023 budźe jedna z temow přichodneho zjawneho posedźenja Chróšćanskeje gmejnskeje rady. Wone wotměje so štwórtk, 13. oktobra, wot 19 hodź. w gmejnskim a kulturnym centrumje „Łužica“. Dale póńdźe wo popłatki za přewostajenje stejnišćow k mjezynarodnemu folklornemu festiwalej a wo popłatki za wupožčowanje wuhotowanskich předmjetow gmejny.
W prózdninach do młyna
Čorny Chołmc. Za čas nazymskich prózdnin wot 17. do 28. oktobra ma Čornochołmčanski Krabatowy młyn wšelake swójbne poskitki přihotowane. Tak planuja swójbne wodźenja z kreatiwnym poskitkom wot póndźele do pjatka stajnje wot 10 do 12 hodź., póndźelu, srjedu a pjatk tež wot 13 do 15 hodź. Nimo toho móža swójby zhromadnje pjec, a to wutoru, štwórtk a sobotu wot 13 do 16 hodź. Zajimcy njech přizjewja so pod telefonowym čisłom 035722 951133.
Policija (10.10.22)
Šofer kóčku wusadźił
Jědlow. Přeńdźenje přećiwo zakonjej wo škiće zwěrjatow bu sobotu Kamjenskemu policajskemu rewěrej znate. Swědk bě wobkedźbował, kak wodźer wosoboweho awta na statnej dróze S 94 blisko Jědlowa (Gödlau) mału kóčku z awta wza a wusadźi. Na to jědźeše muž dale. Informowani policisća pozdźišo kóčku namakachu a do zwěrjatownje dowjezechu. Njeskutk muža policisća přizjewichu.
Přichod w nowych rukach
Popłatki za wopłóčki při Klóšterskej wodźe wostanu dale stabilne
Wudwor (AK/SN). Zaměrowy zwjazk za wopłóčki Při Klóšterskej wodźe (AZV) zarjaduje so 2023 do Kamjenskeho zaměroweho zwjazka za pitnu wodu. Wšitke trěbne kroki za to zamołwići tuchwilu zwoprawdźeja. Tole podšmórny předsyda AZV Sebastian Hein na naprašowanje. „Přichod zaměroweho zwjazka Při Klóšterskej wodźe je z přistupom ke Kamjenskemu zwjazkej zaručeny. Tón wutwori za to swójske zjawne zarjadnišćo za AZV“, Hein rozłoži.
W septembrje chcychu wobydlerjow wo rozpušćenju AZV a jeho přerjadowanju do zaměroweho zwjazka za pitnu wodu informować. Tež lětne wotzamknjenje 2021 chcychu wobkrućić. Ale w septembrje žane posedźenje AZV přewjedli njejsu, tež w oktobrje žane njebudźe.
Dźěłarnička z kwisom a dźiwadłom
Hodźij (GH/SN). Serbska Bjesada Hodźijskeje ewangelskeje wosady je minjenu sobotu lětušu dźěłarničku ewangelskich Bjesadow přihotowała. Přeprošenje bě něšto wjace hač 20 čłonow z Bukec, Rakec a wězo z Hodźija sćěhowało. Ale tež z Budyšina a z Ketlic su zajimcy přichwatali. A z Evanom Bleaklyjom, kotryž europske rěče studuje, so samo Američan na dźěłarničce wobdźěli.
Superintendent Chrystof Rummel zahaji dźěłarničku z nutrnosću. W swojim prědowanju warnowaše wosebje před přiběracym naročnym myslenjom ludźi. Na to informowachu so wobdźělnicy wo aktualnym stawje wuwića přełožowanskeje software z němčiny do hornjoserbšćiny. Olaf Langner bě kompetentny rozprawjer. Wón přewodźeše w poslednich lětach wuwiće programa „Sotra“ a woprowaše za to wjele hodźin swojeho časa. Jeho přinošk wo programomaj „Soblex“ a „Sotra“ nadeńdźe mjez připosłucharjemi wulki zajim. Přitomni mějachu telko prašenjow, zo dyrbjachu samo planowanu přestawku wupadnyć dać.
Składnostnje 800. róčnicy prěnjeho naspomnjenja Klětnoho je ...
So wšěm ludźom přiwobroćić
Kandidat SPD Tobias Schick wólby wyšeho měšćanosty w Choćebuzu dobył
Choćebuz (dpa/SN). Přichodny wyši měšćanosta Choćebuza, politikar SPD Tobias Schick, chce so wšitkim wobydlerkam a wobydlerjam města přiwobroćić – tež wolerjam AfD. „To su tójšto ludźi, tych runje tak w tutym měsće trjebam“, rjekny Schick powěsćerni dpa. „Rozsudne je, wjele mjez sobu rěčeć a wěcy derje rozkłasć“. 41lětny Schick bě so wčera w rozsudnym kole z 68,6 procentami jasnje přećiwo kandidatej AfD Larsej Schieske přesadźił, kiž dósta 31,4 procenty. Schick měješe podpěru wjacorych stron a šěrokeho towaršnostneho zwjazkarstwa.
Dotalny jednaćel měšćanskeho sportoweho zwjazka chce nětko wjacore předewzaća města zwoprawdźić. Wón mjenowaše prawicarski ekstremizm, mobilitu a zesylnjenje měšćanskich štwórćow jako přikłady za projekty, kotrež su hižo schwalene. „Dyrbimy je tež přesadźić.“ Na wólbnej party wčera wječor je Schick tež nowy stil připowědźił. „Sym rěčał wo nowej fairnosći, strony přesahowacej.“
Krótkopowěsće (10.10.22)
Pfeiffer wólby dobył
Zły Komorow. Nowy měšćanosta Złeho Komorowa je Andreas Pfeiffer. Kandidat CDU je wčera rozsudne wólby z nachwilnym wuslědkom 54,4 procentow hłosow dobył. Za kontrahentku Nadine Hönicke (SPD), kotraž ležeše w prěnim wólbnym přechodźe prědku, hłosowaše 45,6 procentow wolerjow. Pfeiffer je tež trěbny kworum 15 procentow wólbokmanych docpěł. Wólbne wobdźělenje wčera bě 38,5 procentow.
Nowe hudźbne widejo „Ta ćma“
Budyšin. „Ta ćma“ rěka nowe, wot soboty w syći wozjewjene serbske hudźbne widejo. Skupina Astronawt je je zhromadnje z orchestrom Serbskeho ludoweho ansambla (SLA), Milenu Wowčerjec a Lilom Handrijom produkowała. Twórba je w Korzymskej wuměłskej hali „Friese“ nastała a bu přez saksku wabjensku kampanju „So geht sächsisch“ spěchowana.
Dwurěčne kemše swjećili
Ptače saki zaso wottwarjene
Njeswačidło (SN/MWj). Wot meje su sobudźěłaćerjo spěchowanskeho towarstwa Njeswačanskeje ptakoškitneje stacije populaciju spěwacych ptačkow při Holešowskim haće přeslědźili. Za to nastajichu při haće 16 wulkich sakow, kotrež kóždu hodźinu kontrolowachu a z nich zapopadnjene ptački wzachu. Přepytowali su ptački na jich starobu a na splah. Nimo toho je wuměrichu, wopjeršćenichu a na to zaso do swobody pušćichu.
Kaž koordinatorka Cornelia Kobalz z přirodoweje centrale Budyskeho wokrjesa zdźěli, je so lětsa 791 ptačkow w sakach zapopadnyło. Z nich su 581 prěni raz wopjeršćenili, 210 hižo pjeršćeń mějachu. W sakach wuhladachu dohromady 32 rozdźělnych družin. Z 270 razami bě mały rokotak (Teichrohrsänger) najčasćišo zastupjeny. Wosebje wjeselili su so ornitologojo nad dwěmaj wódnikomaj (Wasserralle) a dwěmaj brjohačkomaj (Eisvogel). Prěni raz zwěsćichu při tajkim ličenju zahrodneho čowpaka (Gartenbaumläufer), lěsneho čowpaka (Waldbaumläufer), lěsnu lindušku (Baumpieper) a pólneho cyrlika (Feldschwirl).
Policija (07.10.22)
Grat pokradnyli
Bórkhamor. Grat w hódnoće něhdźe 7 000 eurow su njeznaći w nocy na srjedu w Bórkhamoru pokradnyli. Woni přewinychu płót ležownosće a zadobychu so do garaže. Z njeje wzachu wjacore motorske piły a točenske rězadło sobu. Škodowana firma njeje jeno swój grat zhubiła, ale poćerpje nimo toho 1 500 eurow wěcneje škody, policija rozprawja.
Šula dale problem wostanje
Budyski wokrjes hač do 2026 žane nowe nošerstwo njepřewozmje
Worklecy (JK/SN). Worklečanski wjesnjanosta Clemens Poldrack (njestronjan) nawjedowaše wčerawše posedźenje gmejnskeje rady suwerenje a jara přeswědčiwje. To je snano tež wuskutk wopytow w susodnych gmejnach, hdźež so zhromadnje ze swojim, w zastojnstwje tohorunja nowym kolegu Andrejom Bulankom z Njebjelčic předstaji a sej něšto nazhonjenjow nahromadźi.
