Policija (22.03.23)
Paduši so posłužowali
Wojerecy. W času wot soboty popołdnja hač do póndźelnišeho ranja su so njeznaći w pincy bydlenskeho domu na Wojerowskej Gagarinowej posłužowali. Tam so namócnje zadobychu a wzachu najwšelakoriši grat, elektriske nastroje, instalaciski material, črije, napoje a prózdne bleše sobu. Rubizna ma dohromady něhdźe 665 eurow hódnoty. Nimo toho načinichu skućićeljo 20 eurow wěcneje škody. Za paduchami policija nětko pyta.
Technika wuměnjenja za archiw w pincy polěpšiła
Pančicy-Kukow (SN/MWj). Problem włóžneje pincy w twarjenju zarjadniskeho zwjazka Při Klóšterskej wodźe w Pančicach-Kukowje drje so w přichodźe z blida njezhubi, mjeztym pak móža z nim poměrnje derje wobchadźeć. Wo tym móžachu so čłonojo zarjadniskeje zhromadźizny na swojim wčerawšim posedźenju přeswědčić. Poskitk, sej do posedźenja pincu wobhladać, drje je jenož mała horstka přiwzała. Woni pak zwěsćichu, zo spočatk lěta instalowana technika derje dźěła.
Stuchły smjerd wopytowarja tež wčera „witaše“. Ćim bliže pak sy k techniskim připrawam přišoł, ćim mjenje bě wón pytnyć. Kaž předsyda zarjadniskeho zwjazka Stefan Anders informowaše, je podźěl włóžnoty wot 60 procentow na 30 procentow woteběrał. Hač so tónle trend pokročuje, dyrbja wočakować. Při wšěm su někotre akty do hornjeju poschodow přerumowali.
Zelena swěca za solarny park
Gmejnska rada zrěčenju mjez komunu a inwestorom přihłosowała
Krynhelecy (AK/SN). Sewjernje Wochoz w Hamorskej gmejnje ma solarny park Hamorska milinarnja nastać. K tomu je so tamniša gmejnska rada na swojim zašłym posedźenju znowa wuznawa. W Krynhelečanskim kulturnym domje radźićeljo wustawkam wo twarskim planje a wotpowědnemu zrěčenju přihłosowachu.
Zrěčenje wotzamknjetej Hamorska gmejna a Łužiske předewzaće za wobnowjomne energije EPNE. „Jako wjesna rada předewzaće witamy. Naše najwjetše wobmyslenja su mjeztym z blida“, rjekny Wochožanski wjesny předstejićer Mario Weber. Dokelž pak je zarjadniske dźěło za tajki projekt jara wobšěrne, dyrbjał energijowy koncern LEAG gmejnu pjenježnje podpěrać, zo móhła wona wšitko zmištrować“, Weber měni.
Ze spočatkom nalěća tež město Budyšin rozkćěwa. Tele dny ...
Krótkopowěsće (22.03.23)
Medicinu we Łužicy studować
Choćebuz. Braniborska chce uniwersitu za medicinu we Łužicy załožić. Tole wobzamkny wčera krajne knježerstwo w
Podstupimje. W zymskim semestrje 2026/27 móža w Choćebuzu prěni studenća swój studiji zahajić. Projekt ma so hač do lěta 2038 z 2,1 miliardomaj eurow financować, z kotrychž přewza zwjazk 1,7 miliardow eurow.
Přihoty za festiwal „po planje“
Chrósćicy. Přihoty za 14. mjezynarodny folklorny festiwal Łužica „běža po planje“, kaž regionalna rěčnica župy Kamjenc Katharina Jurkowa zdźěli. Wopytowarjo „móža so lětsa mjez druhim na cyłki z Mallorci, Sri Lanki, Čěskeje a Pólskeje wjeselić. Zwjeselaca je wulka ličba přizjewjenych dorostowych skupin. Pytamy pak hišće wuměłstwowych rjemjeslnikow, kotřiž chcedźa so w Chrósćicach sobotu a njedźelu prezentować.“
Móst w Drježdźach blokowany
Policija (21.03.23)
Dźiwja honjeńca w nocy
Mužakow. Dotal njeznata wosoba je w nocy na póndźelu mjez Mužakowom a Rózborkom před policiju ćěkała. Zastojnicy chcychu Audi w Mužakowje kontrolować, šofer pak stupi na płun a smaleše do směra na Krušwicu. Dale dźěše honjeńca z hač do 200 km/h po statnej dróze. Jako awto na polo wotboči, je policisća z wočow zhubi. Pozdźišo Audi w Rózborku wopušćeny namakachu. Kaž so wukopa, bu jězdźidło něšto hodźin do toho w Berlinje pokradnjene.
Zhromadnje jejka debić nawuknyli
Serbsce do nalěća pućować
Hdyž nosy zaso běža
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (16).
Nalěćo nam kiwa. To wjeseli předewšěm tych, kiž sej rady słónčko a rozkćěwacu přirodu lubić dadźa. Alergikarjo maja skerje měšane začuća a nakupuja profylaktisce hižo jónu nósniki, spray za nós a krjepki za woči, hdyž so mučka rostlin přiběrajcy z powětrom roznošuje. Alergije su reakcije imunitneho systema na njeinfekciozne cuzomaćizny, kotrež w normalnym padźe ani chorosće, ani reakciju ćěła njewubudźeja. Mjenujemy je alergeny. Na kontakt z njestrašnym alergenom reaguje njetrjebawši ze zahorjenjom potrjechene ćěło. Wo pjeć typiskich přiznamjenjach zahorjenja – su to čerwjenjenje (rubor), zapuchłosć (tumor), bolosć (dolor), sćoplenje (calor) a wobmjezowanje funkcije (functio laesa) – sym hižo rozprawjał. Tele symptomy so tež při alergiskej reakciji jewja.
Přihotuja druhi raz „Rěč zwjazuje“
Budyšin (SN). Załožba za serbski lud připowědźi wupisanje wubědźowanja „Rěč zwjazuje. Rěc zwězujo. Sorbisch verbindet“. Zaměr wubědźowanja je, ideje a iniciatiwy spěchować, z kotrymiž móže so originelnje, regionalnje, skutkownje, směrodajnje a widźomnje na serbstwo skedźbnić. Při tym dźe wo podpěru a dalewuwiće dwurěčnosće w formje, kotraž přinošuje tomu, zo so serbska rěč zachowa. Wjace informacijow k tomu nadeńdu zajimcy na internetnej stronje załožby.
