Krótkopowěsće (08.08.22)
Ferialny kurs zakónčeny
Budyšin. Z wudawanjom wopismow wo wobdźělenju wšitkim kursistam a kursistkam je so pjatk w awli Budyskeho Serbskeho gymnazija lětuši mjezynarodny ferialny kurs serbšćiny Serbskeho instituta zakónčił. 13 wobdźělenych zdoby sej z pruwowanjemi certifikat po mjezynarodnym referencnym ramiku w stopnjach wot A1 hač do B2.
Intendantka RBB wotstupiła
Berlin. Patricia Schlesinger njeje hižo intendantka sćelaka RBB. Kaž powěsćernja dpa zdźěla, je wona zastojnstwo wčera złožiła. Prawdźepodobnje je wona mjez druhim wysoke poradźowanske zrěčenja wotzamkowała a sej sama nadměrnu mzdu popřała. Dźensa wuradźowaše rozhłosowa rada RBB kak měło dale hić. Wumjetowanja dadźa tuchwilu eksternje pruwować. Schlesinger bě wot 2016 intendantka RBB.
Podpěruja wučomnikow
Chcedźa nowe bydlenja z hladanjom twarić
Budyšin (UM/SN). Při tak mjenowanym Green Parku na Budyskej Flincowej blisko Serbskeho gymnazija zahaja bórze wobšěrne twarske dźěła. Kaž Andreas Spitzke z Lipšćanskeje serwisoweje towaršnosće Amalie wobkrući, ma tam 60 bydlenjow z wobstajnym hladanjom a dnjowe hladanišćo nastać. W tymle měsacu chcedźa fasadu ponowić kaž tež tepjenje, přewětrjenje a sanitarne připrawy zatwarić započeć. „Zaměr je, zo wobydlerjo wot apryla 2023 zaćahnu“, praji Andreas Spitzke. Byrnjež připrawu na zakładźe wobstejacych twarjenjow natwarja, ma bydlenski kompleks kaž „nowy natwarjeny“ wupadać. Twar dodźerži předpisy za dom z mało energiju. „Za zemsku ćopłotu smy dohromady 3 000 metrow dźěrow do zemje točili. Na dwěmaj domomaj natwarimy solarnu připrawu, tak zo budźemy wot miliny a ćopłoty njewotwisni, Spitzke připowědźa.
Serwisowa towaršnosć Amalie wjedźe hižo wjacore domy z wobstajnym hladanjom wokoło Lipska, mjez druhim w Lipsku, Eilenburgu, Halle a Leuna. Nětko chcedźa so sylnišo na kónčiny zwonka wulkich městow koncentrować.
Wodowe hrajkanišćo atrakcija
Wochožanski park błudźenkow ma nowy poskitk za swójby
Wochozy (CK/SN). Při tuchwilnych horcych temperaturach stara so we Wochožanskim parku błudźenkow nowa atrakcija wo wochłódźenje. Tam maja nětko nowe wodowe hrajkanišćo.
Na dołhosći jědnaće metrow a šěrokosći sydom metrow so woda na dwěmaj pućomaj žórli. „Jedna rěčka je runa kaž młynska hrjebja, tamna bóle přirodna a trochu dlěša“, wopisuje Matthias Ebeling nowu atrakciju. Planowar bě připrawu po předstawach spěchowanskeho towarstwa parka koncipował. 10. junija su twarić započeli, dobrych sydom tydźenjow pozdźišo bě wšo hotowe. Wodowe hrajkanišćo přizamknychu krjepjenskemu kołoběhej parka błudźenkow. Tak móža nowosć wobstajnje z čerstwej wodu zastarać, kotraž pak pitna woda njeje.
Zo móhła woda scyła ćec, dyrbja ju dźěći najprjedy raz z klumpu do małeho bazenka klumpać. Hdyž potom něchtó haćidło sćehnje, sej woda swój puć pyta. Tak kaž móžeš wodu na wěstym městnje spławić, maja tež dalše elementy z wodoweho hospodarstwa, praji Matthias Ebeling. Tež małe młynske koła hodźa so zapowěsnyć.
Na wjesny swjedźeń
Sernjany. Z natočenjom piwa a z wubědźowanjom wohnjowych woborow započnje so dźensa wjesny swjedźeń w Sernjanach. Wot 21.30 hodź. budźe kino při Klóšterskej wodźe. Jutře wot 14 hodź. přizamknje so soccerowy turněr. Wot 21 hodź. budu reje pod hołym njebjom z kapału „Die Wehder“. Njedźelu zahudźa Chróšćanscy muzikanća k rańšemu piwku. W 14.30 hodź. slěduje swójbne popołdnjo ze sokolnistwom Winde a ze zabawu za wulkich a małych.
Filmy we wowčerni
Stróža. Druhi raz přewjedu na dworje zarjadnistwa biosferoweho rezerwata Hornjołužiska hola a haty w Stróži filmowe wječory we wowčerni. Dźensa wot 20 hodź. widźa wopytowarjo film „Contra“. Dale pokazaja „Die Wiese – Ein Paradies nebenan“ (12.8., 20 hodź.), „Willi und die Wunderkröte“ (19.8., 18 hodź.) a „Das Pubertier“ (26.8., 20 hodź.)
Policija (05.08.22)
Wobšudnistwu zadźěwała
Budyšin. Starši porik by so předwčerawšim w Budyšinje nimale z woporom wobšudnikow stał. Kedźbliwa sobudźěłaćerka banki je hóršemu zadźěwała. Rentnarjej chcyštaj w swojej bance kredit we wobjimje 45 000 eurow za zběrku knihow měć. To bě sobudźěłaćerce podhladne a wona skedźbni 89lětneju na móžne wobšudnistwo. Na to informowaše wona policiju. Zastojnicy dojědźechu sej k bydlenju rentnarjow, hdźež pozdatnej předawarjej knihow w swojim Mercedesu čakaštaj. Policisća mužej w starobje 22 a 23 lět nachwilnje zajachu. Po zwěsćenju jich personalijow, porstowych wotćišćow a dalšich informacijow jeju zaso pušćichu a pad dale přepytuja.
Čłonki a čłonojo towarstwa Meta Solis hotuja so na dźensa wječor ...
Wosebity kwěćel
Tež za stawizny so zajimowali
Wojerecy (SN/JaW). Wědomostnicy Instituta za geografiju Hamburgskeje uniwersity pod nawodom prof. Martiny Neuburgeroweje su minjene dny we Łužicy přebywali. Kaž zdźěli město Wojerecy bě ćežišćo wuprawy skupiny studowacych wuslědźić, kotre potenciale, šansy a rizika transformaciski proces regiona w změnje ze sobu přinjese.
Kaž nowinska rěčnica Corinna Stumpf dale zdźěli, wobhlada sej skupina mjez druhim Wjelčansku wuhlowu jamu, industrijny park Čorna Pumpa a wězo tež Wojerecy. Rozmołwjeli su so wědomostnicy mjez druhim tež z přećiwnikami wudobywanja brunicy. Hosćo ze sewjera zaběrachu pak so tež ze stawiznami – tež serbskimi – regiona, z kóncom brunicy a wuskutki toho na wuwiće Wojerec kaž tež z dožiwjenymi towaršnostnymi a móžnymi nowymi konfliktami tež hladajo na připowědźene změny. Zetkali su so wědomostnicy předwčerawšim z wyšim měšćanostu Torstenom Rubanom-Zehom (SPD), kiž přewodźeše jich po měće a do Hórnikečanskeje energijoweje fabriki. Wčera wobdźělichu so hosćo na diskusijnym kole w Domje Martina Luthera Kinga.
Krótkopowěsće (05.08.22)
Šek za Luttnerowu załožbu
Budyšin. Rozžohnowacy so Budyski krajny rada Michael Harig (CDU) je Luttnerowej załožbje šek přepodał. Předsydka Margitta Luttner přija pjenježny dar we wysokosći 5 330 eurow. Harig bě nastupajo swoje rozžohnowanje ze zastojnstwa w juliju hosći prosył so kwětkow a darow wzdać a za to załožbje, kotraž podpěruje financnje potrěbnych šulerjow pjenjezy posrědkować.
Žadaja sej reformy
Podstupim. Braniborscy Zeleni žadaja sej reformu tamnišeho lěsneho zakonja. Za přičinu mjenuje krajna předsydka strony Julia Schmidt powěsćerni dpa přiběracy strach lěsnych wohenjow, kaž bě minjene tydźenje nazornje dožiwić. Mjez druhim žada sej wona zakonsce postajić, wusyki wutworić, studnje za hašensku wodu točić a suche drjewo z lěsow wotstronić.
Na měsačk so nastajili
Sobujěducy njetrjebaja hižo přez zwjazkowu dróhu
Budestecy (CS/SN). Wšitke busy, kotrež Budyšin z Hornim krajom zwjazuja, dyrbja přez Budestecy. Dohromady je jich šěsć čarow. Za čas šule zastanje cyłkownje 155 busow, w prózdninach je jich wotydźenja přeco hišće 127. W minjenymaj lětomaj na tym dźěłachu, wuměnjenja za sobujěducych a busowych šoferow polěpšić. Město dweju zastanišćow na woběmaj bokomaj zwjazkoweje dróhi B 96 maja nětko prawe busowe zastanišćo z dwěmaj přidatnymaj nastupnišćomaj. Hižo wobstejacej zastanišći su tak přetwarili, zo hodźitej so bjez zadźěwkow wužiwać. Předwčerawšim su nowe busowe naměsto přepodali. Sobujěducy, kotřiž chcedźa w Budestecach přelězć, trjebaja nětko lědma hišće dróhu přeprěčić. To je wosebje za šulerjow wažne, podšmórny wjesnjanosta Markus Michauk.
