Smochćicy. Za Smochčanski hudźbny swjedźeń 2023 móža sej zajimcy hižo nětko zastupne lisćiki w předpředani wobstarać. Znaty koncert pod hołym njebjom zaklinči 30. junija a 1. julija a je jedyn z hudźbnych wjerškow we Łužicy. Po tym zo wěnowaše so hudźbny swjedźeń 2022 našim čěskim susodam, powjedźe wón 2023 do susodneho pólskeho kraja. Zastupne lisćiki poskićuja při kasy Serbskeho ludoweho ansambla a internetnje pod .

Wustajeńca Božich narodkow

Hirschfelde. W putniskej hospodźe w Hirschfeldźe su hišće hač do štwórtka, 2. februara, Bože narodki wustajene. Mjez nimi je tež tajki, kotrehož postawy hodźa so zdźěla pohibować. Snadneje wulkosće domu dla su přizjewjenja trěbne. Połhodźinske wodźenja započinaja so stajnje sobotu w 14.30 hodź. a njedźelu w 14 kaž tež w 15 hodź. Tež wosebite wodźenja za skupiny ze sydom do ­dwanaće wosobow su móžne a měli so z fararjom Michaelom Dittrichom dojednać, a to z mejlku na dittrich.mi@ t-online.de abo pod tel. čo. 0162 9179949. Zastup je darmotny.

Hižo 13. raz su so wčera zmužići atletki a atleća z Wojerec a wokoliny za wukónc ­lěta do zymneje wody Třižonjanskeho jězora podali. Nimo Wojerowskeho wodosportoweho towarstwa je na to prěni raz tež towarstwo KnappenMan přeprosyło. Dwójce dyrbješe tele zarjadowanje korony dla wupadnyć. Wčera móžachu so zajimcy zaso při Běłochołmčanskim pobrjoze Třižonjanskeho jězora zetkać. Něhdźe 50 jich bě, kotřiž so do wody zwažichu. Woni dóstachu wopismo a horcy napoj. Něhdźe runje telko běchu 2019 při poslednim zymskim kupanju zličili. Runje tak kaž tehdy bě tež wčera woda pjeć stopnjow zymna. Foto: Gernot Menzel

Bóšicy (MiR/SN). Na informaciskich taflach na wsach, přisłušacych Bóščanskej gmejnje, je wupowěsnjeny aktualny lětak z přeprošenjom. „Po dwulětnej přestawce korony dla chcemy nowe lĕto zaso pućować“, zdźěli wjesnjanosta Stanij Ryćer (rjemjesło Bóšicy). Dokal puć powjedźe, wón runje tak kaž w zašłych ­lětach do toho njepřeradźi. Jasne je, zo zetkaja so wobydlerjo jednotliwych wsow 1. januara 2023 na centralnym městnje swojeje wsy, a to w 10 hodź. ­we Wětrowje-sydlišćo na hrajkanišću, w samsnym času w Nowych Bóšicach při busowym zastanišću, w 10.15 hodź. w Bóšicach a Jaseńcy při busowym zastanišću, w 10.30 na Horje při busowym zastanišću a w 10.35 na hrajkanišću w Nowej Jaseńcy. Wšitcy nóžkuja potom na centralne městno, hdźež budźetej bjesada a zabawa. „Poskitk njeměri so jenož na wobydlerjow gmejny“, Ryćer zwurazni. „Njech přińdu tež wšitcy dalši zajimcy sobu, tež ći, kotřiž silwester w našich kónčinach přebywaja.“ Wo nowolětny wobjed so pućowacy starać njetrjebaja. Po tradiciji wočakuje slědne huby mjez druhim překwapjenka z pólneje kuchnje.

Na wjeskach su hišće tradicije žiwe, ­kotrež wobydlerjo pěstuja a zachowaja. W Narću na přikład so žony zetkawaja, zo bychu při předźenju přihladowali a so same pospytali.

Narć (SiR/SN). Sčasami je Steffi Metting ze swojim kołwrótom wšědnje diskutowała. „Wudźenki z brjuchami sym swoje prěnje pospyty mjenowała. Te běchu wot kmaneje nitki jara zdalene“, rozprawja 46lětna. Mjeztym zamóže wona z kołwrótom derje wobchadźeć.

Dźensa Steffi Metting pjeć tajkich nastrojow wobsedźi. Z třomi z nich wona wobstajnje dźěła. Jako wona to powěda, so jeje noha na pedalu horje a dele pohibuje, zo by so koło wjerćało. Jeje ruce dźeržitej wowču wołmu, z kotrejež nastanje poněčim nitka. Štož jednore wupada, scyła tak jednore njeje. A to za angažowanu předźerku woznamjenja, zo dyrbi wobstajnje zwučować. Pomhało jej je, zo je sej w interneće sta widejofilmow wobhladała a tak wuslědźiła, kak so prawje předźe. Přetož po prěnim kursu drje wona wotběhi znaješe, „přasć pak přeco hišće njemóžach. Mi je so stajnje znowa nitka torhnyła.“