Prašenja a wobmyslenja w zwisku z planowanym natwarom fotowoltaikowych připrawow na ratarskich płoninach staraja so tuchwilu we wjacorych gmejnach wo wobšěrne diskusije za a přećiwo tajkim připrawam.

We wjacorych gmejnach Hornjeje Łužicy, mjez druhim tež w tajkich zarjadniskeho zwjazka Při Klóšterskej wodźe, předleža tuchwilu próstwy wšelakich přede­wza­ćow za natwar a wobhospodarjenje wulkich fotowoltaikowych připrawow na ratarskich płoninach abo jim podobnych ležownosćach. Wšitke tute firmy wotpohladuja, hladajo na tučasnu napjatu situaciju w zastaranju z milinu a energiju, spěšnje tunju milinu z přirodnymi žórłami produkować, kaž stej to słónco abo wětřik. Wětrniki so na mnohich móžnych stejnišćach nastajić njehodźa, dokelž njewotpowěduja postajenja wuměnjenjam, kotrež z poměrnje hustym wobsydlenjom tež we Hornjej Łužicy mamy. Tak zbywa jako móžnosć, produkować alternatiwnu milinu, jenož hišće solarna technologija.

Rakecy (UM/SN). Najwjetši dźěl ludźi w Sakskej ma dokładne předstawy wo tym, kajki ma swěčkowy wobłuk wupadać. Z drjewa ma wón być, cyle jasne. Małe, po móžnosći z ruku wurězane figury maja hodowne sceny, hórnikow, křižowanej hamoraj, sornika při žłobiku a podobne motiwy pokazować. A swěcu spožčeja swěčki, kotrež su w samsnym wotstawku na wobłuku přičinjene. Štóž so z tajkimi wočakowanjemi na Rakečanske Cyrkwinske naměsto poda, so najprjedy raz dźiwa. Přetož swěčkowy wobłuk, kiž tam mjez busowym zastanišćom a zachodom na kěrchow steji, wopisanemu klišejej scyła njewotpowěduje. To započina so hižo z materialom, přetož Rakečanski swěčkowy wobłuk je z načerwjeneho zerzaweho metala. Pod dwurěčnym napisom Königswartha-Rakecy wuhladaš Rakečanski gmejnski wopon, ewangelsku cyrkej kaž tež z rohodźe wuskočeneho karpa jako symbol hatneje krajiny.