Po tym zo su na Worklečanskej kupje wjacore wjetše chore a wot ...
Krótkopowěsće (20.01.22)
SLA přeproša na wubědźowanje
Budyšin. Na 12. wubědźowanje młodych talentow „Młoda serbska hudźba“ přeproša Serbski ludowy ansambl dźěći a młodostnych w starobje šěsć do 23 lět. Zajimcy njech so hač do 31. měrca požadaja. Přizjewjenja su móžne w kategorijach spěw (solo, skupina, chór), instrument (solo, skupina, orchester) a cyle nowe w kategorijomaj band a reja (solo, skupinu).
Incidenca pomału stupa
Budyšin. Budyski strowotniski zarjad je wčera 184 dalšich natyknjenjow z koronawirusom zwěsćił. Dźewjeć ludźi je tu w běhu 24 hodźin w zwisku z wirusom zemrěło. RKI podawa dźensa za Budyski wokrjes incidencnu hódnotu 224,5 a za Zhorjelski 249,4. Tam je so wčera 199 ludźi z wirusom natyknyło. Tři wosoby su w zwisku z infekciju zemrěli.
Budyšan nadběha dla zasudźeny
Nasyp z cyle nowym napohladom
Planowanje nabywa kontury
Njeswačanska gmejnska rada posedźenski rjad noweho lěta zahajiła
Njeswačidło (JK/SN). Ze zazběhom lětušich posedźenjow Njeswačanskich gmejnskich radźićelow spokojom bě wčera wječor tamniši wjesnjanosta Gerd Schuster (CDU). Na dnjowym porjedźe stejace temy su woni spěšnje a ze zwučenej dokładnosću wobjednali. Wulke wolóženje radźićelam kaž tež za zarjad scyła bě, zo móžachu skónčnje zakónčić bilancu gmejny k 31. decembrej 2013. Ale mjeztym hižo bilancy dalšich lět na blidźe leža. Te pak chcedźa po słowach wjesnjanosty spěšnišo wobdźěłać, dokelž maja hižo trěbny trening a nazhonjenja z dołho trajaceho wotličenja lěta 2013.
Policija (19.01.22)
Do kontejnera so zadobyli
Wulke Ždźary. Twarnišćo kołowokoło Hórnikečanskeho jězora nastajnosći paduchow wabi. Dalši tajki pad sta so minjene tydźenje při stanowanišću we Wulkich Ždźarach. Kaž policija wčera zdźěli, zadobychu so njeznaći do kontejnera. A tam su nuzowy milinowy agregat, nurjensku klumpu a dalši grat w cyłkownej hódnoće 5 000 eurow pokradnyli.
Ptaču chěžku před paduchami škitał
Po tym zo stej sej raz w nocy kunje w mojej ptačej chěžce ptaču picu słodźeć dałoj, běch najprjedy bjezradny, kak móhł tomu zadźěwać. Ptača pica je so mjeztym chětro podróšiła. Před lětami płaćeše měch z 30 kilogramami zornjatkow słónčneje róže w Čornym Hodlerju 21 eurow, nětko hižo 27 eurow.
Radworčan Šćěpan Paška mi poruči, wokoło štoma pod chěžku groćane pasy z dołhimi kałačemi připrawić. Tajke wužiwaja poprawom tam, hdźež hołbje na twarjenjach sydać njesmědźa. Šołćic třěchikryjerska firma tajke pasy měješe, a tak je hnydom přičinich, hromadźe z kruchom nuklaceho grotu, kotryž kuny zańč nimaja. To pak bě zmylk, štož je moja kamera w přichodnej nocy zapopadnyła. Dwaj šupaj (Waschbären) běštej po groćanych pasach do chěžki zalězłoj a sej moje zornjatka słodźeć dałoj.
W meji wola noweho předsydu
Po tym zo bu kónc zašłeho a spočatk tohole lěta w serbskich a němskich medijach městno předsydy zarjadniskeho zwjazka Při Klóšterskej wodźe wupisane, je nětko tež termin wólbow znaty.
Chrósćicy (SN/MWj). Wólbna doba předsydy zarjadniskeho zwjazka Při Klóšterskej wodźe je runje kaž ta wjesnjanostow a měšćanostow na sydom lět wobmjezowana. Dokelž bu Měrko Domaška w lěće 2015 prěni raz do mjenowaneho zastojnstwa wuzwoleny, dyrbja jeho městno lětsa znowa wobsadźić. Zhromadźizna zarjadniskeho zwjazka je so na swojim wčerawšim posedźenju w Chrósćicach jednohłósnje na to dojednała, zo ma so to 10. meje stać.
Dokelž njejedna so wo zjawne wólby, njeje tež žadyn termin za móžny druhi wólbny přechod trěbny. Hač do 1. měrca móža so zajimcy za funkciju přizjewić. Měrko Domaška je hižo přizjewił, zo so na kóždy pad zaso požada. Kaž jeho zastupjer a Chróšćanski wjesnjanosta Marko Kliman (CDU) wčera připowědźi, budźe wotpowědnje ličbje přizjewjenych kandidatow rozsudźene, kelko požadanskich rozmołwow dyrbja hač do wólbow wjesć.
Budyske křižowanišćo Lubijska/Pawlijowa/Fichtowa chce město ...
Krótkopowěsće (19.01.22)
Marko Suchy zaso sobu dźěła
Budyšin. Marko Suchy w Radźe za serbske naležnosće Sakskeje zaso sobu dźěła. To zdźěli předsydka Kathrin Šwjelina wčera na posedźenju braniborskeje Rady za naležnosće Serbow. Na naprašowanje Serbskich Nowin Suchy rozsud wobkrući. Wón je loni w septembrje jako předsyda gremija wotstupił a sobudźěło wotpočować dał. Za to pak njebě žanoho prawniskeho zakłada.
Dalšich dźesać zemrětych
Budyšin. Za Budyski wokrjes podawa RKI dźensa incidencu 182,5, za Zhorjelski 229,5. Tamniši strowotniski zarjad zwěsći wčera 203 dalše natyknjenja z koronawirusom a tři smjertne pady. Třećina nowoinficěrowanych su ze 77 padami dźěći. W Budyskim wokrjesu bě wčera 190 nowych natyknjenych, sydom ludźi je w zwisku z koronu zemrěło. Wosom dalšich pacientow lěkuja w chorowni.
Direktny wid z Ukrainy
Policija (18.01.22)
Z drogami a bjez dowolnosće
Wojerecy. Předwčerawšim na zažnym popołdnju su policisća před Wojerowskim dwórnišćom wodźerja BMWja kontrolowali. 29lětny Albančan njeměješe płaćiwu jězbnu dowolnosć. Tajku ze swojeje domizny njebě wón přepisać dał. Nimo toho zastojnicy zwěsćichu, zo steješe muž pod wliwom drogow. Wotpowědny test reagowaše pozitiwnje na amfetaminy a kokain. Za wobaj deliktaj změje so Albančan nětko zamołwić.
