Ochranow (SN). Statne myto za twarjenje na wsy lěta 2021 je so mjez druhim Ochranowej spožčiło. Ze wšitkich 110 předležacych projektow je jury loni nazymu dobyćerjow ze štyrjoch kategorijow wuzwoliła a dalšich 20 twarskich objektow wuznamjeniła. Pandemije dla je so wuznamjenjenje hakle dźensa popołdnju na žurli cyrkwje Ewangelskeje bratrowskeje wosady Ochranow wotměło. Myto wučinja 5 000 eurow. Tworjenje tak mjenowaneho Co-Working-Space w ně­hdyšej hašerni Ochranowa, kotraž steji pod pomnikoškitom, je fachowcow přeswědčiło. Statne myto bu w kategoriji „přemysłowe wužiwanje“ spožčene. Po wuznamjeju bě składnosć za bjesadu. Na wjesnym přechodźowanju su wobdźělnicy zarjadowanja měli na pjeć stacijach składnosć, sej městačko zbližić.

Statne myto za twarjenje na wsy bu loni prěni króć wupisane. Požadać móža so priwatny twarscy knježa, předewzaća a towarstwa kaž tež komuny, architekća a planowarjow. Jury, w kotrejž skutkuja fachowcy kaž architekća, pomnikoškitarjo, planowarjo a twarscy ekologojo skutkuja njewotwisnje.

Jubilej takrjec nachwatali

Radebeul. Dźiwadźelnik Gojko Mitić je – takrjec z dwulětnym zapozdźenjom – we wobłuku wčera zakónčenych 29. Karla Mayjowych swjedźenskich dnjow swoje wosomdźesaćiny „nachwatał“. Kaž swjedźeń wuhotowacy kulturny zarjad města Radebeul dale zdźěla, zličichu lětsa cyłkownje 25 000 wopytowarjow.

Mjenje amfibijow

Podstupim. We wodźiznach Braniborskeje je ličba amfibijow, kaž su to žaby abo krokawy, w minjenych lětach jasnje woteběrała. Britta Schmidt, nawodnica Přirodneje straže Braniborskeje, rěči wo „pododólnej jězbje“ populaciju amfibijow nastupajo. Za hłownu přičinu toho ma Schmidt přiběracu suchotu jako sćěh změnjeneje klimy. Towarstwo 15 „narodnych přirodnych krajinow“ dohladuje.

Čěski tepjer w Žitawje

Woheń zamiškrić spytali

Budyšin. Njeprošeny wopyt mějachu w nocy na srjedu pola rentoweho zawěsćerja, kiž ma swoje rumnosće na Budyskej Kamjentnej hasy. Tam su so njeznaći namócnje zadobyli a wjacore rumnosće za hódnotnymi wěcami přepytali. Skónčnje zamiškrichu tež hišće woheń. Na zbožo pak so jenož dymješe a płomjenja so dale njerozpřestrěchu. Zapalerjo wzachu laptop, tak mjenowanu dockingowu staciju kaž tež kompjuterowej wobrazowce sobu. Hódnota rubizny wučinja po informacijach policije něhdźe 1 200 eurow.

Towarstwo Perspektiwa Hamor wuspěšne we wubědźowanju „Čiń sobu“

Hamor (AK/SN). Towarstwo Perspektiwa Hamor Hornja Łužica je so z projektom „Přirodowe a regionalne wiki“ wuspěšnje na sakskim wubědźowanju „Čiń sobu“ wobdźěliła. Tole zdźěli předsydka Romy Ganer. „Zaměr je, na wsach wiki znowa wotkryć a wožiwić. Dźe wo prawidłowne tydźenske wiki, nic jenož za sad a zeleninu, ale tež z wosebitymi temami. Stajnje jónu wob měsac móhli so wiki we wjetšich wsach gmejny wotměć, na přikład na Hamorskim torhošću, na Bjerwałdskej nawsy, w Klětnom, we Wochozach před cyrkwju, při Rychwałdskim byrgarskim domje a w Delnim Wujězdźe při cyrkwi“, rjekny předsydka.

Nimo wozrodźenja wikow chce towarstwo tež wuměnu nazhonjenjow mjez wobydlerjemi přisporjeć. Jako temy móhli sej organizatorojo předstajić regionalne rjećazy wikowanja, naslědnosć, pčołarstwo a wurězanje štomow.