Kermuša generacije zwjazuje
Sulšečanscy młodostni nałožk tykancy spěwanja w Róžeńće pěstowali
Róžant (AK/SN). „Wjesele dźensa“, „Dobry wječor, maćerka“, „Palenc, palenc“ a podobnje klinčeše sobotu wječor před domami a statokami w Róžeńće. Sulšečanscy młodostni su kaž kóžde lěto wjesnjanow na předwječoru Delanskeje kermuše ze swojimi spěwami zawjeselili a za to tykanc, pjenjezy abo palenčk dóstali. To bě takrjec znapřećiwjenje za wopyt Róžeńčanskich młodostnych wječor do Kulowskeje kermuše w Sulšecach. „Tři abo štyri generacije so tónle nałožk hižo pěstuje“, powěda Feliks Šěn, kiž bě hač do 2017 předsyda towarstwa Sulšečanskeje młodźiny. Spočatnje su Sulšečenjo jenož před někotrymi statokami spěwali, dźensa činja woni to před wšitkimi. Něhdźe sto domjacnosćow woni tak wopytaja. Darjeny tykanc zjědźa stajnje nazajtra na swojej hłownej zhromadźiznje w Sulšecach. Zbytk bjeru sej sobu domoj, rozłoži Józef Bělk, dźensniši předsyda Sulšečanskeje młodźiny. W towarstwje maja dohromady 50 čłonow.
Dźěći šćěpić je najefektiwnišo
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował (2).
Policija (21.11.22)
Party eskalěrowała
Wojerecy. W namócnym rozestajenju wuwjercholi sobotu wječor party w pincy wjaceswójbneho domu na Wojerowskej Einsteinowej. Jedyn z wobydlerjow so hóršeše, zo młodostni přewótře swjeća. Na to młodej mužej w starobje 17 a 18 lět do 61lětneho wobydlerja bić započeštaj. Při tym jeho mjezwoči zraništaj, tak zo dyrbješe muž do chorownje. Młodostnaj běštaj do toho tójšto alkohola piłoj. Napitaj hišće přiwołanych policistow skřiwdźištaj.
Porěča wo prawicy
Njebudu dźěl rezerwata
Njeswačidło (JK/SN). Mějachu hižo plany a konkretne předstawy wo tym, kak zapołoža nowe pućowanske šćežki a informaciske tafle a kak wožiwja přirodny turizm w gmejnje. Ale nětko je wšo nimo: Njeswačanska gmejna njebudźe definitiwnje dźěl biosferoweho rezerwata Hornjołužiska hola a haty.
Přisłušnosć by gmejnje mnohe lěpšiny a spěchowanja nastupajo přirodoškit a turizm wobradźiło, štož by tež financielne lěpšiny přinjesło. Rozsud susodneje Radworskeje gmejny, zo biosferowemu rezerwatej njepřistupja, so tež na Njeswačidło wuskutkuje. Kupowe rozrisanje, zo njeby Njeswačanska gmejna direktny zwisk z rezerwatom měła, njehodźi so zwoprawdźić a njeje scyła móžne. To wopodstatni a wujasni Njeswačanski wjesnjanosta Gerd Schuster (CDU) na minjenym posedźenju gmejnskeje rady. Njedawne wuradźowanje fachowcow Sakskeho statneho ministerstwa za energiju, škit klimy, wobswět a ratarstwo, nawodnistwa biosferoweho rezerwata a wobdźělenych gmejnow w Stróži skónči so z faktom, zo Radworska gmejna rezerwatej njepřistupi a tež Njeswačanske nadźije so z tym rozbija.
25 000 eurow škody je nastało sobotu popołdnju w Brětni, jako so ...
Na braniborskich pućach maja šoferojo dźensa swoju lubu nuzu. ...
Krótkopowěsće (21.11.22)
Z busom k twórbam Buka
Budyšin. Na busowu ekskursiju po slědach twórbow serbskeho molerja Jana Buka na twarjenjach w regionje je so wčera 20 wosobow z Łužicy a Pólskeje podało. Pozastali běchu mjez druhim w Malešecach, Bukecach, Ralbicach, Sulšecach a Pěskecach. Budyski Serbski muzej a Drježdźanske statne wuměłstwowe zběrki běštej na tule njewšědnu wuprawu přeprosyłoj.
Chcedźa energiju lutować
Drježdźany/Zhorjelc. Ze zahajenjom tepjenskeje periody je zajim sakskich komunow nastupajo móžnosće lutowanja energije dale wulki, Sakska energijowa agentura zdźěli. Na nastork městow Zhorjelc a Reichenbach kaž tež Rudnohórskeho wokrjesa je so spočatk měsaca 80 zastupjerjow ze wšelakich zarjadnistwow online zetkało, zo bychu so wo wotpowědnych alternatiwach wuměnili.
Hodowny štom z Łužiskich horow
Za adwentničku so přizjewić
Chrósćicy. Po dwulětnej přestawce přeprošuje Chróšćanska gmejna wuměnkarki a wuměnkarjow na adwentničku, a to srjedu, 7. decembra, w 15 hodź. do wjacezaměroweje hale Jednota. Organizatoriskich přičin dla proša wo přizjewjenje na gmejnskim zarjadnistwje pod telefonowym čisłom 035796/ 96 210 abo e-mailnje pod adresu .
Dróha zawrjena
Brěznja. W zwisku z twarom noweho kolesowanskeho puća wot Brěznje do Protec nastanje na kromje Brěznje tak mjenowana wobchadna kupa. Tohodla budźe wokrjesna dróha mjez woběmaj wsomaj wot póndźele, 21. nowembra, hač do 9. decembra dospołnje zawrjena. Wokołopuć powjedźe přez Hlinowc.
... biblioteka tež
Budyšin. Techniskich přičin dla budźe Budyska měšćanska biblioteka wot přichodneje póndźele hač do 27. nowembra zawrjena. Online-katalog, onleihe a datowe banki w tym času tohorunja docpějomne njejsu. Wot 28. nowembra steji wšón serwis zaso k dispoziciji.
Adwentne spěwanje
Bydlenski blok wobšěrnje ponowili
Wojerecy (AK/SN). Po poł lěće twarskeho časa je Wojerowska bydlenjotwarska towaršnosć bydlenski blok čo. 69 do 75 na Budyskej aleji dosaněrowała. Dohromady jedna so wo 32 bydlenjow z třomi abo štyrjomi stwami. Mnozy z podružnikow bydla tam hižo dlěje hač 20 lět. Bydlenjotwarska towaršnosć je 525 000 eurow inwestowała a sumu dospołnje ze swójskich srědkow zapłaćiła.
Bydlenski blok na Budyskej aleji nasta w 1960tych lětach. Tuž běchu nětko někotre twarske naprawy trěbne. Na swislach přitwarichu wosom balkonow. Tepjenje přestajichu wot płuna na milinu. „Wobšěrne dźěła wopřijachu dale nowe městno za milinowe časniki w pincy, rozdźělowanske kašćiki a dalše techniske připrawy“, praji Christian Frank z bydlenjotwarskeho předewzaća. „Dale smy tójšto metrow kablow z pincy hač do jednotliwych bydlenjow kładli.“
