17 milionow za digitalizaciju
„Digitalizacija, sylnjenje personala, slědźenje – wažna kročel doprědka“
Drježdźany (SN). Zjawna strowotniska słužba (zss) je nimo stacionarneho a ambulantneho zastaranja třeći stołp strowotnistwa. Tutón spjelnja hłownje stražowace, dočasnje starace a starosćiwe nadawki. Po spěchowanskim připrajenju Zwjazka móže Sakske socialne ministerstwo nětko swoje plany za digitalizaciju zss zwoprawdźić. Zaměr je mjez druhim, procesy zjednorić a digitalnu wuměnu mjez zarjadami spěchować. Při tym chcedźa tež tuchwilu wužiwanu software pruwować a přichodokmanje dale wuwiwać. W přichodnymaj lětomaj steji za to 16,8 milionow eurow k dispoziciji. Z dalšimi spěchowanymi 760 000 eurami budźe so Sakska wobdźělić na třoch dalšich projektach, mjez druhim k polěpšenju mjezsobneho wužiwanja (Interoperabilität) a kraje přesahowaceje wuměny datow kaž tež k temje wuměny datow wo pitnej wodźe zhromadnje z druhimi zwjazkowymi krajemi.
Krótkopowěsće (15.11.22)
Lubijske towarstwo mytowane
Drježdźany. Mjez lawreatami lětušeho Sakskeho integraciskeho myta je towarstwo „Augen auf e. V.“ z Lubija. Ze swojim projektom arabskeho kofejoweho stana wjedźe ludźi wot 2016 w Hornjej Łužicy hromadźe a wolóža zetkawanja mjez domoródnymi a ludźimi z migraciskim pozadkom. Tući planuja a dohladuja kofejowy stan. Myto su wčera w Drježdźanach přepodali.
Pittkunings w podcasće
Choćebus. W 100. wusyłanju Choćebuskeho podcasta „nulldrei55“ minjeny tydźeń běše hudźbnik Bernd Pittkunings z hosćom. Wuměłc swjeći lětsa 40lětny jewišćowy jubilej. Wusyłanje słyšiće pod
Móst nadal njewěsty
Hrádek nad Nisou/Žitawa/Bogatynia. Hižo 18 lět planowany „trójny“ móst přez łužisku Nysu w krajowym třiróžku Čěskeje, Němskeje a Pólskeje je legislatiwnych zadźěwkow a wysokich zawjazkow dla dale njewěsty. Za móžny twar trjebaja tři twarske dowolnosće po předpismach wobdźělenych krajow. Ideju jednorišeho mosćika znajmjeńša mjez Čěskej a Němskej pólska strona wotpokazuje.
Scolari zakónči karjeru
Policija (14.11.22)
W kuchni hašeć dyrbjeli
Budyšin. Woheń w kuchni bydlenja na Budyskej Karla Marxowej dyrbješe wohnjowa wobora wčera popołdnju hašeć. Wobydlerjo běchu bydlenje hižo wopušćili. Na kachlach namakachu kameradojo přismudźene wěcy, mjez druhim poćehnjenje za łožo.
Serbske blido w krajnej stolicy
Z jubilejom pomhali
200. róčnicu Chróšćanskeje wohnjoweje wobory woswjećili
Chrósćicy (SN/MWj). Z tak mjenowanej milu módreje swěcy a wulosowanjom tombole je wčera w Chrósćicach wuklinčał swjedźeń k 200. róčnicy tamnišeje dobrowólneje wohnjoweje wobory. Wot pjatka poskićichu wobornicy w Jednoće a wokoło njeje pisany program za cyłu swójbu a prezentowachu so tak jako wažny wobstatk zjawneho žiwjenja w Chrósćicach a cyłej gmejnje.
Jedyn z wjerškow bě sobotu nawječor, jako wosadny farar Měrćin Deleńk nowe wohnjowoborne awto požohnowa. Cyle nowe wšak wone njeje. Jedna so wo trjebane jězdźidło, kotrež su za swoje zaměry přetwarić dali, rozłoži nawoda Chróšćanskich wobornikow Beno Hojer. Za to je gmejna něhdźe 30 000 eurow inwestowała. Tele nawodniske a transportne jězdźidło maja mjeztym něhdźe lěto. Z 200. jubilejom wobornikow mějachu nětko tež rjanu składnosć, je požohnować dać.
Přeměna maćiznow mylena
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował.
Čłowjek zežiwja so dźeń a njestrowšo a so runočasnje přeco mjenje hiba. Fatalna to kombinacija, wšako stej strowe zežiwjenje a prawidłowny sport wažnej wuměnjeni za dołhe a strowe žiwjenje. Tuž tež njezadźiwa, zo so wosebje w bohatych dźělach swěta kaž w Europje a Sewjernej Americe w běhu zašłych lětdźesatkow chorosće rozpřestrěwaja, kotrež rezultuja z njebalancy přez jědźe a napoje přiwzateje a wot ćěła přetrjebaneje energije. Jedna z tutych, mjeztym ludowych, chorosćow je diabetes.
Gmejnsku radu njepomjeńša
Namjet, Hamorsku gmejnsku radu na 14 městnow wobmjezować, su tamniši radźićeljo na swojim zašłym posedźenju wotpokazali. A tež we wjesnych radach wostanje wšitko při starym.
Hamor (CK/SN). Po tym zo bu Sakski gmejnski porjad změnjeny, mějachu so nětko hłowne wustawki Hamorskeje gmejny z lěta 2015 přiměrić. Hladajo na komunalne wólby 2024 bě zarjad namjetował, ličbu čłonow gmejnskeje rady wot tuchwilu 16 na 14 pomjeńšić, dokelž je dźeń a ćešo, zajimcow za tute čestnohamtske dźěło namakać. W oktobru běchu rozsud wo tym přestorčili. Mjeztym su sej přezjedni, ličbu njezměnjenu pola 16 wostajić.
Nory maja zaso princowski por
Njebjelčicy (AKR/SN). Po třoch lětach přestawki su karnewalisća Serbskopazličanskeho karnewaloweho towarstwa minjeny pjatk zaso ceptar w gmejnje přewzali. Z tym započa so w Njebjelčicach pjaty počas. Prěni króć dóstachu wot noweho wjesnjanosty Andréja Bulanka na gmejnje symboliski kluč zarjada a kasu přepodatej.
Dotal najdlěje amtěrowacy princowski por Marcel II. a Christina II. ze Zubneje skały dyrbješe sobotu wječor z ćežkej wutrobu regentstwo wotedać. Serbskopazličanske karnewalowe towarstwo bě na wólby noweho princa do „Bjesady“ přeprosyło. Na wupředatej žurli dožiwichu wopytowarjo rjany a wotměnjawy dwuhodźinski program. Prezident z krótkej narěču zabawny wječor wotewrě. Rjenje přihladować běše zaso škričkowej gardźe, kotraž ze zapalom zarejwa.
