Krótkopowěsće (11.07.22)
Hilbert dale w zastójnstwje
Drježdźany. Dirk Hilbert wostanje wyši měšćanosta stolicy Sakskeje. Kandidat towarstwa „Njewotwisni wolerjo za Drježdźany“ zdoby sej při wčerawšich rozsudnych wólbach 45,3 proc. hłosow. Prěni raz po lěće 1994 poradźi so tak amtěrowacemu měšćanosće tam znowawuzwolenje. Na druhim resp. třećim městnje slědujetaj Eva Jähnigen (Zeleni) z 38,3 proc. a Maximilian Krah (AfD) 12,2 proc.
Sydom wosobow kandiduje
Choćebuz. Sydom wosobow nastupi k wólbam Choćebuskeho wyšeho měšćanosty 11. septembra. Su to Lars Schieske (AfD), Thomas Bergner (CDU), Tobias Schick (SPD), Sven Benken (Naš Choćebuz), Felix Sicker ( FDP), Lysann Kobbe (Die Basis) a kandidat-jednotliwc Johann Staudinger. Wokrjesny wólbny wuběrk je jich minjeny pjatk wobkrućił. Wyši měšćanosta Holger Kelch (CDU) zastojnstwo ze strowotniskich přičin złoži.
Róčnicu „wowki“ wopominali
Policija (08.07.22)
Trik bohužel fungował
Bukecy. Zaso raz su njeznaći socialne syće za wobšudnistwo znjewužiwali. Tónraz je so starša žona w Bukecach z woporom stała. Z powěsću w messengerowej słužbje 72lětnej nabarbichu, zo ma jeje syn nowe telefonowe čisło a zo trjeba nuznje pjenjezy, zo móhł swój nowy mobilny telefon wužiwać. Wěrjo do toho, zo swojemu synej pomha, Bukečanka 2 400 eurow přepokaza. Hakle pozdźišo wona pytny, zo bu wobšudźena a informowaše policiju. Zastojnicy tuž wospjet nuznje warnuja, pjenjezy na cuze konto přepokazać. Najlěpje je, stajnje wosobinsce z přiwuznymi rěčeć.
Přeća a zaměry zapisane
Kulow (AK/SN). „Kulow w změnje – tradicionelnje, žiwje a naslědnje za přichod“ rěka hesło wuwićoweho koncepta města Kulowa a jědnaće wjesnych dźělow. Měšćanscy radźićeljo su jón na swojim posedźenju předwčerawšim jednohłósnje wobzamknyli. Koncept je strategiski zakład dźěła a směrnica za wuwiće města hač do lěta 2035.
W decembru 2020 a januaru 2021 přewjedźechu wobydlerske naprašowanje, kotrež je 300 pokiwow wunjesło. Tójšto ludźi je w dźěłowych skupinach sobu skutkowało. Tež wobydlerska zhromadźizna w meji měješe dobry wothłós, rjekny měšćanosta Markus Posch (CDU).
Přiwzali su nětko hišće do koncepta dalše wuwiće radnicy kaž tež wutwar hłownych dróhow w Hózku, Brěžkach, Rachlowje, Salowje, Sulšecach a Spalach. Tohorunja přiwzachu namjet, přistajić cityjoweho managera, jeli za to spěchowanske srědki dóstanu. Wotpokazali su porno tomu ideju, wuwić Kulow na „Město Johanna von Šadowica“, štož bě radźićelka Birgit Bensch namjetowała. Runje historiska wosobina Krabata móhła być kaž čerwjena nitka za najwšelakoriše projekty. Z tym pak wona tamnych radźićelow přeswědčić njemóžeše.
Prěnjemu mužej so dźakowali
Poslednje posedźenje gmejnskeje rady z Tomašom Čornakom
Njebjelčicy (JK/SN). Na spočatku posedźenja Njebjelčanskeje gmejnskeje rady wčera wječor dožiwichu radźićeljo a přitomni wobydlerjo gmejny dźakowanja a česćowanja. Zahajił je ceremoniju wjesnjanosta Tomaš Čornak (CDU), kotryž so na swojim poslednim posedźenju jako předsyda gmejnskeje rady wjacorym swěrnym pomocnikam gmejny za čas swojeho skutkowanja podźakowa. Mjez nimi běchu gmejnski planowar Jules Buitel, přistajeny gmejny Sylwio Reinicke, Marcel Bellmann z Budyskeje energijoweje agentury, sekretarka Konstanca Róblowa, zastupowacy wjesnjanosta Tomaš Klar a aktiwist na polu eko-ratarstwa a eko-energije Andreas Kretschmer. Jim so Čornak z wulkim kwěćelom podźakowa, prjedy hač sam njenazhoni počesćenje a dźak ze stron gmejnskich radźićelow. Sylwio Reinicke a Lukaš Deleńk so rozžohnowacemu wjesnjanosće w mjenje gmejnskeje rady za wjele lět spomóžneho dźěła na dobro komuny z wulkim wopismom dźakowaštaj.
Informuja wo powołanjach
Kamjenc. Powołanske wiki wotměja so jutře, sobotu, wot 10 do 16 hodź. kołowokoło towera na Kamjenskim lětanišću. Tam prezentuje so něhdźe 80 regionalnych předewzaćow z rjemjesła, posłužby, industrije a strowotnistwa z wukubłanskimi a dźěłowymi móžnosćemi. Zajimcy móža swoje dospołne požadanske podłožki sobu přinjesć a so jednotliwym firmam direktnje předstajić.
Ekumeniske kemše w radiju
Smochćicy. Ewangelske a katolske kubłanje dorosćenych Sakskeje swjećitej njedźelu, 10. julija, zhromadnje swoje 30lětne wobstaće z ekumeniskimi kemšemi w Smochčanskim kubłanišću swj. Bena. Radijowy sćelak MDR Kultur kemše wot 10 hodź. originalnje wusyła. Wo hudźbne wobrubjenje starataj so Lipšćanski ansambl amarcord a za křidłom hudźbnik Jan Brězan. Wot 14 hodź. přeprošuja w Smochćicach na swójbne popołdnjo z pisanym programom na jewišću. Zastup je darmotny.
Porěči wo projekće
Pod hesłom „Zetkanje oldtimerow“ su tele dny w Kamjenskej ...
Móst dźěłow dla dospołnje zawru
Chorowni bórze dwě jednotce
Kamjenc/Zhorjelc (SN/at). Změna nošerja za dotalnej chorowni maltezow w Kamjencu a Zhorjelcu je wotzamknjena, wobě wčera zdźělištej. Towaršnosć za strowotu a zastaranje Sakska (GGS) je nošerstwo stejnišćow loni w nowembrje přewzała. Zo byštej domaj hospodarsce naslědnje derje nastajiłoj, ma kóžda z njeju jednotu tworić, dźěłatej pak dale hromadźe. Kamjenske stejnišćo změje mjeno Chorownja swj. Jana tzwr, Zhorjelske Chorownja swj. Carolusa tzwr.
Tale samostatnosć zwyši atraktiwitu za inwesticije, rěka w nowinskej zdźělence. Chorowni „budźetej jako kliniskej stołpaj nošer za mnohe medicinske poskitki a tak zastaranje ludźi w našim regionje kaž tež nadregionalnje zawěsćić“, wuzběhny Lutz Möller. Wón skutkuje jako jednaćel wobeju domow a nawoda Kamjenskeho stejnišća. Daniela Kleeberg wostanje nawodnica Zhorjelskeho stejnišća. Wukonowy poskitk wobeju chorownjow w połnym wobjimje wobchowaja.
Ručež přisłušne zarjada přihłosuja, rozdźělenje chorownjow do dweju samostatneju stejnišćow zwoprawdźa. Z tym w Kamjencu a Zhorjelcu prawje bórze liča.
Krótkopowěsće (08.07.22)
Isa Bryccyna prezidentka
Budyšin. Serbska grafikarka, ilustratorka, molerka a wuhotowarka w Ludowym nakładnistwje Domowina Isa Bryccyna je nowa prezidentka Rotary kluba Budyšin. Wona je wčera na jedne lěto zastojnstwo wot Bernharda Johna přewzała. Jako prezidentka chce so tež serbskim temam wěnować. Dotal je so wona wjacore lěta w předsydstwje kluba wo prawidłowne přednoški a referentow starała.
Dešć jeno zlochka pomhał
Lubin/Luboraz. W kónčinje lěsneho wohenja w Luborazskej holi wulkozasadźenje wohnjowych woborow, policije a zwjazkoweje wobory traje. „Dešć je jeno zlochka pomhał“, rjekny wčera rěčnica wokrjesa Dubja-Błóta Kathrin Veh. Region wjace spadkow trjeba. Póndźelu wudyrjeny lěsny woheń po přestrjeni 86 hektarow so dale njewupřestrěwa. Zaměr bě, woheń wčera zhašeć.
Nohajcy z Havelom njebudu
