Ćežke wjedrowe wuměnjenja mějachu minjeny kónc tydźenja při ...
Wjerchej Pücklerej k česći
Puć do iluzionistiskeho swěta Oskarshausen w Freitalu bě so za ...
Krótkopowěsće (20.10.22)
Wo Serbach so informowali
Budyšin. Wobdźělnicy seminara na temu „Němsko-pólsko-čěska pomjezna kónčina. Mjeńšiny w dialogu w so měnjacej Europje“ Němsko-Europskeho kubłanskeho skutka z Hessenskeje rozmołwjachu so wčera ze społnomócnjenej za serbske naležnosće Budyskeho wokrjesa Halenu Jancynej. Seminar wotměwaja w Zhorjelcu, wčera informowachu so wo Serbach. Dale je skupina Serbski muzej wopytała a bě z hosćom Domowiny.
Klimowy projekt we Wochozach
Wochozy. We wobłuku noweho klimoweho projekta chcedźa we Wochožanskim parku błudźenkow mjez druhim wjace rostlin zwosadźeć, kotrež horcotu lěpje znjesu, přetrjebu wody pomjeńšić a samo solarnu připrawu instalować. To zmóžnja spěchowanje zwjazkoweho ministerstwa za bydlenje, měšćanske wuwiće a twarstwo we wysokosći 730 000 eurow za dobu třoch lět.
„Gigafactory“ VW w Čěskej?
Na dobro pčołkow a pódy
Delanski pčołar a ratarjo za jedyn postronk ćahnyli
Konjecy (SN/MWj). Z klimowej změnu, kotruž tuchwilu wšudźe dožiwjamy, maja so pčołarjo mócnje bědźić. To je Konječanski pčołar Jan Šołta minjeny čas husćišo nazhonił. „Jedyn z wulkich problemow je, zo lědma hišće mjerznje. Normalne by było, zo pčołki někak srjedź septembra k měrej přińdu a žiwja so potom wot cokoroweje měšeńcy, kotruž jim pčołar da“, nazhonity delanski pčołar rozłoži.
Poskićuja zjawne zarjadowanja
Hórnikecy (KD/SN). Kubłanišćo a zetkanišćo Hórnikečanski transferny rum domizna organizuje wotnětka zarjadowanja za zjawnosć. Tole zdźěli jeho nawoda Frank Hirche. Prěnje tajke zaběraše so njedawno z prašenjom, kak ludźo indiwidualnje, kolektiwnje a kulturnje domiznu namakaja a kotre nazhonjenja wo tym su rozdźělne generacije wot časa po Druhej swětowej wójnje hač do přitomnosće činili. Wo tym wědomostnicy před publikumom diskutowachu.
Literarny wědomostnik a sobudźěłaćer transferneho ruma dr. Jörg Bernig rjekny, zo buchu we Łužicy ludowe skupiny tam a sem suwane, kotrež dyrbjachu zhromadne žiwe być a to derje zdokonjachu. Stawiznar dr. Peter Becher z Mnichowa dopominaše na to, kak dyrbjachu ludźo po Druhej swětowej wójnje z nowymi susodami žiwi być, bjez toho zo bychu jich rěč rěčeli.
Policija (19.10.22)
Drogi wotedał
Budyšin. Po wšěm zdaću swoje swědomje wolóžić chcyše w nocy na póndźelu 25lětny muž w Budyšinje. Krótko po połnocy klinkaše wón na policajskim rewěrje a rjekny, zo wonka na třěše policajskeho awta drogi leža. Kaž so wukopa, bě wón je sam tam połožił, hromadźe z trašawku, kapsnej lampu a móšnju. Muž policistam zdźěli, zo ma nimo 40 gramow crystala z třěchi awta doma dalše drogi a pólske praskotaki. Přepytawši jeho bydlenje a zahrodowy domčk namakachu zastojnicy wjetše mnóstwo amfetaminow, konopa a marihuany kaž tež kokain, crystal, trašawku a wulku hromadu pyrotechniki. 25lětneho na to nachwilnje zajachu. Při drogowym tesće zwěsćichu, zo bě wón wšelake družiny wopojnych jědow brał. Přećiwo młodemu Budyšanej přepytuja nětko podhlada wikowanja z drogami a přeńdźenja přećiwo zakonju wo brónjach a rozbuchadłach dla.
Basnje w šěsć rěčach
Budyšin. Basnje Milana Hrabala w šěsć rěčach steja w srjedźišću knižneho předstajenja z awtorom a přełožerku Róžu Domašcynej jutře, štwórtk, w 19 hodź. w Budyskej Smolerjec kniharni. Cyklus Milana Hrabala „Cestou bolesti a víry“ bu do delnjoserbšćiny, hornjoserbšćiny, němčiny, jendźelšćiny a do pólšćiny přełoženy. Knižne wudaće je Spěchowanske towarstwo za serbsku rěč w cyrkwi přewzało. Zarjadowanje je zhromadny projekt Smolerjec kniharnje a Zwjazka serbskich wuměłcow. Wšitcy zajimcy su wutrobnje witani
Křižowanišćo zawrjene
Budyšin. Wot dźensnišeho je Budyske křižowanišćo Lubijska/Pawlijowa/Fichtowa dospołnje zawrjene. Za čas dotalneho přetwara tam zwěsćichu, zo wjacore kable a roły hinak leža hač wočakowane. Zo móhli wšitko trěbne přepołožić a na wjacorych městnach runočasnje dźěłać, je dospołnjene zawrjenje trěbne, měšćanske zarjadnistwo zdźěli. Po wšěm zdaću w decembru budźe křižowanišćo zaso wočinjene.
Tróšku Bayerskeje w Delanach
Ćežki porod hospodarskeho plana
Normalnje w městach a gmejnach swój hospodarski plan w nalěću schwala. W Njeswačidle je to hač do wčerawšeho trało – přiwšěm njejsu wulke inwesticije tak a tak móžne.
Njeswačidło (JK/SN). Lěto je nimale nimo a skónčnje je so Njeswačanska gmejna we woprawdźitym zmysle słowa předrěła a na swojim wčerawšim posedźenju z wjetšinu hłosow wustawki dwójneho hospodarskeho plana za 2022/23 wobzamknyła. Jako přihot mějachu radźićeljo nadawk, sej doma dobrych sto stron wopřijacy dokument spřistupnić. Runje tak móžachu wčera wobzamknjenja kmani wo naćisku wuradźować.
