Dale a wjace ludźi při taflach
Ličba potrěbnych w Němskej tak wulka kaž hišće nihdy
Berlin (dpa/SN). Wjace hač milion ludźi w Němskej zastaruje so po naprašowanju tež na taflach ze žiwidłami. Němski institut za hospodarske slědźenje (DIW) ličbu srjedu na nimale 1,1 milion wobliči a poćahowaše so na naprašowanje z lěta 2020. Sam pak wuchadźa tuchwilu z jasnje wyšich ličbow. „Połoženje je pola wšitkich taflow ekstremnje napjate“, praji rěčnica třěšneho zwjazka taflow Němskeje. Pozadk je wójna w Ukrainje a stupace płaćizny. „Přińdźe tež wjace ludźi, kotřiž maja dźěło.“
Po cyłej zwjazkowej republice něhdźe 960 taflow potrěbnym žiwidła rozdźěleja, kotrež njemóža hižo předawać. Třěšny zwjazk rěči mjeztym wo jasnje wjace hač dwěmaj milionomaj kupčow a kupcow, wjace hač hdy prjedy. DIW je so wobdźělnikow swojeje naprašowanskeje serije Socio-oekonomiski panel 2020 prašał, hač bě z nich loni něchtó pola tafle. Přińdźe tak na nimale 1,1 milion ludźi, kotřiž wot poskitkow profitowachu.
Wićaz projekt „LAB“ faworizuje
Budyšin/Konjecy (SN/at). Rozsud we wubědźowanju „Wěda twori perspektiwy za region“ wo dwěmaj slědźenskimaj wulkocentromaj chcyše zwjazkowa ministerka za kubłanje a slědźenje Bettina Stark-Watzinger (FDP) z ministerskimaj prezidentomaj Sakskeje, a Saksko-Anhaltskeje Michaelom Kretschmerom, Rainerom Haseloffom (wobaj CDU) dźensa připołdnjo wozjewić.
Budyski krajny rada Udo Wićaz (CDU) je do toho za Łužiski brunicowy rewěr projekt „Lausitz Art of Building – LAB“ faworizował. „Štóž změnu strukturow chutnje bjerje, dyrbi za LAB hłosować“, cituja Wićaza w nowinskej informaciji krajnoradneho zarjada. Krajny rada z toho wuchadźa, zo projekt LAB, kotryž měri so na za klimu neutralne a resursy lutowace twarjenje, spěšniše zasydlenja zmóžnja a zdobom wutworjenju dźěłowych městnow w produkciji polěkuje.
Konkurencny projekt za Łužicu je Němski centrum za astrofyziku (NCA) zapodał. Team NCA bě podpěraćelow dźensa připołdnju do Konječanskeho towarstwoweho domu přeprosył, zo bychu tam wozjewjenje rozsuda zhromadnje sćěhowali.
Chcedźa wuskutki na město rozjimać
Nimoměry wjele wobydlerjow chcyše na wčerawšim posedźenju Budyskeje měšćanskeje rady swoju naležnosć přednjesć. Radźićeljo wobzamknychu, nastupajo wuskutkowanje energijoweje krizy na měšćansku towaršnosć wutworić dźěłowy kruh.
Krótkopowěsće (29.09.22)
„Němska wuchowa zežiwidła“
Žitawa. Pod tutym hesłom přewjeduja wot dźensnišeho po cyłej Němskej tydźeń přećiwo brojenju zežiwidłow. Něhdźe jědnaće milionow tonow žiwidłow so wob lěto zniči. Tak budźe na přikład njedźelu, 2. oktobra, w Žitawje „šniplowa disko“, při kotrejž na tamnišej domchowance prezentowanu zeleninu přetrjebaja.
Wodarnju do słužby stajili
Čorna Pumpa. Rozšěrjeny industrijowy wodočisćenski zawod kaž tež wodarnja wot wčerawšeho w Čornej Pumpje dźěłatej. W ramiku strukturneje změny bu za to 70 milionow eurow inwestowanych. Sakski statny minister za regionalne wuwiće Thomas Schmidt (CDU) je wažnosć planowanja kónca wudobywanja brunicy wuzběhnył a so při tym na předwidźane zakónčenje 2038 měrił.
Direktor parka wotwołany
Z mnohimi nadawkami skutkowanje zahajił
Pančicy-Kukow (JK/SN). Nowy předsyda zarjadniskeho zwjazka „Při Klóšterskej wodźe“, Stefan Anders je so po swójskich słowach derje do swojeho noweho zastojnstwa zadźěłał. W prěnimaj měsacomaj w nowej funkciji je so z bytostnymi nadawkami zarjadnistwa zwjazka kaž tež sobudźěłaćerjow a jich dźěłowymi wobłukami zeznajomił. Wón ma poměr mjez sobudźěłaćerjemi za jara dobry, zhromadne dźěło w zarjedźe kaž tež z gmejnami zwjazka derje běži. Scyła čini jemu dźěło wulke wjeselo a wón je rady zdokonja, dokelž je jara wotměnjawe a mnohostronske.
Wčerawše posedźenje zarjadniskeho zwjazka „Při Klóšterskej wodźe“ bě městopředsyda Marko Kliman zahajił a trěbne přisahanje noweho předsydy přewjedł. Tón je po złoženju hamtskeho sluba nawod posedźenja přewzał.
Stefan Anders informowaše radźićelow mjez druhim wo wuslědku wokolneho wobzamknjenja (Umlaufbeschluss) nastupajo wuhotowanje běrowow w domje zarjadnistwa. Wotpowědny nadawk přepodachu po wupisanju třo firmam.
Wulke wjeselo na motorskich
Do Smolerjec kniharnje
Policija (28.09.22)
Po njezbožu cyle jednorje dale jěł
Delni Wujězd. Na zwjazkowej dróze B 156, mjez wotbóčku Delni Wujězd/Bjerwałd je 58lětny šofer awta marki Opel póndźelu připołdnju njezbožo zawinił. Wón bě před nim jěduce nakładne kaž tež awto marki Ford w dołhej křiwicy přesćahnył a wodźidłomaj do boka zajěł. Potom jědźeše bjez zastaća dale do směra na Hamor. Šofer Forda bě sej značku spomjatkował a ju policiji sposrědkował. Ta je na to zwěsćiła, zo bě šofer Opela zranjeny a zo bě alkohol pił.
W znamjenju dwurěčnosće
Na Njepilic statoku w Rownom su zašłu njedźelu mócnje swjećili. Na dworowym swjedźenju bě składnosć, při hudźbje, dobrej jědźi a serbskej kulturje rjanu nazymu witać.
Rowno (JoS/SN). „Su-li žně w bróžni, potom směmy swjećić“, rjekny předsyda spěchowanskeho towarstwa „Njepilic statok Rowno z.t.“, Manfred Nikel, „a to najebać to, zo nimamy hišće domchowanku“. Spěchowanske towarstwo zhladuje na dobru lětnu bilancu. Wjeršk wšitkich zarjadowanjow běše mjeztym 23. dworowy swjedźeń. Kotoł z jejkowej poliwku, běrnjace placki, domjacy połćik, blachi tykanca a kurjene pstruhi – wšitko je było spěšnje zjědźene. Najbóle požadany pak běše chlěb z drjewjaneje pjecy. Na to njeběštaj Tzschamarjec pjekarskaj mištraj přihotowanaj, byrnjež pěc dwójce napjelniłoj. Samo Manfred Nikel z hłowu wiješe: „To njejsmy hišće ženje dožiwili“.
Dźeń rěkow zajimował
Prěni króć su projekt w Budyšinje při Sprjewi wotměli
Budyšin (CS/SN). Won z rjadowniskeje rumnosće a do přirody! To bě hesło, kotrež je šulerjow 8. a 9. lětnikow Serbskeje wyšeje šule a Melanchthonoweho gymnazija Budyšin njedawno na wosebity dźeń wabiło. Tući wužichu akciski dźeń rěkow a podachu so k Sprjewi, hdźež mějachu při Starej wodarni wšelake stacije zmištrować. Wone zmóžnichu šulerjam, sej mnohe nowe dopóznaća na temy wodźizna-ekologija, wobswětoškit a domjacy skót zdobyć.
„Dźeń rěkow“ je projekt sakskeho statneho ministerstwa za energiju, klimu, wobswět a ratarstwo kaž tež załožby za přirodu a wobswět. Do přewjedźenja projekta zapřijeći su krajne zarjadnistwo rěčnych zawěrow, krajny zarjad za wobswět, ratarstwo a geologiju kaž tež wobhospodarjenska towaršnosć za wobswět a ratarstwo. Dźeń rěkow je so mjeztym šesty króć, dotal po wjetšich městach, přewjedł, prěni króć pak w Budyšinje.
