Maja dosć terminow za změnu
Budyšin (SN/MWj). Dźakowano přidatneho personala maja we wotrjedźe za jězbnu dowolnosć Budyskeho krajnoradneho zarjada nětko dosć terminow, zo móža sej wobydlerjo swoju jězbnu dowolnosć na nowy dokument zaměnić. Mjeztym zo mějachu tam spočatk lěta hišće dołhe čakanske lisćiny, kaž w nowinskej zdźělence rěka, je nětko dosć swobodnych terminow.
Aktualnje dyrbja wosoby, narodźene w lětach wot 1953 do 1958, swoju staru jězbnu dowolnosć hač do 19. julija 2022 na nowu zaměnić. Trěbna próstwa hodźi so mjeztym tež z póštu zapodać. Wotpowědny formular nadeńdu zajimcy na internetnej stronje wokrjesa. Wažne je, zo su podłožki dospołne, hewak je wobdźěłać njemóža. Nowu dowolnosć w formje šekoweje karty móžeš zapłaćić, hdyž sej ju na krajnoradnym zarjedźe wotewzaš. Za to ma so termin dojednać.
Twarnišću skónčnje božemje prajili
Pančicy-Kukow (SN/MWj). Mjeztym zo je so w Serbskej zakładnej „Šuli Ćišinskeho“ w minjenych měsacach z twarskimi dźěłaćerjemi a rjemjeslnikami jenož tak mjerwiło, knježeše minjeny pjatk popołdnju čiłe žiwjenje šulerjow kaž tež jich staršich a dźědow a wowkow. Po dwěmaj lětomaj přestawki móžeše kubłanišćo skónčnje zaso wulki šulski swjedźeń přewjesć.
Kaž nawodnica Jadwiga Čižankowa při witanju rjekny, wěnowachu wot spočatka šulskeho lěta planowany swjedźeń 30lětnemu wobstaću kubłanišća jako zakładna šula. Nimo toho so nětko symbolisce z twarnišćom rozžohnowachu, kotrež bě chowancow a wučerski kolegij wjele měsacow přewodźał a tež chětro poćežował. Tež rěčnik staršiskeje přirady Jan Ješka so šuli, gmejnje, staršim a njeličomnym pomocnikam dźakowaše, zo su to zhromadnje zmištrowali.
Nowosć na kóncu Božeje mšě
Ze serbskich katolskich wosadow procesiony do Róžanta putnikowali
Róžant (SN/MWj). Po tym zo je putnikowanje katolskich Serbow korony dla před lětomaj dospołnje wupadnyło a so loni bjez procesionow wotměć dyrbjało, bě wčera takrjec zaso wšitko po zwučenym wašnju. Ze wšitkich serbskich katolskich wosadow putnikowachu wěriwi k hnadownemu městnu. Družki njesechu postawu swjateje Marije sobu. Mnozy dojědźechu sej z awtom do Róžanta, druzy kolesowachu a dalši wotstajichu jězdźidło we wokolnych lěsach a zbytk puća hač na putnisku łuku nóžkowachu.
Wuhotowała je lětuše putnikowanje Chróšćanska wosada. Hłowny celebrant mjez wjacorymi serbskimi duchownymi bě farar Měrćin Deleńk. Wo hudźbne wobrubjenje postara so Chróšćanski cyrkwinski chór pod nawodom Michała Cyža, kěrluše wěriwych přewodźeli su Chróšćanscy dujerjo pod nawodom Jurja Jakubaša. Kaž stajnje je Serbski rozhłós putniske kemše originalnje wusyłał. Moderěrował je je farar Gerat Wornar.
Krótkopowěsće (07.06.22)
Ramnow zastupuje wokrjes
Budyšin. Ramnow je dobyćer 11. wokrjesneho wubědźowanja „Naša wjes ma přichod“ a hornjołužiski zwjazk gmejnow přichodnje na krajnej runinje zastupuje. Kaž w dźensnišej zdźělence krajnoradneho zarjada Budyšin dale rěka, přizna wěcywustojna komisija Oberlichtenauwej druhe a Koćinje trěće městno. Nosaćicy/Jama (Nostitz/Grube) a Čerwjene Noslicy (Rothnaußlitz) dźěla sej štwórte městno.
Njewšědny wupad miliny
Praha. Něhdźe třećina čěskeje stolicy bě přez masiwny wupad miliny zańdźeny štwórtk rano potrjechena. Tole nastupaše zdobom syći metro a tramwajkow. Dźesatki ludźi su w liftach tčacy wostali. „Blackout“ tajkeho rozměra njedožiwi Praha hižo 20 lět – wot katastrofalnych přepławjenjow w lěće 2002.
Za tezu „žiwjenja ze swětnišća“
Poswjeća nowe třělnišćo
Po dwěmaj lětomaj přestawki změja noweho třělcowskeho krala
Kulow (SiR/SN). Wulki wokomik budźe jutře, sobotu, popołdnju za Kulowske třělcowske towarstwo swjateho Bosćana. Jeho čłonojo smědźa so nad nowym třělnišćom za powětrowki wjeselić. Město bě towarstwu staru a njewužiwanu trafochěžku přewostajiło. Wjace hač 350 hodźin su čłonojo towarstwa dźěłali a ju na třělnišćo přetwarili. Financowali su projekt z darami a ze swójskimi srědkami.
Hižo srjedź meje je fachowc wšitke trěbne wěstotne předpisy přepruwował a žane njedostatki njezwěsćił. Tuž móža jutře w 14 hodź. nowe třělnišćo poswjećić, z čimž lětuši třělcowski swjedźeń oficialnje zahaja. Hodźinu pozdźišo započnje so tak mjenowane kralowske třělenje na swjedźenišću. Runočasnje chcedźa Rolanda Brücknera jako třělcowskeho krala lěta 2019 rozžohnować. Dwójce wšak dyrbješe Kulowski třělcowski swjedźeń wupadnyć.
Ma hišće tójšto planow
Z gmejnu Ralbicy-Róžant je mjeztym 25 lět zwjazane mjeno Hubertusa Ryćerja. Tak dołho skutkuje 62lětny mjeztym hižo jako wjesnjanosta. Do toho bě tule funkciju w tehdy samostatnej Róžeńčanskej gmejnje wukonjał. K wólbam wjesnjanosty 12. junija wón nětko znowa kandiduje.
Najwjetši dźěl družin wišnjow dyrbi hišće chwilu zrawić, ...
Krótkopowěsće (03.06.22)
Drohoćinku „wróćo zdobyli“
Budyšin. Dźakowano spěchowanju Swobodneho stata Sakskeje a Kulturneje załožby Sakskeje kaž tež darom priwatnikow zamó Muzej Budyšin awkciju dobyć a wuznamny kapsny časnik „Tourbillon čo. 41 000“ kupić. Drohoćinka, zhotowjena w zawodźe Lange & Söhne, bě něhdy we wobsydstwje Otta Weiganga a je so po Druhej swětowej wójnje zhubiła. Přichodnje hodźi so „mišterska twórba“ w trajnej wustajeńcy muzeja wobdźiwać.
50 projektow wuzwolenych
Drježdźany. Sakske statne ministerstwo za kulturu a turizm je cyłkownje 50 namjetam wubědźowanja „Sachsen geht weiter“ spěchowanje po 5 000 eurach přizwoliło. Hač do oktobra maja zapodawacy, mjez druhim Wojerowska Kulturna fabrika a łužiski festiwal „Přińć a woteńć“, chwile, swoje projekty dale wuwiwać.
„Čorna scena“ so schadźuje
Policija (02.06.22)
Njezbožo wosy dla
Łuty. Wosy w swojim awće dla so 54lětny wodźer Opela předwčerawšim we Łutach prawje na wobchad koncentrować njemóžeše. Insekt bě so na mjezwočo muža sydnyło. Jako chcyše wón jeho wućěrić, zajědźe přez wobchadnu kupu. Na wobchadnym znamjenju a awće nasta dohromady 16 000 eurow škody.
W šuli swjeća
Pančicy-Kukow. Na šulski swjedźeń Serbskeje zakładneje „Šule Ćišinskeho“ su wšitcy zajimcy jutře, pjatk, najwutrobnišo do Pančic-Kukowa přeprošeni. W 15 hodź. započnje so pisany program na dworje kubłanišća. Přizamknje so zabawa za dźěći. Wo ćělne derjeměće je postarane. Nimo toho wobsteji móžnosć sej ponowjene rumnosće šule wobhladać. Šulske wjednistwo nadźija so prawje bohateho wopyta.
Narodninarjej Sławu zaspěwali
Chrósćicy. Škotowarka a 24 škotowarjow je so předwčerawšim na turněrje serbskich seniorow w Chróšćanskim Krawčikec hosćencu wobdźěliło. Spočatnje su škotowarjej, sobuzałožerjej a wjelelětnemu nawodźe turněra Janej Macce k jeho narodninam trójnu „Sławu“ zaspěwali. Z 3 046 dypkami wopokaza so Wolfgang Kühn jako najlěpši škotowar dnja před Křesćanom Weclichom (2 589) a Herbertom Krečmarjom (2 134). Cyłkownje nawjeduje dale Herbert Krečmar před Wolfgangom Kühnom a Siegfriedom Rawu. Přichodny turněr wotměje so 28. junija w Nowosličanskim kulturnym domje.
