Na spěwny wječor
Pančicy-Kukow. We wobłuku jubilejneho lěta Kocora a Zejlerja wotměje so sobotu 2. julija, spěwny wječor z programom „Zejler w nowym fraku“ skupiny Wólbernosće w 19.30 hodź. na Kaulfürstec statoku w Pančicach-Kukowje (Róžeńčanska 32).
Woswjeća jubilej
Smječkecy. Na swoje 25lětne wobstaće zhladuje pjatk a sobotu, 1. a 2. julija, Smječkečanski młodźinski klub. Tónle jubilej chcedźa z wulkej party woswjećić a tak z rejwanišćomaj a barami perfektny start do lětnjeho časa skićeć. Na woběmaj dnjomaj čakaja na wopytowarjow najwšelakoriše hudźbne stile. Pjatk płaći zastup pjeć eurow, sobotu při wječornej kasy 14. Za zarjadowanje płaći nastupajo korona prawidło 3G.
Policija (28.06.22)
Tři delikty naraz
Budyšin. Nimale wšitko wopak činił je 43lětny wodźer nakładneho awta, kotrehož zadźeržachu policisća předwčerawšim připołdnju na awtodróze A 4 mjez Budyšinom a Słonej Boršću. Wón bě z Lkw-jom njedźelu po puću, hačrunjež za to dowolnosć njeměł. Nimo toho běchu spinadła jězdźidła skóncowane. A skónčnje so wukopa, zo měješe wodźer 1,94 promilow alkohola w kreji.
Časowy swědk zaso steji
Posledni měznik něhdyšeje prusko-sakskeje hranicy postajeny
Komorow (JK/SN). Dobre 300 metrow zwonka Komorowa pola Rakec, blisko Wojerowskeho Čorneho Halštrowa zhromadźi so minjenu sobotu dopołdnja nahladna ličba ludźi, zo by była ze swědkom samo na sebi historiskeho wokomika. Tam bu mjenujcy posledni měznik podłu něhdyšeje prusko-sakskeje hranicy wotkryty, kotrehož postajenje bě Wienski kongres 1815 wobzamknył.
Woda a dróhi ludźi zaběraja
Wobstajnje přewjeduje Łazowski wjesnjanosta Thomas Leberecht rěčne hodźiny, a to nic jenož we Łazu samym, ale tež w jednotliwych wsach. Minjene dny bě wón w Lipinach.
Lipiny (AK/SN). W zwisku ze strukturnej změnu ma tež mała wjes Lipiny (Lippen) na kromje Łazowskeje gmejny nowy wodowód dóstać. Tole podšmórny wjesnjanosta Thomas Leberecht (CDU) minjeny štwórtk we wobydlerskej rěčnej hodźinje. Wón nadźija so wotpowědnych srědkow Zwjazka. Dotal wjedźe starši wodowód z Bórka do Lipin. Dalši přińdźe z Mortkowa. Nětko chcedźa nowy twarić, a to wot statneje dróhi S 108.
Tema pitneje wody ludźi w 55 wobydlerjow ličacej wsy hižo dlěje zaběra. „Po wohenju před třomi lětami buchu filtry ponowjene. Mamy pak nastajnosći mało ćišća a často mazanu wodu“, powěda wobydlerka Elke Kieschnick. Wona je 1990 z mandźelskim swójbny dom w Lipinach twariła a by sej lěpše zastaranje z wodu přała. Jeje pokiwy a starosće wjesnjanosta sobu wza, wšako wě, zo je to za wobydlerjow eksistencielny problem.
Po třoch lětach přestawki nadróžneho twarnišća a korony dla ...
Hižo pjaty króć „Zadarmo a wonka“ w Budyšinje
Budyšin (SN/bn). Pod hesłom „Zadarmo a wonka“ wuhotuje Dźěćacy a młodźinski centrum Budyskeje ewangelskeje wosady swj. Pětra TiK – „Zetkanišćo w pincy“ stajnje kónc junija festiwal pod hołym njebjom. Lětsa swjećachu na dworje wosadnicy prěni mały jubilej „MiKtival“ mjenowaneho zarjadowanja, kotrež so pjaty króć wotmě. Hižo wot zažneho popołdnja wužichu předewšěm młode swójby wobšěrny poskitk zabawy. Tak dachu so dźěći a někotryžkuli dorosćeny pisanje našminkować, druzy wuspytachu so w eksperimentalnym laborje w lejtowanju. Za dorostowych wuměłcow bě grafiti-sćěna spřihotowana. Formacija Francircus zahori hosći z artistiku a figurowymi powětrowymi balonkami. Modowy label LABA prezentowaše fairnje a naslědnje w Hornjej Łužicy produkowane drasty tež ze serbskimi motiwami a popisami.
Krótkopowěsće (28.06.22)
Kretschmer so z Fialu zetkał
Praha. Krótko do zahajenja čěskeho prezidentstwa rady EU je so sakski ministerski prezident Michael Kretschmer (CDU) wčera w Praze z čěskim premierom Petrom Fialu zetkał. Wobaj staj mjez druhim wo železniskej čarje za wysoke spěšnosće mjez Drježdźanami a Prahu a wo energijowej wotwisnosći wot Ruskeje rěčałoj. Politikarjej chwaleštaj dale zhromadne dźěło we wuchowanskich słužbach.
Literarne myto Ričelej
Drježdźany. Lukaš Ričel je z lawreatom lětušeho Literarneho myta Sakskeho statneho ministerstwa za wědomosć a wuměłstwo. Z Worklec pochadźacy awtor bu za jeho dźiwadłowu hru „Widerstand“ kaž tež za romanaj „Z pjašću do swěta bić“ a „Raumfahrer“ wuznamjenjeny. Jury chwali jeho „bjezposrědny a čerstwy“ stil a „kritiske rozestajenje z młódšimi němskimi stawiznami“.
Sudniski wusud bn
Hospodarski plan delanskeje gmejny za lětsa steji
Ralbicy (JK/SN). Po tym zo bě zastupowacy wjesnjanosta René Wjacławk (SWZ Delany) dotalnemu a po njedawnych wólbach w zastojnstwje wopodstatnjenemu wjesnjanosće Hubertusej Ryćerjej (njewotwisny kandidat) gratulował, započa gmejnska rada Ralbicy-Róžant na zašłym posedźenju swój poměrnje wobšěrny dnjowy porjad wotdźěłać. To zmištrowachu radźićeljo zaměrnje a bjez wjetšich diskusijow.
Policija (27.06.22)
Pokradnjeny Lkw namakali
Wojerecy. Běłe nakładne awto typa MAN su njeznaći w nocy na minjeny štwórtk z twarnišća při Čornym Halštrowje na Spalowskej dróze we Wojerecach pokradnyli. Jězdźidło bě 40 000 eurow hódne. Něšto hodźin pozdźišo wuhlada wobydler Lkw z Lubijskim čisłom we Łutach a informowaše policiju. Z jězdźidła pobrachowaše jeničce nastroj za registrowanje awtodróhoweho popłatka. Po zwěsćenju slědow Lkw wobsedźerjej wróćichu.
Muzeje z kombinowanym lisćikom
Tři wulke muzeje města Wojerecy ćahnu wotnětka za jedyn postronk a so tak nadźijeja, wjace wopytowarjow přiwabić, zo bychu wuskutki koronoweje přestawki přewinyli.
Wojerecy (AK/SN). Za Wojerowski měšćanski muzej, za kompjuterowy muzej Konrada Zuseho a za Hórnikečansku energijowu fabriku płaći wotnětka kombinowany zastupny lisćik. Za jedyn muzej płaći wopytowar połny zastup. Za wopyt tamneju dóstanje wón stajnje euro rabata. Kombi-lisćik njeje časowje wobmjezowany. „Tak chcemy zhromadne dźěło podšmórnyć a so mjez sobu do syće splesć“, nawodnica kompjuteroweho muzeja Andrea Prittmann tele dny při předstajenju wosebiteho lisćika rozłoži.
