Scholz nowu twornju wopytał

Carny Gózd. Zwjazkowy kancler Olaf Scholz (SPD) je planowany wutwar produkcije miliny w Němskej potwjerdźił. „Chcemy produkciju miliny hač do kónca lětdźesatka na 800 terawattowych hodźin wutwarić“ , wón wčera na wopyće noweje twornje za baterijowe komponenty chemijoweho koncerna BASF na stejnišću Carny Gózd wuzběhny. Předewzaće so zaměrnje na energijowej změnje wobdźěli.

Termin za Europeadu 2024 jasny

Berlin. Po europeadźe je do europeady. Časowy ramik za přichodne koparske europske mišterstwa narodnych mjeńšinow je postajeny. Wot 28. junija do 7. julija 2024 so w němsko-danskej pomjeznej kónčinje pod hesłom ,,Mjez morjomaj“ zaso do bula kopa. Serbske mustwo so znowa wobdźěli.

Snadny přirost bjezdźěłnosće

Pjany po puću

Židźino. Zastojnicy Wojerowskeho policajskeho rewěra su wčera w rańšich hodźinach wosobowe awto typa Toyota w Židźinom kontrolowali. Při tym zwěsćichu alkoholowu wóń we wudychu 35lětneho šofera. Přewjedźeny test wujewi hódnotu 0,58 promilow, štož wjedźeše k přizjewjenju ze stron zastojnikow.

Do małotransportera so zadobyli

Budyšin. Chrobli paduši su so w času mjez minjenej sobotu a předwčerawšim připołdnju na dotal njeznate wašnje do transportera Mercedes Benz na Budyskim Třělnišću dóstali. Wozydło bě tam zawěsćene wotstajene. Mějićel njeje so wo nastatej wěcnej škodźe wuprajił. Skućićeljo su z wozydła kanister, napinanski pas, přisłušk za wozydło a dwanatk blešow piwa sobu wzali.

Wodźer motorskeho zranjeny

Sepicy. Njezbožo z wosobowym awtom typa BMW a motorskim je so njedźelu dopołdnja w Sepicach stało. Při zražce je wodźer motorskeho kontrolu zhubił a so walił. Při tym so zlochka zrani.

Nowoslicy. Štóž chce sej 11. nowembra měrćinsku husycu zesłodźeć dać, móže to na dnju Swjateho Měrćina wot 18 hodź. w Nowoslicach pola Dinarjec. Na bifeju poskićeja tam husycu z neplacymi kulkami, čerwjenym kaž tež pupkatym kałom. Na wosobu płaći jědź 25 eurow. Skazanki přijimuja Dinarjecy hač do 4. nowembra pod telefonowym čisłom 0172 357 09 08 abo přez mejlku pod .

Staršisko-dźěćacy kruh

Smjerdźaca. Serbske šulske towarstwo poskići sportowy kurs za nanow a maćerje ze swojimi dźěćimi, kotrež hišće žłobik njewopytuja. Poskitk wotměje so w Kubłanskim srjedźišću LIPA w Smjerdźečanskim kulturnym domje stajnje póndźelu wot 9.30 do 11 hodź. Prěni termin je 7. nowembra. Nawod změje hojenska pedagogowka a sportowa terapeutka Michaela Rabowa. Přizjewjenja přijimuja pod abo pod telefonowym čisłom 0172 7811959. Popłatk na pjeć razow wučinja 37,50 eurow.

Dźeń kina so nawróći

Budyšin. Ze sloganom „Na zbožo je wutora“ poskića Budyske kino zaso kóždu wutoru kinowy dźeń. Na tutym dnju płaći ­zastup za kóždy film a kóžde městno 6,50 eurow za dorosćenych a 5 eurow za dźěći (3D-přiražka płaći přidatnje).

Dwě městni běštej we wjesnej radźe Miłoraza swobodnej

Trjebin (CK/SN). Na přidatne wólby běchu wobydlerjo Trjebinskeho wjesneho dźěla Miłoraza tydźenja namołwjeni. Přičina tutych bě, zo běše wjesna rada jenož hišće z jednej wosobu wobsadźena, město we wustawkach předpisanych třoch. Tamnaj sobustawaj staj do Noweho Miłoraza přećahnyłoj, čehoždla njemóžetaj hižo sobustawaj Miłoraskeje wjesneje rady być. Za wólby požadał so do toho nichtó njebě, tak zo móžachu wólbo­kmani mjena kandidatow napisać. „To hišće měli njejsmy“, rjekny nawodnica hłowneho zarjada Marion Mudrina. Wurjadny pad zaleži na přesydlenju Miłoraza, kotrež traje hač do lěta 2024.