Popłatki wostanu stabilne
Běrow zaměroweho zwjazka za wopłóčki we Wudworju dale dźěła
Porchow (AK/SN). Zaměrowy zwjazk za wopłóčki Při Klóšterskej wodźe (AZV) přirjaduje so 2023 Kamjenskemu zaměrowemu zwjazkej za pitnu wodu. Wšitke trěbne dźěła wobstara potom Kamjenska EWAG. Zjawnoprawniske zrěčenje mjez AZV a zaměrowym zwjazkom za pitnu wodu ma podrobnosće přirjadowanja rjadować. Wjetšina zhromadźizny AZV je na swojim wčerawšim posedźenju w Porchowje přirjadowanju kaž tež zrěčenju přihłosowała. Zastupjerjo Porchowskeje, Chróšćanskeje, Pančansko-Kukowskeje a Worklečanskeje gmejny běchu za to, zastupjerjo Ralbic-Róžanta hłosowachu přećiwo tomu.
„Jako AZV wostanjemy dale samostatni. To woznamjenja, zo dale samostatnje swój hospodarski plan zdźěłamy a wobzamknjemy“, podšmórny předsyda AZV a Porchowski wjesnjanosta Sebastian Hein. Přiwšěm je po jeho słowach zrěčenje trěbne, dokelž EWAG přichodnje wšitke trěbne dźěła wobstara.
Po takće dujerskeje kapały Horjany su wopytowarjo běrnjaceho bala ...
W zahrodce plahuje eksotiske płody
Twarske dźěła lětsa njezahaja
Wopłóčkowy zaměrowy zwjazk „Mała Sprjewja“ chce při wotkryću Margarećineje hěty we Wulkej Dubrawje klětu najprjedy dźělny projekt zwoprawdźić. To je trěbne, dokelž njeje so jedne wočakowanje spjelniło.
Krótkopowěsće (09.11.22)
„Eksil a wuznam wjacerěčnosće“
Drježdźany. Dalmatiska basnica Marica Bodrožić je předwčerawšim z prěnim čitanjom w centralnej bibliotece Drježdźanskeho kulturneho palasta Chamisso-docenturu poetiki Sakskeje akademije wuměłstwow 2022 nastupiła. Jeje ćežišća, na kotrež chce z dalšimaj čitanjomaj stajnje póndźelu nawjazać, běchu „domizna, eksil a wuznam wjacerěčnosće“ .
Najwjetši slědźerski projekt
Lipsk. Zhromadna wědomostna konferenca Zwjazka a zwjazkowych krajow je wčera „Slědźerski portal BACH“ Sakskeje akademije wědomosćow přizwoliła. Z tym móže dotal najwjetši projekt k wuslědźenju wuznamneje hudźbneje dynastije w januarje 2023 startować. Projekt ma 25 lět běžeć a je dźěl akademijoweho programa, kotryž je aktualnje najwjetši duchowno- a kulturnowědny dołhodobny slědźerski program Němskeje.
Morawske wědomje žiwe
Policija (08.11.22)
Njezbožo na kromje swjedźenja
Droždźij. Při wobchadnym njezbožu w Droždźiju (Drehsa) pola Wósporka bu předwčerawšim něhdźe w 19 hodź. 49lětny muž snadnje zranjeny. Běły transporter bě do njeho zajěł a na to wotjěł, bjez toho zo by so šofer wo zranjeneho starał. Runje samsny dźeń su w Droždźiju běrnjacy swjedźeń swjećili. Policija tuž móžnych swědkow prosy so přizjewić, jeli su něšto wobkedźbowali.
Pytaja sobudźěłaćerja
Chrósćicy. Chróšćanska gmejna wupisa městno gmejnskeho dźěłaćerja abo gmejnskeje dźěłaćerki za komunalny twarski dwór a komunalne objekty gmejny. Městno ma so tak spěšnje kaž móžno wobsadźić. Dźěło je wobmjezowane na dwě lěće z opciju kruteho přistajenja na połny dźěłowy čas. Nadrobne wupisanje dźěłoweho městna nadeńdu zajimcy na internetnej stronje gmejny pod zjawnymi wozjewjenjemi. Pisomne požadanja z trěbnymi podłožkami maja so gmejnje hač do 12. nowembra zapodać.
Wo měsačku we wuměłstwje
Zajim móhł wjetši być
Za nowotwarsku ležownosć w Serbskich Pazlicach pytaja hišće zajimcow
Njebjelčicy (JK/SN). Hižo dlěši čas planuje a přihotuje Njebjelčanska gmejna w Serbskich Pazlicach na ležownosći „Za cyrkwinskim pućom“ wjacore stejnišća za jednoswójbne domy. Loni zahajene planowanje naby lětsa z prěnimi kalkulacijemi k ležownostnym płaćiznam jasniše kontury. Po tym zo bě jasne, zo nastanu w Serbskich Pazlicach sydom ležownosćow za nowe domy, je hłowny planowar, inženjerski běrow CommunalConcept Peter Linke z Drježdźan, lětsa prěnje kalkulacije k přihotej, wotkrywanju a z tym tež k płaćiznam za ležownosće wozjewił. Jedna so při tym wo hrubu kalkulaciju, štož njeje zawěsće hišće doskónčna suma. Tuta budźe jasna, hdyž budu ležownosće wotkryte a nowym mějićelam k wobtwarjenju přepodate.
Nakupowanska nóc přiwabiła
Wuspěšnu dožiwjensku nóc – znajmjeńša hladajo na mnóstwo wopytowarjow – registrowachu wikowarjo minjenu sobotu w Budyskim nutřkownym měsće, hdźež witachu na 20. nakupowansku nóc „Romantica“.
Budyšin (CS/SN). Nakupowanska nóc Romantica, kotraž steješe pod hesłom „Shopping-safari“, přiwabi minjenu sobotu tysacy wopytowarjow do Budyšina. Sčasami bě na hasach a naměstach telko wopytowarjow, zo bě lědma móžne so dale pohibować. Při předawanišćach za napoje a kulinariske speciality nastachu dołhe čakanske rynki. W poskitku mějachu nimo dalšich napojow samo hižo dohodowne swětłe a čerwjene horce wino. Něhdźe 160 wobdźělenych wikowarjow so prócowaše, swojim hosćom něšto wosebite skićić, kaž na přikład črijowy dom Mutscher na Karla Marxowej, kiž bě swój wobchod jako dźungl wuhotował. Wša dekoracija pak njemóžeše zakrywać, zo su na Karla Marxowej mnohe wobchody njewužiwane a prózdne.
