Hórku w měsće saněruja
Radźićeljo so schadźuja
Njebjelčicy. Přichodne zjawne posedźenje Njebjelčanskeje gmejnskeje rady wotměje so jutře, štwórtk, w 19.30 hodź. w tamnišim gmejnskim zarjadnistwje. Na dnjowym porjedźe steji mjez druhim informacija wo nowych wotnajenskich zrěčenjach za regeneratiwne ratarstwo. Nimo wjacorych ležownostnych prašenjow póńdźe tež wo termin klětušich wólbow wjesnjanosty a wo nakup drasty a wuhotowanja za wohnjowu woboru.
Mjenje wopytowarjow
Wojerecy. Prawidło 3G korony dla Wojerowskemu zwěrjencej tuchwilu tójšto mjenje wopytowarjow wobradźa. Hačrunjež su zastupny lisćik wot dźewjeć na pjeć eurow na wosobu potuńšili, je ličba wopytowarjow w nowembru porno samsnemu měsacej lěta 2019 wo 35 procentow woteběrała. Tropowy dom kaž tež hród a měšćanski muzej dyrbjachu dospołnje zawrěć. Přiwšěm dyrbja zwěrjata dale zastarać. Pytaja tuž zajimcow, kotřiž móhli coowej z kmótřistwom pomhać.
Policija (15.12.21)
Awtowe čisło sej spomjatkował
Smječkecy. Z městna njezboža ćeknył je předwčerawšim dopołdnja 74lětny wodźer Mercedesa na puću wot Wudworja do Smječkec. Tam wón před nim jěducy BMW přesćahny. Jako so zaso na prawym boku zarjadowa, so Mercedes tamneho awta šmórny, jědźeše pak dale. Wodźer BMWja sej awtowe čisło spomjatkowaše a zawoła policiju. Tak změje so 74lětny nětko za swoje zadźerženje zamołwić. Na Mercedesu nasta něhdźe 200 eurow škody, na tamnym jězdźidle wučinja škoda něhdźe 1 700 eurow.
Škotowarjo sezonu dočasnje skónčili
Budyšin (SN/MWj). Naprawow koronapandemije dla su so organizatorojo škotowych turněrow serbskich seniorow rozsudźili, zo lětušu sezonu dočasnje skónča. Kaž hłowny organizator Měrćin Nowak z Lubija zdźěli, móžachu lětsa jeničce dźesać turněrow přewjesć. Na nje witachu nimo jeničkeje žony dohromady 35 škotowarjow a wosom nowačkow. Nětko so nadźijeja, zo budu so w lěće 2022 zaso prawidłownje zetkawać a potom na prěnim turněrje lětušich dobyćerjow mytować móc. Jako najlěpši kartyplacar wopokaza so lětsa Křesćan Weclich z 20 275 dypkami. Dalše prědnje městna wobsadźichu Wolfgang Kühn (18 822), Gerat Šmelink (18 235), Hermann Woko (17 341), Jurij Hanto (16 956), Manfred Rohark (16 771) a Pawoł Šołta (15 652).
Čestna jehła za čestnohamtskosć
Wojerecy (KD/SN). Kóžde druhe lěto spožča město Wojerecy Čestnu jehłu Günthera Petersa wobydlerjam, kotřiž často hižo lětdźesatki čestnohamtsce na dobro wobydlerstwa skutkuja. Njedawno je Uwe Vogel wot wyšeho měšćanosty Torstena Rubana-Zeha (SPD) w starej radnicy tajke wuznamjenjenje přijimał, dokelž je wón wot lěta 1993 čestnohamtski sudnik na Sakskim krajnym socialnym sudnistwje w Kamjenicy.
Měsačnje jězdźi Uwe Vogel do Kamjenicy, hdźež so na prawniskich wusudach za zbrašenych ludźi z cyłeje Sakskeje wobdźěla, kaž 67lětny rozprawja. Při tym móže so jednać wo płaćenje wotškódnjenja abo wo wěste zapiski do wupokaza za ćežkozbrašenych. Zapoda-li něchtó přećiwo wusudam socialnych sudnistwow w Drježdźanach, Kamjenicy a Lipsku znapřećiwjenje, potom krajne socialne sudnistwo jako druha instanca tajki wusud přepruwuje, Vogel rozłožuje.
Energiju ze słónca dobywać
Pola Horow ma 33 hektarow wulki solarny park nastać
Hory (AK/SN). Sewjerowuchodnje přemysłownišća pola Horow blisko Wojerec ma hač do kónca lěta 2023 něhdźe 33 hektarow wulki solarny park nastać. Blisko bywšeje sušernje ma so wón při Ptačečanskej dróze hač k tak mjenowanej južnej hrjebi wupřestrěć. Za tónle projekt budźe twarski plan nastajeny, kaž su radźićeljo gmejny Halštrowska Hola na swojim wčerawšim posedźenju z jednym napřećiwnym hłosom wobzamknyli. „Płonina so za to derje hodźi“, rjekny wjesnjanosta Dietmar Koark (CDU).
Po dlěšich přihotach maja w Budyskej Allendowej štwórći nětko ...
Přistupja zwjazkej za pitnu wodu
Zaměrowy zwjazk za wopłóčki při Klóšterskej wodźe bu 1992 załoženy a by potajkim klětu na 30. róčnicu wobstaća zhladować móhł. By – přetož tule róčnicu drje zwjazk pjeć komunow w dotalnej formje hižo njedožiwi.
Chrósćicy (SN/MWj). Cyle njespektakularnje a bjez najmjeńšeje diskusije je wjetšina zhromadźizny zaměroweho zwjazka za wopłóčki Při Klóšterskej wodźe wčera w Chróšćanskej „Jednoće“ wobzamknyła, zo přistupja Kamjenskemu zaměrowemu zwjazkej za pitnu wodu. Wotpowědnje wobzamknjenjam minjenych tydźeń w jednotliwych gmejnskich radach su gmejny Pančicy-Kukow, Chrósćicy, Worklecy a Porchow za přistup hłosowali, gmejna Ralbicy-Róžant bě přećiwo tomu.
Za přichod wokrjesneje hudźbneje šule
Wokrjesna hudźbna šula Budyšin ma w twarjenju na Budyskej Tzschirnerowej skónčnje swój domicil z naročnymi wuwučowanskimi wuměnjenjemi dóstać. Za přetwar a přitwar je wokrjesny sejmik nětko přidatne srědki 611 100 eurow schwalił.
Budyšin (SN/at). Za planowane projekty přidatne pjenjezy wudawać, to bě někotrym wokrjesnym radźićelam ćerń we wóčku. Tak prašeše so Frank Sühnel (Zeleni), hač njehodźa so hinaše rumnosće namakać. Jemu so „mentalita hrabnjenčka“ njelubi. A dr. Frank Hannawald (AfD) pominaše sej, zwyšenych kóštow dla „staw w pokładni zwěsćić“. Jeho frakcija nochce tajke zwyšenja po krokach zhonić.
Krótkopowěsće (15.12.21)
Ličba zemrětych přiběrała
Budyšin. Dźensa leži incidenca we woběmaj hornjołužiskimaj wokrjesomaj pod tysac, ze spadowacej tendencu. Roberta Kochowy institut je za Budyski wokrjes 851,3 podał, za Zhorjelski 645. W Budyskim wokrjesu su wčera wo 410 natyknjenjach z koronawirusom informowali, dźesać pacientow je zemrěło. 308 infekcijow a dźewjeć smjertnych padow mjenowachu we wokrjesu Zhorjelc.
Wjac serbskich zarjadowanjow
Berlin. Wjac serbskich zarjadowanjow chcedźa w Berlinskim zastupnistwje Sakskeje přewjesć. Na to dojednaštaj so wčera předsyda Domowiny Dawid Statnik a społnomócnjeny Zwjazka za Saksku Conrad Clemens. Dale stej łužiskej zapósłanči SPD Sylvia Lehmann a Kathrin Michel wčera přilubiłoj, jako přećelce serbskeho ludu w zwjazkowym sejmje skutkować. Rěčał je Statnik tež ze zapósłancom SSW Stefanom Seidlerom.
Spěchuja kulturne herbstwo
