Krótkopowěsće (24.03.22)
Polěpšenje dale njespóznajomne
Budyšin/Zhorjelc. Krajnoradny zarjad wokrjesa Budyšin informowaše wčera wo dalšich 1 757 zwěsćenych infekcijach z koronawirusom. W Zhorjelskim wokrjesu je so 1 091 wosobow z nim natyknyło, štyrjo schorjeni su zemrěli. Incidency stej so po Roberta Kochowym instituće we woběmaj wokrjesomaj zwyšiłoj a wučinjatej dźensa za Budyšin 1 957,7 a za Zhorjelc 1 400,1.
Na dobro klimy a móšnjow
Wojerecy. Wobchadny zwjazk Hornje Łobjo (VVO) a Wobchadna towaršnosć Wojerecy (VGH) poskićatej wot 1. apryla nowy dnjowy tiket. Jězdźenka płaći 3,50 eurow a dowola jězby z busom a železnicu po měsće kaž tež we wokolinje hač do Čorneho Chołmca. Zaměr je, wjace ludźi za zjawny wosobowy bliskowobchad zahorić. Wukopa-li so modelowy projekt jako wuspěšny, chce VVO přichodnje po-dobny poskitk za cyły region zarjadować.
Ličba skawtow dale a wjetša
Dwurěčnosć w Malešanskej gmejnje widźomna
Na wšěch 24 wsach maja němsko-serbske taflički a pućniki
Matthias Seidel (CDU), wot lěta 2008 wjesnjanosta gmejny Malešecy, k wólbam wjesnjanosty 12. junija znowa nastupi. Jeho bilanca bywšeje legislatiwneje periody je zdźeržliwje optimistiska. Někotre projekty nastupajo bě so Seidel lóšeho zwoprawdźenja nadźijał, ale běrokratiske zadźěwki jeho chětro poćežowachu. To płaći mjez druhim za twar kolesowarskeje šćežki, kotraž měła komunu lěpje wokrjesnemu městu přiwjazać. Bohužel pak, wjesnjanosta wobžaruje, to tak spěšnje njeńdźe, kaž bě sej to myslił.
Na dwórnišću sej knihi wupožčić
Poskićeja plahowarjam zaso sakske kokoše
Stróža (SN/MWj). Před lětomaj je zarjadnistwo biosferoweho rezerwata Hornjołužiska hola a haty započało, saksku kokoš jako staru družinu domjaceho skotu zjawnosći zaso bóle zbližeć. Wot toho časa su tójšto tajkich kokošow plahowarjam posrědkowali. Zo bychu tónle fundament za přichod sakskeje kokoše dale skrućili, slěduje lětsa dalša namołwa zajimcam, kaž zamołwita za zjawnostne dźěło w biosferowym rezerwaće Christina Schmidt informuje.
Štóž rady robustnu kokoš za swójske zastaranje z jejemi a mjasom pyta, móže so w zarjadnistwje biosferoweho rezerwata e-mailnje pod abo pod telefonowym čisłom 035932/ 36 515 přizjewić. Přizjewjenja přijimuja hač do 31. meje.
Skupinki skotu, wobstejace z honača a dweju do třoch kokošow, abo tajke, kotrež njehodźa so plahować, wotedadźa w lěću a nazymje za snadny pjenjez na dworje zarjadnistwa biosferoweho rezerwata w Stróži pola Hućiny. Wuběrać móža zajimcy mjez čornymi, běłymi, žołtymi a barbnje měšanymi skoćatami.
Policija (23.03.22)
Njezbožo zawinił a dale jěł
Budyšin. Dotal njeznaty wodźer awta je předwčerawšim připołdnju w Budyšinje wobchadne njezbožo zawinił, dokelž njebě předjězbu dźěsća wobkedźbował. Wokoło 11.30 hodź. bě muž na Paulijowej po puću. Na křižowanišću Liebknechtowa wón do 13lětneho kolesowarja zajědźe. Hólc so zrani a jeho koleso so wobškodźi. Muž pak jědźeše dale a so wo hólca njestaraše. Nětko pyta policija swědkow, kotřiž běchu njezbožo wobkedźbowali (tel: 03591/ 35 60).
Radźićeljo wuradźuja
Ralbicy. Přichodne posedźenje gmejnskeje rady Ralbicy-Róžant jutře, štwórtk, we 18.30 hodź. w Ralbičanskej sportowni. Mjez druhim zaběraja so radźićeljo z móžnym wutwarom Róžeńčanskeho puća w Ralbicach a z nowymi rostlinami za Ralbičanske sportnišćo.
Wotrow. Tohorunja jutře, ale w 19 hodź. zetka so gmejnska rada Pančic-Kukowa na Wotrowskej starej šuli. Nimo wjacorych twarskich naležnosćow dyrbja radźićeljo mjez druhim rozsudźić, hač budu traktor z nakładowakom wotnajeć.
Pytaja tołmačerjow
Budyšin. Wohnjowoborny zwjazk Budyskeho wokrjesa pyta pomocnikow, kotřiž móhli z ukrainšćiny do němčiny a nawopak přełožować. Na te wašnje chcedźa ukrainskim ćěkancam pomhać, wobstaranja wšědneho dnja w jim cuzym kraju z cuzej rěču zmištrować. Štóž wotpowědne rěčne znajomosće ma a k tomu mobilny telefon wobsedźi, njech přizjewi so z mejlku na .
Tež serbsku kulturu dožiwić
W gmejnje Halštrowska Hola ma syć pućowanskich šćežkow nastać
Hory (AK/SN). Mnohostronsku syć pućowanskich šćežkow chce gmejna Halštrowska Hola na swojim teritoriju wutworić. Zmóžnić ma to 100 000 eurow, kotrež su we wobłuku idejoweho wubědźowanja simul+ Swobodneho stata Sakskeje dobyli. „Ze swojej ideju pućowanskich šćežkow smy jedna z 25 komunow, kotrež su 100 000 eurow dobyli“, rozłoži twarska nawodnica Claudia Simon na zašłym posedźenju gmejnskich radźićelow. Dźakowano dobytym pjenjezam móža projekt w přichodnymaj lětomaj zwoprawdźić. Za to wutworja dźěłowu skupinu, kotraž ma wšitko přihotować.
Nowy dźěl 600lětnych stawiznow
Bywši Holešowski hosćenc ma noweho wobsedźerja. Na njeho čaka wjele dźěła, ale tež dom z charakterom, w kotrymž je wjele wosebitosćow, kajkež druhdźe nimaš.
Holešow (UM/SN). Njewšědny dwuposchodowy dom so při zwjazkowej dróze B 96 w Holešowje pozběhuje. Hižo nimo jěducy spóznaje, zo ma twarjenje swoje najlěpše časy za sobu. Abo tola nic? Přetož we wjace hač 600lětnych stawiznach domu započina so nětko nowy wotrězk. „Nam je so poradźiło kupca namakać“, praji Jörg Zimmer z Drježdźanskeje imobilijoweje firmy Wertstein.
Dom je při dróze z Budyšina do Wojerec lětstotki dołho wažnu funkciju spjelnjał. Tu móžachu wikowarjo z konjacymi zapřahami pozastać a přenocować. „Z pólnych kamjenjow murjowany delni poschod drje pochadźa ze 14. lětstotka a je snano hišće starši hač Holešow samy“, je Jörg Zimmer rešeršował. Horni tykowany dźěl porno tomu je hakle we 18. lětstotku nastał.
