Policija (01.09.22)
Při płoće wisajo wostała
Dźěwin. Njekedźbliwosće dla bu předwčerawšim kolesowarka w Dźěwinje snadnje zranjena. 37lětna bě na chódniku Wjesneje dróhi do směra na Brězowku po puću, jako při płoće ležownosće wisajo wosta. Na to žona padny a so zrani. Jeje koleso suny so na jězdnju, hdźež runje w tym wokomiku traktor přijědźe a přez koleso zajědźe. Škoda wučinja něhdźe 600 eurow.
Łastojčku pokradnyli
Bambruch. Mopedy z časa NDR su po wšěm zdaću dale jara požadane, bohužel tež mjez paduchami. Tak je něchtó w rańšich hodźinach minjeneje wutory Łastojčku w Bambruchu pokradnył. Antracitowy Simson bě po informacijach policije něhdźe 3 000 eurow hódny. Policija nětko za paduchom pyta.
Podłu Klóšterskeje wody pućowali
Z historiskimi twaršćiznami
Pjeć prózdninskich domčkow blisko Krabatoweho młyna nastanje
Čorny Chołmc (AK/SN). Wuchodnje dožiwjenskeho dwora Krabatowy młyn w Čornym Chołmcu nastanje pjeć prózdninskich chěžow za swójby, kotrež hodźa so cyłe lěto wužiwać. 1,3 milion eurow ma projekt płaćić. Inwestor je Wojerowska bydlenska towaršnosć. W jeje nadawku Wobau Kulowska twarska towaršnosć připrawu z bjezbarjernym přistupom twari. Krabatowy młyn Čorny Chołmc ptzwr budźe jeje najenk a wobhospodar. Towaršnosć je z 85 000 eurami na projekće wobdźělena. Nowy domicil wotewrić chcedźa klětu 4. decembra, na dnju swjateje Borbory. „To je zhromadny projekt. Z nim reagujemy na stupace wopytowarske ličby. Prózdninske domčki njebudu jenož we hłownej, ale runje tak w pódlanskej sezonje wobohaćenje“, podšmórny Tobias Ćižik, jednaćel Krabatoweho młyna Čorny Chołmc ptzwr tydźenja při předstajenju projekta we Wojerecach.
Připad jemu wunošny radźićel był
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (18)
W Nuknicy, wjesce z něhdźe 50 wobydlerjemi, narodźi so 1972 agilny Radworski pčołar Frank Wowčer. Za čas dźěćatstwa w dźensa nimale hišće ryzy serbskej wsy zboka rěčki Satkule je so jemu zašćěpiła kruta zwjazanosć z přirodu a k wšemu, štož je škita hódne, zo by so Boža stwórba we wšej swojej rjanosći a bohatosći zachowała. W staršiskim domje a w šuli w Chrósćicach, kotruž je 1989 z 10. lětnikom wuspěšnje zakónčił, bu kubłany k wědomemu serbskemu nastajenju. Husto přebywaše jako šuler pola swojeho dźěda Jurja Weclicha, kiž bě swój čas hižo nazhonity pčołar.
Za wotewrjenosć demonstrowali
Dobry srědk přećiwo emocionalnym diskusijam
Budyšin (CS/SN). Posedźenje Budyskeje měšćanskeje rady je wčera prěni raz nowowuzwoleny wyši měšćanosta Karsten Vogt (CDU) nawjedował. Jako so wón na swoje městno w prezidiju na žurli měšćanskeje rady posydny, wón rjekny: „Na stólcu sedźeć je to jedne, jón wupjelnić něšto druhe.“ Kak so wjelelětny šulski nawoda swojim nadawkam wěnuje, lubi nadźiju, zo so jemu to poradźi.
Prjedy pak hač so wón dnjowemu porjadej wěnowaše, su noweho wyšeho měšćanostu spřisahali a jemu 750 gramow ćežki hamtski rjećaz přepodali. Tónle nadawk přewza po słužbnych lětach najstarši měšćanski radźićel Heinrich Schleppers (CDU). Zo z Karstenom Vogtom w radnicy nowy wětřik zaćehnje, je hižo ryzy wonkownje na tym spóznać, zo bu parkowanska taflička za wyšeho měšćanostu při radnicy wotstronjena.
Krótkopowěsće (01.09.22)
Inowaciske myto dóstali
Choćebuz. Za wuwiće a konstrukciju wosebiteho 3D-ćišćaka je předewzaće MCR Engineering Łužyca, kotrež přisłuša koncernej Łužiska energija a milinarnje (LEAG), inowaciske myto wobłuka metal Braniborskeje dóstało. Wčera su wuznamjenjenje na Hrodźe Neuhardenberg přepodali. Z inowaciskim mytom hódnoći Braniborska kreatiwne ideje a produkty.
Graffiti sej wotnjesć móc
Praha. Festiwal twórcow graffiti „Off the Wall“ zarjadowachu minjeny kónc tydźenja w čěskej stolicy. 160 metrow dołha barokowa murja w historiskej štwórći Malá Strana bu wot sprayerow pomolowana. Tež pasanća móžachu ideje přidać. Škoda pak žana njenasta, dokelž bě murja do toho z wosebitymi zejmowacymi platami nakładźena. Tute chcedźa w septembrje přesadźować.
Serbowka w Americe
Policija (31.08.22)
Diesel wotklumpali
Słona Boršć. Prjedy hač so ćěriwa wot jutřišeho při tankownjach drje zaso podróša, su so njeznaći minjeny kónc tydźenja w Słonej Boršći na cyle hinaše wašnje z nimi zastarali. Woni podachu so na teren firmy při Słonoboršćanskej dróze a wotklumpachu z bagra, nakładowaka a dumpera dohromady něhdźe tysac litrow diesela. Kaž Zhorjelska policajska direkcija zdźěli, nasta potrjechenej firmje škoda něhdźe 2 100 eurow.
Padustwo zwrěšćiło
Wojerecy. Ze zadnjeho dwora na Wojerowskej Liebknechtowej chcychu njeznaći minjene dny elektroroler pokradnyć, štož pak so poradźiło njeje. Kaž dyrbješe wobsedźer předwčerawšim zwěsćić, bě zamk jězdźidła manipulowany, tak zo njehodźeše so wone hižo z klučom zaswěćić. Škoda wučinja 300 eurow.
Na filmowu premjeru
Pančicy-Kukow. Na filmowy wječor přeprošuja župa „Michał Hórnik“, młodźinski klub Pančicy-Kukow a tamniši kružk młodych swójbow farskeje wikarije zajutřišim, pjatk, wot 19 hodź. na teren něhdyšeho hosćenca w Pančicach-Kukowje napřećo klóštrej. Tam pokazaja jako premjeru dźěćacy film „Mała wjera“ w serbskej synchronizaciji, štož bě zhromadny projekt Rěčneho centruma WITAJ, Michała Cyža a Załožby za serbski lud. Tomu so serbske hudźbne wideja přizamknu. W 21.30 hodź. steji film „The Healer – Glaube an das Wunder in dir“ na programje. Wo ćělne derjeměće budźe postarane.
Škotowarjo karty placali
Prócuja so wo dorost za šach
Budyšin (WL/SN). Na mjeztym hižo tradicionalnym šachowym turněrje we wobłuku dnja Hornjeje Łužicy šachoweho kluba Jednota Budyšin wobdźěli so minjenu sobotu w Budyskej Krónje 24 žonow, muži, dźěći a młodostnych. Wotpowědujo historiskemu zwjazkej šesćiměstow mjez Budyšinom, Zhorjelcom, Lubanjom, Lubijom, Kamjencom a Žitawu su tež lětsa zaso po Šwicarskim systemje w šěsć kołach šach hrali. Při tym kiwachu najlěpšim hrajerjam atraktiwne myta, mjenujcy stilizowane šachowe postawy krala, kralowny, konika a wěže. Přepodał je myta kaž hižo minjene lěta znaty Budyski šachowy hrajer Dieter Gärtner.
K dispoziciji stajene bu wšitko wot noweho Budyskeho wyšeho měšćanosty Karstena Vogta a Budyskeho zapósłanca Sakskeho krajneho sejma Marka Šimana (wobaj CDU), kotryž turněr hižo wot prěnjeje hodźiny sem přewodźa.
