Policija (22.02.22)
Morchej zajědojćena była?
Budyšin. Při latarnjach a štomach podłu Sprjewje w Budyskim Humboldtowym haju su swědcy předwčerawšim, njedźelu, po wšěm zdaću zajědojćene kuski morcheje namakali, wšitko zezběrali a policiju informowali. Kriminalisća nětko přepytuja, hač z namakankow někajki strach za zwěrinu wuchadźa.
Nochcedźa pěstowarnju wohrozyć
Ralbicy (SN/MWj). Po Worklecach a Chrósćicach su nětko tež w gmejnje Ralbicy-Róžant rozsudźili, zo ma tamniši wjesnjanosta dale kaž dotal čestnohamtsce skutkować. Na zašłym posedźenju gmejnskeje rady bě šěsć radźićelow za čestnohamtskeho gmejnskeho šefa, dwaj byštaj sej radšo hłownohamtskeho přeli, jedyn radźićel so hłosa wzda.
Składnostnje dnja wodźerja hosći su předwčerawšim na Wojerowskim ...
Link dalši tydźeń přistupny
Budyšin (SN/at). Nimale 270 Serbowkow a Serbow je so na naprašowanju paralelnje k interviewam za Łužiski monitor 2022 wobdźěliło. Kaž Viktoria Klemm z Lipšćanskeje Towaršnosće za analyzu wikow a strategiju MAS zwr našemu wječornikej zdźěli, bě pak jeničce 70 naprašnikow dospołnje wupjelnjenych. 197 wobdźělnicow a wobdźělnikow njeje z přičin, kotrež njejsu slědźerjam znate, hač do poslednjeho łopjena přetrało.
Prěnjotnje měješe katalog prašenjow hač do předwčerawšeje njedźele w syći přistupny być. Termin pak bu wo tydźeń hač do 27. februara podlěšeny, knjeni Klemm informuje. Zamołwići Łužiskeho monitora chcedźa tak wšěch tych nastorčić, so snadź hišće raz z podatymi prašenjemi zaběrać, kotřiž to w prěnim pospyće dokónčili njejsu. Nadźijeja so tuž znajmjeńša sto dospołnje wupjelnjenych naprašnikow wuhódnoćić móc.
Sćěhowacy link płaći dale hač do njedźele, 27. februara:
Link bu runje tak po nutřkotowarstwowych kanalach Domowiny župam a sobustawskim towarstwam posrědkowany.
Krótkopowěsće (22.02.22)
Serbski přełožk pola Microsofta
Budyšin. Software-koncern Microsoft je składnostnje wčerawšeho dnja maćeršćiny wo tym informował, zo hornjoserbšćinu jako rěč wotnětka do swojeho Bing-translatora a do Microsoft-office-nałožowanjow zapřijmje. K tomu je serbske zhromadźenstwo same aktiwnje přinošowało, předewšěm Rěčny centrum WITAJ a Serbski institut. Załožba za serbski lud ma wudobyće za „dalši krok po puću serbskeje digitalizacije“.
Indicenca znowa woteběraca
Budyšin. Po Roberta Kochowym instituće wučinja incidencna hódnota dźensa w Budyskim wokrjesu 1 237,2 a w Zhorjelskim 979,4, štož je mjenje hač wčera. Wot minjeneho pjatka hač do wčerawšeho rozprawjachu we wokrjesu Budyšin wo 1 107 natyknjenjach z koronawirusom. We wokrjesu Zhorjelc bě jich 753. Zdobom je tam ličba zemrětych w zwisku z koronu wo tři přiběrała.
Kónc za konopny projekt LEAG
Policija (21.02.22)
Rozestajenje zmija dla
Žitawa. Sylny wětřik je sobotu popołdnju swójba w Žitawje wužiwała a zmija pušćała. Jako padny tón na zemju, šmórny so parkowaceho Audija, ale jón njewobškodźi. 23lětna wobsedźerka awta to z bydlenja wobkedźbowaše a najprjedy na swójbu swarješe. K jězdźidłu přišedši wona 52lětnej žonje woneje swójby mjezwoči dyri a ju při tym zrani. Zranjenja ćěła kaž tež křiwdźenja dla změje so 23lětna nětko zamołwić.
Wodnjo a w nocy nakupować
Rychwałd (AK/SN). Wobchod, kiž je 24 hodźin wob dźeń wotewrjeny, ma bórze w Rychwałdźe w Hamorskej gmejnje nastać. „W nim maja potom žiwidła a twory wšědneje potrjeby poskićeć“, rozłoži zastupowacy wjesnjanosta Hendryk Balko na zašłym posedźenju gmejnskeje rady. „Tam budu sej ludźo tež pakety wotewzać móc a elektroawto nabiwać móc, ale změja tež přistup k internetej.“ Přistup do wobchoda změja kupcy digitalnje z wosobinskej kartu. Předewšěm poskićeć maja regionalne twory. Pjekarjo a rěznicy z wokoliny móhli so sobu zapřijeć, Balko wuzběhny.
Přizemjo nětko hinak wužiwać
Wojerecy (KD/SN). Spočatk januara je přirodowědno-techniski dźěćacy a młodźinski centrum NATZ z Wojerowskeho wobydlerskeho centruma Piwarska hasa 1 wućahnył. Nětko móža swobodne rumnosće na přizemju hinak wužiwać. Rozmołwny partner za wšitke towarstwa, skupiny a jednotliwcow je Toni Züchner, hač do njedawna hišće nawoda Wojerowskeho kina Cinemotion.
Zhromadnosć přewšo wažna
Korona so tež na dźěło wohnjowych wobornikow wuskutkuje
Slepo (CK/SN). Jeno 16 zasadźenjow mějachu kameradojo Slepjanskeje dobrowólneje wohnjoweje wobory loni zmištrować. Wosom razow wołachu jich na pomoc, šěsć króć dyrbjachu woheń hašeć, jónu přewjedźechu katastrofowe zwučowanje a dalši raz zasadźenje z decentralnym škričkowanišćom. Dohromady mějachu dźewjeć zasadźenjow mjenje hač lěto do toho. To rjekny nawoda wobory Mario Klar na njedawnej hłownej zhromadźiznje. Tak kaž na žurli Serbskeho kulturneho centruma njejsu mužojo a žony hižo dwě lěće hromadźe sedźeli, při čimž so tež tale zhromadźizna na oficialny dźěl wobmjezowaše. „Pandemija našu zhromadnosć wulce wužaduje“, nawoda wobornikow měnješe. Korony dla wukubłanje stajnje tak móžne njebě, kaž bychu sej to přeli. Přiwšěm nałoži kóždy wobornik za to přerěznje 28 hodźin, z čimž su hladajo na wobstejnosće spokojom. Kedźbować skerje na kwalitu hač na kwantitu so při zasadźenjach jako dobre wopokazuje.
Sportnišćo chcedźa předać
Zdźar (UM/SN). Wulkodubrawska gmejna je sportnišćo w swojim wjesnym dźělu Zdźar (Särchen) na předań wupisała. Z wotpowědneho wobzamknjenja gmejnskeje rady wuchadźa, zo chcedźa za to znajmjeńša 50 000 eurow měć. Wuměnjenje je, zo kupc ležownosć za bydlenje, přemysło, turizm abo sport wužiwa. Wobstatk předawanskeho paketa je 1981 natwarjeny a z wolijom tepjeny sportowy dom, kotryž dyrbja nuznje saněrować.
Zdźarowske sportnišćo spóznawaš tuchwilu najlěpje na štworych koparskich wrotach, hdźež pak saki pobrachuja. Hrajnišćo same je njerune a z knotwišćemi kaž posyte. Sportnišćo je w bjezposrědnym susodstwje tudyšeho lětanišća za płujadła. Hižo w lěće 2014 bě Wulkodubrawske sportowe towarstwo přestało sportnišćo wužiwać. Loni nalěto chcychu młodostni sportowy dom ponowić a w nim młodźinski klub zaměstnić. To pak je gmejnska rada wotpokazała, dokelž bě hižo jasne, zo chce areal předać.
