Krótkopowěsće (21.03.22)
Nowotny dale wjesnjanosta
Rakecy. Z 98,5 procentami wšěch hłosow bu Swen Nowotny wčera za Rakečanskeho wjesnjanostu wuzwoleny. Wot CDU namjetowany bě Nowotny jenički kandidat. Wolerjo pak mějachu składnosć, dalše mjeno na wólbny lisćik připisać, štož je jenož mało ludźi činiło. Před sydom lětami bě so Swen Nowotny prěni raz wo zastojnstwo wjesnjanosty w Rakecach prócował a so tehdy přećiwo třom dalšim kandidatam přesadźił.
Incidenca wyša hač 2 000
Budyšin. Přez kónc tydźenja je incidenca w Budyskim wokrjesu marku 2 000 překročiła. Dźensa podawa Roberta Kochowy institut hódnotu 2 082,8. Wokrjes informowaše dopołdnja wo 1 693 natyknjenjach z koronawirusom a wo dwěmaj smjertnymaj padomaj wot minjeneho pjatka. Wo 1 216 infekcijach rozprawješe wokrjes Zhorjelc minjeny pjatk, po RKI wučinja tam incidenca dźensa 1 609,6.
Sylnja wučbu informatiki
Policija (18.03.22)
Spěšnosć kontrolowali
Rakecy. Dlěje hač pjeć hodźin je policija předwčerawšim popołdnju a wječor spěšnosć na hłownej dróze w Rakecach kontrolowała. Do směra na Budyšin bě wot 600 jězdźidłow 28 přespěšnych. Rekord docpě pólski Opel z 82 km/h. Šofer dyrbi nětko měsac nóžkować a 260 eurow pokuty płaćić. Do napřećiwneho směra bě wuslědk moderatniši. Wot 660 měrjenych awtow bě pjeć přespěšnych, z toho tři we wobłuku pokuty. Najspěšniši z 71 km/h bě VW z Budyskim čisłom. Na wodźerja čakatej nětko dypk w Flensburgu a 115 eurow pokuty.
W zahrodnistwje kamelije wobdźiwać
Wokoło jězora ma zaso kołopuć nastać
Łaz (AK/SN). Gmejna Łaz w Budyskim wokrjesu prócuje so dale wo znowa natwar kołopuća wokoło Hórnikečanskeho jězora. To wuzběhny wjesnjanosta Thomas Leberecht (CDU) na zašłym posedźenju gmejnskeje rady. Jeje čłonojo zaběrachu so z financowanskim zrěčenjom z Łužiskej a srjedźoněmskej towaršnosću hórnistwoweho zarjadnistwa (LMBV).
Saněrowanja jězora dla je puć sylnje poćerpjeł. Nowy ma dospołnje asfaltowany a před korjenjemi škitany być. Podłu njeho su blida a ławki kaž tež wobswětlenje předwidźane. Planowanje płaći něhdźe 30 000 eurow. Z toho zapłaći Łazowska gmejna 15 procentow. Město Kulow wobdźěli so z tysac eurami, wšako słušeja jemu ležownosće na Mučowskim pobrjohu jězora.
Najwjetši dźěl financuja z fondsa za brunicowe saněrowanje. Po słowach wjesnjanosty koncentruja so najprjedy na zapadny dźěl jězora, přetož tón budźe najskerje jako prěni zaso přistupny. Wothłosować dyrbja to ze zarjadnistwom rěčnych zawěrow, dokelž wone přichodny kołopuć sobu wužiwa.
Šansa młodostnej so wobhonić
Budyšin/Berlin. Zapósłanča zwjazkoweho sejma Kathrin Michel (SPD) přeproša jednu młodostnu z Budyskeho wokrjesa w starobje 16 do 19 lět na wopyt zwjazkoweho sejma w Berlinje. Tak wobdźěli so wona na akciji Girls Day, ke kotrejž chce jeje frakcija dohromady 60 młodych holcow přeprosyć. Wone móža so wo politice a dźěle zapósłancow wobhonić. Termin je wot 27. do 28. apryla. Štóž ma zajim, njech napisa někotre linki wo swojej motiwaciji a njech přizjewi so hač do 21. měrca pod kathrin.michel.wk@bundestag.de.
Poskićeja wosebite wodźenja
Kamjenc. W Kamjenskim Muzeju zapadneje Łužicy powjedźe geologa Jens Czoßek njedźelu, 20. měrca, trójce po wosebitej wustajeńcy wo krydowej dobje před 90 milionami lět w Sakskej. W 11 a 14 hodź. budźetej to 45 mjeńšin trajacej wodźeni, w 15.15 hodź. dalše połdrahodźinske. Wobdźělenje płaći jeničce normalny zastup. Wobkedźbować maja wopytowarjo prawidło 3G. Wšitcy su wutrobnje přeprošeni.
Wotewrje nowy wobchod
Palenje chodojtow zaso zmóžnić
Radwor (SN/MkWj). Ukrainscy wójnscy ćěkancy běchu předwčerawšim, srjedu, tež tema na posedźenju Radworskeje gmejnskeje rady. Kaž wjesnjanostka Madeleine Rentsch wo tym informowaše, je mjeztym něhdźe 700 ćěkancow w Budyskim wokrjesu dojěło. Krizowy stab krajnoradneho zarjada dźěła koordinuje. Tež gmejna je konto zarjadowała, na kotrež móža wobydlerjo pjenježne dary přepokazać. Radźićeljo zhonichu, zo stej dwě swójbje w gmejnje ćěkancow přiwzałoj, stajnje po pjeć wosobach.
Za planowany wutwar parkowanišća při Radworskim kěrchowje su wupisanja za twarske dźěła rozesłane. Spočatk julija chcedźa po planje dźěłać započeć a kónc awgusta hotowi być. Nowu štwórć jednoswójbnych domow za wjacezaměrowej halu „Slavia“ nastupajo chcedźa na posedźenju w meji rozsudźić.
Kandidatura njeje samozrozumliwa
Malešecy (WL/SN). Čłonojo Malešanskeje a Hućinjanskeje skupiny CDU su wčera wjelelětneho wjesnjanostu Matthiasa Seidela jako kandidata za wólby wjesnjanosty gmejny Malešecy 12. junija nominowali.
Hačrunjež je so gmejna w dotalnej 14lětnej hamtskej dobje Seidela přewšo derje wuwiła, njebě jeho wospjetna kandidatura samozrozumliwa. Rozsudne běchu na kóncu mnohe rozmołwy z wobydlerjemi a gmejnskimi radźićelemi, zo je so 48lětny za třeću kandidaturu rozsudźił. Wutwar wopłóčkoweje syće, šěrokopasmowe zastaranje z internetom, dróhotwar, bjezzadźěwkowy přetwar busowych čakarnjow, angažement za pěstowarnje, šule, wohnjowe wobory a towarstwa su jenož někotre přičiny, zo su jemu wčera znowa dowěru wuprajili.
Swjedźenski ćah budźe wjeršk
Wotrowska wosada přihotuje so na 250. jubilej swojeho załoženja
Wotrow (SN/MWj). Lětsa je tomu 250 lět, zo běchu we Wotrowje cyrkej poswjećili, štož wobhladuja runočasnje jako załoženje wosady. Za tónle wulki jubilej su hižo w lěće 2017 prěnje ideje zběrali. Cyle zaměrnje so wot nalěća 2020 na podawk přihotuja, rozłožuje předsydka wosadneje rady Claudia Wjacławkowa, kotraž ma přihotowanske nitki sobu w horšći. „Bě dołho jasne, zo dyrbi naša cyrkej k jubilejej ponowjena być. Mjeztym je tam elektrika składźena a sćěny su prěni raz barbjene“, Wotrowčanka rozprawja. Najpozdźišo hač k wosadnemu swjedźenjej wot 23. do 26. junija ma wšitko hotowe być. Potom dožiwja wosadni štyridnjowski swjedźeń z wjacorymi zarjadowanjemi.
