Nadźijeja so spěchowanja
Prěni wotrězk planowanja nowotwara pěstowarnje zahajeny
Njeswačidło (JK/SN). Hižo dlěši čas Njeswačanscy gmejnscy radźićeljo wo tym rozmysluja, kak hodźi so nuznje trěbny nowotwar tamnišeje pěstowarnje zwoprawdźić. Za gmejnu je nowotwar wulke pjenježne wužadanje. Tohodla prócuja so wo wotpowědnje wysoke spěchowanje, zo by gmejnski podźěl poměrnje snadny wostał a so bjez přidatnych napinanjow zwjesć hodźał.
Prawniske kroki připowědźene
Njebjelčicy (SN/MWj). W interneće anonymnje wozjewjene pozdatne wěrnosće z Njebjelčanskeje gmejny su na zašłym posedźenju gmejnskeje rady razny protest wjacorych gmejnskich radźićelow wunjesli. Tak so Frank Domš wot wozjewjenjow distancowaše a porokowaše, zo jich awtorojo zmužitosć nimaja swoje wobličo pokazać. „Wumjetowanja škodźa gmejnskej radźe a cyłej Njebjelčanskej gmejnje“, wón rjekny. Dalšej radźićelej so tomu přizamknyštaj a zwurazništaj, zo čujetaj so wosobinsce ranjenaj. Zastupowacy wjesnjanosta Tomaš Klar připowědźi prawniske kroki.
Wjesnjanosta Tomaš Čornak (CDU) wobhladuje wozjewjenja jako difamowanje radźićelow a wobydlerjow. Tež wón připowědźi prawniske kroki. Zdobom je na to skedźbnił, zo w minjenymaj lětomaj při wšitkich přećiwo njemu zapodatych słužbnych pohórškach žanežkuli pokiwy namakali njejsu, zo je swoje słužbne winowatosće zanjechał abo přećiwo nim jednał. „Přiwšěm poskićam anonymnym wozjewjerjam składnosć so zamołwić“, Čornak podšmórny. Po jeho słowach so policija z padom hižo zaběra.
Cyle w znamjenju orchidejow steješe minjeny kónc tydźenja ...
Dalša podpěra zaručena
Pomocne akcije towarstwow a jednotliwcow – podpěrać ukrainskich ćěkancow – nimaja žanoho kónca. Mjeztym je tež we Łužicy dale a wjace poskitkow, zaručić ćěkancam přebytk.
Smjerdźaca/Radwor/Rěčicy (SN/MiR). Ukrainska swójba, kotraž w Smjerdźečanskim Šmitec/Handrikec domje přebywa, počina so we wsy zažiwjeć. Mjeztym wuwučujetej dźěći swójby wučerka na wuměnku Jadwiga Gerberichowa a wučerka Serbskeho gymnazija Alena Hiccyna. Tři holcy z nimaj němčinu wuknu. Na nawsy hrajkaja sej dźěći ukrainskeje swójby z wjesnymi dźěćimi, a jich zhromadna rěč je serbšćina. Mjeztym su tež w dalšich serbskich wsach swójby, kotrež su ćěkancow přiwzali abo chcedźa za to bydlenje resp. stwu přewostajić.
Krótkopowěsće (15.03.22)
Z krizowym stabom
Budyšin. Krizowy stab koordinuje pomoc za Ukrainu wot wčerawšeho w Budyskim krajnoradnym zarjedźe. Wobdźělene fachowe zarjady so na dźěłowych dnjach wot 8 do 18 hodź. wothłosuja, kaž zarjad wčera zdźěli. Ćežišći najprjedy raz stej, nuzowe kwartěry za přichadźacych zarjadować a bydlenske rumnosće za jich trajne zaměstnjenje wotnajeć. Wokrjes Budyšin so na to hotuje, znajmjeńša 5 000 wosobow přiwzać.
Dale na wysokim niwowje
Budyšin. Incidenca po Roberta Kochowym instituće je dźensa z hódnotomaj 1 627,5 w Budyskim a 1 166,6 w Zhorjelskim wokrjesu dale na wysokim niwowje. Wokrjes Budyšin informuje wo 391 natyknjenjach a třoch smjertnych padach wot minjeneho pjatka. Wokrjes Zhorjelc rozprawja wo 1 066 nowoinficěrowanych a třoch zemrětych pacientach.
Tež Češa chcedźa wojować
Prěnje ptački so zaso nawróćili
Nalěćo njeje so hišće tak prawje započało, słyšimy pak w přirodźe hižo zaso ptački fifolić. Čerwjeneho milana, jednoho z najwjetšich rubježnych ptakow Němskeje, spóznawaš na rjanej wosebitej čerwjeno-brunej wopuši, kotrejež dla mjenujemy milana tež kanju. Čerwjeny milan je europski ptak, jeničce w Němskej wudypa so połsta procentow teje družiny. Lětsa z jara miłej zymu, je wjele čerwjenych milanow mjez druhim tež w Hornjej Łužicy wostało. Po cyłej Němskej naličichu fachowcy 200 ptakow podłu rěkow. Lěto do toho bě jich jenož něhdźe sto. Za puć do španiskeho zymskeho kwartěra trjeba ptak něhdźe dwaj tydźenjej, dokelž wob dźeń hač do 200 kilometrow zmištruje. W nocy wotpočuje na wulkich sćežorach abo štomach. Mjeztym so tež tónle rubježny ptak zaso do Łužicy nawróća.
Demonstruja za měr
Kamjenc. Zwjazk Lěwicy Kamjenc-Radeberg namołwja k demonstraciji za měr jutře, wutoru, w 17 hodź. na Kamjenskim torhošću. Njejedna so wo stronskopolitiske zarjadowanje, tuž su wšitcy wobydlerjo namołwjeni so wobdźělić. Na městnje chcedźa informować, kak móža ludźo ćěkancam z Ukrainy najlěpje pomhać. Dale změja tak mjenowany wotewrjeny mikrofon za wšěch, kotřiž chcedźa swoje měnjenje zjawnje rjec.
Přeprošuja na přednošk
Chrósćicy. Po dlěšej přestawce přeproša župa „Michał Hórnik“ zaso na zjawne zarjadowanje. Štwórtk, 17. měrca, w 15 hodź. poskići Beno Bělk w Chrósćicach přednošk wo swojich pućowanjach po Africe. Přeprošeni do wjacezaměroweho ruma „Jednoty“ su předewšěm wuměnkarjo, ale tež wšitcy dalši zajimcy su witani. Jim poskića kofej a tykanc. Přistup rjaduja po prawidle 3G, na městnje budźe móžnosć so testować dać. Wjace tajkich přednoškow za wuměnkarjow chcedźa w běhu lěta přewjesć.
Policija (14.03.22)
W kuchni so paliło
Biskopicy. Pjeć zranjenych wosobow je wuslědk wohenja, kotryž dyrbjachu wobornicy minjeny pjatk wječor w Biskopicach hašeć. 24lětna žona bě tam wolij w fritezy sćopliła, pozdźišo pak na to zaby, tak zo so wolij palić započa. Jeje 23lětny partner chcyše fritezu z wokna ćisnyć, štož pak jemu so njeporadźi a płomjenja so w kuchni rozpřestrěchu. K hašenju wołachu wjace hač 70 wobornikow ze 16 jězdźidłami. Zawinowarka poćerpje šok, 23lětny so na rukomaj ćežko zrani. Kura dla dyrbjachu dalšu 40lětnu wobydlerku domu a jeje dźěsći w starobje šěsć a třinaće lět ambulantnje zastarać.
Klučowe produkty postajili
Chrósćicy (JK/SN). Z pomocu wustawkow rjaduja komuny hłowny dźěl swojeho zarjadniskeho dźěła. Towarstwa a organizacije wusměrjeja tohorunja swoju dźěławosć po wustawkach, kotrež dyrbja hdys a hdys aktualizować a woprawdźitym poměram přiměrić. Tak tež w Chróšćanskej gmejnje. Wosebje wustawki wohnjoweje wobory z lěta 2005 běchu hižo dlěši čas gmejnskich radźićelow zaběrali. Tak přepodachu je zamołwitym zarjadniskeho zwjazka Při Klóšterskej wodźe, zo bychu wotpowědnje aktualnym zakonskim rjadowanjam nowe wustawki naćisnyli. Naćisk su radźićeljo nětko na swojim posedźenju schwalili. Runje tak postupuja z wustawkami, kotrež rjaduja wotrunanje čestnohamtskeje słužby w rjadach wohnjoweje wobory, wosebje tych kameradow z wjetšej zamołwitosću, kaž su to na přikład nawoda wobornikow a zamołwity za graty kaž tež zamołwity za młodźinsku wohnjowu woboru.
Z naprašowanjom ludźi sobu zapřijeć
Wólbny bój je dawno zwučene formy překročił, kaž su to na přikład informowanišća, lětaki, póštowe posyłki abo ryzy internetna prezentacija kandidatow. Požadar CDU wo zastojnstwo wyšeho měšćanosty Budyšina Karsten Vogt kroči nowy puć.
Budyšin (SN/at). Njespokojnosć ludźi z politikarjemi pohnuwa kandidata křesćanskich demokratow za zastojnstwo Budyskeje měšćanskeje hłowy k rozmyslowanju. „Na kotre wašnje móžu wolerki a wolerjow zapřijeć, zo bych hromadźe z nimi swój wólbny program skonkretizował a so při tym bóle na to wusměrił, što ludźi jima“, so Karsten Vogt praša. Wšako dźe wo přichod města, kaž titl jeho wólbneho programa „Zhromadnje zaso rosć“ zwuraznja. Wuměna myslow z druhimi, to njeje jenož dopóznaće ze swojeho skutkowanja jako nawody Budyskeho Melanchthonoweho gymnazija, je tež spomóžny puć we wólbnym boju.
