Twar šule w Gołkojcach dróši
Dale warnować a rěčeć
Stare a nowe město zwjazać
Wojerecy (AK/SN). Město Wojerecy chce swoje stare a nowe město přichodnje intensiwnišo mjez sobu zwjazać a zhromadnje wuwiwać. Za to nastanje koordinowanske městno za wuwiće centrumow. Natwarić a etablěrować ma je marketingowe towarstwo Swójbny region HOY. Tole su měšćanscy radźićeljo na swojim wčerawšim posedźenju z jednym napřećiwnym hłosom wobzamknyli.
Cyłkowne kóšty za projekt, kiž je předwidźany wot awgusta 2022 hač do awgusta 2025, wučinja 575 000 eurow. Z toho zapłaći město dźesać procentow. 90 procentow spěchowanja dóstanu ze zwjazkoweho programa „Do přichoda kmane nutřkowne města a centrumy“. Město Wojerecy bě so na tymle programje wobdźěliło. Za to bě wone projektowu próstwu pod hesłom „Kooperatiwne wuwiće centrumow Wojerec“ zwjazkowemu institutej za twarske, měšćanske a rumnostne slědźenje zapodało. Institut je projektej přizwolił. Nětko móža w měsće dwě personalnej městnje wutworić.
Krótkopowěsće (13.07.22)
Swoju poziciju wobkrućili
Wojerecy. Předsydstwo župy „Handrij Zejler“ je wčera na swojim doprózdninskim posedźenju we Wojerecach poziciju wobkrućiło, zo njeměli žane wuwzaća być, kotrež bychu zjawnosć hłownych zhromadźiznow Domowiny wobmjezowali. Gremij bě wurjadnu hłownu zhromadźiznu třěšneho zwjazka 3. junija w Choćebuzu wuhódnoćił, hdźež wjetšina delegatow wotpowědny namjet župy za změnu wustawkow sćěhowała njebě.
Pawołska šula mytowana
Drježdźany. Rakečanska Ewangelska Pawołska šula słuša z projektom „Pawołska šula sej historisku biblioteku w Rakečanskej ewangelskej cyrkwi wotkrywa“ k dohromady 26 lawreatam krajneho programa „Pegasus – šule pomniki adoptuja“ za šulske lěto 2022/2023 a změje za to premiju. Wo tym je sakske kultusowe ministerstwo wčera informowało.
Wobornicy w zymowej komorje
Policija (12.07.22)
Skućićelej so přeradźiłoj
Wojerecy. Hara na jeju ležownosći je w nocy na póndźelu wobsedźerjow bydlenskeho domu we Wojerecach ze spara budźiła. Wonaj wuhladaštaj wosobje, kotrejž chcyštej so runje do garaže zadobyć. Najskerje měrještej so skućićelej na moped w garaži. Jako pak nakładowane drjewo powalištaj, sebje sameju přeradźištaj a skónčnje ćeknyštaj.
Kupać najzašo za pjeć lět
200 ludźi na dnju wotewrjeneho twarnišća při Hórnikečanskim jězoru
Wulke Ždźary (AK/SN). Wot klětušeho ma kołopuć wokoło Hornikečanskeho jězora zdźěla wužiwajomny być. Hišće lětsa dotwarja móst nad přitokom we Wulkich Ždźarach. Tohorunja lětsa chcedźa nowy towarstwowy centrum k medijam přizamknyć a wonkowne připrawy dotwarić. Towarstwa móža potom wot klětušeho swoje domicile twarić započeć. Kupanje w jězoru pak budźe najzašo wot lěta 2027 móžne. Tole běchu konkretne powěsće za přichod, kotrež zdźělichu minjenu sobotu na dnju wotewrjeneho twarnišća při jězoru. Něhdźe 200 ludźi je so za aktualny staw zajimowało.
Młode baćony dóstachu pjeršćenje
Z Delnjeje Kiny do Myšec wjedźeše tele dny lětuša čara wopjeršćenjenja baćonow w Budyskim wokrjesu. Ornitologa Stefan Siegel z Rudnych horin je lětsa šesty raz tele dźěło přewzał. Kaž hižo w zašłych lětach je firma Lift Manager zaso darmotnje zběhadło ze šoferom přewostajiła. Puć wjedźeše mjez druhim přez Wjesel, Trupin, Ralbicy a Nuknicu. Prěni króć běchu tež Němske Pazlicy cil wuprawy. Na 17 hnězdach dósta kóžde młodźato dwě rynce přityknjenej, jednu mjeńšu wot ptačernje Hiddensee a druhu chětro wulku wyše kolena. Tuta hodźi so z dalokowidom wotčitać. Tak móže so žiwjenjoběh jednotliweho ptaka sćěhować. Na wotpowědnej internetnej stronje su wozjewjene wšitke stacije, hdźež bu baćon widźany.
Wot swojeho wuja wjele nawuknył
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (3)
Něšto dlěje hač štyri lětdźesatki stara so wo financne naležnosće towarstwa Serbskeje pčólnicy dźensa 73lětny Chróšćan Jan Wawrik. Mjeztym nazhonity pčołar je so 1948 w Nowej Jaseńcy narodźił. Chodźo wot 1955 wosom lět w Chrósćicach do šule je sej tehdy hižo za čas dźěćatstwa poměrnje dobre znajomosće wo pčołarjenju přiswojił.
Krótkopowěsće (12.07.22)
Wuspěšny spěwny swjedźeń
Poršicy. Na 60 ludźi je wčera wječor přišło na serbski spěwny swjedźeń do Poršic, kotryž wotmě so jako zazběh swjedźenskeho tydźenja składnostnje 800teho jubileja wsy. Skupina Přezpólni zanošowaše z wopytowarjemi hač do pózdnich hodźin jednu štučku po druhej. To budźeše w někotrymžkuli wopytowarju dopomnjenki na dźěćacy čas, jako w Poršicach a wokolnych wsach na tójšto kwasach hišće serbsce spěwachu.
Prastare swětłožołmowe signale
Paris. Swětnišćowe agentury ESA (wjacore europske kraje), NASA (USA) a CSA (Kanada) su dźensa prěni regularny wobraz, sfotografowaneho wot kosmosoweho teleskopa „James Webb“, wozjewili. Dotal „najbóle detailěrowane foto swojeho razu“ pokazuje mólički wurězk uniwersuma, kajkiž před něhdźe 4,6 miliardami lětami wupadaše.
Wraki ruskich tankow w Praze
Z tradiciju so zwjazani čuja
14. serbski ewangelski domizniski dźeń we Wojerecach a w Ćisku přewjedli
Wojerecy/Ćisk (AK/SN). Serbski ewangelski domizniski dźeń je jasne wuznaće k serbskim korjenjam regiona. Tole wuzběhny jeho iniciator Joachim Nagel wčera na mjeztym 14. tajkim zarjadowanju we Wojerecach a w Ćisku. „W serbskej módro-čerwjeno-běłej chorhoji je barba wutroby srjedźa. Wobchowajće sej tule móc ze swojeje srjedźizny“, rjekny wón w swojich postrownych słowach. 75lětny farar na wuměnku bě jedyn z něhdźe sto wobdźělnikow.
Domizniski dźeń zahajichu z dwurěčnej Božej słužbu we Wojerowskej Janskej cyrkwi. Hudźbnje wobrubił je ju Židźinski chór. Liturgiju je Blunjanski farar dr. Stefan Reichelt hornjoserbsce čitał. Serbski superintendent na wuměnku Jan Malink prědowaše wo wodaću, swěrnosći a wujednanju.
