Ma kampanju serbskeje rěčeza utopisku
Dźěłowy kruh za serbske naležnosće města Budyšina je so wčera schadźował. Mjez druhim su wo tym wuradźowali, kak předewzaćelow najlěpje animěruješ, zo napisy na swojich wobchodach dwurěčne wuhotuja.
Budyšin (SN/CoR). Jako noweho čłona dźěłoweho kruha witaše předsyda gremija Benjamin Wirth wčera Roberta Krawca jako naslědnika Jana Budarja, jako hosća nowu nawodnicu Budyskeho měšćanskeho zarjada za hospodarstwo a turizm Doreen-Charlottu Hantschke, zo bychu sej wo móžnym přichodnym zhromadnym dźěle nastupajo dwurěčnosć w hospodarstwje mysle wuměnjeli. Jeje zaćišć je, zo dwurěčnosć w měsće Budyšinje hišće tak prezentna njeje, kaž by wočakowała. „Praji so, zo je Budyšin stolica Serbow. Za to pak stej tu serbska rěč a kultura lědma widźomnej. Wosebje turistow bychmy na našu jónkrótnu wosebitosć bóle skedźbnjeć móhli“, rozłoži Doreen-Charlotte Hantschke.
Krótkopowěsće (10.03.22)
Zhromadźizna hač do junija
Budyšin. Hač do 7. junija dyrbi Domowina wurjadnu hłownu zhromadźiznu přewjesć. Na to je so prezidij třěšneho zwjazka wčera dojednał. Na „hłownej“ chcedźa loni w Slepom wobzamknjene změny wustawkow po pokiwach Drježdźanskeho hamtskeho sudnistwa přiměrić, a je znowa wobzamknyć. Sudnistwo njebě jednu změnu wustawkow připóznało. Dotal su sej šěsć župow a dalše towarstwa hłownu zhromadźiznu žadali.
Za hybridno-elektriske ćěrjenje
Choćebuz. Lětarstwo chce z widom na změnu klimy z wuwićom hybridno-elektriskich ćěrjenjow wustork parnišćowych płunow pomjeńšić. Za to je Němski centrum za lětarstwo a swětnišćowe lětarstwo dźensa na stejnišću w Choćebuzu nowy institut za elektrifikowane ćěrjenje lětarstwa wotewrěł. Dotal dźěła tam 23 ludźi, předwidźanych je raz 150.
Ličba natyknjenych dźěći přiběra
Ze wšěmi wjeskami komuny sprawnje wobchadźeć
Wo zdokonjanym a wo planowanych projektach w gmejnje Hodźij do wólbow wjesnjanosty w juniju
Wjesnjanosta Hodźija (Göda) Gerald Meyer (njestronjan) ma za swój najwažniši nadawk, zawěsćić měr a harmoniju mjez wšitkimi wobydlerjemi swojeje komuny. Nimo wužadanja, ze wšěmi wjeskami gmejny sprawnje wobchadźeć, je to zdobom próca wo to, zo njedochadźa mjez němskimi a serbskimi wobydlerjemi k žanymžkuli konfliktam. Wjesnjanosta měni, zo je so to jemu w minjenej wólbnej dobje prawdźepodobnje derje zešlachćiło, a so tuž nadźija, zo tomu tež dale tak wostanje. Wšako ma to za „A a O“ hladajo na dalše bujne wuwiće komuny.
Tež w Hodźijskej změja wobydlerki a wobydlerjo 12. junija noweho wjesnjanostu abo nowu wjesnjanostku wolić. Gerald Meyer je swoju kandidaturu hižo připowědźił. Dalši kandidaća za wólby wjesnjanosty w Hodźijskej gmejnje dotal znate njejsu.
Wohnjowa wobora wažna
Policija (09.03.22)
Štom na awto padnył
Smjerdźaca. Na transporter 61lětneho muža je předwčerawšim pola Smjerdźaceje štom padnył. Na zbožo so nichtó zranił njeje. Škoda na awće wučinja něhdźe 2 000 eurow.
Čitanje je znamjo podpěry
Ludźom na Ukrainje z pjenježnymi a wěcnymi darami pomhać
Smjerdźaca/Radwor/Drježdźany (SN/MiR). Do kruha pomoc poskićacych potrjechenym wot wojowanjow na Ukrainje słuša tež Towarstwo swj. Filomeny. Wone zběra pjenjezy za trjebany transporter, z kotrymž móhli katolscy wěriwi na Ukrainje pomocne srědki, kotrež su do města Obuchiw dóšli, ludźom w měsće a na wsy rozwožować. Benedikt Rjeda, kiž ma wot 1990tych lět zwisk do Ukrainy, chce tam transporter dowjezć. Mjeztym je z wjacorymi awtowymi domami rěčał, kotrež chcedźa za wotpowědnym wozydłom hladać. „Narěčał bě mje nawoda duchowneho centruma oblatow w Obuchowje, hač njebychmy pomhać móhli“, praji Benedikt Rjeda. „Mjeztym so tež Obuchowej wójna bliži. Prěnja bomba je něhdźe pjeć kilometrow dale města zadyriła.“ Darićeljo njech přepokazaja pjenjezy na konto: St. Filomena e.V., Volksbank Dresden-Bautzen, IBAN: DE 55 8509 0000 6036 0810 05. Štóž trjeba kwitowanku za financny zarjad, ma swoju dospołnu adresu podać. Předsyda towarstwa swj. Filomeny Gerat Róbl rjekny: „Jako mje Benedikt Rjeda narěča, sym rady podpěru poskićił.
Filmowy wječor jeno za žony
Informuja wo spěchowanju
Budyšin. Załožba za serbski lud přeproša wšitkich zajimowanych na prěnje informaciske zarjadowanje, na kotrymž chcedźa wšelake móžnosće spěchowanja předstajić, hladajo předewšěm na nowe směrnicy załožby k programej „Serbska rěč a kultura w strukturnej změnje“. Zarjadowanje budźe online a wotměje so jutře, štwórtk, w 17 hodź. Link wozjewja na internetnej stronje załožby. Wobdźělnicy změja móžnosć swoje prašenja wotbyć. Sobudźěłaćerjo załožby na nje rady wotmołwja.
Zběraja wěcne dary
Smochćicy. Hromadźe z Wenclec transportnym předewzaćom zběraja w Smochčanskim kubłanišću swjateho Bena wěcne dary za ludźi z Ukrainy, kotřiž su do Pólskeje a Rumunskeje ćeknyli. Dary přijimuja na parkowanišću za recepciju, a to wšědnje wot 8.30 do 17 hodź. Předewšěm proša wo sćěhowace wudźěłki: začinjene awtowe kašćiki za prěnju pomoc (tež wotběžane), zubne šćětki a pastu, spanske měchi za dźěći a dorosćenych, spódnju drastu (termo), pjelški, mydło, nuznikowu papjeru, suchu jědź za ćěšenki, měcy, šawle, rukajcy, nohajcy – wšo, štož ćopło dźerži. Čerstwe twory, wodu a druhu drastu njepřijimuja.
Połsta kilometrow pućować
Hórki/Radwor (SN). Dosć swojorazne a chětro naročne sportowe zarjadowanje serbscy młodostni tuchwilu přihotuja. Skupinka wokoło Radworčana Mateja Wjeńki a Hórčanki Leonie Matješkec planuje tak mjenowany „Slaviamarš“. Wotměć ma so tón 11. junija. Je to pućowanje nimo łužiskich honow a lěsow z Hórkow do Radworja na distancy 50 kilometrow w běhu dwanaće hodźin.
Při pućowanju njejedna so wo wubědźowanje. Jenički zaměr je so mentalnje a ćělnje wužadać, kaž organizatorojo zdźěleja. Woni skedźbnjeja w tym zwisku tež na sćěhi dwě lěće trajaceje koronapandemije bjez wjetšich sportowych zarjadowanjow, štož drje je so mjez mnohimi negatiwnje na motiwaciju wuskutkowało so sam abo sama k sportowanju přewinyć. „Swoboda a nadźija na žiwjenje kaž do wirusa pak nam zaso kiwatej. Je potajkim načasu, sej z nowej energiju zaso wjetše zaměry stajeć“, w zdźělence rěka.
Krótkopowěsće (09.03.22)
Rada wójnu na Ukrainje zasudźa
Podstupim. Braniborska Rada za naležnosći Serbow wójnu Ruskeje na Ukrainje zasudźa. Na swojim wčerawšim internetnym posedźenju schwalichu rezoluciju, w kotrejž rěka: „W zmysle měrniweho zhromadneho žiwjenja w Europje apelujemy wójnu hnydom skónčić, so k jednanjam wróćić a nańć rozrisanje za wobaj słowjanskej ludaj.“
Incidenca lědma změnjena
Budyšin. Niwow incidency w Hornjej Łužicy je lědma změnjeny. Roberta Kochowy institut poda dźensa za Budyski wokrjes hódnotu 1 161,4, za Zhorjelski 869,3. Wokrjes Budyšin informowaše wčera wo 408 natyknjenjach z koronawirusom. Mjez 724 nowonatyknjenymi we wokrjesu Zhorjelc je 150 dźěći. Ličba w hornjołužiskich chorownjach lěkowanych schorjenych powjetši so na 182.
Pomoc ćěkancam na A4
Policija (08.03.22)
Štyri pincy wurumowali
Budyšin. Wjaceswójbny dom w Budyšinje na hasy Při rězarni su sej njeznaći minjeny kónc tydźenja jako cil wupytali. Kaž policija rozprawja, zadobychu so woni do štyrjoch pincow. Pokradnyli su mjez druhim štyri awtowe kolesa, mountainbike a wšelki grat. Hódnota rubizny wučinja něhdźe 2 500 eurow. Nimo toho nasta 50 eurow wěcneje škody.
