2 000 ludźi je wčera klóšterski swjedźeń w Pančicach-Kukowje ...
We wobłuku Choćebuskeho měšćanskeho swjedźenja su minjenu sobotu ...
Wjacore lěsne wohenje
Niska. (SN/JBo) Zašły kónc tydźenja je so wysokich temperaturow dla mjez druhim tež w Hornjej Łužicy, blisko Niskeje, we wjacorych lěsach paliło. Kaž rozprawja Budyske studijo sćelaka MDR, běchu mnozy wohnjowi wobornicy mjez druhim w Trjebuzu, Kózlach a pola Hórki zasadźeni. Wčera wječor mejachu wobornicy płomjena w dalokej měrje pod kontrolu. Tež pola Wóslinka dyrbjachu wobornicy lěsny woheń hašeć. Tu zamołwići samo zapalerstwo njewuzamkuja.
Z jednym z lětušich najwjetšich wohenjow maja so po podaću powěsćernje dpa tuchwilu juhozapadnje Berlina wokoło městačka Treuenbrietzen bědźić. Tam je so na 60 hektarach lěs palił. Najebać mało spadkow w minjenych dnjach, wuchadźeja zamołwići skerje z mało stracha lěsnych wohenjow. Tuž pokazuje dźensa indeks schodźenkow lěsnych wohenjow (WBI) za hornjołužiske wokrjesy kaž tež za južnobraniborske wokrjesy, kaž Hornje Błóta-Łužica, Sprjewja-Nysa a Choćebuz najniši schodźenk jedyn. Byrnjež dźensa a jutře z dešćom ličili, zarjady wobydlerjow přiwšěm wo to proša kedźbliwi być.
Krótkopowěsće (20.06.22)
Połoženje wody dla napjate
Drježdźany. Sakska chce swoje zastaranje z wodu dołhodobnje tež w krizach stabil lizarać a tak tež na doby suchoty přihotowana być. Kaž wobswětowy a ratarski minister Wolfram Günther (Zeleni) powěsćerni dpa rjekny, dyrbja za to zhromadny system mjez rěčnymi zawěrami wutwarić, zo móhli regionalne deficity wody wurunać. Tuchwilne połoženje je napjate, nic pak tak jara kaž w lěće 2020.
Třo kandidaća znowa nastupja
Zhorjelc. W rozsudnym přechodźe wólbow krajneho rady Zhorjelskeho wokrjesa 3. julija ze Sebastianom Wippelom (AfD), dr. Stephanom Meyerom (CDU) a z njewotwisnym kandidatom Sylviom Arndtom třo kandidaća znowa nastupja, zdźěli Zhorjelski krajnoradny zarjad minjeny pjatk. Kandidatka FDP Kristin Schütz je požadanje cofnyła.
Zaměrnje dźiwje swinje třěleja
Na dobro swójbow rozsudźili
Ze staršiskimi přinoškami za dźěćace dnjowe přebywanišća so zaběrali
Rakecy (JK/SN). Kóžde lěto wotliča gmejny hromadźe z nošerjemi dźěćacych dnjowych přebywanišćow zawodne kóšty tutych zarjadnišćow. Zawodne wudawki su zakład za wobličenje gmejnskeho podźěla na wudawkach za žłobik, pěstowarnju a hort, ale wosebje tež měritko za wysokosć staršiskeho přinoška.
W jězoru so njekupać
Grodk. Kupanje w Grodkowskim spjatym jězoru je wotnětka zakazane. Wotpowědne postajenje je wokrjes Sprjewja- Nysa wudał. Kaž su při přepytowanju wody zwěsćili, su so tak mjenowane módre algi nadměru rozšěrili. Kontakt z nimi móže pola čłowjeka runje tak kaž pola domjaceho skotu, na přikład pola psa, strowotniske problemy wuskutkować.
Ze wšědneho dnja fararja
Budyšin. Dźeniki fararja Bogumiła Šwjele (1897–1945) steja w srjedźišću knižneho předstajenja z přełožerku a wudawaćelku Annett Brězanec štwórtk, 23. junija, w 19 hodź. w Budyskej Smolerjec kniharni. Šwjela słuša jako redaktor, rěčewědnik a sobuzałožer Domowiny k najwuznamnišim wosobinam serbskich stawiznow. Nimo swojeho wobšěrneho skutkowanja je zapisował nimale poł lětstotka serbsko-němski wšědny dźeń a podawki tehdyšeho časa. Při tym skići tohorunja dohlady do swojeho powołanskeho a priwatneho žiwjenja.
Policija (17.06.22)
Hólc so ćežko zranił
Łupoj. Jědnaćelětny hólc bu předwčerawšim wječor při wobchadnym njezbožu we Łupoji pola Radworja ćežko zranjeny. Po informacijach Zhorjelskeje policajskeje direkcije bě wón njejapce z ležownosće na puć běžał. 60lětny wodźer Škody njemóžeše hižo spinać a do hólca zajědźe. Dźěćo dowjezechu do chorownje.
Přeprošuja na swjedźeń do klóštra
Pančicy-Kukow (SN/MWj). Klóšterski a swójbny swjedźeń Budyskeho wokrjesa wotměje so zajutřišim, njedźelu, w klóštrje Marijinej hwězdźe w Pančicach-Kukowje. Na njón přeproša abatisa Gabriela Hesse, krajny rada Michael Harig (CDU) kaž tež Budyski wokrjes, gmejna Pančicy-Kukow a Křesćansko-socialny kubłanski skutk.
W 10.30 hodź. zahaja dźeń ze swjedźenskej Božej mšu w cyrkwi. Nimo wulkich regionalnych a přirodnych wikow, na kotrychž poskićuja regionalne speciality, čakaja na wopytowarjow informaciske stejnišća a poskitki k wobdźělenju mnohich towarstwow z wokrjesa. Tak móža dźěći sakske dźěćace sportowe znamješko „Flizzi“ złožić, krosnowansku sćěnu přewinyć, so při paslenju kreatiwnje pospytać, hudźić abo so na kwisu wobdźělić.
Štóž je do wčerawšeho dešćika swoje syno do sucheho zwozył, je ...
Łakomski swjedźeń w susodstwje nastawaceho Liškowskeho jězora
Łakoma (WeM/SN). Njedawno su składnostnje 30. róčnicy wobsadźenja delnjoserbskeje wsy Łakoma (Lakoma) swjedźeń na kromje nastawaceho Choćebuskeho wuchodneho jězora wuhotowali. Renej Šuster ze Zeleneje Ligi je skupinu něhdźe 25 zajimcow po zwostatej kromje zničeneje wsy wjedł.
Wot lěta 1983 do lěta 2007 bě Łakoma sydlišćo spřećiwjenja njerozumnej energijowej politice NDR a pozdźišo tež ZRN. W swojich dwurěčnych wuwjedźenjach wopisowaše Šuster lěta wusydlenja, wobsadźenja a zničenja delnjoserbskeje wsy. Poćahujo so na mjeno nastawaceho jězora na městnje bywšeje jamy Choćebuz-sewjer spomni na to, zo běchu zamołwići mjez druhim próstwu, jězor po jednej ze štyrjoch jamy dla zničenych serbskich wsow pomjenować, wotpokazali, dokelž so jim to do koncepta zwičnjenja jězora njehodźeše. Serbja dźensa njedźiwajcy toho jězorej „Liškojski jazor“ rěkaja.
