Nowej ławce za teren wětrnika
Němcy (AK/SN). Wobydlerski etat 2022 města Wojerecy je nimale zestajeny. 904 wobydlerjow je wo nim wothłosowało, zdźěla online, zdźěla na papjerje. To rjekny předsyda dźěłoweje skupiny Uwe Blazeiczyk na zašłym posedźenju měšćanskeje rady. „Najwjace hłosow dósta namjet za dwě nowej ławce na terenje Němčanskeho wětrnika, mjenujcy 438 hłosow. Namjet ponowić schód a murju w parku Jürgena von Woyskeho dósta 271 hłosow a je tak dobyćerski namjet za nutřkowne město“, Blazeiczyk rozłoži.
Zahrody wotewrjene byli
Wojerecy (SiR/SN). Prěni raz wotmě so předwčerawšim we Wojerecach a wokolinje dźeń wotewrjeneje zahrody. 16 wobdźělnikow je zajimcam přistup do swojeje zahrody zmóžniło a so při tym wšelakim temam kaž dźiwim rostlinam, hnojidłam a wuměłskim twórbam z rostlinow wěnowało. Tale mnohotnosć je mjez wopytowarjemi dobry wothłós našła.
Drengnerec swójba z Noweje Łuki je swój z wjele lubosću wuhotowany statok spřistupniła. Tam nimaja jenož najwšelakoriše žadne rostliny, ale tež konje, psy, kóčki, nopawy a dalše zwěrjata. Hłowna tema Sigruny Jeck we Wojerecach porno tomu su róže w najwšelakorišich barbach. Wone rěkaja mjez druhim Heidi Klum a Erika Berger. Tutej a wjele dalšich plahuje Sigrun Jeck na runje 50 kwadratnych metrow małym terenje. Ze swojim wobdźělenjom chcyše wona wopytowarjam strach před ćernikami wzać a na to skedźbnić, zo móžeš je jednorišo plahować, hač sej něchtóžkuli mysli. Wo tym móžachu so zajimcy njedźelu na małym nutřkownym dworje Wojerowčanki přeswědčić.
Policija (14.06.22)
Paduch na stanowanišću
Bórk. Minjeny kónc tydźenja bě paduch na stanowanišću w Bórku při Budyskim spjatym jězoru po puću. Z bydlenskeho připowěšaka wza wón ćmowej mobilnej telefonaj sobu. Dale pokradny wón ze stana awtowy kluč, wotpowědne awto přepyta a z njeho 20 eurow spakosći. Dalšej škodowanej pobrachuje nětko jeje tablet. Dohromady nasta něhdźe 200 eurow škody. Policija pyta swědkow, kotřiž su něšto wobkedźbowali.
Mašinu zaso namakali
Rakojdy. Kolesowy nakładowak, kotryž běchu njeznaći spočatk junija w Lětonju pokradnyli, su nětko w lěsku mjez Rakojdami a Přiwćicami zaso namakali. Tehdy běchu so paduši na teren firmy podali a z twarskej mašinu płót přełamali. Jězdźidło bě někak 45 000 eurow hódne. Při namakanju pomhali su wobydlerjo kaž tež sobudźěłaćerjo škodowaneje firmy. Policija je slědy zawěsćiła a mašinu wobsedźerjam zaso wróći.
Kokoš w srjedźišću
Stróža. Mjeztym dwě lěće so zarjadnistwo biosferoweho rezerwata Hornjołužiska hola a haty prócuje, na swojim teritoriju zaso zasydlić saksku kokoš, kotraž je wot wotemrěća wohrožena. Wo dotalnych wuspěchach projekta informuja na zjawnym zarjadowanju pjatk, 17. junija, wot 14 hodź. w Stróžanskim Domje tysac hatow. Zajimcy su wutrobnje witani.
Ideje wobydlerjow prašane
Chrósćicy. Gmejna Chrósćicy nastaji tučasnje wuwićowy koncept za cyłu gmejnu. Při wudźěłanju idejow za přichod su wobydlerjo wšitkich wsow wutrobnje přeprošeni sobu skutkować. Wobydlerjo, kotřiž so za sobudźěło zajimuja, so njech hač do 27. junija na Chróšćanskej gmejnje pod telefonowym čisłom 035796/ 96 210 abo z mejlku na přizjewja.
Kwasne zwony hišće njezwonja
Zazběh gmejnskeho zjednoćenja najprjedy raz wotstorčeny
Trjebin (CK/SN). Poprawom měješe Trjebinska gmejnska rada na swojim zašłym posedźenju zahajenje gmejnskeje změny wobzamknyć. To by był start za jednanja ze Slepjanskej gmejnu wo dobrowólnym zjednoćenju. W druhim wobzamknjenju měli wuzwolić třoch radźićelow za dźěłowu skupinu, kotraž měła ramik jednanjow ze Slepom postajić. Skupinje byštaj dale wobaj wjesnjanostaj a třo Slepjanscy radźićeljo přisłušeli. Hač do kónca awgusta 2022 měješe skupina naćisk zrěčenja zdźěłać – jako zakład za wobydlerski rozsud. Termin za njón chcychu w septembru postajić.
Z gratownje wohnjoweje wobory je w minjenych lětach w Nuknicy ...
Tři nowe jězdźidła dóstali
My smy dobyli?
Krótkopowěsće (14.06.22)
Wšitcy znowa nastupja
Budyšin. Wšitcy štyrjo kandidaća wo zastojnstwo noweho krajneho rady Budyšina Udo Wićaz (CDU), Alex Theile (zhromadny kandidat Lěwicy, SPD a Zwjazka 90/Zelenych), Tobias Jantsch (swobodny kandidat) a Frank Peschel (AfD) k wólbam 3. julija znowa nastupja. W Zhorjelskim wokrjesu porno tomu njeje hišće jasne, hač wšitcy kandidaća 3. julija znowa nastupja.
Wutwarja serwis na městnje
Drježdźany. Drježdźanska rjemjeslniska komora swój serwis na městnje dale wutwarja. Wotnětka móža so rjemjeslnicy tež w Sprjewinym Dole nastupajo podpěru swojich prašenjow dla wobhonić. Poskitk wopřija wobłuki dale-a wukubłanja, dawki, prawo, personalny management, wodźenje zawoda atd. Dwójce wob měsac su fachowcy w tamnišim kompetencnym centrumje docpějomne.
Dwurěčna zběrka wušła
Poradźuje darmotnje
Budyšin. Prawiznik a wokrjesny radźićel Lěwicy Hajko Kozel poskići jutře, wutoru, wot 15 do 17 hodź. dalši raz darmotne socialne poradźowanje. Wone hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932/ 363727.
Radźićeljo wuradźuja
Pančicy-Kukow. Leaderowa wuwićowa strategija budźe jedna z temow přichodneho posedźenja gmejnskeje rady Pančicy-Kukow jutře, wutoru, w 19 hodź. we Wotrowskej starej šuli. Dale změja radźićeljo wjacore twarske naležnosće na blidźe. Mjez druhim póńdźe wo nowotwar pawiljona a a hrajkanišća na terenje bywšeho hosćenca w Pančicach.
Wokoło pomnika rjedźić
Pančicy-Kukow. Čłonojo Domowinskeje skupiny Pančicy-Kukow a dalši zajimcy su přeprošeni pomhać při rjedźenju wokoło pomnika Jakuba Barta-Ćišinskeho w Lipju. Dźěłowe zasadźenje wotměje so jutře, 14. junija, wot 17 hodź. Wobdźělnicy njech přinjesu sej kmany grat sobu. Kóžda pomocliwa ruka je witana.
