Na dworowy swjedźeń
Worklecy. We Worklecach, na tamnišej zakładnej a wyšej šuli „Michał Hórnik“, wjesela so wučerjo a šulerjo na tónle pjatk, wšako wotměja tam swój tradicionalny dworowy swjedźeń. W tymle ramiku přeproša Worklečanski hort wot 18 hodź. wšitkich zajimcow na dźeń wotewrjenych duri do zarjadnišća.
Wo instrumentach
Łaz. „Hudźbne instrumenty w změnje časa“ rěka aktualna wustajeńca w domje Zejlerja a Smolerja we Łazu. Tamniše Spěchowanske towarstwo wita zajimcow na wotewrjenje přehladki pjatk, 20. meje, we 18 hodź. Wustajeńca, kotraž budźe wot póndźele do štwórtka stajnje wot 10 do 17 hodź. wotewrjena, ma być hač do kónca julija přistupna.
Wabjacy nalětni swjedźeń
Wjesnjanosta přisahu wotpołožił
Po tym, zo je Budyski krajnoradny zarjad wólby Rakečanskeho wjesnjanosty lětsa w měrcu jako prawnisce w porjadku zastopnjował, móže Swen Nowotny swoje zastojnstwo dalšu hamtsku dobu wukonjeć.
Rakecy (JK/SN). Na wčerawšim posedźenju tamnišeje gmejnskeje rady wuzwolichu radźićeljo najprjedy zamołwiteho radźićela, kotryž přisahu a slub wjesnjanosty do zastojnstwa wotewza. Jednohłósnje wuzwolichu radźićeljo na namjet wjesnjanosty dołholětneho radźićela dr. Andreasa Weise, kotryž w krótkej formje wjesnjanosće přisahu a slub do zastojnstwa wotewza. Z tym je Swen Nowotny tež oficialnje do swojeho zastojnstwa powołany a smě a chce so naročnym nadawkam Rakečanskeje gmejny wěnować.
Policija (19.05.22)
Šmóraka grafitijow lepili
Budyšin. Na Budyskej Židowskej su policisća regionalneho rewěra wutoru po pokiwach lepili šmóraka grafitijow. 16lětny młodźenc němskeho pochada měješe z barbu pomazanej ruce. Wón bě do toho drje wjacore jězdźidła, sćěny a milinowe kašćiki z barbu napryskał. Nastata škoda wučinja něhdźe 10 000 eurow. Nětko so kriminalna słužba z padom zaběra.
Saněrowanje nimale dokónčene
Łužiska a srjedźoněmska towaršnosć za hórnistwowe zarjadnistwo (LMBV) je saněrowanje Hórnikečanskeho jězora nimale zakónčiła. Wotewrjene je saněrowanje wuchodneho brjoha, kiž bě so w lěće 2021 zesunył.
Łaz (AK/SN). Na Mučowskim pobrjohu su dźěła za wobnowjenje Hórnikečanskeho jězora w dalokej měrje wotzamknjene. Mjeztym předleži tež plan spřistupnjenja z boka towarstwa sydlerjow. Hišće lětsa ma być projekt po wjetšej měrje zakónčeny.
Dotal hišće jasne njeje, kak chcedźa při zawěsćenju a wobnowjenju wuchodneje skłoniny postupować. Tam běše zesuwanje zemje loni 11. měrca dalše dźěła tři měsacy dołho zadźeržało. „Srjedź tohole lěta chcemy jasne wuprajenja měć, kak ma dale hić“, rjekny referent Sakskeho wyšeho hórnistwoweho zarjada (SOBA) Kai Oliver Dammer. Wobhospodarićelomaj stanowanišća w Koblicach a sunshine-parka při jězoru Marlen a Ricej Gläßerej, bě to wažne wědźeć. Wšako chce LMBV wobnowjenje Kobličanskeje hrjebje ze saněrowanjom wuchodneho brjoha hnydom sobu zwoprawdźić.
Žony z dźěłom krajnoradneho zarjada jara njespokojom
Budyšin (CS/SN). Što zaběra žony w Budyskim wokrjesu? Tute prašenje chcyše njestronski kandidat za wólby krajneho rady Alex Theile ze žonami diskutować, kotrež so za runostajenje, inkluziju a prewenciju přećiwo namocy angažuja. Něhdźe dwanatk tajkich a jedyn muž běchu wčera wječor do Budyskeho hotela Best Western přišli.
Krótkopowěsće (19.05.22)
Solokoncert Jana Brězana
Drježdźany. W Němskich dźěłarnjach w Drježdźanach-Hellerauwje běchu sej wčera swojeho něhdyšeho stipendiata, studenta wučerstwa hudźby Jana Brězana přeprosyli. Wón zanošowaše na křidle najwšelakoriše twórby z jazzowymi a južnoameriskimi elementami. Rodźeny Smječkečan skedźbni publikum na swoju maćeršćinu a předstaji spěw w serbskej rěči.
Publikum Šwicarku wuzwoliło
Halle nad Solawu. Dobyćerka lětušeho wubědźowanja „Next Generation“ tele dny wotměwaceho so festiwala „Women in Jazz“ je šwicarska spěwarka Fiona Grond. Wona bu we wobłuku publikumoweho wothłosowanja ze 26 kandidatkow wuzwolena. Nominowana bě tež wokalistka Choćebuskeho duwa LeDazzo Lena Hauptmann ze serbske spěwy wopřijimacym programom.
Leopardy do Čěskeje
Policija (18.05.22)
Napity po puću był
Budyšin. Na Mosće měra w Budyšinje je policistam póndźelu rano wokoło pjećich napadnył šofer wosoboweho awta. 66lětny je, wodźo awto marki Audi, napity po puću był. Po tym, zo běchu jeho zastojnicy zadźerželi, su jeho na alkohol testowali. Při tym zwěsćichu zastojnicy pola šofera němskeho pochada 0,64 promilow. Na to zakazachu mužej dalejězbu a napisachu wozjewjenku.
Kolesowar znjezbožił
Wojerecy. Na zbožo bu kolesowar jenož lochko zranjeny, jako je wčera we Wojerecach znjezbožił. Popołdnju wokoło třoch zawiny 83lětny šofer awta typa Seat z měšćanskich wikow z Kinajchtskeje dróhi na statnu dróhu S 108. Při tym je po wšěm zdaću 70lětneho kolesowarja přewidźał a direktnje do njeho zrazył. Po zražce dowjezechu kolesowarja, kiž bu lochko zranjeny, do chorownje. Wěcna škoda na awće a na kolesu wučinja dohromady tysac eurow.
Historisku wosobinu dožiwili
Ekumeniski tachantski wobchod a Ewangelska wosada swj. Pětra přeprosyštej minjeny pjatk na 67. literarny kofej na wosadnu žurlu swj. Pětra. Tema wopokaza so předewšěm za ewangelskich wosadnych jako jara přićahliwa.
Mytowanski koncert njebudźe
Budyšin. Dobyćerski koncert 12. wubědźowanje młodych hudźbnych talentow „Serbska hudźba“ njedźelu, 22. meje, wupadnje. Koncert pak chcedźa nachwatać, zdźěli wuhotowar wubědźowanja Serbski ludowy ansambl. Přičina za postupowanje je, zo njeje wulkemu dźělej dobyćerjow móžno, so na koncerće wobdźělić. Ručež budźe nowy termin jasny, chce SLA informować.
Wjesnjanosta zmylki nječinił
Njebjelčicy. Komunalnoprawniski dohlad Budyskeho wokrjesa je po wobšěrnym pruwowanju zwěsćił, zo je Njebjelčanski wjesnjanosta jednał po zakonjach. Tež gmejnska rada je po prawje postupowała. Na internetnej stronje „wahrheit-krabat.com“ wozjewjene wumjetowanja nimaja tuž za komunalneho politikarja z wida zarjada sćěhi. Tuchwilu slědźi policija za iniciatorami poskitka w syći.
