Kupjel do priwatnych rukow
Běła Woda (AK/SN). Janska kupjel w Běłej Wodźe přeńdźe do priwatneho nošerstwa. Tole je měšćanska rada na swojim zašłym posedźenju jednohłósnje wobzamknyła. Kupjel nawjeduje přichodnje gastronom Steffen Laube. Rodźeny Choćebužan skutkowaše dołhi čas w Berlinje a bydli nětko w Krušwicy. Jeho koncept předwidźi, zhromadnje z kupjelu tež lodowu kofejownju wobhospodarjeć. Nimo kofeja a lodu chce tam tež pizzu předawać. Dźěćace narodniny, kinowe předstajenja pod hołym njebjom a koncerty chcedźa tam tohorunja wotměwać.
Steffen Laube chce kupjel takrjec jako pospyt najprjedy wot 1. junija hač do kónca lěta nawjedować a hakle potom zasadny koncept wobhospodarjenja předpołožić. Wot 1. julija hač do 31. awgusta budźe kupanje móžne. Město Běła Woda připłaći jako přiražku maksimalnje 15 000 eurow. „Tajka atrakcija kaž kupjel wosrjedź města dyrbjała komunje tule sumu pjenjez hódna być. Kupjel je tež za turistow atraktiwna“, praji nowy wobhospodar Janskeje kupjele.
Rekordnu ličbu 145 mopedow a motorskich zličichu předwčerawšim na ...
800lětne jubileje zahajili
Krótkopowěsće (03.05.22)
Dźesać lět kontaktny běrow
Wrocław. Ze swjedźenskim zarjadowanjom su wčera wječor dźesaćlětne wobstaće kontaktneho běrowa Sakskeje we Wrocławju woswjećili. Jednaćelka Judith Šołćina sposrědkowa nawodźe zastupnistwa zbožopřeća Domowiny. Wona, direktorka Budyskeho Serbskeho muzeja Christina Boguszowa a referent Domowiny za kulturu a wukraj Clemens Škoda su Serbow tam zastupowali.
Spad bjezdźěłnosće dale traje
Budyšin. Wo dalšim spadźe bjezdźěłnosće we wuchodnej Sakskej rozprawja dźensa Budyska wotnožka Zwjazkoweje agentury za dźěło. W měsacu apryl bě tu 16 912 bjezdźěłnych, 569 (-3,3 procenty) mjenje hač w měrcu. 1 300 wosobow je zaso přistajenje našło. Firmy dale jara za nowymi dźěławymi pytaja, wosebje w předźěłacym přemysle, strowotnistwje, socialnistwje a we wikowanju.
Dźeń a mjenje natyknjenjow
Policija (02.05.22)
Tójšto alkohola pili
Budyšin. Posledni dźeń apryla bě po wšěm zdaću na wjacorych městnach z wjele alkoholom zwjazany. W Budyšinje 58lětny muž z kolesom hižo runowahu dźeržeć njemóžeše a padny. Pola njeho naměrichu 2,56 promilow alkohola w kreji. W Kulowcu měješe 63lětna žona 0,66 promilow intus. To pak jej dosahaše, zo swój e-bike hižo pod kontrolu njeměješe a runje do policajskeho awta zajědźe. A w Hamoru je w nocy na njedźelu k bijeńcy mjez mužomaj w starobje 19 a 25 lět dóšło. Pola staršeho naměri policija 2,5 promilow alkohola.
Porěča z kandidatom
Kamjenc. Rozmołwa wo serbskich prašenjach z kandidatom za wólby Budyskeho krajneho rady Alexom Theilu wotměje so srjedu, 4. meje, w 19 hodź. w Kamjenskim běrowje Lěwicy na Budyskej čo. 8. Wječor skići móžnosć, so wo předstawach kandidata wosebje tež k serbskim naležnosćam a prezency serbskeje rěče w Budyskim wokrjesu a we wokrjesnym zarjadnistwje dorozumić. Na zarjadowanje přeprošuje dźěłowy kruh Serbja pola SPD.
Předpředań zaběžała
Budyšin. Wot wčerawšeho předawaja zastupne lisćiki za Łužiske hudźbne lěćo 2022. Na programje steji dwanaće zarjadowanjow w Budyšinje a wokolinje wot 12. do 28. awgusta. Dospołny program nadeńdu zajimcy internetnje pod . Lisćiki poskićuja w Budyskim měšćanskim zarjadnistwje kaž tež w Žitawje, Njeswačidle, Chróstawje a Großschweidnitzu.
Serbska hudźba w Lipsku
Nowonarodźene dźěći witali
Wo kupjeli zjawnje diskutować
Kamjenc (BG/SN). Hižo lětdźesatki zaběra wobydlerjow Kamjenca a wokoliny wosud Kamjenskeje płuwanskeje hale. 38 šulow z Lessingoweho města a cyłeho regiona wužiwa kupjel za płuwansku wučbu. Tež wuchodosakske płuwanske towarstwo ma tu swój domicil. Kupjel pak ma swoje najlěpše časy dawno za sobu. Natwarjena bu wona w 1970tych lětach předewšěm tohodla, zo móhli wojerscy piloća přežiwjenje we wodźe po njezbožach zwučować.
Bórze njewotwisne zastaranje
Ze solarnej připrawu chce gmejna swoje wudawki trajnje znižić
Njebjelčicy (SN/JaW). Towaršnosć „Łužiska přiroda a energija“, kotraž ma swoje hłowne sydło w Njebjelčicach, smě na třěše Njebjelčanskeho gmejnskeho centruma fotowoltaikowu připrawu instalować. To je gmejnska rada na swojim minjenym wuradźowanju štwórtk z wjetšinu hłosow rozsudźiła.
Do toho běštaj čłonaj předsydstwa towaršnosće Elke Altmann a Wolgang Giese rozłožiłoj, što planuja. Hladajo na stupace kóšty za milinu – tuchwilu wšak wójny w Ukrainje dla hišće spěšnišo stupaja – je planowane z fotowoltaikowu připrawu krok po kroku cyły gmejnski centrum awtarknje z milinu zastarać. Započeć chcedźa tak spěšnje kaž móžno za prěni dźěl připrawy něhdźe 30 kwadratnych metrow třěchi z modulemi wuhotować. „Produkowanu milinu pak składujemy pak direktnje w centrumje wužiwamy, bjez toho zo ju přez cuze milinowody wodźimy. To lutuje kóšty. Hdyž wjace miliny produkujemy hač přetrjebamy, dodawamy nadbytk do syće“, rozłoži Wolgang Giese.
Poradźeny zazběh w młynje
Na mnohich městnach su so ludźo kónc tydźenja wjeselili, zo móžachu zaso raz rjanu zabawu dožiwić. To bě sobotu při chodojtypalenju runje tak pytnyć kaž wčera na nalětnim swjedźenju.
Čorny Chołmc (SiR/SN). Rjany a dołho wočakowany wobraz skićeše so wčera w Čornochołmčanskim Krabatowym młynje: spokojni wopytowarjo, wjele přećelnych słowow a najlěpša nalada, a to při wulkotnym nalětnim wjedrje. Bjez dźiwa, zo jednaćel Tobias Čižik nalětni swjedźeń rjany zazběh lětušeho programa zarjadowanjow mjenowaše. „Wjeselimy so, zo je po dwěmaj lětomaj koronoweje přestawki zaso wjele wjerškow móžnych, kaž na přikład Krabatowe swjedźenske hry a dalše podawki.“
Prěni raz bě wčera Orchester łužiska brunica z hosćom w Krabatowym młynje. 35 hudźbnikow chce tam přichodnje časćišo přijěć. Wo tym hižo dlěje rozmysluja. Dotal pak so plan korony dla zwoprawdźić njehodźeše.
