Dalše koło za rozsud trěbne
Kandidat SPD Torsten Ruban-Zeh je drje prěni přechod wčerawšich wólbow wo zastojnstwo Wojerowskeho wyšeho měšćanosty dobył, přiwšěm dyrbja Wojerowčenjo 20. septembra hišće raz wolić. Žadyn z pjeć kandidatkow a kandidatow njebě trěbnu wjetšinu hłosow dóstał, kaž z nachwilneho wólbneho wuslědka wuchadźa.
Wojerecy (SN/JaW). Torsten Ruban-Zeh je prěnje koło wólbow Wojerowskeho wyšeho měšćanosty dobył, nažnjawši 31,8 procentow. Njestronska kandidatka wólbneho zwjazka Lěwicy, Zwjazka 90/ Zelenych a zwjazka Aktiwne Wojerecy Dorit Baumeister dósta 27,8 procentow, Marco Gbureck wot AfD dósta 18,5 procentow, kandidatka CDU Claudia Florian 11,7 procentow a njewotwisny jednotliwy kandidat Dirk Nasdala 10,2 procentaj. Za wuspěch maja wobdźělenje na prěnim kole wólbow. Z cyłkownje 52,9 procentami je jasnje wjac ludźi woliło hač před sydom lětami. Tehdy wobdźěli so na prěnim wólbnym přechodźe jeno 38,7 procentow wólbokmanych.
Krótkopowěsće (07.09.20)
AfD dale rozrostuje
Podstupim. Ličba potencielnych prawicarskich ekstremistow w Braniborskej je – tež podhladnych padow AfD dla – wot 1 675 w lěće 2018 na loni 2 765 rozrostła a dotal najwyši staw docpěła. To wuchadźa z rozprawy wustawoškita, kotruž staj nutřkowny minister Michael Stübgen (CDU) a šef zarjada Jörg Müller dźensa w Podstupimje předstajiłoj.
Komisija za přichod ratarstwa
Berlin. Knježerstwowa komisija, kotraž ma po dołhej zwadźe konsens za přichod ratarstwa w Němskej namakać, je so dźensa připołdnju w Berlinje prěni raz schadźowała. Předewšěm dźe jej tež wo wjace přirodoškita, wo lěpše wuměnjenja w chlěwach a hródźach wo mjenje boja nastupajo płaćizny žiwidłow. Ratarski zwjazk wočakuje konstruktiwne zhromadne dźěło w gremiju.
Zeleni za dalewobstaće Miłoraza
Finisaža dźěłarnički
Miłoćicy. Z předfinisažu jutře, sobotu, wot 17 hodź. a z finisažu njedźelu wot 10 hodź. skónči so 14. mjezynarodna rězbarska dźěłarnička při Miłočanskej skale. Tam móža sej zajimcy na woběmaj dnjomaj wobhladać, što je šěsć wuměłcow minjeny čas stworiło. K tomu poskića hudźbu, akcije za dźěći a dalše programowe dypki. Tež wo ćělne derjeměće wopytowarjow budźe postarane.
Koncertujetaj na dworje
Budyšin. Gitarist Tim McMillan a wiolinistka Rachel Snow koncertujetaj jutře wot 20 hodź. na dworje Budyskeho Kamjentneho domu. Wonaj předstajitaj njewšědny miks stilow kaž celtic rock, folk, metal a jazz. Při wječornej kasy płaći zastup sydom eurow. Hdyž so dešćuje, budźe koncert na žurli Kamjentneho domu.
Na kermušny kofej
Policija (04.09.20)
Zhubjeneho namakali
Stróža. Po nimale štyrjoch tydźenjach su wčera popołdnju w Olbje pola Stróže w Malešanskej gmejnje pytanje za zhubjenym mužom skónčić móhli. Wokoło 14 hodź. nurjerjo jeho ćěło nańdźechu. Wone ležeše něhdźe 150 metrow wot přibrjoha zdalene we hłubokosći 21 metrow. 10. awgusta bě so 44lětny hromadźe z mandźelskej k sportowemu płuwanju na jězor podał. Na poł puća měješe wón najskerje strowotny problem a chcyše wróćo k přibrjohej płuwać. Wot toho dnja policisća a wohnjowi wobornicy za zhubjenym pytachu. Zasadźili su tohorunja nurjerjow, policajske psy, helikopter a na kóncu trut za nurjenje. Policija chcyše dźensa nadrobniše informacije wozjewić.
Awto z partnerskeje gmejny
Pěskečanscy wohnjowi wobornicy dóstanu jězdźidło, ale nic nowe
Miłoćicy (SN/MWj). Dokelž ničo wěčnje njedźerži, je tež raz hašenske jězdźidło wohnjoweje wobory dodźeržane a dyrbja z hinašim narunać. Nowe financować pak je zwjetša komplikowana naležnosć. Wšako dóstawaja komuny při płaćiznach mjez 200 000 a 400 000 eurami jeno dźěl spěchowany, tak zo trjebaja šwarny swójski podźěl. Tohodla je mjeztym z wašnjom, zo wobstaruja sej trjebane jězdźidło. Tak čini to nětko tež Njebjelčanska gmejna za Pěskečanskich wohnjowych wobornikow.
Krótkopowěsće (04.09.20)
Hotuja so na europeadu
Pančicy-Kukow. Zamołwići serbskeju koparskeju wubrankow su wčera wo dalšich přihotach na přichodnu europeadu wuradźowali. Signale ze stron zarjadowarja su jasne, zo přewjedu europski mjeńšinowy turněr klětu srjedź junija w Korutanskej, dalokož to situacija koronapandemije dla dowoli. Najebać chětro połne hrajne plany w ligach planujetej wubrance nazymu wjacore zetkanja.
Kontaktnej wosobje pozitiwnej
Budyšin. Znowa stej so dwě kontaktnej wosobje w Budyskim wokrjesu natyknyłoj, jeju koronatestaj běštej pozitiwnej, kaž strowotniski zarjad dźensa zdźěli. Aktualnje je 19 schorjenych. 80 wobydlerjow (+15) dyrbi w karantenje wostać. W Budyskim wokrjesu běchu w běhu minjenych sydom dnjow w jědnaće padach koronawirus zwěsćili.
Praktiske prašenje rozjimali
Policija (03.09.20)
Wjetšu plantažu planowali
Budyšin. Kedźbliwi zastojnicy kriminalneje słužby su předwčerawšim w Budyšinje konopjowu plantažu wuslědźili. Rostliny stejachu na balkonje wjaceswójbneho domu. Na přepytowanju bydlenja, wot hamtskeho sudnistwa přikazanym, njenamakachu jenož wone šěsć rostlin na balkonje, ale tež štyri dalše k sušenju powěsnjene. Dale bě w bydlenju wjetše mnóstwo konopjoweho symjenja. Kaž wobydlerjo policistam sami powědachu, chcychu konop na wjetšej plantaži dołhodobnje plahować. Z toho nětko ničo njebudźe, přetož zastojnicy wšitko sćazachu. Město toho změja so potrjecheni na sudnistwje za swoje přeńdźenje zamołwić.
Hordosć na Łužicu a na serbsku rěč budźić
Němcy (AK/SN). 20 dwurěčnych T-shirtow je tele dny Němčanska Witaj-pěstowarnja „Pumpot“ w nošerstwje Serbskeho šulskeho towarstwa darjene dóstała. Přepodałoj staj je zamołwita za serbske naležnosće města Wojerec Gabriela Linakowa a Madeleine Matschke z marketingoweho towarstwa Swójbny region Hoy. Na T-shirtach steji mjez druhim „Něžny jandźel z Wojerec“.
Ideju měješe měšćanski marketing, kotrehož akterojo chcedźa tež serbsku rěč a identitu w měsće skrućić. „Smy swójbny region a chcemy, zo dalše swójby do Wojerec přićahnu“, rozłožuje Madeleine Matschke. Kóžde we Wojerecach nawonarodźene dźěćo tajki dwurěčny T-shirt abo lack dóstanje. Dohromady maja tuchwilu 700 na składźe, štož něhdźe lěto dosaha.
Kupjel zaso wočinjena
Zachowuja bohatosć regiona
Nimo wulkich nadregionalnych a w medijach prezentnych serbskich towarstwow mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Slepjanske towarstwo Kólesko (18).
W decembrje 2012 je dwanaće zajimcow towarstwo Kólesko załožiło. Za předsydu wuzwolichu Hartmuta Hanča. Agilnemu cyłkej přisłuša dźensa 18 čłonow. Woni chcedźa kulturne herbstwo hajić, zachować a zjawnosći widźomnje předstajeć. Jako dalše ćežišća skutkowanja sej zapisachu, dokumentować a publikować slepjanšćinu. Tež drastu tamnišeho regiona k najwšelakorišim składnosćam w zjawnosći pokazać. Hajić a zachować bohatosć ludowych spěwow a tradicionalneje typiskeje hudźby je towarstwu runje tak wažne kaž pěstować nałožki a tradicije. Nimo toho dokumentuja kulturne stawizny a baje spřistupnja zjawnosći bajki, přisłowa a powědki.
