Ingo Adam, prezident Radworskeho sportoweho towarstwa 1922 (nal.) a ...
Registrowanje ćěkancow pospěšić
Zhorjelc (AK/SN). W Zhorjelskim wokrjesu je dale wulka solidarita z ukrainskimi ćěkancami. Pomocne organizacije, cyrkwje, towarstwa, zwjazki a wobydlerjo tuchwilu imensne dźěło wukonjeja. Za to so jim Zhorjelski krajny rada Bernd Lange (CDU) minjenu srjedu na nowinarskej rozmołwje wutrobnje dźakowaše. W přizjewjenskim portalu wokrjesa, kotryž zamołwja wuwićowa towaršnosć ENO Zhorjelskeho wokrjesa, je tuchwilu 1 400 přebywanišćow z 5 400 łožemi registrowane. Wokrjes přihotuje zhromadnje z bydlenskimi towaršnosćemi wotpowědne ramikowe zrěčenja. „Trjebamy nětko podpěru hladajo na wuhotowanje bydlenjow. W tymle wobłuku ma so pomoc nětko koncentrować“, so krajny rady z apelom na pomocne organizacije, towarstwa, zwjazka a wobydlerjow wobroći.
Krótkopowěsće (11.04.22)
Na jutrownym seminarje
Åbenrå/Apenrade. Nimale 70 młodostnych ze wšeje Europy přebywa hač do pjatka na lětušim jutrownym seminarje Młodźiny europskich narodnych mjeńšin MENS. Třo čłonojo młodźinskeho towarstwa Pawk zastupuja tam Serbow. W srjedźišću seminara pola němskeje mjeńšiny w Danskej na Knivsbergu steja stawizny němsko-danskeje namjezneje kónčiny a kritiske myslenje młodostnych. Pjatk wotměja tam hłownu zhromadźiznu MENS.
Snadnje zwyšena incidenca
Budyšin. Přez kónc tydźenja je incidenca w Hornjej Łužica znowa snadnje stupała. Roberta Kochowy institut (RKI) je dźensa za Budyski wokrjes hódnotu 974,1 podał a zdobom wo 408 natyknjenjach z koronawirusom informował. Incidenca we wokrjesu Zhorjelc je po RKI 795,0. Tamniši strowotniski zarjad je minjeny pjatk wo dalšich 348 infekcijach a smjertnymaj padomaj rozprawjał.
Potuńši so bencin w Čěskej?
Policija (08.04.22)
Wudźerja wobkradnyli
Budyšin. Na Budyskej Njekowej dyrbješe wobydler wutoru popołdnju zwěsćić, zo bě něchtó jeho wudy, saki, kumštne wudźenki a wjele dalšeho wudźerskeho wuhotowanja z pincy wjaceswójbneho domu pokradnył. Kaž policija zdźěli, je wuhotowanje nimale 4 000 eurow hódne. Dalša škoda po wšěm zdaću nastała njeje. Kriminalna policija pad přepytuje.
Ponowjeny gmejnski swjaty křiž we Worklecach je Chróšćanski ...
Mjenje padustwow
Zhorjelc (UM/SN). Worklecy wostanu kupa zbožownych. Z tak mjenowanej ličbu častosće 540 steji serbska gmejna na poslednim městnje kriminalneje statistiki Zhorjelskeje policajskeje direkcije za lěto 2021. Ličba poda, kelko njeskutkow, wobličene na 100 000 wobydlerjow, bu w běhu lěta w gmejnje zličenych. W absolutnej ličbje bě to we Worklecach runje šěsć. Na druhim a třećim městnje wotzady sćěhuja Chrósćicy (783) a Njebjelčicy (911). Cyle hinaše je połoženje w Kodersdorfje pola Zhorjelca. Tam zwěsćichu – tohorunja na 100 000 wobydlerjow wobličene – 16 464 njeskutkow. Tule ličbu zamući pak tankownja při awtodróhowej wotbóčce, hdźež wjele policajskich aktiwitow přewjedu a njeskutki zwěsća, kotrež z městnosću ničo činić nimaja, nawoda referata za bój přećiwo kriminaliće Zhorjelskeje policajskeje direkcije Bernhard Graul rozłoži.
Něhdźe 170 ukrainskich ćěkancow je so wčera na Budyskim hłownym ...
Krótkopowěsće (08.04.22)
Bórze nowa wersija app Sotra
Budyšin. Nowa wersija serbskeje přełožowanskeje app Sotra ma w meji přistupna być. To bě wčera we wobłuku online-zarjadowanja Załožby za serbski lud wo wužiwanju aktualnych móžnosćow, serbske teksty do druhich rěčow přenjesć, zhonić. Nowy system změje neuronalny zakład, tak je eficientniši hač dotalny na statistiskej bazy. Hišće w běhu lěta app wo delnjoserbšćinu rozšěrja.
Kampanja za wučerjowy dorost
Drježdźany. Pod hesłom „LEHRERIN SACHSEN – eine Klasse für sich“ je sakske ministerstwo za kultus nowu kampanju zahajiło. Z njej chcedźa nuznje trjebany dorost za powołanje wučerja wabić. Woprašowanja su zwěsćili, zo 18- do 25lětni w Sakskej skeptisce na wučerstwo hladaja. Woni widźa tam skerje mało postupnych šansow, mało česćenja, stres a karjeru bjez wulkeho wuwića hač do renty.
Incidenca woteběra
Policija (07.04.22)
Wjace škody hač rubizny
Wojerecy. Tójšto škody načinili su njeznaći w času wot póndźele popołdnja do wutory dopołdnja we Wojerowskim zahrodkownišću na Brězowym puću. Tam zadobychu so do sydom twarjenjow. Pokradnyli su kable a pisany metal. Łamachu zamk duri, při tym nasta něhdźe 10 000 eurow wěcneje škody. Rubizna bě po informacijach policije 500 eurow hódna.
Hałzy wotedać
Njebjelčicy. Zo njebychu hromady chodojtypalenja lětsa přewulke byli, poskićuje Njebjelčanska gmejna zaso wosebity serwis. Wobydlerjo móža swoje wurězane hałzy z přeměrom hač do dźesać centimetrow sobotu, 9. apryla, wot 9 do 15 hodź. na dwór komunalneho twarskeho zawoda přiwjezć. Tam je roztřěskaja a za komunalne zaměry dale wužiwaja.
Poradźuje darmotnje
Budyšin. Prawiznik Hajko Kozel poskići póndźelu, 11. apryla, wot 15 do 16.30 hodź. dalši raz darmotne socialne poradźowanje. Tematiskej ćežišći budźetej aktualne dźěło- a socialnoprawniske wuskutki koronapandemije. Tola tež dalšim wobłukam chce so Kozel wěnować, maja-li zajimcy hinaše prašenja. Poradźowanje hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932/ 363727.
