Z jěduceho awta skočił

Budyšin. Wobsedźer bydlenskeho mobila w Drježdźanach informowaše sobotu wječor policiju, zo bě jón něchtó pokradnył. Zastojnicy wuhladachu jězdźidło na awtodróze A 4 pola Budyšina a chcychu je zadźeržeć. Paduch pak signale ignorowaše a město toho wotboka do policajskeju awtow zrazy, zo njemóhli jeho zastojnicy dale přesćěhać. Dokelž pak njebě wuspěšny, rozsudźi so za riskantny manewer. Wón swoju spěšnosć pomjeńši a z jěduceho bydlenskeho mobila skoči. Tón hišće něšto metrow dale jědźeše, prjedy hač jón policajske awto zadźerža. Paduch pak z awtodróhi ćekny a so do ćmy zhubi. Při pytanju za nim zasadźichu nimo helikoptera tež policajskeho psa, njemóžachu pak skućićela namakać. Na dwěmaj policajskimaj jězdźidłomaj a na by­dlenskim mobilu nasta něhdźe 25 000 eurow škody.

Pančicy-Kukow (SN/MWj). Dobru powěsć měješe wjesnjanosta Pančic-Kukowa Markus Kreuz (CDU) na njedawnym posedźenju gmejnskeje rady we Wotrowje. Po jeho słowach dóstanu dalši wu­twar syće pitnje wody spěchowany, a to za Žuricy, Hłupońcu (Glaubnitz), Kašecy a Časecy. Jedna so wo spěchowanje we wobjimje 65 procentow cyłkownych twarskich kóštow. Za twar maja nětko dwě lěće chwile. Hač do kónca lěta 2024 dyrbja spěchowanske srědki wotličić. Hdy dokładnje twarić započnu, dotal hišće wěste njeje. Najprjedy chcedźa z potrjechenymi wobydlerjemi dorěčeć, hdźe dokładnje budźe wodowód kładźeny. Mjenowane štyri wsy su poslednje w gmejnje, kotrež budu syći pitnje wody přizamknjene. Loni zwoprawdźichu to w Ka­necach, Swinjarni a Jaworje. Tež w tychle wsach dósta gmejna Pančicy-Kukow twarske dźěła spěchowane.

Radźićeljo Kulowski hospodarski plan 2022 jednohłósnje schwalili

Kulow (AK/SN). Klětu chce město Kulow předewšěm do wohnjowoborneje gratownje a do lěsneje kupjele inwestować. Tež kolesowansku šćežku wot Brěžkow do Mučowa budu planować. Tele ćežišća předwidźi hospodarski plan města za lěto 2022, kotryž su měšćanscy radźićeljo na swojim zašłym posedźenju jednohłósnje schwalili. „Dobra powěsć je, zo so sadźby za ležownostny a za přemysłowy dawk njezměnja“, podšmórny měšćanosta Markus Posch (CDU). „Špatna powěsć porno tomu je, zo připowědźene přidatne dawkowe dochody dotal do měšćanskeje kasy dóšli njejsu.“

Za nowotwar wohnjowoborneje gratownje předwidźi hospodarski plan 1,439 milionow eurow. 979 000 eurow z toho su spěchowanske srědki. Za wuhotowanje de­po­ta maja 100 000 eurow k dispoziciji, połojca toho je spěchowana. A za wuhotowanje wobornikow móža 40 000 eurow wudać. Tule sumu pak město same zapłaći.

Domizniske towarstwo Droždźij-Worcyn je ze saněrowanjom žurle w towarstwowym domje wulki projekt zwoprawdźiło. Wuslědk móže so widźeć dać. Nětko pak dyrbja derje hospodarić.

Droždźij (UM/SN). Mała a wot wulkich dróhow zdalena wjes Droždźij (Drehsa) ma zaso swjedźensku žurlu, kaž ju jenož mało wsow tejele wulkosće ma. Zmóžniło je to hibićiwe domizniske towarstwo Droždźij-Worcyn. Wone je skerje njenahladnu žurlu na hotowu parličku skuzłała, štož je jeho čłonam někotružkuli šědźiwu włosu wunjesło, měni Vincenz Neumann z předsydstwa towarstwa.

W lěta 1898 natwarjenym hosćencu běchu pozdźišo w reprezentatiwnym domje wosrjedź wsy za čas NDR gmejnske zarjadnistwo, wobchod, rěznistwo a lěkarska praksa zaměstnjene. Wot 1995 ma tu kulturne a domizniske towarstwo swoje sydło, kotrež dom wot lěta 2004 wot města Wósporka wotnaja. Twar pak bě tehdy w špatnym stawje. Wot lěta 2011 přewjedźechu tuž wjacore mjeńše twarske naprawy, a te je towarstwo zwjetša same zapłaćiło. Mjez druhim ponowichu třěchu, zatwarichu nowe wokna a modernizowachu kuchnju a nuzniki.