Běrokratiske puće zaso raz dołhe
Chrósćicy (SN/MWj). Zo sej druhdy tež małe twarske naprawy šwarny čwak běrokratije žadaja, dyrbjachu čłonojo Chróšćanskeje gmejnskeje rady na swojim wčerawšim posedźenju znowa nazhonić. We wobłuku twarskich naležnosćow woni schwalichu, zo smě so na terenje bywšeje pěstowarnje při Satkuli tak mjenowana calisthenics-připrawa natwarić. Z tym chcedźa wudospołnić areal, hdźež su w zašłymaj lětomaj staru pěstowarnju wottorhali a nowu grilowansku hětu kaž tež hrajkanišćo natwarili. Předewšěm wjesna młodźina sej nastroje přeješe, z kotrymiž hodźa so ćěłozwučowanja přewjesć.
Wosebity třiróžk za oldtimery
Jězdźidła pojědu w Bóščanskej gmejnje na dobro ćežko schorjenych dźěći
Bóšicy (SN/MiR). Nimale lěto dźěła Bóščanski wjesnjanosta Stanij Ryćer (rjemjesło Bóšicy) za to, zo by so lětsa zaso wotměła jězba po tak mjenowanym Bóščanskim třiróžku. Doskónčne přizwolenje za tónle wjeršk w gmejnje dóstać njebě scyła lochko. Wšako dyrbjachu zamołwići mnohe zadźěwki přewinyć. Na zašłym posedźenju gmejnskeje rady pak Ryćer gmejnskim radźićelam zarjadowanje připowědźi a tež to, zo přewozmje za nje zastupowacy krajny rada Budyskeho wokrjesa Udo Wićaz (CDU) kmótřistwo.
Pomoc z Budyšina do Lwowa dóšła
Krótkopowěsće (22.04.22)
Juristiske přepruwowanje
Lipsk/Zhorjelc. Wokrjes Zhorjelc da předpisy ze sakskeho zakonja wo zarunanju financow, posledni raz změnjeneho loni 31. měrca, wot wustawoweho sudnistwa w Lipsku přepruwować. Wokrjes widźi so zranjeny w swojim prawje samozarjadnistwa a měni, zo swoje wustawoprawnisce kazane financielne minimalne wuhotowanje zaručene njeje. To wustawowe sudnistwo wčera zdźěli.
Incidenca dale pod 500
Budyšin. Z hódnotomaj 494,6 w Budyskim a 335,7 w Zhorjelskim wokrjesu je incidenca po Roberta Kochowym instituće dźensa w Hornjej Łužicy dale pod 500. RKI je za wokrjes Budyšin 524 natyknjenjow z koronawirusom a smjertnej padaj podał. Wokrjes Zhorjelc rozprawješe wčera wo 274 infekcijach a třoch zemrětych schorjenych z doby 9. do 16. apryla.
Dźeniki Šwjele w LND wušli
Čertowy kamjeń trochu rjeńši
Policija (21.04.22)
Paducha přejěł
Čorny Chołmc. Zwěrjeći paduch kokoše je předwčerawšim wječor swój njeskutk ze žiwjenjom zapłaćił. 39lětny muž bě ze swojim wosobowym awtom typa VW Touran na zwjazkowej dróze B 97 wot Čorneho Chołmca do Njedźichowa po puću, jako liška wotlěwa doprawa puć přeprěči a do awta zaběža. Zwěrjo na městnje njezboža slakny. Liška bě sej krótko do toho kokoš popadnyła a měješe ju při zražce hišće w klamje. Na awće nasta 500 eurow škody.
Zaběraja so ze zelemi
Smjerdźaca. Pod nawodom pedagogowki za hojenske rostliny a zela Reginy Krawcoweje poskićitej Serbske šulske towarstwo a Kubłanske srjedźišćo LIPA zelowe wuchodźowanja kołowokoło Smjerdźaceje, Łazka, Róžanta a Smječkec. Při tym sposrědkuja přehlad wo domizniskich hojenskich rostlinach a zelach, jich skutkowanju a móžnosćach wužiwanja. Prěnje terminy su 28. apryla w Smjerdźacej, 19. meje we Łazku a 23. junija w Smječkecach. Poskitk wotměje so stajnje wot 17 do 19 hodź. Dalše terminy sćěhuja. Přizjewjenja přijimuja hač do 27. apryla e-mailnje pod abo pod telefonowym čisłom 0172 7811959. Wobdźělenje na wuchodźowanju płaći wosom eurow.
Startuja do sezony
Na dźěłarničku a finisažu do muzeja
Budyšin (SN). Dźěłarničku fotografije přewjedźe Budyski Serbski muzej sobotu, 23. apryla, wot 10 do 14 hodź. Nawjedować budźe ju wuspěšny Hamburgski fotograf Jörg Müller. Dźěłarnička orientuje so na temje wosebiteje wustajeńcy „5 x Němska po wšěm swěće. W špihelu migracije“ z ćežišćom domizna, migracija, mnohotnosć. K tomu maja fota nastać, kotrež w kursu prezentuja a wuhódnoćeja. Při tym posrědkuje Jörg Müller wědu a praktiske nałožowanje fotografowanja. Kurs je za zajimcow z dobrej kameru, kotrymž je wobchad z fotowym aparatom a fotografiju znaty. Přizjewjenja přijimuja e-mailnje pod adresu abo pod telefonowym čisłom 03591 2708700. Wobdźělenje płaći na wosobu 15 eurow.
Dale přeprošuje Serbski muzej na finisažu mjenowaneje wosebiteje wustajeńcy njedźelu, 24. apryla, w 15 hodź. K tomu porěči fotograf Jörg Müller wo dožiwjenjach a zaćišćach na swojich wotkrywanskich jězbach, hdźež je so jemu poradźiło, němske žiwjenje na pjeć kontinentach fotografisce zapopadnyć. Wšitcy su na finisažu přehladki wutrobnje witani.
Nowe wjednistwo powołali
Rakečanska wohnjowa wobora so technisce a personelnje wuwiła
Rakecy (JK/SN). Na zašłym posedźenju Rakečanskeje gmejnskeje rady dźakowaše so wjesnjanosta Swen Nowotny (CDU) spočatnje nawodźe gmejnskeje wohnjoweje wobory Sörenej Johansonej, kotryž je dotal gmejnsku kaž tež Rakečansku wohnjowu woboru runočasnje nawjedował. Z dobropisom za fitnesowe studijo a čestnym wopismom jeho spušćomne a spomóžne dźěło na dobro gmejny zdoraznichu.
Při wólbach gmejnskeje wohnjoweje wobory w měrcu bu nowe wjednistwo wuzwolene. Na minjenym posedźenju gmejnskeje rady powoła wjesnjanosta nawodu a jeho zastupjerja do jeju zastojnstwow. Nowy nawoda je Stefan Ziesch, jeho zastupuje Frank Schimank. Woběmaj wupřa Swen Nowotny wjele wuspěcha při spjelnjenju jeju zamołwiteho čestnohamtskeho dźěła. Při tym pokaza na to, kak derje je so gmejnska wohnjowa wobora w minjenych lětach technisce kaž tež po personalu wuwiła a je so stała ze spušćomnym garantom za wěstotu, ale tež za pomoc při mnohich gmejnskich zarjadowanjach a akcijach na dobro wobydlerjow.
Sulšečan z tójšto zamołwitosću
Wot měrca wuhladaš w Kulowskej radnicy mjez sobudźěłaćerjemi nowe wobličo. Frank Kral ma tam najwšelakoriše nadawki w twarskim wotrjedźe. Nimo toho je wón nawoda měšćanskeho zawoda za wopłóčki.
Kulow (AK/SN). 5 225 domjacnosćow w centralnej wopłóčkowej syći, 170 domjacnosćow Koćinskeje rostlinskeje wodočisćernje a něhdźe tysac domjacnosćow z małej biologiskej čisćenskej připrawu Frank Kral ze swojimi sobudźěłaćerjemi zamołwja. Jako nawoda měšćanskeho zawoda za wopłóčki ma Sulšečan wot měrca najwšelakoriše nadawki zmištrować. Nimo toho je 47lětny zastupowacy twarski nawoda Kulowa. Dale je wón w radnicy prěni muž hdyž jedna so wo naležnosće wohnjowych woborow.
