Krótkopowěsće (05.04.22)
Ukrainjanka wuwučuje
Worklecy. Na Worklečanskej zakładnej šuli „Michał Hórnik“ wuwučuje wot dźensnišeho Ukrainjanka. Wučerka, kotraž dyrbješe z domizny ćeknyć, wuwučuje předewšěm štyrjoch šulerjow, kotřiž hižo na tutu šulu chodźa, w jich maćeršćinje. Wona je wukubłana pedagogowka za zakładne šule. Sama wuknje wona ze šulerjemi w regularnej wučbje němčinu.
Poda so lětsa na wuměnk
Wojerecy. Wot lěta 2000 organizuje Carmen Hoffmann Wojerowske hudźbne dny. Lětuši 55. festiwal je za nju zdobom čas rozžohnowanja. W awgusće poda so w Serbskim wučerskim wustawje w Budyšinje wukubłana na wuměnk. Jeje naslědnica je Christiane Vogel, kotraž hižo wjele lět dorostowe wubědźowanje „Młodźina hudźi“ organizuje.
Mjenje natyknjenjow
Jubilejna wustajeńca wo kołćach, pčołkach a pčólnicy
Njeswačidło (ML/SN). Něhdźe 80 zajimcow, mjez nimi tež mnozy ze serbskich katolskich wsow, wosebje pčołarjow, zetka so wčera po dlěšim času zaso na wotewrjenju noweje 46. wosebiteje wustajeńcy w Njeswačanskim domizniskim muzeju. Nowa přehladka wěnuje so wurjadnemu regionalnemu podawkej, stolětnemu wobstaću Njeswačanskeje pčólnicy „Nad Čornicu“.
Nawoda muzeja Arnd Lehmann dźakowaše so wosebje tuchwilnym 26 čłonam pčólnicy, kotřiž wobhospodarja 158 ludow pčołkow a kiž su hłownje k wuhotowanju zajimaweje přehladki ze swójskimi eksponatami přinošowali. Předsyda pčólnicy, blidarski mišter Christian Budar, porěča wo wuwiću a wuspěchach 1922 załoženeje pčólnicy (wjace wo tym w dalšim přinošku).
Policija (04.04.22)
E-bike zaso namakali
Wojerecy. Spěšny wuspěch zapisać móžeše sej policija kónc tydźenja při pytanju za pokradnjenym kolesom we Wojerecach. Wobydler wjaceswójbneho domu bě pjatk popołdnju zastojnikow wołał, dokelž bě so něchtó do pincy zadobył a jeho e-bike typa Stevens kaž tež točensku mašinu pokradnył. Hódnota rubizny wučinja dohromady 2 650 eurow. Wěcnu škodu při pinčnych durjach powobličichu na něhdźe 50 eurow. Hišće sobotu dopołdnja wuhlada wobsedźer swoje koleso w interneće na předawanskim portalu. Paduch je tam hižo na předań poskići. Jako chcyše skućićel pokradnjene koło zajimcej přepodać, policija zapřimny a 30lětneho němskeho staćana nachwilnje zaja. Wojerowski policajski rewěr pad nětko dale přepytuje.
Ze solo-projektom po puću
Distancuja so wumjetowanjow
Njebjelčicy. Njebjelčanski gmejnski zwjazk CDU distancuje so wot wašnja wozjewjenja wumjetowanjow přećiwo zastupjerjam a podpěraćelam gmejny. Tole zdźěli předsyda gmejnskeho zwjazka CDU Křesćan Žur w nowinskim wozjewjenju. Dale w stejišću rěka: „Wozjewjenja buchu přez lětaki a w interneće rozšěrjene. Čłonojo zwjazka kritizuja tohorunja anonymnu formu wobwinowanjow. Wone škodźa gmejnje a wothódnoćeja čestnohamtski angažement mnohich krajanow.“
Namołwjeja k darowanju
Budyšin. Němsko-Serbske ludowe dźiwadło podpěruje „Namołwu za Ukrainu“ Budyskeho ekumeniskeho tachantskeho wobchoda a zarjaduje městno, hdźež móža so dary wotedać. Jutře, 5. apryla, kaž tež srjedu, štwórtk a pjatk stajnje wot 11 do 19 hodź. je móžno dary při jewišćowym zachodźe na Seminarskej wotedać. Trěbne su spanske měchi a isomaty, mjasowe a kołbasowe konserwy, suche płody, słódčizny, konserwěrowane žiwidła, zawobalenski material, tež začinjene kašćiki za prěnju pomoc, pjelški a hygieniske artikle. Dary dowjezu z nakładnym awtom do Lwiwa, zwotkelž je z awtami a transporterami rozdźěla.
W najmjeńšej wsy inwestuja
Lětuše předewzaća we Worklečanskej gmejnje předstajili
Worklecy (SN/MWj). Z naćiskom hospodarskeho plana 2022 a z lětušimi inwesticijemi je so na swojim posedźenju minjeny štwórtk Worklečanska gmejnska rada zaběrała. Kaž wjesnjanosta Franc Brusk (CDU) zdźěli, liča z dochodami 2,8 milionow eurow a z wudawkami we wobjimje 3,1 miliona eurow. Deficit nastanje přez tak mjenowane wotpisanja. Sadźba ležownostneho dawka B wostanje z 390 procentami runje tak stabilna kaž přemysłowy dawk ze 400 procentami.
Tak kaž tule w Pančicach-Kukowje su sobotu tež w Kulowje, Rakecach, ...
Krótkopowěsće (04.04.22)
Angela Stachowa zemrěła
Lipsk. W starobje 74 lět je serbsko-němska spisowaćelka a politikarka Angela Stachowa 29. měrca w Lipsku zemrěła, kaž swójbni zdźělichu. Wona bu wuznamjenjena z wjacorymi mytami. Jednotliwe jeje twórby buchu do čěšćiny, pólšćiny, rušćiny, šwedšćiny, chorwatšćiny a jendźelšćiny přełožene. Wot 1990 do 1994 bě wona zapósłanča PDS/Lěweje lisćiny w zwjazkowym sejmje.
Wokrjes dlěje njeinformuje
Budyšin. Wot dźensnišeho płaći w Němskej nastupajo koronu jenož hišće bazowy škit. Po Roberta Kochowym instituće je aktualna incidenca w Budyskim wokrjesu 1 375,5 a w Zhorjelskim 1 125,6. Wokrjes Budyšin je minjeny pjatk wo 606 natyknjenjach a sydom smjertnych padach informował, wokrjes Zhorjelc wo 812 infekcijach. Nimo toho wokrjes Budyšin wot dźensnišeho wjace wšědnje wo wuwiću pandemije na swojej internetnej stronje njerozprawja.
Wo delnjoněmčinje
Wuhotuja 11. schadźowanku
Chrósćicy. Rěčny centrum WITAJ a župa „Michał Hórnik“ přeprošatej na 11. swójbnu schadźowanku njedźelu, 3. apryla, w 15 hodź. do Chróšćanskeje „Jednoty“. Pisany program zahaja mali rejwarjo skupiny Łužičanka a šulerska hudźbna skupina Šwintuchi. Přizamknu so dźěłarnički a zaběry za najmłódšich, mjez druhim z paslenjom a kamishibai-dźiwadłom. Za trochu staršich budźetej krosnowanje a dźěćaca wohnjowa wobora přihotowanej. Dale předstajitej so Serbski muzej z poskitkom a Ludowe nakładnistwo Domowina z najnowšimi wudaćemi za dźěći. Starši móža so z fachowcami wo rěčnych kursach a rěčnym kubłanju rozmołwjeć kaž tež při kofeju a tykancu bjesadować.
Na jutrowne wiki
Policija (01.04.22)
Wopačna bankowka napadnyła
Wojerecy. Wočiwidnje wopačna 50eurowska bankowka je so předwčerawšim we Wojerecach jewiła. 16lětny hólc chcyše z njej w kupnicy swój nakup zapłaćić. Sobudźěłaćerce při kasy bankowka napadny a wona policiju informowaše. Zastojnikam młodostny powědaše, zo njebě jemu znate, zo so wo wopačne pjenjezy jedna. Přiwšěm změje wón z wozjewjenjom ličić.
