Traktor wotnajeć rentabelnišo hač jón kupić
Wotrow (SN/MWj). Při wobstaranju noweho traktora za komunalny twarski zawod kroči gmejna Pančicy-Kukow po hinašim puću hač tamne komuny. Mjeztym zo su na přikład w Ralbicach-Róžeńće jara dołho wo nakupje noweho jězdźidła rěčeli, w Pančicach-Kukowje traktor z nakładowakom wotnajimaja. To je gmejnska rada wčera we Wotrowje wobzamknyła.
Zrěčenje za nowu mašinu traje pjeć lět wopřijima jeje wužiwanje 600 hodźin wob lěto. Za to płaća 25 eurow na hodźinu. Zapřijate su hladanje, garantija, narunanje wottrjebowacych so dźělow a reparatury. Zawěsćenje a trěbne ćěriwo płaći gmejna. „Za nas jako gmejna je to rentabelnišo, hač traktor kupić“, wobkrući wjesnjanosta Markus Kreuz (CDU). Je to podobnje tomu, zo sej něchtó wosobowe awto wupožči, wón přirunowaše. Při zawěsćenju ma komuna lěpše kondicije hač priwatna wosoba. W minjenych třoch lětach su z tymle wašnjom wobstaranja techniki derje jěli, Kreuz rjekny. Nimo toho móža wudawki za traktor lěpje kalkulować, dokelž wužiwane hodźiny měsačnje wotličeja, a njetrjebaja so bojeć, zo dyrbja w nuznym padźe wjetšu sumu za wuporjedźenje płaćić.
Strukturna změna transparentna
Wojerecy (AK/SN). We wobłuku změny strukturow chce město Wojerecy wobydlerjow kaž tež wopytowarjow sobu zapřijeć. To je zaměr informaciskeho a zetkawanskeho centruma Swětłowy dwór w starej radnicy. „Tu móža so zajimcy wo projektach města wobhonić. Tež šulske rjadownje móža sem přińć, a to nic jeno z města“, rjekny wyši měšćanosta Torsten Ruban-Zeh (SPD) na srjedownym wotewrjenju.
Kompjuterowy muzej Konrada Zuseho je Swětłowy dwór wuhotował, Załožba łužiskeje jězoriny je z 31 000 eurami financowanje zawěsćiła.
Wo strukturnej změnje w měsće a wokolinje informuja na wulkej wirtuelnej tafli. Na njej předstajeja pjeć projektow města. Su to nowoměšćanski forum, Łužiska kupjel, změna zastaranja z ćopłotu, zwjazk pitneje wody a centrum za twarjenje a bydlenje. Hač do kónca lěta ma internetna platforma nastać. Na njej chcedźa swoje projekty strukturneje změny tohorunja předstajić, kaž projektowa managerka Sarah Stötzner rozłoži.
Za wjesnu zhromadnosć
Zetkawanske srjedźišćo w Chrósćicach nowemu zaměrej přepodali
Chrósćicy (JK/SN). Hdyž so za někotre tydźenje lětuša swjedźenska a grilowanska sezona zahaji, změja w Chrósćicach za to wurjadnu městnosć, kotraž žane přeća wotewrjene njewostaja. Wčera popołdnju přepoda wjesnjanosta Marko Kliman (CDU) areal při něhdyšej pěstowarni swojemu zaměrej. Grilowansku hětu chcychu poprawom hižo loni nazymu přepodać, ale korony dla to móžno njebě. Tak wužiwachu nětko rjane nalětnje wjedro to nachwatać. W přitomnosći mnohich wjesnjanow, gmejnskich radźićelow kaž tež předsydy Domowiny Dawida Statnika hódnoćeše wjesnjanosta nowe zetkawanišćo jako wuskutk zhromadneho prócowanja gmejny a wjesnjanow.
Pandemija strachi zesylniła
Witajmy jenako!
Krótkopowěsće (25.03.22)
Jako sudnik dźěłać njesmě
Lipsk. Bywši zapósłanc zwjazkoweho sejma strony AfD Jens Maier swoje zastojnstwo jako sudnik najprjedy raz wukonjeć njesmě. Słužbne sudnistwo za sudnikow w Lipsku je 60lětnemu zakazało, tuchwilne zastojnstwo dale wjesć. Wo tym sudnistwo dźensa informowaše. Wustawowy škit w Sakskej zastopnjuje Maiera jako prawicarskeho ekstremista.
Roman Nuk nominowany
Waršawa/Drježdźany. Kandidaća za lětuše Němsko-Pólske žurnalistiske myto Tadeusza Mazowieckeho su pomjenowani. Jury je wčera 30 přinoškow w pjeć kategorijach nominowała. Mjez nimi je w kategoriji „žurnalizm w pomjeznym regionje“ tež rozhłosowy přinošk Romana Nuka a Holgera Lühmanna „Mensch Nachbar extra: Was kommt nach der Kohle?“. 9. junija chcedźa dobyćerjow na gali w Zhorjelcu wuznamjenić.
Wolóženje njewotwidźomne
Akcije na dobro Ukrainjanow
W Čornym Chołmcu pytaja za njedźelu zwólniwu abo zwólniweho, kiž by lóšt měł, w pjekarni Krabatoweho młyna sobu dźěłać. Wot 6.30 hač do 15.30 hodź. su pilne ruki trěbne, kotrež tykancy ze słódnymi wěcami pokładuja. Tón dźeń a tež hižo sobotu předawaja w pjekarni pječwo na dobro Ukrainy. Dochody z toho su za tam ćerpjacych.
We Wotrowje wuwiwaja tohorunja aktiwity. Wjacore serbske swójby su hižo ćěkancow z Ukrainy přiwzali. Nětko chcedźa so we wobłuku swójbneho swjedźenja zetkać. Wotměć chcedźa jón njedźelu, 27. měrca, we Wotrowje. Přeprošene su serbske swójby z ukrainskimi hosćimi. Iniciator Dominik Škoda a dalši proša wo to, zo bychu so zajimcy přizjewili. Wšako chcedźa wšitkich z kofejom a tykancom pohosćić. Tak je trjeba wědźeć, kelko ludźi by zhromadne popołdnjo we Wotrowje dožiwić chcyło. Za dźěći maja wšelku zaběru předwidźanu, kaž skakanski hrodźik; wohnjowa wobora chce pódla być; zhromadnje chcedźa za bulom honić a wolejbul hrać; tež na hrajkanišću budźe dosć móžnosćow so zabawjeć. W 15 hodź. chcedźa so wšitcy na sportnišću zetkać.
Wo wójnje rěčeć njewobeńć
Je trjeba z dźěćimi wo wójnje rěčeć? A kak to najlěpje zdokonjeć? Dźěćaca psychologowka dr. Kathrin Mikan, kotraž poskića na platformje SUPERHELDENKIDS wědomostnje wopodstatnjene poskitki za wuwiće wosobiny na sebjewědome, zbožowne wuspěšne a strowe dźěći, posrědkuje zajimcam wo tym informacije po livestreamje.
Wšojedne, kak derje so prócujemy škitać dźěći před hrózbu wójny, wone strachi dorosćenych začuwaja. A tajke zaso strachi w dźěćoch wuwabjeja. Hrózbne hižo je, hdyž dźěći jenož medialne informacije wo wójnje dožiwjeja. Wobrazy so jim takrjec do mozow „zapaleja“ a móža stres a strach wuskutkować. Dźěći to pokazuja, mjez druhim zadźeržo so kaž ćěšenk. Wone su emocionalnje njewurunane, maja ćeže spać a jěsć, so koncentrować a skorža bolosćow dla. „Tuž je wažne jim rozkłasć, zo njejsu na tym wina, hdyž so staršej strachujetaj. Cyle nawopak, trjeba je jim začuće sposrědkować, zo su škitane a schowane“, dr. Mikan rozjasnja.
Transporter pomha misionaram rjadu oblatow
Pomocne akcije z Łužicy na dobro Ukrainy su mnohostronske. Jedna tajka korjeni w lětadołhim přećelstwje Prawočana Benedikta Rjedy k rjadej oblatow w kraju, kotryž tuchwilu pod wójnu ćerpi.
Smjerdźaca (SN/MiR). Hakle njedawno bě Benedikt Rjeda wo pjenježnu podpěru prosył, zo móhli transporter za pomoc Ukrainje kupić. Zhromadnje z Towarstwom swjateje Filomeny a jeho předsydu Geratom Róblom je wón akciju nastorčił. Próstwa wo pomoc bu we wjacorych serbskich medijach wozjewjena, mjez druhim w Serbskich Nowinach, w Katolskim Posole a po žołmach Serbskeho rozhłosa MDR. A čitarjo kaž tež připosłucharjo njejsu so dołho prosyć dali, ale su pjenježne dary na wosebite konto přepokazali. Za to wuprajataj iniciatoraj wšěm darićelam wulki dźak.
