Dale čestnohamtski
Tilo Žur nastupi za CDU k wólbam delanskeho wjesnjanosty
Ralbicy (HJa/SN/JaW). Tilo Žur je kandidat gmejnskeje skupiny CDU Ralbicy-Róžant za wólby noweje hłowy na čole delanskeje komuny 12. junija. Čłonojo skupiny wuzwolichu jeho wčera w rumnosćach stareje šule w Ralbicach. 53lětny Róžeńčan dósta wjetšinu hłosow přitomnych, dwě wosobje so hłosa wzdaštej.
We Wochožanskim parku błudźenkow je žiwjenje mjeztym zaćahnyło. ...
Andrea Kubank za Lěwicu k wólbam nastupi
Wojerecy/Budyšin (SN/at). Wokrjesny zwjazk Budyšin Lěwicy njeje na swojim njedawnym zjězdźe we Wojerecach jenož kandidata za wólby Budyskeho krajneho rady z wuběrnym wuslědkom 100 procentow wotedatych hłosow wuzwolił. Ze samsnym přihłosowanjom su delegatki a delegaća Budyšanku Andreju Kubank za wólby noweje wyšeje měšćanostki/wyšeho měšćanosty sprjewineho města nominowali. Strona ma za trěbne ze swójskim personalnym namjetom nastupić, zo móhła wolerstwu swójske ćežišća komunalneje politiki, pozicije a wobsahi awtentisce posrědkować.
Němsko-serbsku dwurěčnosć rozumi Andrea Kubank jako „jónkrótnu wosebitosć“ města Budyšina. Wona chce so za zachowanje a spěchowanje serbskeje rěče zasadźeć a runje tak tomu dopomhać, zo měšćenjo zajimy Serbow lěpje zaznawaja. „Serbšćina njech je w Budyšinje normalita“, mjenuje wudata mać dweju dorosćeneju synow narok, kotryž měł poprawom samozrozumliwosć być. Němsko-serbskej zhromadnosći polěkować chce wona ze zaplećenjom rozdźělnych akterow w tymle wobłuku.
Krótkopowěsće (11.03.22)
Natyknjenja přiběraja
Budyšin. W Budyskim wokrjesu ličba natyknjenjow z koronawirusom dale přiběra. Wčera zwěsćichu tu 1 392 nowych padow, jedna wosoba je zemrěła. Incidenca po Roberta Kochowym instituće wučinja 1 435,5, we wokrjesu Zhorjelc 1 111,1. W susodnym wokrjesu rozprawjachu wčera wo 544 infekcijach, mjez nimi 120 dźěći, a wo dwěmaj smjertnymaj padomaj z časa wot 22. a 27. februara.
Krabat w Berlinskim HAU
Berlin. Němski kruch „Čorny młyn“ po knize Jurja Brězana předstajeja w swobodnym Berlinskim dźiwadle Hebbel am Ufer (HAU). Performance kolektiwa Showcase Beat Le Mot za přihladowarjow wot dwanaće lět skići wosebite dožiwjenje w křini, jěducej po čornym młynje. Barbara Morgenstern, Mike Majkowski a Viola Bornmann staraja so wo hudźbu. Wuspěšna premjera bě 1. měrca.
SSW ze štyrjomi procentami
Policija (10.03.22)
Třo zranjeni po njezbožu
Běła Woda. Tójšto wěcneje škody a třo zranjeni su wuslědk wobchadneho njezboža, kotrež je so wčera rano na zwjazkowej dróze B 156 při wotbóčce do Wochoz stało. 61lětny chcyše ze swojim VWjom z pódlanskeje na hłownu dróhu wotbočić, njewobkedźbowaše pak předjězbu transportera a zrazy do njeho. 39lětny wodźer transportera a 29lětny sobujěducy so snadnje zraništaj. Šofera VWja dowjezechu do chorownje. Wěcna škoda wučinja něhdźe 60 000 eurow.
Tež w pěstowarni dary zběrali
„Serbske kwasy“ wupadnu
Budyšin. Serbski ludowy ansambl dyrbi swoje za jutře, pjatk, w 19.30 hodź. w Budyskej „Krónje“ planowane předstajenje „Serbske kwasy“ chorosće dla wotprajić. Štóž ma hižo kartki, móže je za předstajenje 23. apryla wuměnić, na dobropis zaměnić abo pjenjezy wróćo dóstać.
Wo žiwjenskej kwaliće rěčeć
Radwor. Towarstwo za wuwiće Hornjołužiskeje hole a hatow (OHTL) přeproša jutře, pjatk, w 17 hodź. na zjawne zarjadowanje w Radworskej sportowej hali „Slavia“. We wobłuku zdźěłanja Leaderoweje wuwićoweje strategije za spěchowansku dobu 2023 do 2027 chcedźa wo prašenjach žiwjenskeje kwality zjawnje diskutować. W tym zwisku budźe rozjimane, kotre naprawy maja so přichodnje spěchować a kotre nic. Wobydlerjo kaž tež zastupjerjo komunow, předewzaćow, towarstwow a cyrkwjow su přeprošeni sobu debatować. Dalša diskusija wotměje so 1. apryla w Chróšćanskej „Jednoće“.
Přichod za stary hosćenc
Něhdy woblubowany hosćenc na kromje Wulkeje Dubrawy budźe saněrowany. Tomu je tamniša gmejnska rada njedawno přihłosowała, byrnjež jedna naležnosć problematiska była.
Wulka Dubrawa (UM/SN). Hosćenc „Lěsny hrodźik“ na kromje Wulkeje Dubrawy budźe přichodny čas wobšěrnje saněrowany. Twarskej próstwje su čłonojo Wulkodubrawskeje gmejnskeje rady na swojim zašłym posedźenju přihłosowali. Wo doskónčnym přizwolenju wšak rozsudźi Budyski krajnoradny zarjad.
Kaž z předłohi wobzamknjenja wuchadźa, ma so „Lěsny hrodźik“ přichodnje zaso jako hosćenc a přenocowanska městnosć wužiwać. Wonkownje so na twarjenju wjele njezměni. Jeničce do sewjerneho směra je powjetšenje planowane. Dale předwidźane su wjacore nowe terasy kaž tež nowy zachod, kotryž budu tež ludźo z handicapom wužiwać móc. Na wuchodnym a zapadnym dźělu wokrjesneje dróhi do směra na Radwor, kotraž nimo twarjenja wjedźe, maja parkowanske městna nastać.
Wobšudnicy z nowym wašnjom
Budyšin (SN/MWj). W Budyskim a Zhorjelskim wokrjesu jewja so wot januara tohole lěta pady wobšudnistwa, za kotrež skućićeljo nowe wašnje nałožuja. Před tym policija wuraznje warnuje, a to nic jeno staršich ludźi. Nowe wašnje funguje tak, zo wobšudnicy kontakt k swojim woporam přez WhatsApp nawjazuja. Woni wudawaja so jako syn abo dźowka a rozprawjeja, zo su swoje šmóratko zhubili abo zo je wone skóncowane. Tohodla so z cuzym čisłom přizjewjeja. Na to proša wo to, zo bychu jim přiwuzni wěstu sumu pjenjez přepokazali, dokelž to sami bjez šmóratka činić njemóža. Wobšudnicy posrědkuja kontowe daty, kotrež pochadźeja stajnje z wukraja, a žadaja sej wjacore sta abo samo wjacore tysacy eurow.
