Dźěło za demokratiju sylnić
Biblioteka Brigitty Reimann we Wojerecach je wobstajnje, tež w běhu koronapandemije, wažne zetkanišćo čitarjam, lubowarjam hrow kaž tež fanam hudźby a filmow.
Wojerecy (KD/SN). Maja Kos Jozak, nowa sobudźěłaćerka mjenowaneje biblioteki, kóždeho rady wita. „Wosobinske zajimy su wažne. Staroba, domizna, nabožina abo seksualna orientacija při tym žanu rólu njehraja“, wona podšmórnje.
Lěpšiny lěpje zbližić
Krótkopowěsće (02.03.22)
Mjenje bjezdźěłnych w regionje
Budyšin. We wuchodnej Sakskej bě minjeny měsac 17 824 bjezdźěłnych, 105 wosobow mjenje hač w januarje. Aktualna kwota bjezdźěłnosće je 6,4 procenty, kaž Budyska wotnožka Zwjazkoweje agentury za dźěło zdźěli. Byrnjež ličba přizjewjenych swobodnych dźěłowych městnow wulka była, so poskitk a naprašowanje stajnje hromadu njehodźitej.
Wšelakej trendaj incidency
Budyšin. Incidenca po Roberta Kochowym instituće je w Budyskim wokrjesu na 1 377,1 postupiła a w Zhorjelskim na 805,8 woteběrała. Wokrjes Budyšin rozprawješe wčera wo 430 natyknjenjach z koronawirusom a wo jednym dalšim smjertnym padźe. Ličbu 371 infekcijow podachu za wokrjes Zhorjelc.
Pomoc dale wulka
Nowe čary po holanskej a hatnej krajinje
Rakecy (UM/SN). Před pjeć lětami zetkachu so turistikarjo a na regionalnym wuwiću zajimowani z hornjołužiskeje hole a hatow, zo bychu sej ideje za nowe kolesowanske a pućowanske šćežki wuměnjeli. Jako móžne temy wobjednachu serbsku kulturu, hatarstwo, brunicu a industrijowu kulturu.
Po tym bě wonkownje wo projekće dosć ćicho. Internje pak su na zwoprawdźenju dale dźěłali, kaž naprašowanje pola regionalneho managementa Leaderoweje kónčiny Hornjołužiska hola a haty ze sydłom w Rakecach wunjese. „Smy pjeć čarow přez naš region wuwili, tři kolesowanske a dwě pućowanskej“, rozprawja projektowa sobudźěłaćerka Claudia Steglichowa. Jedna z kolesowanskich čarow wjedźe k městnam, kotrež su wosrjedź hatow, kaž rybarski dwór w Małym Holešowje, Holešowske haty a Ringpfeilec hatarstwo w Stróži pola Rakec. Jedna z pućowanskeju čarow „Skały, młyny a poprjancy“ wopřijima Hrodźišćansku (Gröditz) skału, tamniši hród a Wósporsku (Weißenberg) Staru poprjancarnju. Ze serbskimi nałožkami, z Napoleonom a wódnymi hrodami podłu Sprjewje wopytowarjow tohorunja zeznajomjeja.
Kolesowar móže sej tu sam pomhać
Nominuja kandidata
Worklecy. Swojeho kandidata za wólby Worklečanskeho wjesnjanosty nominuje tamniši gmejnski zwjazk na zjawnym zarjadowanju štwórtk, 3. měrca w 19 hodź. we Worklečanskej sportowni. Po 48lětnym hamtskim času Franca Bruska wuzwola lětsa nowu wosobu na čoło gmejny. Do toho wola zajutřišim nowe wjednistwo gmejnskeho zwjazka CDU. Wšitcy zajimcy su wutrobnje přeprošeni.
Kak družiny škitać?
Wojerecy. Nawoda Wojerowskeho zwěrjenca Eugène Bruins porěči zajutřišim, štwórtk, w 17.30 hodź. na Wojerowskim hrodźe wo wažnosći, škitać družiny zwěrjatow a rostlin. Wosebje wěnuje so wón při tym wohroženym chinskim leopardam. Je to prěni dźěl małeho rjadu zarjadowanjow w měrcu. Zajimcy njech přizjewja so pod tel. čo. 03571/ 209 375 00.
Policija (01.03.22)
Přećiwo koronapolitice protestowali
Budyšin/Zhorjelc. Po informacijach policajskeje direkcije Zhorjelc je so we wokrjesomaj Budyšin a Zhorjelc wčera dohromady něhdźe 10 500 ludźi na protestach přećiwo koronapolitice wobdźěliło. Wjetšina demonstrantow bě měrliwa, přiwšěm přizjewichu dwacećoch statnemu rěčnistwu přestupjenja porjada resp. ranjenja swobody zhromadźowanja dla.
Póstniske tradicije dźerželi
Wjacore sta norow wčera w Kulowje róžowu póndźelu swjećili
Kulow (AN/SN). Po njewočakowanych žonjacych póstnicach minjenu sobotu na Kulowskim torhošću z poměrnje wjele fanami a fanowkami, kiž chcychu po dwěmaj lětomaj zaso jónu karnewal swjećić, běchmy chětro wćipni na róžowu póndźelu.
Hižo dopołdnja zetkachu so čłonojo póstniskeje gardy a rada jědnaćoch na dworje Kulowskeje šule, zo bychu so „woćoplili“. Pohladachu skrótka do wulkeje sportownje, hdźež wuknjacy Krabatoweje zakładneje šule swoje póstnicy swjećachu. Krasne słónčne nalětnje wjedro, wćipnosć, hač póstniski ćah budźe, a přeće so po dołhim času zaso trochu zabawjeć, wabješe mnohich ludźi wšěch generacijow a samo cyłe swójby do městačka. Na dróze mjez Němcami a Kulowom so hižo mnozy šoferojo a šoferki dźiwachu, jako wuhladachu póstniski wóz Němčanskich karnewalistow.
Z podpěru towarstwa dale spěchować
Běła Woda (AK/SN). Koncern Łužiska energija a milinarnje (LEAG) podpěruje towarstwa w Běłej Wodźe kaž tež kulturne projekty lětsa z dohromady 70 000 eurami. Wotpowědne partnerske dojednanje wo zhromadnym dźěle z lěta 2011 – tehdy běchu je hišće zastupnicy Vattenfalla a města Běłeje Wody podpisali – energijowe předewzaće wo lěto podlěši. Wčera su so tohorunja Běłowodźanscy měšćanscy radźićeljo k tomu wznali. Jednohłósnje je gremij podlěšenje zrěčenja kaž tež dźěłowy plan za lěto 2022 wobzamknył. W nim maja 60 000 eurow předwidźane za podpěru towarstwam a 10 000 eurow za spěchowanje projektow w kulturnym wobłuku města.
Tak su měšćanscy radźićeljo poručenje hłowneho a socialneho wuběrka města sćěhowali. „Podpěra LEAG je wažny zakład, towarstwa w měsće spěchować. Z njej móžachmy w minjenych lětach tójšto zeskutkownić“, podšmórny wyši měšćanosta Torsten Pötzsch (Klartext). „Předewšěm wobłuki sport, kultura a socialne mějachu z toho swoje lěpšiny.“
Krótkopowěsće (01.03.22)
Serbski hiphop z nowinkami
Chasow. Hiphopowa skupina Nowa Doba chce tele dny nowy spěw „Serbska lyrika“ na wjacorych hudźbnych platformach, kaž stej to na přikład Spotify abo Apple Music, wozjewić. Titul je zdobom prěnja pokazka na přichodnje digitalnje wuchadźacu EP „Budyski Bounce“, wopřijacu dalše tři, po zdźělenju wuměłcow subžanru trap přisłušace pěsnje.
Incidenca woteběrała
Budyšin. Wo 1 064 natyknjenjach z koronawirusom a dwěmaj zemrětymaj pacientomaj wot minjeneho pjatka informowaše wčera Budyski wokrjes. W samsnym času zwěsćichu we wokrjesu Zhorjelc 778 infekcijow a pjeć dalšich smjertnych padow za dobu wot 14. do 22. februara. Po RKI je incidenca zaso woteběrała, wona wučinja 1 215,4 w Budyskim wokrjesu a 876,4 w Zhorjelskim.
Wolyńscy Češa wohroženi
