Hamorsku zakładnu šulu dale modernizuja
Hamor (AK/SN). Gmejna Hamor swoju zakładnu šulu zaměrnje dale modernizuje. „Dźe wo trěbny lěpši wohnjoškit. Mjeztym zwoprawdźamy druhi twarski wotrězk. Za to smy próstwu wo spěchowanje we wobjimje 1,25 milionow eurow stajili. W běhu třoch lět chcemy je přetrjebać. Loni smy sanitarne připrawy ponowili. Lětsa slědujetej jědźernja a kuchnja“, podšmórny nawodnica twarskeho zarjada gmejny Cortina Kokles na póndźelnym wuradźowanju gmejnskeje rady. Parlament je tam wobzamknył, hnydom wjacore nadawki twarskim zawodam regiona přepodać.
Křižowanišćo přetwarja
Sportowe kursy zaso zaběželi
Smjerdźaca (aha/SN). Hač rěčne kursy, dalekubłanja abo kreatiwne poskitki – wšitke dyrbjachu před nimale dwěmaj měsacomaj w Smjerdźečanskim kubłanskim srjedźišću LIPA přetorhnyć. Tež derje wopytane sportowe kursy k zachowanju strowoty, kotrež sahaja wot callanetici přez pilates a yoga hač k gymnastiskim zwučowanjam k skrućenju rjapa a cyłeje muskulatury, njesmědźachu hižo přewjesć.
Po běžnych naprašowanjach wobdźělnikow, hdy tam kursy zaso budu, je minjeny tydźeń nawodnistwo LIPY rozsudźiło, wobkedźbujo tuchwilne předpisy, je wot tohole tydźenja pod hołym njebjom dale wjesć. Wobzamknjenych wolóženjow koronanaprawow a dotalneho konsekwentneho dodźerženja wobmjezowanjow dla bě to móžno, štož wobdźělnicy wšitkich kursow witaja.
Minjenu wutoru wot dopołdnja hač do pózdnjeho popołdnja wužiwachu wobdźělnicy štyrjoch kursow składnosć, sej zaso do Smjerdźaceje dojěć.
Wuskutki korony wužadowace
Rakecy (JK/SN). Awla Pawołskeje šule bě wčera druhi króć městnosć, kotraž je Rakečanskej gmejnskej radźe zmóžniła, tuchwilne hygieniske prawidła nastupajo trěbny mjezsobny wotstawk wobkedźbować. Korona postajowaše tež wobsah dnjoweho porjada. Tak poda nawodnica financneho zarjada gmejny Franziska Pfeiffer rozprawu wo hospodarskim planje 2019. Spokojacy staw gmejnskich financow kónc minjeneho lěta je přičina k wjeselu a trochu hordosći, zo su prawje hospodarili. Zo gmejna tak derje steji, je po słowach wjesnjanosty Swena Nowotneho (CDU) wuraz solidneho postupowanja a realistiskeho nastajenja k narokam komunalneho dźěła.
Lětsa tež bjez družkow?
Putnikowanje swjatki póndźelu a procesiony na Bože ćěło wotprajene
Budyšin/Róžant/Bluń (SN/JaW). Kóždolětne putnikowanje serbskich a dwurěčnych katolskich wosadow swjatkownu póndźelu do Róžanta njebudźe. To wobkrući našemu wječornikej tachantski farar a dekan Wito Sćapan. Přičina su tuchwilne wobmjezowanja koronawirusa dla, štož tež Drježdźansko-Mišnjanski biskop Heinrich Timmerevers wobkrući. „Kemše swjeća wěriwi we wosadnych cyrkwjach. W Róžeńće Boža mša tohorunja budźe. Tam pak je ličba městnow kaž w kóždej druhej cyrkwi wobmjezowana. Tuchwilu pruwujemy, hač kemše wottam z pomocu Serbskeho rozhłosa wusyłamy“, zdźěli dekan Wito Sćapan na naprašowanje našeho wječornika.
Za runohódnu dwurěčnosć
Nowonastajene wjesne a měšćanske tafle su w jenakej wulkosći popisane, dlěšodobnje pak wšitke wuměnja
Němčina a serbšćina stej we Łužicy runohódnej rěči. Wotpowědnej zapiskaj namakamy we wustawomaj Braniborskeje kaž tež Sakskeje. W praksy to mjez druhim woznamjenja, zo maja zjawne zarjadnišća, zastanišća zjawneho wobchada a pućniki dwurěčnje popisane być. Tele předpisy zwoprawdźić je proces, z kotrymž na wšelakorych runinach rozdźělnje wobchadźeja.
Wotnětka tež ambulantna a rekonstruktiwna chirurgija
Kamjenc (SN). Medicinski zastaranski centrum (MVZ) Kamjenskeje chorownje maltezow swj. Jana wudospołnja nětko chirurgiski wotrjad. Šeflěkar wčera poswjećeneje praksy w přizemju je dr. Johannes Kormann, powšitkowny chirurg, fachowc za brjušnicu a proktologiju. Jemu poboku staj wyšej lěkarjej dr. Toralph Zirnstein a MD (medical doctor) Noor Bawadekji. Zirnstein je fachowy lěkar chirurgije a ortopedije, Bawadekji jako fachowy lěkar za plastisku a rekonstruktiwnu chirurgiju dotalny spektrum chorownje rozšěrja. Dwě chorobnej sotře z mjenowanymi hromadźe dźěłatej. Typiske schorjenja resp. zranjenja, kotrež w MVZ lěkuja, su mjez druhim bolosće ramjenja a kolena, złamane kosće a mjeńše rany. Tež starše, ewentualnje njeoptimalnje zažite zranjenja resp. błuzny tam přepytuja a hoja.
Krótkopowěsće (14.05.20)
Infekcije dale přiběraja
Budyšin/Zhorjelc. Ličba z koronawirusom natyknjenych je w Budyskim wokrjesu wo cyłkownje dwanaće na 439 rozrostła. Tež Njeswačanska pěstowarnja je potrjechena. Dohromady je 107 ludźi schorjenych, wosomnaćo su w chorowni. 319 ludźi (+10) je so mjeztym wustrowiło. W Zhorjelskim wokrjesu je dale 268 inficěrowanych, 28 wosobow je schorjeło, jednu lěkuja w klinice. 218 ludźi je zaso strowych.
„Kahoot“ myto dobył
Budyšin. Internetny kwis ze serbskorěčnymi nabožnymi hódančkami na platformje „Kahoot“ je tónle tydźeń myto Serbskeho poskitka tydźenja w syći (SPTWS) dobył. Skupina kołowokoło šefa Budyskeho studija SAEK Michała Cyža kóždy tydźeń prawidłownje nowe hódančka zestaja, při čimž móža wužiwarjo stajnje něšto nowe nawuknyć a sej zajimawe pozadki wotkryć.
Nowosće w Soblexu
Wustawki za nowe ležownosće
Policija (13.05.20)
Brónje a drogi namakali
Kamjenc. Specialne jednotki a Kamjenska policija su minjeny štwórtk při přepytanju bydlenja 28lětneho na Kamjenskej Hasy bratra a sotry Scholl wjacore brónje a drogi namakali. Nimo wjacorych pistolow běštej to tež prokawa (Armbrust) a zakazany wulki jednoručny nóž. Dale storčichu zastojnicy na dohromady 320 gramow drogow. Kaž policija zdźěli, jedna so přewažnje wo crystal meth. Našli su tež grat a dalše utensilije za braće drogow. 28lětneho su hišće na městnje zajeli. Hižo pjatk je sudnik za njeho přepytowansku jatbu postajił.
