Krótkopowěsće (09.02.22)
Žane jutrowne wiki w Budyšinje
Budyšin. Tež lětsa wupadnu jutrowne wiki w Budyskim Serbskim domje. To je předsydstwo Spěchowanskeho kruha za serbsku ludowu kulturu wobzamknyło. Za to pak poskićeja 12./13. měrca w Budyskej Serbskej kulturnej informaciji dźěłarničku za debjenje jejkow. Za 69. wubědźowanje wo najrjeńše serbske jutrowne jejko móža dorosćeni swoje kolekcije hač do 4. měrca pola Domowiny w Budyšinje wotedać.
Incidenca zaso nad tysac
Budyšin. Z hódnotu 1 005 je incidenca w Budyskim wokrjesu po Roberta Kochowym instituće dźensa nahladnje stupała. Za wokrjes Zhorjelc mjenowaše RKI 807. Wokrjes Budyšin informowaše wčera wo 320 natyknjenjach z koronawirusom a znowa dwěmaj smjertnymaj padomaj. Wokrjes Zhorjelc je 416 infekcijow a jednoho zemrěteho pacienta wozjewił.
Pjenjezy za hońtwu
Policija (08.02.22)
Z kolesom smjertnje znjezbožił
Brězow. Tragiski wukónc měješe předwčerawšim wječor jězba 44lětneho z e-bikeom w Kubšiskej gmejnje. Wón bě na wokrjesnej dróze z Budyšina do Brězowa (Blösa) po puću, jako něhdźe w 19.30 hodź. w lěwej křiwicy na prawy bok zajědźe a do štoma prasny. Muž hišće na městnje njezboža zemrě. Wobchadna policajska inspekcija Zhorjelskeje policajskeje direkcije pyta nětko za swědkami, kotřiž móhli informacije k wujasnjenju njezboža podać. Pokiwy přijimuja pod telefonowym čisłom 03591/ 36 70 abo w kóždym policajskim rewěrje.
Pytaja naslědnicu za komoru
Zo njeby Heidi dołho sama wostała
Wojerecy (SN/MWj). Po njezbožu we Wojerowskim zwěrjencu minjeny tydźeń pytaja tam za nowym muskim partnerom jeničkeho zwostateho žónskeho hrjebaka (Erdmännchen) z mjenom Heidi. Jeje cyła swójba bě so pod zemju zasypała a njemóžeše so hižo wuswobodźić. Wot dohromady sydom hrjebakow je šěsć zahinyło.
Njezboža kaž tele so tež w přirodnej wokolinje hrjebakow stawaja, dokelž sej zwěrjata podzemske chódby twarja, kotrež móža jara hłuboko sahać. Tohodla su před šěsć lětami, jako we Wojerowskim zwěrjencu nowu připrawu za hrjebakow twarjachu, na měšeńcu zemje z rozdźělnej wulkosću kamuškow kedźbowali. Normalnje to dosć stability zaruča. „Čehodla je so zemja runje nětko po šěsć lětach zesunyła, njemóžemy hišće rjec“, praji nawoda zwěrjenca Eugène Bruins.
Hrjebaki su žiwe we wjetšich swójbnych cyłkach a njehodźa so prosće do druheje swójby přeměstnić. Tohodla pytaja nětko za nowym partnerom za Heidi. Prjedy pak hač nowy hrjebak zaćehnje, chcedźa připrawu přepruwować a jeli trjeba přetwarić.
Solarnu připrawu schwalili
Ze zeleneje miliny změje tež Hamorska gmejna swój wužitk
Hamor (AK/SN). Na Wochožanskich łukach njedaloko Běłeje Wody ma 15 hektarow wulki solarny park nastać. „Wón ma hišće lětsa dźěłać započeć. Produkowanu milinu dodawamy do Běłowodźanskeje přepinarnje“, rozłoži projektowy nawoda Złokomorowskeje firmy za projekty přirodneje miliny Christian Schacht na wčerawšim posedźenju Hamorskeje gmejnskeje rady. Z dwěmaj napřećiwnymaj hłosomaj jeje čłonojo wobzamknychu, twarski plan nastajić.
Hižo loni běchu so ze solarnym parkom zaběrali a tež w techniskim wuběrku su jón rozjimali, praji nawodnica Hamorskeho twarskeho zarjada Cortina Kokles. Připrawa změje cyłkowny wukon 17 megawatow. „Na Wochožanskich łukach móžemy wob lěto něhdźe dwanaće milionow kilowatowych hodźin miliny produkować“, Christian Schacht rozłoži. Po zakonju wo wobnowjomnych energijach móže potrjechena komuna 0,2 centaj na kilowatowu hodźinu dóstać. „Tomu budźemy wotpowědować“, tak Schacht. Mustrowe zrěčenje předleži a ma so hišće lětsa mjez Złokomorowskej firmu a Hamorskej gmejnu podpisać.
Radźićeljo wuradźuja
Worklecy. Wobstarać a natwarić wobchad změrowacu připrawu budźe jedna z temow přichodneho posedźenja Worklečanskeje gmejnskeje rady. Jeje čłonojo zetkaja so zajutřišim, štwórtk, w 19 hodź. w jědźerni Worklečanskeje wyšeje šule. Dale zaběraja so radźićeljo z wotnajenskim zrěčenjom za kupowy hat kaž tež z prašenjom, hač měł wjesnjanosta přichodnje dale čestnohamtsce abo snano hłownohamtsce skutkować. Zajimcy su wutrobnje přeprošeni.
Poskićuja lisćiki
Pytaja turistiskich přewodnikow
Tak kaž druhdźe so tež w Čornochołmčanskim Krabatowym młynje minjene měsacy někotrežkuli zarjadowanje přewjesć njemóžeše. Tohodla bě zymske pućowanje předwčerawšim kaž nowy start.
Čorny Chołmc (DFG/SN). Po třilětnej přestawce su předwčerawšim w Krabatowym młynje w Čornym Chołmcu prěni raz zaso zymske pućowanje přewjedli. Dieter Klimek jako Čorny młynk je skupinu wopytowarjow po wokolinje wjedł. Zajimcam powědaše na přikład wo započatkach Krabatoweho młyna, rozkładźe jim wažnosć Krabatoweje kolesowanskeje šćežki a pokaza městnosć historiskeho čorneho młyna, tak mjenowaneho Brösingoweho młyna.
„Sym 30 lět z młynom, jeho stawiznami a figuru Krabata zwjazany“, powědaše Dieter Klimek wobdźělnikam na poł třeća hodźinje trajacej čarje. „Započał sym wabić za region na pućowanskich wikach a wjetšich nadregionalnych wustajeńcach. To je so wudaniło. Nětko witamy tu hosći z cyłeho swěta.“
Horstka ludźi je so minjenu sobotu nawječor na parkowanišću při ...
Krótkopowěsće (08.02.22)
Nowe dźěło zahajili
Choćebuz. W zwisku ze strukturnej změnu je dźensa jědnaće sobudźěłaćerjow koncerna Łužiska energija a milinarnje (LEAG) nowe dźěło pola Němskeje železnicy w Choćebuzu zahajiło. Přichodnje maja woni spěšniki ICE hladać, na čož so tuchwilu wukubłuja. LEAG a Němska železnica chcetej nastupajo personalne planowanje wušo hromadźe dźěłać.
Incidenca dźensa woteběrała
Budyšin. Incidenca je po Roberta Kochowym instituće dźensa w Budyskim wokrjesu na hódnotu 724,1 a w Zhorjelskim na 771,5 woteběrała. Wokrjesaj stej wčera wo sumje natyknjenjow z koronawirusom wot minjeneho pjatka informowałoj. W Zhorjelskim wokrjesu bě to 751 infekcijow, w Budyskim 663. Tam mějachu dalšej smjertnej padaj. W chorowni hladaja 94 na koronu schorjenych.
Mało apotekow so přizjewiło
Informuja radźićelow a zajimcow
Chrósćicy. „Trjebaja małe gmejny w Sakskej hłownohamtskeho wjesnjanostu?“, rěka hesło informaciskeho zarjadowanja, kotrež je jutře, wutoru, w 19 hodź. w Chróšćanskej wjacezaměrowej hali „Jednota“. Na nje přeproša zarjadniski zwjazk Při Klóšterskej wodźe radźićelow wšěch pjeć přisłušacych gmejnow kaž tež zajimowanych wobydlerjow. Přednošować budu wjacori referenća.
Za wiki so přizjewić
Slepo. Wulke rjemjeslniske a burske wiki budu jedna z atrakcijow we wobłuku swjedźenskeho kónc tydźenja wot 17. do 19. junija k 750. róčnicy wobstaća Slepoho. Za nje móža so rjemjeslniske zawody, wikowarjo a towarstwa hišće přizjewić. Doba přizjewjenja je hač do 10. februara podlěšena. Formular nadeńdu zajimcy pod .
