Hódny zazběh do jubilejneho lěta 750. róčnicy wobstaća Slepoho
Dokładnje na dźeń prěnjeho pisomneho naspomnjenja Slepoho před 750 lětami, 21. januara, su wobydlerjo minjeny pjatk z naročnym zarjadowanjom w tamnišej cyrkwi jubilejne lěto zahajili. Wone změje po tuchwilnym planje z festiwalom dudakow wot 17. do 19. junija swój wjeršk.
Slepo (SN/at). Na wokomik pozastać, wróćo zhladować a doprědka hladać. Na to je Slepjanski wjesnjanosta Jörg Funda (CDU) minjeny pjatk wšěch tych přeprosył, kotřiž běchu do pod wuměnjenjemi korony połnje wobsadźeneho Božeho domu přichwatali. Wosebje witaše wjesnjanostow susodneju gmejnow Trjebina a Dźěwina, zapósłanca Sakskeho krajneho sejma dr. Stefana Meyera (CDU) kaž tež předsydu a jednaćelku Domowiny, Dawida Statnika a Judit Šołćinu.
750 lět měješe Jörg Funda za „njepředstajomnu dołhu dobu“ połsta generacijow, kotrež běchu tu žiwe. Manfred Hermaš ze serbskimi stawiznami wsy a Wolfgang Goldstein z jeje wuwićom po towaršnostnym přewróće staj hosćom to zbližiłoj, na čož njemóža jeno Slepjanki a Slepjenjo, ale wobydlerki a wobydlerjo dźensnišeje gmejny Slepo z wjesnymaj dźělomaj Rowno a Mułkecy hordźi być.
Krótkopowěsće (24.01.22)
Incidenca pod přerězkom
Budyšin. Strowotniski zarjad Budyskeho wokrjesa je minjeny pjatk 179 dalšich natyknjenjow z koronawirusom wozjewił. Po wobličenjach RKI wučinja sydomdnjowska incidenca we wokrjesu tuchwilu 241,6 a leži jasnje pod cyłoněmskim přerězkom. W Zhorjelskim wokrjesu je incidenca po informaciji RKI 289,9.
Grofa wuběrkej předsydari
Budyšin. Při konstituowanju wuběrka Zwjazkoweho předsydstwa Domowiny za zjawnostne a wukrajne dźěło buštaj Krystof Grofa za předsydu a Beno Bělk za městopředsydu wuzwolenaj. Gremij je so minjeny pjatk digitalnje schadźował a chce so wobrazej Serbow w šěršej zjawnosći wěnować a prezencu třěšneho zwjazka w nowych medijach a digitalnych socialnych syćach sobu sylnić.
DGB z nowym nawodnistwom
Policija (21.01.22)
Po kontroli do jastwa
Wojerecy. Jězbu pod wliwom drogow su policisća Wojerowskeho rewěra předwčerawšim we Wojerecach skónčili a při tym z přikazom zajeća pytaneho 35lětneho zajeli. We wobłuku wobchadneje kontrole zastojnicy wodźerja Forda zadźeržachu. Drogowy test reagowaše pozitiwnje na amfetaminy. Dalšu jězbu njetrjebachu jemu wulce zakazać, ale dowjezechu jeho hnydom do jastwa.
Kak dale z wjesnjanostu?
Delanscy radźićeljo wo čestno- abo hłownohamtskosći diskutowali
Ralbicy (jh/SN). Diskusija wo móžnym wobzamknjenju čestno- abo hłownohamtskeje dźěławosće wjesnjanosty gmejny Ralbicy-Róžant tworješe zazběh kaž tež kónc wčerawšeho posedźenja Ralbičansko-Róžeńčanskeje gmejnskeje rady. Hnydom na spočatku zhromadźizny skedźbni radźićel Alfons Ryćer, zo njewobsteji po Sakskim gmejnskim porjedźe prawo wobzamknjenja za hłownohamtskosć za gmejny pod 5 000 wobydlerjemi. Tuž drje radźićeljo wo tym rěčachu, wobzamknyli pak ničo njejsu.
Rozprawja wo emiratach
Za hladanske dźěło so dźakowali
Wutwarej parkowanišća kročel bliže
Radwor (SN/MkWj). W Radworskej gmejnje wo tym rozmysluja, přistajić sobudźěłaćerja, kiž so wo naležnosće klimy stara. Wo tym je wjesnjanostka Madeleine Rentsch na srjedownym posedźenju gmejnskeje rady informowała. Tajkele dźěłowe městno by stat po 90 procentach spěchował. Hladajo na to, zo w druhich gmejnach tajkich „klimowych managerow“ hižo maja, chcedźa w Radworju nětko wotpowědny koncept zdźěłać a zapodać. Wjesnjanostka nimo to na to skedźbni, zo stat klimu škitace naprawy z hač do sto procentami spěchuje.
Serbske barby na jubilejach wsow
Bukecy/Slepo (ML/SN). Lětsa móža 21 wsow a dwě měsće — Wjelećin a Ochranow – w Hornjej Łužicy kulojtu róčnicu wobstaća swjećić. Třinaće wsow změje 800. jubilej prěnjeho naspomnjenja we wopismje biskopa Bena w lěće 1222, na kotrymž su Bože domy a jich městnosće mjenowane. Do nich słušeja Bukecy, Klukš, Hućina, Poršicy, Hrodźišćo, Kumwałd, Wjelećin, Załom a Wjazońca. Zahajenska swjatočnosć za 800. róčnicu je planowana 29. jutrownika w Kumwałdskej cyrkwi, na kotrejž změje sakski ministerski prezident Michael Kretschmer (CDU) swjedźensku narěč.
Jubilej 750lětneho wobstaća Slepoho zahaja hižo dźensa wječor ze swjedźenskim posedźenjom zapósłancow gmejny. Wjeršk swjedźenjowanja budźe kónc tydźenja wot 17. do 19. junija z wubědźowanjemi a poskitkami wjesnjanow na polu sporta, zabawy a kultury. Wulki swjedźenski ćah z mnohimi serbskimi wobrazami je, njedźelu, 19. smažnika, předwidźany. Dalša atrakcija budźe mjezynarodny festiwal dudakow z dwěmaj wječornymaj koncertomaj, za kotryž je so hižo tójšto ćělesow přizjewiło. To praji nam Wolfgang Kotisek, nawoda Serbskeho folklorneho ansambla Slepo.
Krótkopowěsće (21.01.22)
Tiede z hosćom Steinmeiera
Berlin/Budyšin. Farar Christian Tiede z iniciatiwy „Budyšin zhromadnje“ wobdźěli so přichodnu póndźelu na podijowej rozmołwje „Hida a namóc w časach pandemije – nazhonjenja a reakcije“ na Berlinskim hrodźe Bellevue. Na tele rozmołwne koło zwjazkowy prezident Frank-Walter Steinmeier prawidłownje hosći z towaršnostneho žiwjenja přeproša. Nimo toho planuje iniciatiwa 28. januara ćichi rjećaz swěcow po Budyšinje.
Dźeń Saksow wotprajeny
Drježdźany/Frankenberg/Sa. Najwjetši sakski swjedźeń towarstwow tež lětsa njebudźe. To su měšćanscy radźićeljo Frankenberga na swojim wčerawšim posedźenju wobzamknyli. Předewšěm boja so tam raznje wyšich kóštow hač planowane, kaž Frankenbergski měšćanosta Thomas Firmenich předsydźe kuratorija „Dźeń Saksow“ dr. Matthiasej Rößlerej zdźěli.
Incidenca dale snadnje stupa
Policija (20.01.22)
Kružny wobchad přewidźał
Słona Boršć. Hižo zaso bě nowy kružny wobchad pola Słoneje Boršće městno wobchadneho njezboža. Stało je so wone předwčerawšim krótko do 23 hodź. 39lětny wodźer Mercedesa bě po statnej dróze S 106 ze směra awtodróhi z něhdźe 100 km/h přismalił. Pola Słoneje Boršće wón kružny wobchad po wšěm zdaću přewidźa a z wotmachom přez njón zajědźe. Awto něhdźe 20 metrow přez powětr lećeše a hakle při wobhrodźenju ležownosće stejo wosta. Po informacijach policije nasta na Mercedesu něhdźe 30 000 eurow škody. Wuchowanske mocy dowjezechu šofera do chorownje. Tam při kontroli zwěsćichu, zo bě wón tójšto alkohola pił. Pólski wodźer awta měješe 2,2 promilej w kreji. Jězbnu dowolnosć wón tohorunja žanu njeměješe.
