Berlin (SN/CoR). Ewangelska kulturna załožba Zhorjelc dóstanje Slěbornu połkulu Němskeho myta za pomnikoškit 2021. To je Němski narodny komitej za pomnikoškit wčera zdźělił. Wuznamjenjenje je najwyše počesćenje, kotrež w Němskej za čestnohamtski ­angaže­- ment na polu pomnikoškita spožčeja. 22. oktobra chcedźa dohromady šěsć ­Slěbornych połkulow na swje­dźenskim zarjadowanju w zwjazkowej stolicy Ber­linje přepodać.

„Tele myto je zasłužene hódnoćenje wukona załožby, zachować wusahowace kulturne pomniki w Zhorjelcu“, wjeseli so sakski statny minister za regionalne wuwiće Thomas Schmidt (CDU). „Wot ­časa ­załoženja ma Ewangelska kulturna załožba Zhorjelc minjene 25 lět wulke ­zasłužby nastupajo škit a starosć wo tak wuznamne pomniki, kaž su to Swjaty row, Mikławska cyrkej a Mikławski kěrchow ze swojimi rownišćemi a wjace hač 800 narownymi kamjenjemi.“

Załožba zbliža wobydlerjam kulturne pomniki tež z wodźenjemi a zarjadowanjemi. Nimo toho iniciěruje wědomostne přepytowanja wo „swojich“ objektach.

Dalše nowoinfekcije z koronu

Budyšin/Zhorjelc. Strowotniski zarjad Budyskeho wokrjesa je wčera tři dalše koronainfekcije zwěsćił. W chorowni lěkuja tuchwilu tři wosoby, jednu wjace hač dźeń do toho. Roberta Kochowy institut poda za dźensa incidencu 5,0. Tež w Zhorjelskim wokrjesu je incidenca na 4,0 postupiła. Třo dorosćeni a jedne dźěćo su so z wirusom natyknyli. Jednoho pacienta tam stacionarnje lěkuja.

Próstwy hišće wotedać

Podstupim. Za braniborski spěchowanski program „Kultura na wsy“ móža zajimcy hišće hač do 18. awgusta próstwu wotedać. Z dohromady jednym milionom eurow spěchuja tak mjenowane kulturne kótwicowe městna, kotrež na region wuprudźeja a tamnišich akterow zwjazuja. Wosebje čestnohamtsce skutkowacych chcedźa zapřijeć.

Publikacija wo strukturnej změnje

Bjez dowolnosće jězdźił a znjezbožił

Slepo. Wonkownej špihelej dweju jězdźidłow buštej minjenu sobotu při wobchadnym njezbožu w Slepom skóncowanej. 20lětny wodźer transportera bě předaloko na prawy bok zajěł a so parkowaceho dalšeho transportera šmórnył. Zawinowar drje so najprjedy z městna nje­zboža zhubi, policija pak jeho bórze na to lepi. 20lětny jenož njezbožo njepřizna, ale tež, zo scyła žanu jězbnu dowolnosć nima. Wón změje so nětko za ćeknjenje z městna njezboža kaž tež za jězdźenje bjez dowolnosće zamołwić.

Kamjenc. Loni nastatu wustajeńcu wo česćowanju swjateho Bosćana w Chróšćanskej wosadźe wotewru jutře, srjedu, w 19 hodź. w Kamjenskej Haninej cyrkwi. Nawodnica Lessingoweho muzeja dr. Sylke Kaufmann wopytowarjow po přehladce powjedźe.

Na swjedźenišću maja wodu

Němcy. Na iniciatiwu wjesneho a młodźinskeho kluba ma wjesne swjedźenišćo w Němcach nětko swójski přizamk za wodu. Hłubokotwarske dźěła za 70 metrow dołhu rołu je twarski zawod ze wsy přewzał. Sobudźěłaćer Wojerowskich zastaranskich zawodow je wšitko přizamknył. Nowy hydrant słuži zdobom za rjedźenje wodowoda.

Radźićeljo so schadźuja

Radwor. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w jědźerni tamnišeje zakładneje a wyšeje šule. W zjawnym dźělu schadźowanja póńdźe mjez druhim wo wobstaranje nowych laptopow za wučerjow a wo dróhotwarske dźěła w Boranecach.

Přizjewjenja hišće móžne