Łža a wěrnosć we wustajeńcy
Dołhu hrjebju nětko rjedźa
Planuja turistiske srjedźišćo
Parkowanišćo při Radworskim kěrchowje chcedźa lětsa ponowić
Radwor (UM/SN). Městno mjez Kamjenjanskej dróhu a Lilijowym pućom do směra na Łupoj w Radworju je wokomiknje chětro njenahladne. Šotrowana płonina skići při dešću dosć městna za łuže. Zeleń tam žanu njewuhladaš, štož pak ma so bórze změnić. „Tu chcemy lětsa turistiske parkowanišćo z 20 městnami wutworić“, rozłožuje Radworska wjesnjanostka Madeleine Rentsch (Minakałscy přećeljo domizny). Jedne městno ma za zbrašenych rezerwowane być, dalše wuhotuja z připrawu za nabiwanje elektroawtow. „Dale planujemy, zo móža tam kolesowarjo swój e-bike nabić. Tafla ma wo Radworju a wokolinje informować, a móžnosće k posydnjenju maja nastać“, wjesnjanostka připowědźa. Z pomocu qr-koda móža so ludźo wo turistiskich poskitkach wobhonić.
Předewzaće ma nowe mjeno
Wojerowske předewzaće „Fischer & Salowsky“ je Erfurtskej předewzaćelskej skupinje „aiutanda PflegeBienen“ přistupiło. Za sobudźěłaćerjow, wobydlerjow a pacientow so ničo dale njezměni.
Wojerecy (SiR/SN). Wot spočatka lěta 2022 ma Wojerowske předewzaće „Fischer & Salowsky“ nowe mjeno „aiutanda PflegeBienen“. Přičina změny je, zo so Brigita Salowscyna na wuměnk rozžohnuje. Ramona Fischer wostanje dale jednaćelka. Iniciatorce stej před nimale 30 lětami započałoj, we Wojerecach a pozdźišo tež we wokolinje swoje předewzaće natwarjeć. Započałoj stej 1994 z mobilnej hladanskej słužbu. Tón stej angažowanej žonje załožiłoj, zo byštej wužadanjam demografiskeje změny wotpowědowałoj a předewšěm staršim ludźom wšědnu podpěru skićiłoj.
Wot jutřišeho štwórtka hač do 9. januara wotměje so zaso ...
Krótkopowěsće (05.01.22)
Incidenca pomału přiběra
Budyšin. Po kóncu lěta z mjenje testami incidenca po Roberta Kochowym instituće nětko tež w Hornjej Łužicy zaso přiběra. Za Budyski wokrjes mjenuje RKI hódnotu 269,1, za Zhorjelski 222,7. Wo 269 natyknjenjach z koronawirusom a dalšich wosom smjertnych padach rozprawjachu wčera we wokrjesu Budyšin. Wokrjes Zhorjelc informowaše wo 225 infekcijach a 15 wosobach, kotrež běchu w decembrje w zwisku z koronu zemrěli.
Wosebite posedźenje sejma
Drježdźany. Sakski krajny sejm je so dźensa ze zhromadźenjemi za čas koronapandemije zaběrał. Wosebite posedźenje bu próstwy frakcije AfD dla zwołane a měri so na aktualne postajenje nuzoweho stawa w swobodnym staće. Demonstracije su wulkeho stracha natyknjenja dla na dźesać ludźi na krutym městnje wobmjezowane. Wuwzaća přizwolić je móžno. Kritikarjo korona-naprawow pak zawjazki prawidłownje ignoruja.
Słownik zaso na předań
Přirada za prašenja zbrašenych z pozitiwnej bilancu
Wojerecy (SiR/SN). Předsydka přirady za zbrašenych města Wojerec Evelin Graf bilancuje lońše dźěło přirady jako pozitiwne. Čestnohamtsce skutkowacy čłonojo přirady poradźuja měšćansku radu, zo móhli naležnosće wobydlerjow z handicapom zwoprawdźić. „Po mojim měnjenju je so nam poradźiło, naležnosće wobydlerjow po direktnym puću zwjetša k pozitiwnemu wuslědkej wjesć. To płaći za próstwy wo wupokaz za ćežkozbrašenych runje tak kaž za sposrědkowanje kontaktow k najwšelakorišim institucijam“, Evelin Graf rozłožuje. Tež při domjacych wopytach móžachu wobydlerjam na přikład při zarjadniskich prašenjach pomhać.
Njeluboznaj hosćej w ptačej chěžce
Dalše twarnišćo připowědźene
Wulke Ždźary. Nalěto započnu we Wulkich Ždźarach wopłóčkowy kanal kłasć, kaž Łazowski wjesnjanosta Thomas Leberecht (CDU) připowědźi. Za twarske dźěła zwjazkowu dróhu B 96 po wotrězkach dospołnje zawru. Bus mjez Budyšinom a Wojerecami pojědźe potom po Stróžanskim puću. Tamny wobchad powjedu po hinašej wobjězdce.
Kuchnja skónčnje hotowa
Hórnikecy. Wobydlerski centrum w Hórnikecach je nětko skónčnje z nowej kuchnju wuhotowany. Hižo wot lěta 2019 su so we wobłuku wobydlerskeho etata města Wojerec wo kuchnju prócowali. Dokelž pak budget jednoho lěta njedosahaše, su tež pjenjezy z 2020 a 2021 zapřijeli. Tak móžachu tohorunja wšelake twarske ćeže přewinyć. Mjeztym je wšitko zatwarjene a kuchnja funguje, kaž město Wojerecy zdźěli. Ze zbywacymi pjenjezami chcedźa hišće grat a sudobja kupić.
Policija (04.01.22)
Kružny wobchad přewidźał
Słona Boršć. Nowy kružny wobchad pola Słoneje Boršće je předwčerawšim wječor šofer VW Phaetona po wšěm zdaću přewidźał a z wotmachom na připrawjenu hórku zajěł. Wodźerja a sobu jěducu dyrbjachu wobornicy z jězdźidła wućahnyć. Jeju dowjezechu do chorownje.
