Protokole digitalnje přistupne
Znazornjeja nadawki a problemy komunalnych zamołwitych
Budyšin (SN/MWj). Spočatk tohole lěta je so Budyski archiwny zwjazk wuspěšnje wo spěchowanje z programa za digitalizowanje bibliotekow a archiwow prócował. Při tym dźěše wo digitalizowanje podłožkow měšćanskeje rady z časa wot 1623 do 1832 respektiwnje wot 1945 hač do 1990. Prěni dźělny projekt, digitalizowanje protokolow Budyskeje měšćanskeje rady wot 1945 do 1990 móžachu njedawno zakónčić, rěka w nowinskim wozjewjenju města. Tak su nětko informacije z 373 aktow internetnje přistupne. Dźakowano spóznawanja tekstow z pomocu programa OCR hodźa so jednotliwe akty tež za hesłami přepytać. Při pytanju pak spóznawa program jeno z mašinu pisane pismiki, žane rukopisne. Přistup k archiwej nadeńdu zajimcy pod www.archivverbund-bautzen.findbuch.net.
Třeći raz techno a electro při skale
Festiwal Meta-Solis je mjeztym kruta adresa za protagonistow serbskeje elektroniskeje hudźby. Minjeny kónc tydźenja dožiwi dohromady něhdźe sto wopytowarjow při Miłočanskej skale wjeloraki přehlad zynkow mjez technom, synthie-popom a drum ‘n‘ bassom.
Lětni swjedźeń z wulkim programom
Prawy črij žiwjenje porjeńša(4)
Na wsy wobchod měć dźensniši dźeń wjace samozrozumliwe njeje. We wobłuku lětušeho lětnjeho seriala smy so na wsach rozhladowali, zo bychmy swojim čitarjam tón abo tamny wjesny wobchod předstajili.
„Šij, mój šewco šij“ spěwaja hižo dźěći w pěstowarni. Starši na to dźiwaja, zo maja prawe črije wobute, dokelž je to wažne za strowotu nohow a ćělne derjeměće. Za wšěm počasam a kóždemu wjedru wotpowědowace wobuće je Jörg Zoch we Wulkej Dubrawje prawa adresa. Mjeztym hižo jědnaće lět, a to w štwórtej generaciji, zhotowja wón tam perfektnje sedźace črije w swojej ortopediskej dźěłarni.
Krótkopowěsće (18.08.21)
Serbja na europskej płachće
Berlin. Swětowu premjeru je wčera film wo Delnich Serbach „Village X“ w Berlinje dožiwił. Wobhladało je sej jón nimale 400 ludźi – mjez nimi tež zastupnicy z Mosta a Dešna. Nawjerćał je film telewizijny sćelak ARTE mjez druhim na superkokoće 2019 w Mosće a na zapusće w Dešnje. Film je 1. dźěl rjadu wo žiwjenju na wsy we wšelakich regionach Europy. Dźensa w 23:05 hodź. jón ARTE wusyła. Pask je zdobom w mediatece přistupny.
Najniša incidenca Sakskeje
Budyšin/Zhorjelc. W Budyskim wokrjesu su wčera štyri nowoinfekcije z koronawirusom zwěsćili. Roberta Kochowy institut podawa incidencu 8,0. W Zhorjelskim wokrjesu stej so dwě dalšej wosobje natyknyłoj, incidenca po RKI je tu 5,5. Wobaj łužiskej wokrjesaj matej najnišu incidencu po cyłej Sakskej, najwyšu ma Lipšćanski z 29,8.
Spěchuja Błótowski ateljej
Policija (17.08.21)
Na polu so paliło
Pančicy-Kukow. Wohnjowych wobornikow z Pančic-Kukowa wołachu předwčerawšim nawječor k hašenju na wotžnjate žitnišćo na kromje wsy do směra na Wěteńcu. Něhdźe 4 500 kwadratnych metrow šćernišća so tam paleše. Dokelž běchu płomjenja wosrjedź pola wuchadźeli, přepytuje kriminalna policija podhlada zapalerstwa dla.
Kóždy wopor jedyn přewjele
Wojerecy (SN/MWj). Najskerje tež koronoweje pandemije a tuž mjenje wobchada dla je so loni we wobłuku Wojerowskeho policajskeho rewěra mjenje wobchadnych njezbožow stało hač w lěće 2019. Tole zdźěli sobudźěłaćer wobchadneho zarjada města Götz Gleiche, jako tele dny njezbožowu statistiku předstaji.
W policajskim rewěrje, kiž njewopřijimuje jenož město Wojerecy, zličichu 1 686 wobchadnych njezbožow, 309 abo dobrych 15 procentow mjenje hač lěto do toho. W měsće a přisłušnych wsach zwěsćichu 817 njezbožow, 194 mjenje hač w předlěće. Jedna wosoba zemrě. Tež hdyž bě to jenički smjertny wopor, bě to jedyn přewjele, praji prěni policajski hłowny komisar Tobias Hilbert.
Wulki dźěl 141 zranjenych běchu kolesowarjo. Woni su při zražce lědma škitani. Hišće hórje je, hdyž jědu woni z e-bikom. Z nim su hač do 25 km/h spěšni, tak zo su zranjenja při zražce hišće strašniše. Předewšěm na nich Tobias Hilbert apeluje, sej nahłownik stajić. W połojcy wšitkich padow běchu kolesowarjo wina na njezbožu.
Na njebju tam a sem smalili
Do srjedźowěka pohladać
Budyšin. Najwšelakoriše prózdninske poskitki změja hač do kónca awgusta w Budyskim Serbskim muzeju. Štwórtk, 19. awgusta, póńdźe wot 10 hodź. wo Milčanow a słowjanski srjedźowěk. Daloko sahace stawizny wjedu wobdźělnikow do zažneho srjedźowěka – do časa zasydlenja Milčanow a Łužičanow. Kotre žiwjenske poměry knježachu, kak a čehodla twarjachu hrodźišća a što je k tomu wjedło, zo su Serbja dźensa narodna mjeńšina, su stołpy wodźenja. Zajimcy wobhladaja sej zawostanki słowjanskich prjedownikow a zamysla so z praktiskimi přikładami do tuteje časoweje doby. Přizjewjenja přijimuja pod telefonowym čisłom 0 35 91 / 2 70 87 00 abo e-mailnje pod .
Předawaja kartki za pop-operu
