Krótkopowěsće (11.02.16)
Rekordne lěto za turizm
Wiesbaden. Rozmach turizma w Němskej dale přiběra. Lońše lěto je hladajo na ličbu přenocowanjow w Němskej nowy, mjeztym šěsty rekord, wunjesło. Zwjazkowy statistiski zarjad je 436,4 miliony přenocowanjow pućowacych z tu- a wukraja zličił. To je tři procenty wjace hač 2014. Ličba wukrajnych hosći zwyši so wo pjeć procentow na 79,7 milionow.
„Swětłowy smog“ wobmjezować
Frýdlant. Wobydlerjo Frýdlantskeho wuběžka w sewjernej Čěskej protestuja přećiwo hoberskim škleńčnikam w pólskej Bogatyniji. Tamne škleńčane rostlinarnje dźě w nocy tak mócnje swěća kaž město ze sto tysac wobydlerjemi. Nócne swětło myli wuraznje ludźi a wobwliwuje wobswět. Najebać protesty pak pólska firma Citronex planuje škleńčnikowu přestrjeń hišće dźesać króć powjetšić.
Pola Amazon zaso stawkuja
Policija (11.02.16)
Znjezbožił a so zminył
Rakecy. Na zwjazkowej dróze B 96 bě za- wčerawšim wodźer Audija po puću, kiž krótko po 20 hodź. blisko Rakec w prawej křiwicy kontrolu nad jězdźidłom zhubi a na lěwy bok jězdnje zajědźe. Při tym prasny wón do milinoweho kašćika a načini tak něhdźe 3 000 eurow škody. Přiwołanym policistam napadny, zo w awće za alkoholom smjerdźeše, šofer pak bě so najprjedy raz zminył. Krótko na to 23lětneho tola dosahnychu a naměrichu pola njeho 0,6 promilow alkohola w kreji. Wón dyrbješe zastojnikow k wotedaću kreje přewodźeć a přichodny čas hižo z awtom jěć njesmě.
Njeskutka bě jemu žel
Radeberg. Sebje samoho pola policije přizjewił je zawčerawšim 31lětny muž w Radebergu. Wón chcyše w kupnicy pakćik mloka kupić, njeměješe pak dosć pjenjez. Tuž předawarce namjetowaše, dźěl zapłaći a zbytk přichodny raz. Na to kupnicu wopušći. 32lětny sobudźěłaćer chcyše jeho wróćo dirigować, kupc pak dyri jemu z pjasću mjezwoči a so zminy. Byrnjež tole pozdźišo wobžarował, změje so muž za to zamołwić.
Nětko pytaja serbsku dnjowu mać
Nowotwar mosta skónčnje wupisany
Železniski móst nad Budyskej Zeppelinowej chcedźa lětsa w awgusće znowa twarić počeć. Předewzaće Deutsche Bahn (DB) Netz AG je nadawk před něšto dnjemi wupisał. Wo projekće so hižo wjele lět rěči.
Budyšin (UM/SN). Wosebje za zapósłanca Sakskeho krajneho sejma Marka Šimana (CDU) je to zawěsće dobra powěsć. Wot 2006 zasadźa so wón za to, zo so tele „wuško“ na hłownej wobchadnej čarje w Budyskim juhu wotstroni a so stary móst z nowym naruna. Skónčnje je tak daloko: Na šěsć wusko popisanych stronach je DB Netz AG nětko trěbne naprawy a požadanja wupisała.
Sprěnja matej so stary móst a dwuposchodowe twarjenje wuhibkarnje potorhać. Nowotwar ma 18,25 metrow (dotal 9 m) šěroki a 4,50 metrow (dotal 3,50 m) wysoki być. Tak móhli so přichodnje tež wulke nakładne awta bjez problema pod mostom zetkać. Dotal móže tam jenož jedne wjetše jězdźidło srjedźa nimo. Wosebje wot toho časa, zo so zapadna tangenta wužiwa, je to k haćenjam wjedło a wobchad chětro poćežowało. Tež 250 metrow kolijow maja ponowić. Zo bychu ćahi při twarjenju dale jězdźić móhli, je pjeć pomocnych mostow trěbnych.
Tradiciji pjerjodrěća su so póndźelu a wčera na Rownjanskim ...
Fota pokaza prěni raz w zjawnosći
Chrósćicy (MoG/SN). Pod hesłom „Lěto žorawjow“ přednošowaše młody wučer biologije Syman Šołta z Kulowa – pochadźacy z Róžanta – sobotu wječor w Chróšćanskej Putniskej hospodźe wo přirodźe wokoło nas a kak so wona w běhu lěta měnja. Hač zwěrjata abo rostliny – zapopadnył je ze swojej kameru jónkrótne a krasne wobrazy, wot zymy přez nalěćo, lěćo a nazymu – doniž so kołoběh lěta zaso njezawrje. Při tym orientowaše so na žorawje, dokelž su to wosebite ptački. W mnohich kulturach maja je za symbol zboža a mudrosće, přeco hižo su wone ludźi fascinowali. Jako ćahawe ptački wot nas widźane najdale na juhu přezymuja: Doleća sej hač do sewjerneje Afriki. Za čas NDR běchu wone pola nas hišće porědke a stejachu na čerwjenej lisćinje wohroženych družin. Mjeztym jich wobstatk zaso přiběra.
Lětuši etat hakle w awgusće
Pytaja historiske fotografije studnjow hrodoweho parka
Njeswačidło (AR/SN). Nic runjewon zwjeselace informacije poda gmejnska komornica Liliana Wetzko na wčerawšim posedźenju Njeswačanskeje gmejnskeje rady k hospodarskemu planej za lěto 2016. Po postajenjach sakskeho gmejnskeho porjada by wón dyrbjał hižo loni hač do kónca nowembra předležeć. Ale kaž we wjetšinje gmejnow bědźa so tež w Njeswačidle hišće z doskónčnym nastajenjom wotewrjenskeje bilancy w zwisku z dopikowym knihowanjom. Bilanca je wuměnjenje za wobzamknjenje lětušeho hospodarskeho plana, tak sej to krajnoradny zarjad žada.
Krótkopowěsće (10.02.16)
Rozprawa wuběrka předleži
Wojerecy. Nachwilny poradźowacy wuběrk Piwarska haska 1 Wojerowskeje měšćanskeje rady je na swojim wčerawšim posedźenju kónčnu rozprawu swojeho dźěła zestajił. Dokument chcedźa měšćanskej radźe na jeje posedźenju w měrcu předpołožić. Wuběrk bě so z přičinami zaběrał, čehodla bě saněrowanje wobydlerskeho centruma w měsće 700 000 eurow dróše hač planowane.
Natwarja wjelči centrum
Berlin. Pjatnaće lět po nawróće wjelkow do Němskeje je zwjazkowe ministerstwo za wobswět skupinje wědomostnikow nadawk dało, wjelči poradźowanski centrum natwarić. W nim chcedźa prěni króć scyła informacije wo wjelkach w Němskej zběrać a zamołwitym w zwjazkowych krajach spřistupnić, zwjazkowa ministerka za wobswět Barbara Hendricks (SPD) dźensa připowědźi.
Bartsch: CSU won z knježerstwa
Policija (10.02.16)
Rentnarjej znjezbožiłoj
Čorny Chołmc. Ćežke wobchadne njezbožo stało je so wčera na zwjazkowej dróze B 96 blisko Čorneho Chołmca. Krótko po 19 hodź. bě tam 86lětny wodźer wosoboweho awta typa Renault Clio po puću. W prawej křiwicy zajědźe wón z dotal njeznateje přičiny na lěwy bok jězdnje a zrazy tam do štoma. Wón a 79lětna sobujěduca so ćežko zraništaj. Wobeju dowjezechu do Wojerowskeje chorownje. Na awće nasta něhdźe 6 000 eurow škody. Awtowa zamkarnja dyrbješe je wotwlec.
Nowosličanski wóz najwjetši
Najrjeńše słónčne wjedro wčera připołdnju znowa tysacy ludźi do Kulowa zwabi, zo bychu sej w mjeztym hižo 310. sezonje róžowopóndźelny ćah wobhladali.
Kulow (aha/SN). Něhdźe 30 swjedźenskich wozow a dalše žónske skupiny su wčera w Kulowje tež serbsce připowědźili. Wo to postarał je so Tomaš Lipič, kotryž mjeztym wosom lět radźe jědnaćoch přisłuša. Dobra nalada knježeše po cyłym městačku, a mnozy Kulowsku póstnisku hymnu sobu spěwachu, štož su tež njeličomni móhli w zdalenišich kónčinach sobu dožiwić. Wšako je telewizijny sćelak MDR wčera po wosom lětach znowa z Kulowa live wusyłał. Dźesać lět mjeztym tomu je, zo na čole klawnojo ze swojimi křudami praskajo so wo prózdny puć staraja. Hnydom pjeć princowskich porow so w ćahu prezentowaše.
