Zańdźeny pjatk běše zaso tak daloko, dźěl hornjołužiskich baćonow dósta pjeršćenje, hačrunjež njeběše přijomne wjedro. Wjacore šwihele běchu k tomu wjedli, zo akterojo kaž młodźata chětro zmoknychu, kaž je to na wobrazu widźeć. Wšitko pak ničo njepomhaše, ornitologa Stefan Siegel, kiž tele dźěło hižo wjacore lěta tu pola nas wukonja, bě ekstra z Zschopauwa přijěł. Tež wotpowědna technika, kotruž firma Lift Manager kóžde lěto sponseruje, bě na městnje.

Prěnja stacija bě Komorow pola Klukša. Dale dźěše mjez druhim přez Šćeńcu (Steinitz) a Komorow pola Rakec do Ralbic. Tamniši porik baćonow běše hižo w zańdźenych lětach jedyn z najproduktiwnišich, štož dorost nastupa. Lětsa měješe samo pjeć młodźatow. Na přichodnych stacijach, kaž w Sernjanach, Nuknicy a Chasowje, běchu jich tři młodźata. Dohromady su 34 młodych baćonow na jědnaće městnach wopjeršćenili. Bohužel njemějachu wjac pjeršćenjow k dispoziciji, dokelž bě so dźěl skazanych mjez Finskej a Němskej zhubił.

Mało dalšich natyknjenjow

Budyšin/Zhorjelc. W Budyskim wo­krjesu su wčera wo dwěmaj natyknjenjomaj z koronu informowali. W tudyšich chorownjach lěkuja jědnaće pacientow, štyrjoch z nich na intensiwnej staciji. Incidenca wučinja tu po RKI dźensa 2,3. Dwě dalšej infekciji a dwaj smjertnaj padaj poda wo­krjes Zhorjelc za dobu wot minjeneje soboty hač do wčerawšeho. Incidenca po RKI tam je dźensa 1,6.

Žane narunanje za festiwal

Chrósćicy. Nětko je jasne, zo lětuši mjezynarodny folklorny festiwal w Chrósćicach narunany njebudźe. To je při­hotowanski wuběrk třěš­neho zwjazka wčera rozsudźił. Hłowna přičina je, zo so wjetšina łužiskich kulturnych skupin w Chrósćicach prezentować njemóže. Přichodny, 14. mjezynarodny folklorny festiwal „Łužica“, budźe tuž w lěće 2023.

Dyrlich w Münsteru čitał

W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy wotnětka w małej seriji. Naš awtor je bywši wjelelětny předsyda zarjadniskeho zwjazka Při Klóšterskej wodźe Alfons Ryćer. (4)

Druhdy słyšiš měnjenje: „Wjesnjanosta ma prima žiwjenje – sydom lět wěste dźěłowe městno a dobra zasłužba.“ Tola tak přijomne zastojnstwo přeco njeje, ale hdys a hdys samo chětro horcy plester. Něchtóžkuli dyrbješe je hižo dočasnje złožić. W tajkich padach zwjetša dwě hłownej přičinje předležitej.