Budyske nalěćo w septembru
Budyscy měšćanscy radźićeljo su wčera prěni króć w sportowni na Budyskim Třělnišću wuradźowali.
Budyšin (CS/SN). Budyska měšćanska rada rozžohnowa wčera wjelelětneho čłona Matthiasa Knaaka (CDU). Wón je w Budyskim krajnoradnym zarjedźe nawodnistwo šulskeho zarjada přewzał a njemóže funkciju měšćanskeho radźićela tuž dale wukonjeć. Jeho městno w radźe přewozmje Bodo Thiemann, kotrehož su wčera spřisahali.
Dokelž běše Knaak zdobom z čłonom dźěłoweho kruha za serbske naležnosće kaž tež hłowneho a financneho wuběrka města Budyšina, dyrbjachu tam tohorunja nowych čłonow powołać. Nastupajo dźěłowy kruh njebě žanych ćežow. Do njeho su měšćanscy radźićeljo jednohłósnje Heinricha Schleppersa powołali. Nastupajo hłowny a financny wuběrk pak běchu napřećiwne hłosy. Naslědnika do wobeju gremijow dyrbja tuž wolić, štož chcedźa přichodny měsac činić.
Krótkopowěsće (28.01.21)
Wuwiće do praweho směra
Budyšin. Natyknjenja z koronawirusom minjenych sydom dnjow na 100 000 wobydlerjow tež w Hornjej Łužicy dale woteběraja. W Budyskim wokrjesu spadny incidenca wčera na 219 (wutoru 239), w Zhorjelskim na 172,52 (do toho 188,35). W Budyskim wokrjesu zwěsćichu 126 dalšich infekcijow a štyri smjertne pady. W Zhorjelskim bě 101 nowonatyknjenje, 17 pacientow je zemrěło.
Serbska app dale woblubowana
Budyšin. Hornjoserbsku aplikaciju „Serbsce lochko“ je sej dotal 3 000 zajimcow, kotřiž chcedźa serbsku rěč słyšeć a ju wšědny dźeń nałožować, na swojim šmóratku instalowało. Něhdźe 900 ludźi po wšej Němskej app, zestajenu lěta 2014 w pedagogiskim wotrjedźe Rěčneho centruma WITAJ, aktiwnje wužiwa, zdźěli lektorat RCW. App je onlineowa wersija CDjow „Serbsce lochko“, kotrejž stej tež w Smolerjec kniharni na předań.
Wotškódnja swójbu zatřěleneho
We wokrjesu z błyskačemi tójšto pjenjez nazběrał
Hdyž sy z awtom přespěšnje po puću tak zo će błyskač lepi, je to za potrjecheneho njelubozna wěc. Na tamnym boku pak so tón wjeseli, kiž potom mjeńšu abo wjetšu sumu pjenjez dóstanje, na přikład wokrjes. W běhu lěta na te wašnje šwarna suma nastawa.
Budyšin (SN/MWj). Přespěšnje jěducy a při tym lepjeni šoferojo w Budyskim wokrjesu su loni dohromady wjace hač 2,3 miliony eurow pokuty zapłaćili. Kaž krajnoradny zarjad zdźěli, je to nimale 230 000 eurow wjace hač lěto do toho. Nimale 61 000 wodźerjow jězdźidłow bu błysknjenych. To je něhdźe 4 600 wjace hač w lěće 2019. Kóžde druhe drohe foto přinošowachu stacionarne błyskače. „Najwuspěšniši“ bě tón w Póckowach (Putzkau), hdźež su loni 5 500 tempowych hrěšnikow fotografowali. Připrawa wobradźi Budyskemu wokrjesej 105 000 eurow dochodow, něhdźe 25 000 eurow wjace hač lěto do toho. Błyskač při zwjazkowej dróze B 6 w Błócanach (Plotzen) w Bukečanskej gmejnje třěli 4 800 wobrazow w hódnoće dohromady 96 000 eurow. Třeći najwunošniši błyskač je tón při B 96 w Rašowje (Rascha). Tam lepichu 3 600 „nuznych“, kotřiž mějachu 57 000 eurow do wokrjesneje kasy płaćić.
Policija (27.01.21)
Žadosć za šulu měli
Wojerecy. Z lockdownom zwjazane zawrjenje šulow štyrjom dźěćom we Wojerecach najskerje předołho traje. Po wšěm zdaću mějachu woni tajku žadosć zaso raz do šule hić, zo so předwčerawšim popołdnju po jednym Wojerowskim kubłanišću rozhladowachu. Policisća lepichu před twarjenjom dźesaćlětneho, kiž najskerje stražowaše, a w domje samym třoch jědnaćelětnych. Hač chcychu woni něšto pokradnyć, njeje znate; tež wobškodźili ničo njejsu. Přiwšěm jich policisća powučichu, zo jedna so při rozhladowanju po zawrjenej šuli wo njeskutk. Na to přepodachu dźěći jich staršim. Kaž z rozprawy Zhorjelskeje policajskeje direkcije dale wuchadźa, kriminalna słužba tónle pad dale přepytuje, što dokładnje, tohorunja znate njeje.
Wobchod w dobrym pomjatku
Wuchodźowanje přizjewić
Nječuja so akceptowani
Wjesna rada porokuje poměr k měšćanskemu zarjadnistwu
Delnja Kina (CS/SN). Wjesni radźićeljo Delnjeje Kiny so chětro mjerzaja, dokelž nječuja so wot Budyskeho měšćanskeho zarjadnistwa akceptowani. Wot septembra dźěše tam a sem projektow dla, kotrež chce wjesny dźěl Budyšina we wobłuku sakskeje komunalneje pawšale zwoprawdźić. Na iniciatiwu FDP bě měšćanska rada 25. junija 2020 wobzamknyła, wjesnym dźělam po 7 500 eurach za powšitkownowužitne projekty přewostajić. Bohužel, hněwa so Delnjokinjanski wjesny předstejićer Norbert Haupt (CDU), město na nimale wšitkich dypkach něšto kritizuje. Po jeho słowach měšćanosta dr. Robert Böhmer a wot njeho jako zamołwity zasadźeny André Wucht projekty jako „přeća“ wotbywataj. Wjesni radźićeljo sej tuž přeja, zo měli so wšitcy hišće raz za jedne blido sydnyć. Z jich strony tu zwólniwosć za konstruktiwne zhromadne dźěło bě, kaž woni měnja.
Wjele mjenje wopytowarjow zličili
Wojerowski zwěrjenc a susodny hród stej lońšeho dwójneho nanuzowaneho zawrjenja dla nimale 20 procentow mjenje wopytowarjow měłoj.
Wojerecy (SN/MWj). Dohromady 113 468 wopytowarjow su loni we Wojerowskim zwěrjencu a na tamnišim hrodźe zličili. Kaž rěčnica coologiskeje a kulturneje towaršnosće města Stefanie Jürß zdźěli, bě to porno lětu 2019 něhdźe 19 procentow mjenje ludźi, nimale 27 000. Nanuzowaneho zawrjenja koronapandemije dla dyrbješe zwěrjenc 107 dnjow začinjeny wostać, hród a muzej samo 142 dnjow. Tójšto zarjadowanjow hromadźe słušaceju zarjadnišćow dyrbješe wupadnyć. Mjez druhim běchu to tež tajke, hdźež hewak wosebje wjele zajimcow zličeja, kaž měšćanski dźěćacy dźeń, halloweenska party, wulki swójbny swjedźeń a adwentne kuzło na hrodźe a w měšćanskim muzeju. Kubłanske a dožiwjenske poskitki zwěrjencoweje pedagogiki hodźachu so jenož we wobmjezowanej formje wotměć, projekty muzejoweje pedagogiki scyła nic.
Runje w zjawnych twarjenjach je škit před wohenjom přewšo wažna ...
Serbska přirada ma dalšu čłonku
Dźewjećwosobowu přiradu za serbske naležnosće města Wojerec wo dalšu čłonku rozšěrja. Gabriela Linakowa, wot lěta 2010 čestnohamtska społnomócnjena města za serbske naležnosće, gremijej přichodnje jako dźesata wěcywustojna wobydlerka přisłuša.
Wojerecy (AK/SN). Za Gabrielu Linakowu je so Wojerowska měšćanska rada z wjetšinu na wčerawšim posedźenju wuprajiła. Zdobom wobzamkny wona změnu wustawkow wo zarunanju čestnohamtsce skutkowacych. Tak změje Linakowa za swoje čestnohamtske skutkowanje měsačnje 40 eurow. „Dźěłowe městno jej přewostajimy“, podšmórny wyši měšćanosta Torsten Ruban-Zeh (SPD).
