Ideje mje inspiruja
Z Kamjenca do sprjewineho města
W Budyskim měšćanskim zarjedźe za hospodarstwo, kulturu, nowinarstwo a zjawne dźěło wutworja k 1. januarej 2022 znowa wotrjad za hospodarstwo a turizm. Jeho nawodnica a nowa tak mjenowana hospodarska spěchowarka w sprjewinym měsće budźe Doreen-Charlotte Hantschke. To zdźěli Budyski wyši měšćanosta Alexander Ahrens měšćanskim radźićelam na minjenym posedźenju. Hantschke přewozmje zamołwitosć za wobłuk wot Heiki Raue, kotraž jón tuchwilu komisarisce zastawa.
Doreen-Charlotte Hantschke we wobłuku komunalneho hospodarstwa žana njeznata njeje. Wona bě wot lěta 2010 hospodarska referentka w Kamjencu a bě tam direktnje wyšemu měšćanosće Rolandej Dantzej (njestronjan) přirjadowana. Po studiju prawniskich wědomosćow na Drježdźanskej Techniskej uniwersiće zmištrowa rodźena Kulowčanka wjacore natwarne studije na diplomowu hospodarsku juristku a złoži w Berlinje swój „master of legal law“. Po tym zběraše powołanske nazhonjenja w Hagenje, předewšěm w imobilijowym wobłuku.
Krótkopowěsće (21.12.21)
Merz chce Kretschmera za wice
Drježdźany. Designowany zwjazkowy předsyda CDU Friedrich Merz je sakskeho ministerskeho prezidenta Michaela Kretschmera znowa za swojeho městopředsydu namjetował. Wón je wotewrjeny a móže sej tajke zastojnstwo derje předstajić, kaž powěsćernja dpa rozprawja. Krajny zwjazk CDU wčera zdźěli, zo bě so Merz na digitalnej sobustawskej konferency za Kretschmera zasadźił.
Indicenca do hód woteběraca
Budyšin. Incidenca do hód w Hornjej Łužicy dale woteběra. Roberta Kochowy institut je dźensa za Budyski wokrjes 717,8 a za Zhorjelski 491,3 podał. Wot pjatka hač do wčerawšeho registrowaše wokrjes Budyšin 520 natyknjenjow z koronawirusom a 15 smjertnych padow. Wokrjes Zhorjelc rozprawja wo 298 infekcijach a wo dwěmaj zemrětymaj.
Peticiji žnějetej wulki wothłós
W měsće nowe štomy sadźeli
Stawizny, serbske korjenje a křesćansku wěru zwjazać
Miłoraz (AK/SN). Wobydlerjo Miłoraza, kotryž je wot wudobywanja brunicy hórko potrjecheny, spominaja na to zwjazowace. „Wažne su zhromadne stawizny, serbske korjenje a křesćanska wěra“, rjekny farar Jörg Michel, kiž je hač do julija 2022 zastupjer za wakancu w ewangelskej wosadźe Slepo, njedźelu na nyšporje k přepodaću swětła měra z Betlehema w Miłorazu. Při spěwach, mjez kotrymiž bě slepjanski „To jo ta rjana gałuzka“ a modlitwje zetkachu so wěriwi w towarstwowym domje. Konfirmand Till Kowalik bě swětło ze Slepoho přinjesł. Dalši dowjezechu je do Trjebina, Rownoho, Mułkec, Brězowki, Dźěwina, Lěska a samo do Cerska.
Policija (20.12.21)
Woheń w hali hašeli
Lětoń. 63 kameradow Budyskeje powołanskeje a dalšich wohnjowych woborow je sobotu popołdnju přećiwo płomjenjam wojowało, kotrež w priwatnej hali w Lětonju zachadźachu. Tam steješe wotzjewjeny Chevrolet, kotryž chcyše wobsedźer restawrować. Techniski defekt w awće bě woheń zawinował. Na zbožo njebě w tym času nichtó w hali. Wobydlerjo běchu kur wuhladali a woboru informowali. Cyłkowna škoda wučinja něhdźe 12 000 eurow.
Wutworja testowanski centrum
Pančicy-Kukow. Wot dźensnišeho móža so wobydlerjo w Pančicach-Kukowje na koronawirus testować dać. Kaž gmejnske zarjadnistwo zdźěli, wutworja testowy centrum w tak mjenowanym lěkarskim domje nad praksu dźěćaceje lěkarki. Wotewrjeny budźe wón póndźelu wot 14 do 17 hodź. a srjedu wot 7 do 11 hodź. Hač do hód poskićeja na wjacorych městnach přidatne móžnosće šćěpjenja. W Kamjenskej wotnožce ludoweje uniwersity móžeš so jutře wot 11 do 17 hodź. šćěpić dać. We Wojerowskej zarjadowanskej rumnosći „Vis-à-Vis“ budźe šćěpjenski centrum zajutřišim a štwórtk wot 11 do 17 hodź. wočinjeny. W Budyskej sportowni na Třělnišću poskićeja šćěpjenje hač do štwórtka wšědnje wot 9 do 17 hodź. Termin dojednać móžeće sej internetnje pod https://sachsen.impfterminvergabe.de. Patoržicu, hodowne swjate dny kaž tež wot 31. decembra hač do 2. januara žane šćěpjenja móžne njebudu.
Předawaja namakane kolesa
Po jutrach chcedźa twarić
W Chrósćicach hotuja so na wjacore projekty
Chrósćicy (SN/MWj). Do přetwara rumnosćow Chróšćanskeje zakładneje šule a tamnišeho horta chce gmejna klětu něhdźe 35 000 eurow inwestować. Nimo spěchowanja nałoži něhdźe 10 000 eurow swójskich srědkow. Na swojim zašłym posedźenju su gmejnscy radźićeljo wjesnjanostu Marka Klimana (CDU) społnomócnili, wotpowědne twarske nadawki firmam přepodać. Tak ma za šulskeho nawodu přidatna rumnosć nastać, štož běchu sej hižo dawno přeli, dokelž su tuchwilne rumnostne wuměnjenja chětro wobmjezowane. Dale ma w horće nowy nuznik nastać. Nětko móže architekt Marko Dźisławk wšitko planować, zo móhli předewzaće w zymskich prózdninach zwoprawdźić.
Wozjewjenje přećiwo wobornikam
We wjelelětnym rozestajenju mjez Trjebinskej gmejnu a tamnišim sportowym towarstwom Trjebinskeho towarstwoweho domu dla so nětko dalši wjeršk připowědźa. Hač hodźi so wón hišće wotwobarać?
Trjebin (CK/SN). Wohnjoškitneje kontrole w Trjebinskim towarstwowym domje dla ma so přećiwo čłonam tamnišeje wohnjoweje wobory chłostanske přizjewjenje mylenja domjaceho měra dla zapodać. Wjesnjanosta Waldemar Locke (CDU) bu spočatk nowembra informowany, zo běchu w objekće pječa wohnjoškitne durje manipulowane. Dokelž jedna so wo zjawne twarjenje, za kotrež je gmejna zamołwita, dyrbješe wón jednać. Kaž Locke na zašłym posedźenju gmejnskeje rady informowaše, je wón wobornikam nadawk dał tam za prawym hladać. Kaž so při kontroli 8. nowembra wukopa, běchu mjez druhim wohnjoškitne durje z klinami wuzběhnjene a jedyn zamk zalěpjeny. „Takle njesmě so ze strowotu ludźi wobchadźeć“, praji wjesnjanosta a skedźbni na zakonske předpisy. Mjeztym wón wobžaruje, zo njeje naležnosć hnydom wozjewił.
