Swinjarnja (SN/MWj). Najskerje starši šulskich dźěći w Swinjarni wokomiknje ani tak zli njejsu, zo jich dźěći do šule chodźić njesmědźa. Holcy a hólcy mjenujcy tuž tež šulski bus wužiwać njetrjebaja. Štož bě hač do minjeneho pjatka wšědna normalita, je w Swinjarni strašna wěc. Štóž chce wottam z busom do Pančic-Kukowa abo dale jěć, dźě dyrbi statnu dróhu S 100 přeprěčić, zo by busowe zastanišćo na tamnym boku dróhi docpěł. Dokelž pak na hłownej dróze wosobowe a nakładne awta kaž tež motorske móhłrjec bjez přestawki jězdźa, je to wšo druhe hač jednore.
Nowa rektorka uniwersity
Drježdźany. Rozšěrjeny senat Drježdźanskeje Techniskeje uniwersity je wčera psychologowku a profesorku dr. Ursulu M. Staudinger za rektorku wuzwolił. Staudinger je po cyłym swěće připóznata slědźerka na polu staroby. Tuchwilu ma profesuru za sociomedicinske wědomosće na Columbia Aging Centeru New-Yorkskeje uniwersity, kotryž je lěta 2013 załožiła. Wona naslěduje prof. dr. Hansa Müllera-Steinhagena, kiž dźe na wuměnk.
Kurs přestorčeny
Budyšin. Lětuši ferialny kurs za dźěći Rěčneho centruma WITAJ dyrbi coronawirusa dla wupadnyć. Na to stej so nawodnica RCW dr. Beata Brězanowa a zamołwita za projekt Michaela Hrjehorjowa póndźelu připołdnju dojednałoj. Projekt klětu w jutrownych prózdninach dale powjedu. Je to jenički móžny termin, dokelž maja tón tydźeń dźěći nimale po wšej Němskej prózdniny.
Forum wotprajili
Njebjelčicy (JK/SN). Na lońšim oktoberskim posedźenju bě Njebjelčanska gmejnska rada wobzamknyła, dźěl ležownosće w Miłoćicach přenajeć zjednoćenstwu Permagold, kotrež plahuje wužitne ratarske a zahrodniske kultury po principje permakultury. Na předwidźanej płoninje w Miłoćicach chcyše drustwo sadowcy a jahodowe kerki nasadźeć. Po dokładnym pruwowanju zjawne zajimy zastupowacych institucijow je so drustwo nětko rozsudźiło wonu płoninu za planowany zaměr njewužiwać, dokelž bychu wužadanja, na njej wuspěšnje hospodarić, mocy drustwa přesahowali. Nimo toho so po słowach zamołwitych žadanja ze stron zjawnych institucijow narokam permakultury spřećiwjeja.
Debjenki njenamakali
Słona Boršć. Sakska policija měješe předwčerawšim při wuslědźenju padustwa w bayerskim Fürthu pomhać, hdźež buchu debjenki w hódnoće 10 000 eurow pokradnjene. Podhladna žona sedźeše pječa w pólskim busu. Tón zadźeržachu njedźelu připołdnju při awtodróhowym wotpočnišću pola Słoneje Boršće. Mjez druhim bě w nim tež pytana pólska staćanka, kotruž na městnje přesłyšowachu. Pokradnjene debjenki pak pola njeje žane njenamakachu. Po skónčenju policajskeje akcije smědźachu žona a dalše wosoby w busu dale jěć.
Budyšin (SN/MWj). Coronawirus zjawne žiwjenje w Hornjej Łužicy dospołnje lemi. Móhłrjec w połhodźinskim takće dóstawamy informacije, zo su wjetše kaž tež mjeńše planowane zarjadowanja wotprajene.
Konječan Křesćan Gruhn prosy wozjewić, zo zhromadźizna hońtwjerskeho drustwa Konjecy 20. měrca znatych přičin dla wupadnje. Nowy termin sčasom wozjewja. Na njewěsty čas zawrjena je wotnětka Wojerowska dźěćaca a młodźinska farma, kaž zdźěli jeje nošer Miłočanski Křesćansko-socialny kubłanski skutk.
W gmejnach zarjadniskeho zwjazka Při Klóšterskej wodźe so na njewěsty čas žane posedźenja gmejnskich radow njewotměja. To rěka, zo planowanej zhromadźiznje gmejnskich radźićelow 19. měrca w Pančicach-Kukowje a 26. měrca w Njebjelčicach njebudźetej, kaž zarjadniski zwjazk informuje.
Zo by so rozpřestrěwanje coronawirusa po móžnosći pomjeńšiło, dyrbi so zjawne žiwjenje na minimum redukować. Tomu wotpowěduje tež zarjadniski zwjazk Při Klóšterskej wodźe.
Pančicy-Kukow (SN/MWj). Za twarjenje zarjadniskeho zwjazka Při Klóšterskej wodźe w Pančicach-Kukowje kaž tež za zjawne zarjadnišća w pjeć přisłušnych gmejnach přihotuja „rjadowane wobmjezowanje wukonoweho poskitka“, rěka w nowinskej zdźělence, kotruž je zarjadniski zwjazk wčera medijam připósłał. Tak chcedźa zaručić, zo je zarjadnistwo dale dźěłakmane. Tohodla su tam kaž tež w gmejnskich zarjadnistwach wosobinske dorěčenja jenož hišće w nuznych padach móžne. Swoje prašenja a naležnosće měli wobydlerjo jednotliwym wěcywobdźěłarjam telefonisce abo z mejlku sposrědkować. Potom so pruwuje, hač je wosobinski termin trěbny. Pod slědowacymaj telefonowymaj čisłomaj je zarjadniski zwjazk docpějomny: 035796/ 94 60 a 946 40 abo 946 45. Na kóždy pad proša wo to so wopyta wzdać, hdyž so něchtó chory čuje, bě-li w minjenymaj tydźenjomaj w jednej z rizikowych kónčin, abo měješe-li kontakt z někim z tajkeje kónčiny.
Wochozy (CK/SN). Nalětni swjedźeń we Wochožanskim parku błudźenkow kónc měrca je wotprajeny. Přiwšěm su tam njedźelu nowu sezonu zahajili. „Njewěmy, kak so kriza corony dla na nas wuskutkuje. Ale pohibowanje na čerstwym powětře po přirodźe k stabilizaciji imunoweho systema móžu w našim 20 hektarow wulkim parku jenož poručić. Ćim bóle, hdyž smy wšitcy napominani swoje socialne kontakty redukować“, rjekny předsyda spěchowanskeho towarstwa Ulrich Klinkert.
Olympiada přestorčena
Budyšin. 54. centralnu olympiadu serbskeje rěče, kotraž bě za spočatk apryla planowana, přestorča. Přizjewiło je so 14 wučerjow a 83 šulerjow, mjez nimi 31 z Delnjeje Łužicy. Nowy termin za olympiadu planuje Serbske šulske towarstwo w oktobru. Potom budu so šulerjo nětčišeho 6. lětnika wubědźować. Dale přestorči SŠT za 27. měrc planowanu prezentaciju delnjoserbskeje webstrony www.dyrdomdej.de.
Towarstwo so njeschadźuje
Praha/Budyšin. Towarstwo přećelow Serbow (SPL) w Praze je wšitke swoje planowane zarjadowanja na wěsty čas wotprajiło, štož płaći za přichodne tydźenje. Jasne tež njeje, hač budu jutry na wuprawje we Łužicy. Kaž hižo zańdźene lěta chcychu z busom na křižerjow přijěć. Hłownu zhromadźiznu SPL runje tak přestorči kaž předwidźane wustajeńcy a přednoški w Praze a Liberecu.
Łódźnicy njemóža na dźěło