Z wčerawšeho posedźenja Radworskeje gmejnskeje rady

Radwor (SN/MkWj). Zo so w Radworskim hrodźe zaso něšto hiba, wobydlerjo gmejny hižo dlěši čas wědźa. Wčera wječor měješe kóždy, kiž so za to zajimuje, składnosć, wjace wo tym zhonić. Nowy wobsedźer hrodu, 50lětny Florian Heilbronner, je wot februara wokoło hrodu aktiwny. Z Frankskeje pochadźacy krajinowy architekt bydli w Berlinje a mjeztym sčasami tež w Radworju, kaž sam praji. We wobłuku prezentacije na wulkej wobrazowce wón wčera rozłoži, kak sej přichod 300 lět stareho knježeho domu předstaja: Hród ma zaso tajki kaž něhdy wupadać – jako barokna drohoćinka. Na prezentaciji předstaji Heilbronner zdobom historiske fota, kotrež bě sej nazběrał. Tak dokumento­waše z fotami tež přetwary po Druhej swětowej wójnje, na přikład, jako bě hród wučerski wustaw abo šulska kuchnja.

Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často pak maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa Bizoldec hosćenc w Haslowje. (20 a kónc)

Po cyłej Łužicy drje lědma někoho nańdźeš, kotremuž Haslow znaty njeje. Hłowna přičina je tamniši přiwabliwy Bizoldec hosćenc. Mała wjes nad Čornicu z dźensa něhdźe 70 wobydlerjemi bu lěta 1390 prěni raz jako Dreykretzen naspomnjena. ­Kretscham je słowjanska požčonka za „korčma“. Zo pak mjenuje so wjes serbsce Haslow a nic Tři korčmy – tak Jan Meškank – pokazuje na prěnjotne pomje­nowanje sydlišća. Je to serbsko-němska měšana twórba ze słowa Hasel-lěsk, kotremuž bu kóncowka -ow přidata.

W zažnym srjedźowěku stejachu w Haslowje při wikowanskej dróze Via regia tři korčmy. Kóžda z nich słušeše hinašemu knjejstwu. Rjebišec korčma, hižo před 100 lětami zawrjena, słušeše do knjejstwa Hornich Sulšec. We Vickec korčmje, ně­hdy Wutołčanskemu knjejstwu přisłušacej, su hač do lěta 1958 piwo točili a w přisłušacym rěznistwje kołbasy tykali.

Budu-li naši potomnicy raz wo gastronomiskim połoženju w dwurěčnych kónčinach Budyskeho wokrjesa po politiskim přewróće slědźić chcyć, změja ze Serbskimi Nowinami lěta 2021 w času wot 13. julija hač do dźensnišeho wudaća dobry zakład informacijow. Dohromady 20 hosćencow najwšelakorišeho razu smy čitarjam minjene tři měsacy dwójce wob tydźeń předstajili. Naš awtor Alfons Handrik je we wšitkich swojich přinoškach zajimawosće wo stawiznach korčmow, wo jich rozdźělnych wobsedźerjach a wo dźensnišim poskitku w hosćencach wuslědźił a čitarjam spřistupnił. Tak je redakciji SN w prózdninskim času znowa pod pažu přimnył a nam dźěło w druhdy napinacych lětnich tydźenjach trochu wolóžił. Připódla prajene je to lětsa jědnaty raz, zo je lětnja serija našeho wječornika na lokalnej stronje z jeho pjera. Za tajke wobstajne sobudźěło směm pilnemu Smjerdźečanej tež raz na tymle městnje wulki dźak wuprajić. Marian Wjeńka

Incidenca nad hódnotu 30

Budyšin. Wo 28 natyknjenjach z koronawirusom su wčera w Budyskim wo­krjesu informowali. Ze 168 schorjenych lěkuja štyri w chorowni. Incidenca po RKI dale stupa a wučinja tu dźensa 32,2. Aktualna incidenca po RKI we wo­krjesu Zhorjelc je 19,6. Tam rozprawjachu wčera wo 14 dalšich infekcijach, pjeć wosobow je korony dla w klinice.

Šćěpjenski centrum zawrjeny

Kamjenc. Wot Němskeho čerwjeneho křiža wobhospodarjeny šćěpjenski centrum na Kamjenskim lětanišću za škit pře koronawirus je dźěłać přestał. Poslednju injekciju dósta wčera krótko do 18 hodź. 50lětny muž. Wot dźensnišeho tam žane šćěpjenja wjace móžne njejsu. Mobilnej šćěpjenskej teamaj pak najprjedy hač do kónca septembra w Budyskim wokrjesu dale dźěłatej.

Multifunkcionalne šćěpiwo