Klóšter, přehladku a młyn sej wobhladali
Hladajo na wokomiknje zaso stupace korona-ličby a tak hrožace wospjetne čujomne wobmjezowanja zhromadneho schadźowanja smy sej jako Domowinska skupina Worcyn krótkodobnje swoju kubłansku jězbu zarjadowali. Jasne hnydom bě, zo pojědźemy k Monice Cyžowej do Noweje Jaseńcy. Ju wšak skoro wšitcy z njedawneho zarjadowanja župy Budyšin znajachu, hdźež wustupištaj Cyžec mandźelskaj z lóštnym hudźbnym programom.
Najprjedy pak wjedźeše nas puć do klóštra Marijineje hwězdy w Pančicach-Kukowje. Tam njewobhladachmy sej jenož jara rjanu wučbnu zahrodu, ale z runje tak wulkim zajimom tež wustajeńcu narodneje drasty, wot Moniki Cyžoweje wuhotowanu. Prjedy hač so k Cyžecom do Noweje Jaseńcy podachmy, dachmy sej hišće w Kozarčanskim Fischerec hosćencu wobjed zesłodźeć.
Pola sebje doma překwapi nas Monika Cyžowa z dalšej nahladnej kopicu eksponatow serbskeje drasty. Wuběrnje rozłoži nam spore dźěło, ke kotremuž njesłušeja jenož lubosć, ale předewšěm wušiknosć a sćerpnosć. Jeno žony so tomu njedźiwachu, ale tež mužojo njemóžachu přehladku dochwalić.
Stare rjemjesło sej wotkryli
W Krabatowym młynje kosu klepać a z njech wobchadźeć wuknyli
Čorny Chołmc (SiR/SN). „Mój dźěd je za nas stajnje kosu klepał. Nětko wón tu hižo njeje a njewěm, kak to dźe. Škoda, zo njejsym sej to prawje pokazać dała“, praji Christina Fabian z Noweje Łuki. Wona bě minjeny kónc tydźenja jedna z 15 wobdźělnikow, kotřiž chcychu w Čornochołmčanskim Krabatowym młynje wobchadźenje z kosu nawuknyć. Samo dźěći běchu tam přišli, kaž dwanaćelětna Nele ze swojim nanom. Doma maja nukle, a te chcedźa wězo z čerstwje syčenej trawu zastarane być. Wšitcy mějachu swójsku kosu sobu, kotrež sej kursisća mjez sobu wobhladachu. Zastupjene běchu starše, ale tež moderniše nastroje. Jedyn samotwarjeny bě tohorunja pódla.
Historisku bróžnju, kotraž při Trjebinskim Šusterec statoku znowa ...
Ideje spyta stajnje zwoprawdźeć
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa kulturnu bróžnju w Nowoslicach. (6)
Krótkopowěsće (29.07.21)
Do abo po nakupje so šćěpić dać
Budyšin/Wojerecy/Zhorjelc. W Budyskim centeru na Žitnych wikach móža so ludźo přichodnu wutoru a wutoru pozdźišo pře koronu šćěpić dać, we Wojerowskim Łužiskim centeru přichodnej dwaj štwórtkaj. Dohromady sydom nowych infekcijow je Budyski wokrjes zwěsćił, incidenca postupi tu po podaću RKI na 5,3. W Zhorjelskim wokrjesu wučinja incidenca dale 1,6.
Podpěruja wopory zapławjenjow
Kamjenc. Z dohromady 20 000 eurami chcetej město Kamjenc a jeho bydlenska towaršnosć SWG wopory wulkeje wody podpěrać. Pjenjezy chcedźa z měšćanskeho kaž tež z etata SWG wzać. Za to su so měšćanscy radźićeljo a jednaćelstwo SWG wuprajili, kaž Lessingowe město informuje. Po naprašowanju SN města Budyšin, Wojerecy, Biskopicy a Běła Woda ničo podobne njeplanuja.
Spěšnoćahowa trasa njewěsta
Jedyn njese brěmjo tamneho
Wjesny dom seniorow w Bjezdowach wobsteji 20 lět
82lětna Elisabeth Grofina a jeje 85lětny mandźelski Jurij bydlitaj w Bjezdowskim (Klein Partwitz) wjesnym domje seniorow. „Smój rady aktiwnaj. Móžemoj sobu činić. Wostudłe namaj ženje njeje. Mamoj tu tež tójšto duchownych powabkow“, měnitaj mandźelskaj nastupajo gymnastiku, spěwanje, hódanske hry, čitanje nowiny a dalše wobsahi. Wot spočatka lěta bydlitaj wonaj w domje seniorow na bywšim třistronskim ratarskim statoku Patokec Marje. Jako katolikaj chodźitaj tam wot póndźele do pjatka prawidłownje k nyšporu. Njedźelnu Božu mšu sćěhujetaj w radiju abo telewiziji. „Móžemoj swoju wěru dale pěstować. Kóždemu wobydlerjej wopokazuja tu respekt, česćownosć a přistojnosć. Dohladowanje je jara fachowske“, staj wobaj dźakownaj.
Stwy hinak zarjadowane
Policija (28.07.21)
Do čakaceho awta prasnył
Miłoćicy. Na statnej dróze S 100 mjez Hlinowcom a Pančicami-Kukowom je so wčera popołdnju wobchadne njezbožo stało. Wodźer Nissana dyrbješe při wotbočenju do Miłoćic čakać, za nim jěducy wodźer Opela to přepozdźe pytny a je nimale bjez borzdźenja do Nissana zrazył. Wobeju šoferow dowjezechu do chorownje. Zasadźenych bě 21 wobornikow z Miłoćic, Njebjelčic a Pěskec.
Poskićeja socialne lěto
Budyšin. Za čas wot 1. septembra 2021 hač do 31. awgusta 2022 poskića Muzej Budyšin młodym zajimcam, přewjesć dobrowólne socialne lěto we wobłuku měšćanskich a kulturnych stawiznow. Do jich nadawkow słuša inwentarizować a digitalizować objekty, hladać a rozšěrić datowu banku, rešeršować za wustajeńcy a pomhać wosebite přehladki sobu natwarić a wottwarić. Nadrobniše informacije dóstanu zajimcy pod telefonowym čisłom 03591/ 534 931.
Radźićeljo wuradźuja
Wotrow. Dalše twarske dźěła we wobłuku saněrowanja šulskeho twarjenja w Pančicach-Kukowje budu jedna z temow přichodneho posedźenja tamnišeje gmejnskeje rady jutře w 19 hodź. na Wotrowskej starej šuli. Dale zaběraja so radźićeljo z ponowjenjom wjesneje dróhi w Kanecach, za čož dyrbi gmejna nětko roły, wobhrodźenja a zornowcowe plesternaki kupić. Nimo toho póńdźe wo nowu bydlensku štwórć při Srjedźnym puću w Pančicach-Kukowje.
Dobra duša šule rozžohnowana
Na poslednim dnju šulskeho lěta je so šulska słužba za Martinu Jancynu zakónčiła. Wona bě na Wojerowskej Zakładnej šuli „Handrij Zejler“ při Worjole wot 1985 to, štož so dobra duša šule mjenuje. Jako zastupowaca nawodnica je minjene lěta hodźinski plan tak zestajała, zo bě wšitko za koleginy optimalnje zrjadowane a na wosobinske wobstejnosće přiměrjene.
Kóždy na šuli, hač koleginy, šulerstwo, starši šulerjow, socialna słužba abo techniski přistajeny měješe w Martinje Jancynej stajnje wotewrjene wucho za słužbne abo tež priwatne naležnosće. Sćicha staraše so wona wo wšě małe, ale tež wulke šulske problemy, njehladajo na swjatok. Tež w času najwjetšich wužadanjow je z přećelnym optimizmom měrnje wustupowała. Wona bě na Zejlerjowej šuli najdlěje wuwučowaca a drje poslednja wučerka, kotraž so z tohole šulskeho městna na wuměnk poda, wšako ma kubłanišćo po přichodnym šulskim lěće na nowe městno přećahnyć.
Mnozy chcedźa sej dom twarić
Město Kulow kupi płoniny při starym dwórnišću za nowe ležownosće
Kulow (AK/SN). Bydlensku kwalitu w Kulowje chce tamniša měšćanska rada dale polěpšić a kupi za to płoniny za nowe twarske ležownosće a parkowanske městna. Kaž měšćanscy radźićeljo na swojim zašłym posedźenju wobzamknychu, kupi město dohromady 31 400 kwadratnych metrow přestrjenje. Za to wuda 350 000 eurow, kotrež wozmje zdźěla ze srědkow koronoweje pomocy komunam, zdźěla z měšćanskich rezerwow.
