Protyčce do Kopšina a Sernjan
Zakładnu šulu dale ponowjeja
Nadawki za třeći twarski wotrězk nětko přepodate
Hamor (CK/SN). Za třeći twarski wotrězk wohnjoškitneho ponowjenja Zakładneje šule Hamor je tamniša gmejnska rada předwčerawšim jednotliwe nadawki přepodała. Za wjace hač poł miliona eurow budu mulerske dźěła wukonjane, tepjenje, sanitarne připrawy a elektrika přetwarjene, nowe špundowanje kładźene a wšitko wobarbjene. Po zjawnym wupisanju su so w pjeć losach stajnje za najlěpšeho poskićowarja rozsudźili. Za suchotwarske dźěła mějachu najprjedy jenički poskitk. Z trochu zapozdźenjom hišće tři dalše dóńdźechu, kotrež njebychu po zakonju wobkedźbować směli. Jedyn z poskićerjow pak so prócowaše, we wobłuku prawniskeho pruwowanja Hamorskej gmejnje pohóršk wuprajić. Radźićeljo tuž wobzamknjenje wo nadawku za suchotwar wotstorčichu. Wobstaranja materiala dla drje by hinaši puć lěpši był, gmejna pak chce móžnym zarjadniskim zmylkam zadźěwać, kaž twarska nawodnica Cortina Kokles rozłoži.
Młody pčołar dźěda naslěduje
Hórki (aha/SN). Handrijej Sćapanej z Hórkow bě dźewjeć lět, jako jeho dźěd Beno Šnajder 1997 zemrě. Wón bě z ćěłom a dušu pčołar był. Po smjerći steješe jeho dwanaće kołćow na zahrodźe prózdnych. Swójbni wšak to wobžarowachu, a Handrij wědźeše, zo su wšón pčołarski grat a trěbna škitna drasta njewužiwane.
Jako šuler 7. lětnika Chróšćanskeje šule nawjaza młody Hórčan zwisk ke Chróšćanskemu pčołarjej Jurjej Brězanej a jemu powědaše, kak móhł zawostajenstwo swojeho dźěda wozrodźić. Nazhonity pčołar přilubi jemu pomoc a podpěru. Wón wědźeše, zo ma Roland Jenč z Hózka we Łazku swoju pčólnicu – přetwarjeny Barkas B 1000 – a zo ma wotpohlad, někotre pčolace ludy předać. Zhromadnje staj so k njemu na puć nastajiłoj a wróćištaj so z třomi ludami. Jurij Brězan, kiž je mjeztym njeboh, je Handrijej Sćapanej wobstajnje wšitke trěbne dźěła kołowokoło pčołarjenja wot spočatka hač do kónca wujasnjał.
We wjacorych domach na Wojerowskej Hasy Käthy Niederkirchner tuchwilu ...
Bórze milion eurow deficita
Runje tak kaž mnohe dalše komuny hlada tež město Wojerecy z měšanymi začućemi do přichoda, dokelž čakaja na nje pjenježnje napjate časy. To wotbłyšćuje so na přikład w nowym hospodarskim planje.
Wojerecy (KD/SN). Na swojim 3. wurjadnym posedźenju wobzamkny Wojerowska měšćanska rada wčera dwójny etat 2021/2022. Jenički radźićel bě so hłosa wzdał, hačrunjež planuja wjace wudawkow hač dochodow. Problem je, zo móža swoje planowane wotpłaćenje kreditow we wobjimje miliona eurow wob lěto hač do 2025 jenož hišće na zakładźe dobreho hospodarjenja zašłych lět zwjesć, rozłoži wyši měšćanosta Torsten Ruban Zeh (SPD). Z dźensnišeho wida změja w lěće 2025 deficit nimale miliona eurow.
Krótkopowěsće (12.05.21)
Sebjetesty jenož pod dohladom
Budyšin. Sebjetest na koronawirus wotnětka jeno připóznawaja, hdyž bu pod dohladom přewjedźeny. Nowe rjadowanje Zwjazka nětko tež w Sakskej nałožuja. Test ze swójsce podpisanym wobkrućenjom z interneta wjace njepłaći. W Budyskim wokrjesu bě hač do wčerawšeho 23 natyknjenjow z koronu a jedyn smjertny pad. Incidenca po RKI wučinja tu dźensa 125,1. Zhorjelski wokrjes rozprawješe wo 87 infekcijach. Incidenca po RKI je tam dźensa 156,3.
W Starym ludźe filmowali
Dešno. Team 2. programa španiskeje telewizije RTVE je wčera w srjedźowěkowskim sydlišću Stary lud Dešnjanskeho domizniskeho muzeja wjerćał. Muzejowe mustwo je drastu, rěč a dźensniše žiwjenje po słowjanskim wobsydlenju regiona předstajiło. Španiscy telewiznicy su po cyłej Němskej po puću. Dešno słuša k nahrawanjam w Błótach.
Kubłanski park abo kič?
Policija (11.05.21)
Bjez dowolnosće palili
Wulki Wjelkow. Na parkowanišću we Wulkim Wjelkowje su w nocy na póndźelu wjacori młodostni lěhwowy woheń zamiškrili. Po policajskich wustawkach města Budyšina pak to tak dowolene njeje. Jako tam policija krótko do połnocy přijědźe, dwě wosobje ćeknyštej, zastojnicy jednu z njeju po krótkim přesćěhanju dosahnychu. Kaž so při alkoholowym tesće wukopa, měješe młodostny 2,46 promilow alkohola w kreji. Policisća woheń zhašachu a přepodachu młodostneho jeho staršimaj.
Južna warianta w fokusu měšćanskich radźićelow
Budyšin (CS/SN). Čłonojo hłowneho wuběrka Budyskeje měšćanskeje rady rěčachu na swojim zašłym posedźenju wo tym, kotru wariantu wobjězdki južnje města maja za najlěpšu, byrnjež dotal jasne njebyło, hač budźe wobjězdka scyła twarjena. Tak to znajmjeńša wyši měšćanosta Alexander Ahrens (SPD) zwurazni. Wšako njeje to naležnosć města, ale Sakskeje. Ahrens namjetowaše tež hnydom južnu wariantu jako najspomóžnišu. Sewjerna je drje krótša, štož móhło so na kóšty wuskutkować, ma pak mnohe njelěpšiny. Tale čara by wjedła mjez Budyšinom a Hornjej Kinu po ležownosćach, kotrež słušeja do kónčiny přepławjenja. Nimo toho – na to běchu wobydlerjo hižo pokazali – by wuskutkowała dalše poćežowanja za Hornju Kinu wobchada a hary dla. Bychu-li sewjernu wariantu twarili, bychu někotre dróhi přichodnje do zamołwitosće města přešli a tak trajne přidatne kóšty zawinowali. Dale by běh dróhi logistiski centrum při nakładnym dwórnišću znjemóžnił. Centrum pak ma so stać zwjazowanska městnosć mjez dróhu a kolijemi, kajkaž by w Sakskej jónkrótna była.
We wysokej starobje hišće čiła
Nadźija na poradźenje
Budyšin. Budyski twarski decernat so wjeseli, zo chcedźa Budyšenjo swoje domy na dnju pomnika zajimcam zaso wotewrěć. Město so mjeztym 28 lět na akciji wobdźěla. Po lońšej přestawce budźe tónraz składnosć so wobdźělić. Cyłoněmski dźeń wotewrjeneho pomnika wotměje so 12. septembra. Potom móža sej zajimcy městnosće wotkryć, kotrež zjawnosći hewak přistupne njejsu.
Tónkróć dowěrić
Budyšin. Minjeny čas běchu so husto wobšudnicy, kotřiž so jako zastupjerjo někajkeje firmy wudawachu, ludźom do bydlenjow dóstali. Tuchwilu pak su w Budyšinje woprawdźe sobudźěłaćerjo Němskeje telekom po puću. Spóznajomni su woni na typiskej drasće předewzaća w barbach šěra/čorna a magenta. Woni móža so ze słužbnym wupokazom identifikować. Wobkedźbujo škitne postajenja woni zajimowanych wobydlerjow sprjewineho města po přeću poradźuja.
