Policija (02.02.22)
Na wołanje susoda reagowała
Běła Woda. Wobhladniwje jednała je předwčerawšim wječor wobydlerka na Puškinowej w Běłej Wodźe, jako słyšeše z bydlenja swojeho susoda, kak wón wo pomoc woła. Nablaku informowaše wona měšćanski policajski rewěr, kotryž je hnydom wobsadku policajskeho awta pósłał. Z pomocu wohnjowych wobornikow dóstachu so zastojnicy do bydlenja 91lětneho. Wón bě padnył a njemóžeše sej hižo sam pomhać. Wuchowanscy sanitetarjo so na to wo muža starachu. Kedźbliwej žonje, kotraž bě wołanje starca słyšała a pomoc organizowała, so policija wuraznje dźakuje.
Sport za muži
Na camprowanju serbsce strowili
Dołho dosć na šćežku čakali
Zbywacy wotrězk kolesowanskeho puća do Kamjenca dotwarja
Njebjelčicy (JK/SN). Po 25 lětach přihotow a planowanja je so skónčnje poradźiło namakać móžnosć, dotwarić kolesowansku šćežku podłu statneje dróhi S 100 mjez Budyšinom a Kamjencom. Hač k wotbóčce do směra na Miłoćicy je šćežka hižo hotowa. Nětko kiwa dokónčenje. Prawe rozrisanje namakać pak njebě lochko. Z cyłkownje štyrjoch wariantow měješe so najpřijomniša, to rěka hospodarsce znjesliwa a wobswětej nješkodźaca namakać. Tak mjenowana prěnja warianta, bjezposrědnje při S 100 je so přesadźiła. Dalša měješe wjacore dźesatki metrow paralelnje k dróze přez Hlinowski lěs wjesć. Tam pak je škitany biotop a tuž tale móžnosć wupadnje. Tamnej namjetaj běštej hišće bjezwuhladnišej. Při telko wuběrje wězo njezadźiwa, zo je tak dołho trało.
Wojuja wo lěkarski dom
Hamorska gmejna chce na swojim teritoriju zakładne lěkarske zastaranje zaručić a prócuje so wo to, zo móža projekt we wobłuku strukturneje změny zwoprawdźić. Při tym pak dyrbja so do spěcha měć.
Hamor (CK/SN). Z pjenjezami z hornca za změnu strukturow ma w Hamorje lěkarski dom nastać. W januaru bě Klětnjanski lěkar dr. Peter Raff zemrěł. Z nim hižo nětko domjacy lěkar pobrachuje, praji nawoda hłowneho zarjada gmejny Arian Leffs. A powšitkownej lěkarce w Hamorje woteńdźetej přichodne lěta na wuměnk. Z lěkarskim domom chce gmejna za naslědnikow zajimawa być, zo móhli zakładne lěkarske zastaranje za nimale 4 400 wobydlerjow zaručić.
Nowe ležownosće młodym swójbam
Hory (AK/SN) Gmejna Halštrowska Hola wutwori na Horach twarske ležownosće za młode swójby. K tomu je so tamniša gmejnska rada na swojim wčerawšim posedźenju wuznała. Z jednym hłosawzdaćom radźićeljo wobzamknychu, nastajić twarski plan za „bydlensku štwórć Stara Berlinska dróha II“. Nowu bydlensku štwórć přizamknu direktnje wobstejacej štwórći „Stara Berlinska dróha“. Dohromady ma dźewjeć ležownosćow nastać.
„Na gmejnskim zarjedźe běchu so minjene lěta stajnje zaso zajimcy přizjewjeli. Młode swójby so zaměrnje za ležownosćemi naprašuja, hdźež móža sej swójski dom natwarić“, nawodnica twarskeho zarjada Claudia Simon wčera rozłoži. „Jako gmejna smy wšitke naprašowanja zběrali, a nětko nowu bydlensku štwórć na Horach wutworimy.“
Wosrjedź zymy na kćějace kwětki w zahrodce myslić je při ...
Njejasnosć wostanje
Krótkopowěsće (02.02.22)
Harig: Alternatiwy pytać
Drježdźany/Budyšin. Budyski krajny rada Michael Harig (CDU) dale wo to wabi, šćěpjensku winowatosć zběhnyć. Tohodla je sej wón wčera w telewiziji MDR změny w zakonju nastupajo strowotnistwo a wobłuki hladanja žadał. Tam wotpohladany zaměr njeda so docpěć. Trěbne su tuž nuzne rozmyslowanja wo alternatiwach na zwjazkowej runinje, sej Harig pomina. W lisće bě wón hižo minjeny tydźeń sakskeho ministerskeho prezidenta Michaela Kretschmera (CDU) prosył so za změnu zasadźić.
Ličbje natyknjenjow přiběracej
Budyšin. Wjetši rozrost natyknjenjow z koronawirusom stej Budyski wokrjes z 380 a Zhorjelski ze 407 padami wčera wozjewiłoj. Ličba schorjenych, kotrychž dyrbja w chorowni lěkować, je w Hornjej Łužicy na 78 přiběrała. Roberta Kochowy institut poda dźensa za wokrjes Budyšin incidencnu hódnotu 440,9 a za wokrjes Zhorjelc 603,7.
Kubłanišća wostanu wotewrjene
Policija (01.02.22)
W domje woheń wudyrił
Budyšin. Wulka škoda nasta wčera rano při wohenju w bydlenskim domje na Nowoměšćanskej dróze w Budyšinje. Po wšěm zdaću běchu podružnicy rano zahe kachle zatepili. Bórze na to sapachu płomjenja hižo z třěchi twarjenja. Přiwołani wohnjowi wobornicy je zhašachu. Škodow wohenja a hašenskeje wody dla najprjedy raz nichtó w domje bydlić njemóže, kaž z policajskeje rozprawy wuchadźa. 48lětneho muža dyrbjachu zranjeneho do chorownje dowjezć, dokelž bě so při hašenju zranił. Rozměr škody wučinja něhdźe 150 000 eurow.
