Wjercha Pücklera počesćili
Krótkopowěsće (15.02.22)
Incidenca lochce spaduje
Budyšin/Zhorjelc. Wot pjatka hač do wčerawšeje póndźele su we wokrjesomaj Budyšin (960) a Zhorjelc (813) cyłkownje 1 773 dalšich natyknjenjow z koronu zličili, w Zhorjelskim 14 omikronwarianty. Přiwšěm je incidenca we woběmaj wokrjesomaj lochce spadnyła. Tak podawa Roberta Kochowy institut dźensa za Budyšin hódnotu 1235,2 (-154,4) a za Zhorjelc 951,5 (-216,3).
Digitalna biblioteka
Budyšin. Portal delnjoserbskeje rěče Serbskeho instituta (SI) je wo poskitk bohatši. Wot kónca januara móža zajimcy pod prěnju wersiju digitalneje delnjoserbskeje biblioteki wužiwać. Wona wopřijima mjez druhim swobodnje přistupne digitalizowane wudaća staršich ćišćanych delnjoserbskich tekstow. Wo wužiwanju a dalšich wobsahach nowostki informuje SI zajutřišim, štwórtk, na online-prezentaciji.
Studowacych prjedy zapřijeć
Policija (14.02.22)
Paduchow katalyzatora wuslědźili
Běła Woda. Nimale wšědnje policija rozprawja, zo paduši wot wosobowych awtow katalyzator wotrězaja a pokradnu. W tychle dźělach su wosebite metale, kotrež móža skućićeljo derje wužiwać a předać. Sobotu připołdnju je policija w Běłej Wodźe třoch podhladnych wuslědźiła, kotřiž su znajmjeńša za jedyn tajki pad zamołwići. W jich awće njenamakachu jenož we Wojerecach pokradnjeny katalyzator, ale tež štyri kolesa Peugeota a drohi grat. Muža a žonu z Pólskeje w starobje 25 a 24 lět kaž tež 32lětneho Ukrainjana zastojnicy nachwilnje zajachu. We wobłuku přepytowanjow chcedźa nětko wuslědźić, hač je padušna trójka tež za dalše kradnjene katalyzatory zamołwita. Škoda we Wojerowskim padźe wučinja něhdźe 800 eurow.
Zaručeja wěstotu podłu pućow
Sće so hižo wobdźělili?
Iniciatorojo Łužiskeho monitora spřistupnjeja Serbowkam a Serbam katalog prašenjow, zo bychu jako mjeńšina wobydlerstwa swój wid na aktualne łužiske wobstejnosće zapodali a naprašnik wupjelnili. Sćěhowacy link płaći jenož wobmjezowanje hač do njedźele, 20. februara:
Wobchad we wsy změrować
Wšědny puć šulerjow we Worklecach je wulke wužadanje
Worklecy (JK/SN). To bě derje měnjene a na kóncu běchu tež wšitcy wobdźěleni z rozrisanjom spokojom, jako so busowe zastanišćo za šulerjow Worklečanskeje zakładneje a wyšeje šule přepołoži. Nětčiše blisko pjekarja, hdźež maja šulerjo tež móžnosć, pod třěchu na bus čakać, zaso mnohim šoferam witane njeje. Wosebje rano tam hač do tři busow steji a puć blokěruja, tak zo awta nimo njemóža. Nimo toho su so někotři starši na tym postorčili, zo maja jich dźěći nětko dale do šule, a to hišće podłu hłowneje dróhi. Lěpšina noweho zastanišća njeje so hišće wot wšitkich spóznała, tež hdyž šulerjo ani dróhu přeprěčić njetrjebaja a móža po chódniku nóžkować.
Wulka nopawa na puntach wotbyła
Wojerecy (SiR/SN). Waha bě minjene dny najwažniši utensil we Wojerowskim zwěrjencu. Tam su lětušu inwenturu přewjedli. Minjeny štwórtk bě najwjetši dźěl něhdźe tysac wjetšich a mjeńšich zwěrjatow waženych, měrjenych a posudźowanych. Pobrachowali su jenož hišće wulke nopawy. Štož zdaše so za zwonkastejacych komplikowana naležnosć być, bě na kóncu cyle jednore, přetož nopawa Bert jako najwjetša da so bjez problemow z tróšku sadom na wahu zwabić. Wona waži dokładnje 132,8 kilogramow a je tuž 2,5 kilogramow wotbyła.
Po njezbožu hrjebakow přińdźetaj jutře, wutoru, nowej hrjebakaj z Berlina do Wojerowskeho zwěrjenca, zo móhli z nimaj takrjec nowu swójbu wutwarić, informowaše nawoda zwěrjenca Eugène Bruins. Wón so nimo toho nadźija, zo budu twarske dźěła w nowej připrawje za mjedwjedźe hišće do jutrow wotzamknjene. Potom móhłoj so mjedwjedźej Björn a Bengt do Wojerec nawróćić. Rozžohnować budu so porno tomu z poslednjej pusćinowej lišku, kotraž do druheho zwěrjenca přećehnje. Tule družinu we Wojerecach hižo njezměja.
Podłu B 96 bórze twarja
Wulke Ždźary (AK/SN). Swój koncept wotwodźowanja wopłóčkow Łazowska gmejna dale krok po kroku zwoprawdźa. Hišće lětsa chcedźa ležownosće podłu zwjazkoweje dróhi B 96 přizamknyć. Na swojim zašłym posedźenju čłonojo Łazowskeje gmejnskeje rady wobzamknychu, zo ma nadawk we wobjimje 560 000 eurow Nišćanska twarska firma STB dóstać.
„Je to zhromadny projekt krajneho zarjada za dróhotwar a wobchad, Kamjenskeje EWAG a Łazowskeje gmejny. Zo njebychmy wobydlerjow přejara poćežowali, přewjedźemy naprawu w štyrjoch twarskich wotrězkach“, rozłoži Łazowski wjesnjanosta Thomas Leberecht (CDU). Wosebite wužadanje budźe, zo maja so časowe wotběhi dokładnje dodźeržeć. To ma inženjerski běrow z Mučowa z twarskej firmu wothłosować. Na zjawnej wobydlerskej zhromadźiznje 24. februara w 16 hodź. w awli Wulkoždźarowskeje zakładneje šule chce Thomas Leberecht wo twarskich wotrězkach a wo móžnym časowym planje informować.
Fuziju cofnyć njeje hižo tabu
Wuznam justicy jako dźěłodawar, korona, dołhi puć k elektroniskej akće a skónčnje hišće pohlad do wšědneho dnja sudnistwa stejachu w srjedźišću njedawneje nowinarskeje rozmołwy Zhorjelskeho krajneho sudnistwa w Budyšinje.
