Krótkopowěsće (28.10.21)
385 nowych natyknjenjow
Budyšin/Zhorjelc. We woběmaj hornjołužiskimaj wokrjesomaj incidenca korony dla dale přiběra. Za Budyski wozjewi Roberta Kochowy institut dźensa hódnotu 278,8. Wčera přizjewi wokrjes 250 nowych schorjenjow. Za Zhorjelski wokrjes podawa RKI incidencu 258,2. Tam zwěsćichu 135 dalšich infekcijow.
Šulerske filmy hišće zapodać
Drježdźany. Za sakski festiwal šulerskeho filma „film ab!“ móžeja šulerki a šulerjo swoje samoprodukowane paski hišće hač do 5. nowembra na internetnej stronje zapodać. Kultusowe ministerstwo a Sakski krajny wustaw za priwatny rozhłós a nowe medije festiwal zarjadujetej. Wuknjacy wšitkich rjadowniskich schodźenkow móža so wobdźělić. Najlěpše filmy z premijemi cyłkownje 2 100 eurow mytuja.
China so mjerza
Policija (27.10.21)
Tobak při puću ležał
Krušwica. Paket hrubeho tobaka je předwčerawšim popołdnju w Krušwicy policajske zasadźenje zawiniło. Swědcy namakachu paket při kromje puća, kotryž wjedźe k hraničnemu mostej, a informowachu policiju. Po wšěm zdaću bě paket z transportera abo nakładneho awta padnył. Kaž bě z nalěpka wučitać, jednaše so wo 33 kilogramow tobaka. Policisća wzachu wšitko sobu a informowachu swojich kolegow-cłownikow. Woni maja nětko nadrobniše wobstejnosće namakanki wuslědźić.
W prózdninach do muzeja
Budyšin. „Baje, baje, bachu ...“, rěka dalši prózdninski poskitk Budyskeho Serbskeho muzeja jutře, štwórtk, wot 10 hodź. Při tym steja sćinowe bajki w srjedźišću. Wobdźělić móža so zajimcy, kotřiž zamóža bajki bać a je tež pokazać. W Serbskim muzeju móža woni swójske sćinowe dźiwadło a figury paslić. Přizjewjenja přijimuja e-mailnje pod adresu ticket@sorbisches-museum.de abo pod telefonowym čisłom 03591/270 87 00.
Wotewru wustajeńcu
Budyšin. Rězbarstwo Alojsa Šołty ze Žuric steji w srjedźišću noweje wustajeńcy Budyskeje Serbskeje kulturneje informacije, kotruž tam pjatk, 29. oktobra, w 17.30 hodź. wotewru. Pod hesłom „Korjenje – swětło w rjadźe – swobodne kreacije z drjewa“ pokaza serbski wuměłc přehlad swojeho tworjenja a jednotliwe eksponaty a jich nastaće rozłoži. Wopytowarjo maja płaćiwe hygieniske postajenja wobkedźbować. Za zarjadowanje płaći prawidło 3G. Wšitcy zajimcy su na wotewrjenje zajimaweje přehladki wutrobnje přeprošeni
Čita z druheje knihi
Postajenja znowa rjaduja
Po dźesać lětach chcedźa policajske wustawki přiměrić
Slepo (CK/SN). Jako škit před zjawnym poćežowanjom maja gmejny, zarjadniske zjednoćenstwa a zwjazki status policajskeho zarjada. To potrjechi mjez druhim zanjerodźenja přez skót, njedowolene wupowěsnjenje plakatow abo poćežowanja hary dla. Rjadowane je to wšo w policajskich wustawkach. Wot lěta 2010 maja tajke tež w Slepjanskim zarjadniskim zjednoćenstwje, hdźež płaća wone za gmejny Slepo, Dźěwin a Trjebin.
Nalětni deficit zaso wurunany
Konjecy/Drěwcy (aha/SN). Lětuše zymne a mokre nalěćo je zawinowało, zo bě wunošk mjedu jara snadny a daloko pod dołholětnym přerězkom. Kćěło wšak je wšo kaž kóžde lěto, tola wjedra dla njemóžachu pčołki wulećeć. Tele starosće njemějachu jenož serbscy pčołarjo, ale tomu bě po cyłej Němskej tak.
Konječan Jan Šołta, kiž mjeztym dlěje hač pjeć lětdźesatkow pčołki plahuje, z nazhonjenjow wě, zo so straty w nalěću zwjetša zaso wurunaja. Jako su lětsa mlóče kćěli bě wjedro tajke, zo wučinješe wunošk jenož połojcu dołholětneho přerězka. Tež wunošk z akacijow njebě tajki kaž wočakowany. Hdyž pak lipa kćěješe, so straty nimale wurunachu, tak, „zo móžachu pčołarjo we Łužicy spokojom być“.
Třeći raz přewjedźechu w Smječkečanskim młodźinskim klubje ...
Personalna změna w přiradźe
W přiradźe za serbske naležnosće města Wojerecy skutkowaše dotal dźesać wosobow. Nětko su gremij na jědnaće wosobow rozšěrili. Tole je měšćanska rada wčera wobzamknyła.
Wojerecy (AK/SN). Marcel Fröschl (AfD) Wojerowsku měšćansku radu wopušći. Jeho próstwje su radźićeljo na swojim wčerawšim posedźenju přihłosowali. Na jeho městno we frakciji AfD přińdźe Hans-Jürgen Wald. Wón přewozmje nadawki swojeho předchadnika w jednotliwych wuběrkach. Tomu słuša tež přirada za serbske naležnosće. Nimo Walda skutkuja w nim dale radźićeljo Christoph Wowtscherk (CDU), Dirk Nazdala (Swobodni Wolerjo) a Jan Kregelin (SPD). Jako wěcywustojni wobydlerjo dźěłaja we wuběrku sobu Evelin Grafowa z Wojerec, Gabriela Korchowa z Němcow, Birgit Zahrodnikowa z Ćiska, Brigita Šramina z Wojerec, Karl-Heinz Schütze z Wojerec a Gabriela Linakowa z Ćiska. Evelin Grafowa je předsydka serbskeje přirady města.
Krótkopowěsće (27.10.21)
83 koronapadow w klinikach
Budyšin. W hornjołužiskich chorownjach lěkuja tuchwilu 83 na koronu schorjenych. Incidenca je po Roberta Kochowym instituće dźensa w Budyskim wokrjesu 234,9 a w Zhorjelskim 215,5. Wokrjes Budyšin je wčera wo 220 dalšich natyknjenjach z koronawirusom informował. We wokrjesu Zhorjelc rozprawjachu samsny dźeń wo 173 infekcijach.
Myto přichoda do Njebjelčic
Drježdźany. Projekt „Wnučkokmane energijowe hospodarstwo za gmejnu Njebjelčicy“ wuznamjeni sakske ministerstwo za energiju, škit klimy, wobswět a ratarstwo z Mytom přichoda 2021 w kategoriji eku. Z tym zwjazany je mytowanski pjenjez 10 000 eurow, kaž projektowy team eku Njebjelčanskeho wjesnjanostu Tomaša Čornaka tele dny informowaše.
Yücel na čole PEN-centruma
Policija (26.10.21)
Katalyzator pokradnyłoj
Běła Woda. Dźeń a časćišo so paduši na katalyzatory wosobowych awtow měrja. Najnowši tajki pad sta so předwčerawšim w Běłej Wodźe. Tam su njeznaći wot Mercedesa katalyzator a wot Audija wobě čisle pokradnyli. Hnydom alarmowana wobsadka policajskeho awta wuslědźi na to muži w starobje 25 a 31 lět. Při jeju Audiju A6 běštej spakosćenej čisle přičinjenej. W awće samym namakachu zastojnicy pokradnjeny katalyzator kaž tež wotpowědny grat. Policisća wšitko sćazachu a wzachu paduchow sobu na policajski rewěr. Tam jich z fotami a porstowymi wotćišćemi kriminalistisce registrowachu. Pad nětko dale přepytuja.
Skićeja impulsy za zetkanja
Smochčanske kubłanišćo swjateho Bena je tele dny nowy program za nazymske a zymske měsacy 2021/2022 wudało. W nim je tójšto znatych zarjadowanjow zapřijatych, maja pak tež někotre nowe poskitki přihotowane.
Smochćicy (SN/MWj). Dohromady wjace hač 70 zarjadowanjow ma Smochčanske kubłanišćo swjateho Bena w přichodnych tydźenjach a měsacach planowane. To wuchadźa z noweho programa za nazymske a zymske měsacy 2021/2022, kotrež je kubłanske zarjadnišćo Drježdźansko-Mišnjanskeho biskopstwa nětko předpołožiło. Předwidźane maja w přichodnych měsacach, mjez druhim wjele poskitkow za nabožne, kulturne, ekologiske a politiske kubłanje. „Chcemy być městno, hdźež so ludźo zetkawaja a do rozmołwy přińdu. Stejimy w našim kraju, našej zhromadnosći a tež w našej cyrkwi wosrjedź přewróta časoweje doby. W tutym času je wažniše hač hdy prjedy, zo so mjez sobu znajemy, sej připosłuchamy a so tež wuměnjamy. Z našimi zarjadowanjemi chcemy za to impulsy a tež rum skićić“, praji rektor Sebastian Kieslich.
