Na farmje zaso warja
Wojerecy. Wot popjelneje srjedy, 2. měrca, w 19 hodź. pokročuja na Wojerowskej dźěćacej a młodźinskej farmje z rjadom „Klewernje a kreatiwnje warić“. Hesło prěnjeho zarjadowanja rěka „Jahły, hejduš a zelene krupy“. Wobdźělenje na dorosćeneho płaći sydom eurow. Přizjewjenja přijimuje Elžbjeta Hojerjowa pod telefonowym čisłom 03571/ 979 164 abo z mejlku pod . Ličba městnow je wobmjezowana. Městna rozdawaja tak, kaž přizjewjenja dochadźeja.
Pytaja statoki za jubilej
Slepo. Za swjedźenski kónc tydźenja wot 17. do 19. junija, hdyž zhladuja na 750. róčnicu Slepoho a wotměja 9. mjezynarodny festiwal dudakow, pytaja tam statoki, na kotrychž móhli so towarstwa a wobdźělene skupiny prezentować. To płaći za Měrowu dróhu wot gmejnskeho zarjadnistwa hač k Serbskemu kulturnemu centrumej. Dale pytaja zwólniwych, kiž chcyli so na swjedźenskim ćahu wobdźělić. W nim maja so serbske tradicije, wšědne žiwjenje kaž tež turistiske poskitki wotbłyšćować. Zajimcy njech přizjewja so hač do 11. měrca pod telefonowym čisłom 035773/ 77 230.
Wěstota šulerjow wažna
W měrcu započnu w Roholnju zawróćensku seklu za busy twarić
Roholń (AK/SN). Gmejna Łaz da w swójskej zamołwitosći na kromje Roholnja (Riegel) tak mjenowanu zawróćensku seklu za busy twarić. To su gmejnscy radźićeljo na swojim zašłym posedźenju schwalili. Nadawk we wobjimje 85 000 eurow přepodachu twarskej firmje ze Židźinoho w gmejnje Halštrowska Hola.
Dotal wobsteji w Roholnju jenož prowizoriska zawróćenska sekla. Dowolnosć za nju Budyski krajnoradny zarjad kóžde lěto podlěša. „Pytamy hižo dołho za rozrisanjom“, rjekny twarski nawoda gmejny Wolfgang Tietze. Při wjacorych terminach na městnje su zastupjerjo wokrjesa, gmejny, policije a Regiobusa zwěsćili, zo njemóža dotalnu seklu dale wužiwać. Wona je přemała a předaloko zwonka wsy. Tak so na nowotwar dojednachu. Za spěchowanskimi móžnosćemi pytać pak bě ćežko. Skónčnje dóstachu wot krajneho zarjada za dróhotwar a wobchad pjenjezy přizwolene.
Ideje za wobydlerski etat prašane
Budyšin (SN/MWj). Wot 2017 ma město Budyšin kóžde lěto wobydlerski etat. Wob lěto přewostajeja 10 000 eurow za najwšelakoriše zaměry, kotrež móža wobydlerjo namjetować. Dotal bě stajnje tak, zo móžachu zajimcy swoje ideje za běžne lěto hač do kónca februara zapodać. Koronapandemije dla pak je lětuši termin nětko hakle 31. měrc.
Z přewostajenymi pjenjezami hodźa so na přikład swjedźenje w měšćanskich štwórćach sobu financować, nowe ławki a wotpadkowe sudobja w parkach nastajić, bydlenska štwórć wozelenić abo wusłužena telefonowa budka jako wupožčowarnja knihow nastajić. Inwestiwne předewzaća so porno tomu na tajke wašnje zwoprawdźeć njehodźa. K tomu słušeja na přikład twar hrajkanišćow abo kolesowanskich šćežkow a chódnikow. Projekty, kotrež njejsu w měšćanskej zamołwitosći abo na měšćanskich ležownosćach, tohorunja spěchujomne njejsu. To samsne płaći za personalne wudawki towarstwow.
Štóž chce doma raz dodźeržanu matracu za łožo wotbyć, móže ...
Nochcedźa jenož porjedźeć, ale tež restawrować
Choćebuz (SN/CoR). Hač do kónca februara chce město Choćebuz antiserbske móranja a nalěpki na tamnišich dróhowych tafličkach wotstronić a sporjedźeć. To rjekny nawodnica wotrjada měšćanske wuwiće a twar Choćebuskeho měšćanskeho zarjadnistwa Marietta Tzschoppe wčera na 26. Choćebuskej zhromadźiznje měšćanskich zapósłancow w swojej wotmołwje na oficialne naprašowanje frakcije Aktiwni njewotwisni wobydlerjo Swobodni wolerjo/Socialny přewrót Choćebuz (AUB-FW /SUB). Dohromady tři prašenja bě předsyda frakcije Torsten Kaps w zwisku z dwurěčnymi dróhowymi tafličkami stajił. Na prěnje, wot hdy su městu nadpady znate, skedźbni Marietta Tzschoppe na to, zo maja přeco zaso ze zamazanymi tafličkami činić, často tež politiskich motiwow dla. W specielnym padźe bě zamołwita za naležnosće Serbow Anna Kosacojc-Kozelowa zarjad 10. februara informowała. Hižo samsny dźeń su so z policiju skontaktowali, kotraž bě chłostajomny delikt wozjewiła. Wotpowědne fota a podłožki bě jej zarjad přepodał.
Harig žada sej podpěru ministrow
Budyšin (SN/bn). Pod nadpismom „Je pjeć po dwanaćich!“ namołwja Budyski krajny rada Michael Harig (CDU) ze zjawnym listom zwjazkoweho ministra za zežiwjenje a ratarstwo Cema Özdemira kaž tež sakskeho statneho ministra za energiju, škit klimy, wobswět a ratarstwo Wolframa Günthera (wobaj Zwjazk 90/Zeleni), so „wosobinsce naležnosći problematiski tudyšich swinje plahowacych zawodow wěnować. Tuchwilne krizy, kaž na přikład konflikt mjez Ukrainu a Ruskej abo koronapandemija, su towaršnostne zaznawanje afriskeje swinjaceje mrětwy po wšěm zdaću chětro nabok stłóčili. Z wuchodneje Europy dale rozšěrjaca so mrětwa pak wohroža eksistencu ratarstwa, wosebje swinje plahowaceho, w tak mjenowanych restrikciskich conach, kajkimž cyła sakska Hornja Łužica, to rěka wokrjesaj Budyšin a Zhorjelc, wokomiknje přisłuša.“ Zamołwitej ministerstwje na zwjazkowej kaž tež na krajnej runinje měłoj „potrjechene zawody registrować a přechodne financowanje kaž tež nachwilne wužiwanje zaručić“.
Krótkopowěsće (24.02.22)
Nowa hudźba Caroliny Eykec
Berlin. Ze singleomaj „Crystal Glacier“ a interpretaciju Debussyjoweho krucha „Clair de Lune“ přihotuje tereministka Carolina Eyckec zjawnosć na nowy album „Thetis 2086“, kotryž ma w aprylu wuńć. W jeho srjedźišću steja přiroda, zemja a uniwersum. Wobě nowej singleej serbskeje hudźbnicy stej hižo na YouTube přistupnej.
Incidenca zaso lochce stupa
Budyšin. Incidencna hódnota w Budyskim a Zhorjelskim wokrjesu zaso lochce stupa. Po Roberta Kochowym instituće wučinja wona dźensa za Budyski wokrjes 1 187,2. Wčera zličichu tu 1 010 natyknjenych z koronawirusom, 61 pacientow lěkuja w zwisku z koronu w hornjołužiskich klinikach. Za Zhorjelski wokrjes podawa RKI incidencu 1 002,6; cyłkownje zwěsćichu tam wčera 700 nowoinfekcijow – dwě z omikronwariantu – 79 ludźi je w chorowni.
Čěska přiwozmje ćěkancow
Policija (23.02.22)
Spěšnosć měrili
Běła Woda. Na zwjazkowej dróze B 156 mjez Běłej Wodu a Hamorom je policija předwčerawšim spěšnosć wobchada měriła. W běhu pjeć hodźin trajaceje kontrole přepruwowachu 550 jězdźidłow a hač jich šoferojo předpisanu spěšnosć 100 km/h dodźerža. Při tym registrowachu dwanaće přeńdźenjow. Njesławny rekord docpě Renault z Kamjenskim čisłom, kiž bě ze 128 km/h po puću. Jeho šofer ma nětko sto eurow pokuty płaćić a dóstanje jedyn dypk w Flensburgu.
Modla so wo měr
Slepo. Před pozadkom dramatiskeho wuwića konflikta we wuchodnej Ukrainje přeproša Slepjanska ewangelska wosada za jutřiši štwórtk we 18 hodź. na měrowe modlenje do Slepjanskeje cyrkwje. Naležnosć nutrnosće je, zo měli brónje mjelčeć a zo měli so wo měrliwe rozrisanje konflikta dale prócować.
Seniorojo škotowali
Radwor. Škotowarka a 19 škotowarjow je so wčera na turněrje serbskich seniorow w Radworju wobdźěliło. Z Wernerom Richterom z Budyšina a Alfonsom Budarjom z Noweje Wjeski móžachu dweju nowačkow witać. Najwuspěšniši bě Herbert Krječmar z 2 904 dypkami před Manfredom Höraufom (2 486) a Wolfgangom Kühnom (2 480).
Wobydlerjow chcedźa zapřijeć
Njewotwisne zastaranje z energiju gmejnu wulce wužaduje
Njebjelčicy (JK/SN). Studija k móžnosćam njewotwisneho a naslědneho zastaranja z energiju ma być hač do kónca lěta zakónčena. Wona je zakład a zdobom směrnica k zwoprawdźenju energijoweho koncepta Njebjelčanskeje gmejny. Hižo dźesać lět zaběraja so w njej zhromadnje z fachowcami z temu njewotwisne zastaranje z energiju.
Wčera wječor witaše Njebjelčanski wjesnjanosta Tomaš Čornak (CDU) fachowcow z wobdźělenych institucijow a mnohich zajimcow na informaciske zarjadowanje k temje energija. Zarjadowanje wotmě so tež online, tak zo mějachu mnozy składnosć, so na přewšo zajimawym a informatiwnym wječoru wobdźělić. Čornak wuzběhny we witanskich słowach wažnosć studije před pozadkom wobstajnje stupacych płaćiznow za energiju a hladajo na změnu strukturow we Łužicy. Nětko je načasu zapřijeć tež wobydlerjow do prócowanjow. Wšako chcedźa jich njewotwisnje a po dobrych kondicijach z energiju zastarać.
