Dom kata sej wobhladać
Chasow. Njedźelu, 26. septembra, wot 13 do 18 hodź. budźe při wětrniku w Chasowje dźeń wotewrjenych duri. Wětrnik drje přistupny njebudźe, wobhladać pak móža sej zajimcy historiske twarjenje, kotrež je pod zapřijećom „dom kata“ znate, a kiž bu z Lišeje Hory do Chasowa přenjesene. Na znowanatwarje wobdźěleni rjemjeslnicy na městnje wšelake rjemjesła pokzuja. Wjedźenja su tohorunja planowane. Wo zabawu a dobru naladu staraja so Chróšćanscy muzikanća. Zastup je darmotny. Přiwšěm je kóždy krošik rady widźany a witany. Wšako twar hišće dokónčeny a dozapłaćeny njeje. Čłonojo a přećeljo Njeswačanskeho domizniskeho a kulturneho towarstwa wjesela so na mnohich wopytowarjow.
Předstaja Serbsku protyku
Malešecy. Na premjeru Serbskeje protyki 2022 su wšitcy zajimcy póndźelu, 27. septembra, we 18 hodź. do hosćenca „Wódny muž“ w Malešecach přeprošeni Redaktor protyki Pětr Šołta předstaji nowostku zhromadnje z Lubinu Malinkowej, Gerlind Šubertowej a Gretu Helenu Scheffel, kotrež wurězki ze swojich přinoškow čitaja. Zastup je wot 17.30 hodź.
Wiki drjewa zaso stabilne
Měšćanska rada Kulowa etat za komunalny lěs wobzamknyła
Kulow (AK/SN). Swój komunalny lěs dale zamołwiće a směrodajnje wobhospodarjeć chce tež město Kulow. To podšmórny naměstnik nawody twarskeho a porjadoweho wotrjada Jurij Brösan na minjenym wuradźowanju měšćanskeje rady. Jednohłósnje wobzamknychu Kulowscy radźićeljo klětuši hospodarski plan za komunalny lěs. „Ličimy z nadbytkom něhdźe 8 700 eurow“, Brösan rozłoži. „Wiki drjewa su zaso stabilne.“
Kaž z etata 2022 wuchadźa, chcedźa dochody něhdźe 61 200 eurow docpěć, mjez druhim 42 100 eurow z předanje drjewa. Za přetworjenje lěsow nadźijeja so něhdźe 18 600 eurow spěchowanskich srědkow Sakskeje. Tomu napřećo steja wudawki nimale 52 400 eurow. Cyłkownje wobsedźi město Kulow 162,7 hektarow lěsa.
Tykowany statok Michaela Purschkeho (2. wotprawa) w Njebjelčicach ma ...
Słowničk za wikowarjow poručili
Dźěłowy kruh za serbske naležnosće w Budyskej měšćanskej radźe je so wčera z podpěru za Lěto Zejlerja a Kocora kaž tež z polěpšenjom dwurěčneho marketinga rozestajał.
Budyšin (CS/SN). Kak móhli zarjadowanja klětušeho Lěta Zejlerja-Kocora němskim měšćanam zbližić, kotřiž ze serbskej tematiku so tak jara njezaběraja? Prašenje to, na kotrež pytachu čłonojo dźěłoweho kruha za serbske naležnosće na swojim wčerawšim posedźenju w sukelnicy za wotmołwami. Rozjimali su wšelake móžnosće, zo bychu zjawnosć wo 27 dypkach zarjadowanskeho programa skutkownje informowali. Tak budu nětko pruwować, kak hodźa so na přikład płoniny při Mosće měra abo busowe zastanišća za wabjenje wužiwać. Jako bjez problema móžne zda so być, připrawić chorhoj na měšćanskim domje na Hłownym torhošću. Wjeršk Lěta Zejlerja-Kocora budźe klětu w oktobrje serbski spěwanski swjedźeń w měšćanskej hali „Króna“. Organizatorojo wočakuja tam wulku ličbu chórow.
Krótkopowěsće (23.09.21)
Wjetša ličba natyknjenjow
Budyšin. Ličba natyknjenjow z koronawirusom w Budyskim wokrjesu dale přiběra. Krajnoradny zarjad je wčera wo 57 informował. Runje tak stupa tu incidenca, po RKI wučinja wona dźensa 46,6 a je tuž třeći dźeń za sobu nad hódnotu 35. Za wokrjes Zhorjelc poda RKI dźensa incidencu 26,3. Tam rozprawjachu wčera wo 25 infekcijach.
Serbski sejm Michel přijał
Njebjelčicy. Tudyša direktna kandidatka SPD za wólby zwjazkoweho sejma Kathrin Michel je dźensa Njebjelčicy wopytała. Z wjesnjanostu Tomašom Čornakom (CDU) rozhladowaše so wona po wsy a poby w pěstowarni. Po tym su ju čłonojo Serbskeho sejma wo idejach za kulturnu a kubłansku awtonomiju a wožiwjenju serbskeje kultury, rěče a identity informowali.
Pjenjezy za přemysło
Policija (22.09.21)
Šulu ewakuować dyrbjeli
Malešecy. Jako reakciju na wjacore hrožace mejlki su policisća póndźelu rano Malešansku šulu přepytali. Dotal njeznaći skućićeljo běchu šuli sobotu do toho hrožace powěsće słali. Za přepytanje zasadźichu zastojnicy na rozbuchlinu specializowaneho psa. W tym času dyrbješe 320 šulerjow dom wopušćić. Wokoło 11 hodź. přepytowarjo warnowanje zběhnychu, tak zo su dźěći a młodostni zaso do swojich rjadownjow móhli.
Předstaja nowostku w Smolerjec kniharni
Krótkopowěsće (22.09.21)
Zaso smjertny pad
Budyšin. W Budyskim wokrjesu rozprawjachu wčera wo 15 natyknjenjach z koronawirusom a wo jednym smjertnym padźe. Wot 229 schorjenych lěkuja sydom w chorowni. Incidenca tu po RKI je dźensa ze 40,9 třeći dźeń za sobu wyša hač 35. Za Zhorjelski wokrjes podawa RKI incidencu 20,4. Tež tam informowachu wčera wo 15 nowoinfekcijach.
Dźeń wotewrjenych duri njebudźe
Budyšin. Němsko-Serbske ludowe dźiwadło je lětuši dźeń wotewrjenych duri wotprajiło. Kaž w nowinskej zdźělence domu rěka, „tuchwilne połoženje tajke zarjadowanje njedowola. Wěstotne wotstawki njehodźa so za jewišćom, w magacinach a na chódbach dodźeržeć. Ćežkeje wutroby smy so tuž rozsudźili 3. oktobra planowane zarjadowanje wupadnyć dać.“
Doba zapodaća so kónči
Digitalizacija dale postupuje
Na Chróšćanskej zakładnej šuli móža wučerjo bórze z laptopom dźěłać
Chrósćicy (SN/MiR). Ćežišćo Chróšćanskeje gmejnskeje rady spočatk septembra běše lětuši hospodarski plan. Tam je wjesnjanosta Marko Kliman (CDU) radźićelam wuwědomił, zo bu etat hakle lětsa w měrcu schwaleny. Runje, dokelž je tón z wulkej kedźbliwosću na móžne financne wuhotowanje nastajeny, jewjachu so prašenja. Mjez druhim bu jasne, zo drje dawkowa móc stupa, klučowe připokazanki gmejnam pak porno tomu spaduja. Do cyłotneho etata zapřijaty je přemysłowy dawk. Zdobom je Marko Kliman rozłožił, zo je lěpje hospodarski plan z trochu mjenje narokami, ale na konstantnje niskim niwowje nastajić.
Policija (21.09.21)
W kuchni so paliło
Pančicy-Kukow. Wohnjowe wobory z Pančic-Kukowa, Wotrowa, Žuric a Chrósćic dyrbjachu njedźelu připołdnju w Pančicach-Kukowje woheń hašeć, kiž bě w bydlenskim domje na Halštrowskej wudyrił. Jako něhdźe 30 kameradow tam dojědźe, so z woknom kuchnje hižo husty kur waleše. Spěšneho zapřimnjenja wobornikow dla, ale tež dźakowano přizjewjakej kura w domskim móžachu rozpřestrěću płomjenjow na dalše rumnosće zadźěwać. Přičinu wohenja policija nětko přepytuje.
Podružnik ničo njepytnył
Wojerecy. W nocy na minjenu njedźelu je w bydlenju na Steinbrückowej we Wojerecach woheń wudyrił. Hosćo dróhoweho swjedźenja w susodstwje informowachu wohnjowu woboru. 37lětny podružnik bydlenja njebě sam ničo pytnył. Rozměr škody dotal jasny njeje.
