Zahaja „lěto župow“
W partnerskim měsće koncertowali
Po dołhej koronowej nanuzowanej přestawce zwučowanjow a wustupow je chór Budyšin minjenu sobotu w Budyskim partnerskim měsće Jelenjej Górje we wobłuku tamnišeho rjadu koncertnych sobotow spodobny wječor wuhotował. Mjez druhim zaklinčachu serbske štučki kaž „Z wuhladkom“ z pjera Jana Bulanka, „Moluj mi, moluj“ Bjarnata Krawca a „Chwalena budź fijałka“ Korle Awgusta Kocora. Wosebje słyšenjahódne běchu jendźelska twórba „The Gift to be simple“, Baldassary Donatijowe „Wenn wir hinauszieh’n“, ale tež „Aká si mi krásna“ w słowakskej rěči. Dramaturgisce přemysleny stopnjowaše so koncert hač k pólskim pěsnjam k sobuspěwanju, štož publikum dźakownje přiwza. Spěw chóra bu sčasami wot wioliny a bongow přewodźany, štož přewza Reinhard Simmgen. Wulkotnje zanjese Sylwija Jancyna „Tule statok zboža stajić“. Tež znata „Lubka Lilija“ baritona Michała Jancy njeje pobrachowała.
Twarski zawod je palnišćo
Rozdźělne měnjenja k rozrisanju problema dale wobsteja
Njeswačidło (JK/SN). Hižo dlěši čas zaběra so Njeswačanska gmejnska rada ze swojim twarskim zawodom a jeho přichodom. Mjeztym tež wobydlerjo na wukonitosći za gmejnu njeparujomneho posłužboweho wotrjada dwěluja. Na njezjawnym posedźenju gmejnskeje rady w juniju běchu někotři radźićeljo a wjesnjanosta Gerd Schuster (CDU) ideju zrodźili, twarski zawod wot njewotwisneje poradźowaceje firmy posudźować dać. Z toho nadźijeja so pokiwow a nastorkow k trěbnemu nowemu, wosebje pak wukonitemu wusměrjenju komunalneho předewzaća.
Originelne ideje a kreatiwita witane
Někotražkuli komuna ma swoje ćežko wužiwajomne twarjenja. Jedne tajke je w Běłej Wodźe tamniše dwórnišćo, kotrež wot lěta 2000 prózdne steji. To chcedźa nětko změnć.
Běła Woda (AK/SN). Swoje dwórnišćo chce město Běła Woda w jeho historiskej formje a napohledźe zachować. Nětko pyta ideje, kak hodźało so wone wobsahowje wužiwać. Minjeny pjatk zahajene idejowe wubědźowanje ma so po słowach zamołwiteho za hospodarske spěchowanje města Thorstena Rennhaka w dwěmaj krokomaj přewjesć. 3. awgusta maja wobdźělnicy swoje ideje předstajić. 3. septembra ma wužiwanska koncepcija předležeć. Kónc septembra móhli potom snano planować započeć.
Prašenje woprawnjene
Za projekty dotal chwile njebyło
Slepo (AK/SN). We wobłuku komunalnych projektow za strukturnu změnu njejsu gmejny Łaz, Slepo, Trjebin a Sprjewiny Doł ze žanym předewzaćom zastupjene, kotrež je regionalny přewodźacy wuběrk za Łužiski rewěr poručił spěchować. Runje wone gmejny běchu a su wot brunicowych jamow a jich sćěhow wosebje potrjechene.
Slepjanski wjesnjanosta Jörg Funda (CDU) ma diferencowany wid na rozsudy přewodźaceho wuběrka. Wón pak zdobom wobkruća, čehodla w gmejnje dotal hišće žane swójske projekty njepředleža. „Mamy tuchwilu ruce połnej dźěła, zo bychmy njezeskutkownjene inwesticije zwoprawdźili resp. nastorčili, kotrež wurostu ze swój čas planowaneho wužiwanja wulkeho dźěla našeho gmejnskeho teritorija za hórnistwo. Bojimy so, zo so tu znowa do špatneho połoženja dóstanjemy.“
Krótkopowěsće (14.07.21)
Žane dalše natyknjenja
Budyšin/Zhorjelc. Nastupajo staw infekcijow z koronawirusom njeje so ani w Budyskim ani w Zhorjelskim wokrjesu porno wčerawšemu ničo změniło. Nowonatyknjenja njejsu žane zwěsćili. Incidencna hódnota wučinja po Roberta Kochowym instituće 0,0 za wokrjes Zhorjelc resp. 2,3 za Budyšin. We woběmaj wokrjesomaj tuchwilu dohromady jenož hišće třoch pacientow stacionarnje lěkuja.
Krawcowy „Statok“ w němčinje
Budyšin. Na předań je w Ludowym nakładnistwje Domowina wušła kniha Křesćana Krawca „Was wir in uns tragen – Sorbische Lebenswege“. Publikacija je němska wersija tohorunja wot LND wudateje zběrki portretow „Sej statok stajili“ z wosebitym kapitlom wo Chróšćan zběžku. Awtor sam bě so wo přełožk swojeje knihi postarał.
Alimenty nachwilnje stat zaruna
Praha. Płaćenje alimentow za małolětnych nastupajo zličeja w Čěskej republice tučasnje 120 000 dołžnikow. Wot započatka julija je pak móžno tele pjenjezy wot stata zarunane dóstawać. Maksimalnje jedna so wo měsačnje 3 000 krónow na dwě lěće. Wupłaćenu sumu sej stat potom wot dołžnikow wróćo žada.
Jutře zetkanišćo wotewru
Wětrow/Bóšicy (SN/MiR). Wjacegeneraciske zetkanišćo we Wětrowje čaka nětko na hosći. Jutře, 14. julija, w 16 hodź. móža so zajimcy prěni króć po domskim rozhladować a sej snadź hižo termin za zetkanje ze swójbnymi knihować. Wužiwać móža zetkanišćo předewšěm Wětrowčenjo a wobydlerjo dalšich wsow Bóščanskeje gmejny. Wětrowčanka Ingrid Konschakowa, kotraž ma zetkanišćo čestnohamtsce nawjedować, pak je tež dalšim ludźom poruča.
Wulce zajimawa budźe wopytowarjam biblioteka. Tydźensce srjedu, stajnje wot 16 do 18 hodź., móža sej tam wćipni čitarjo knihi wupožčić, abo tež na městnje čitać. Wšako maja w domje čitanski róžk z přijomnym konopejom. Tež za blidom sedźo móža čitać abo so bjesadować. „To wšak běše wotmysł, tele zetkanišćo wutworić“, wuswětla wjesnjanosta Stanij Ryćer (Rjemjesło Bóšicy). „Wobydlerjo přejachu sej městnosć, hdźež móža so zetkać a zhromadnje swjećić.“
Dźěłarnička za młodostnych
Budyšin. Sobotu, 17. julija, wotměje so wot 10 do 16 hodź. wuměłska dźěłarnička „wot běłeho k čornemu“ w Serbskim muzeju. Wona je myslena za młodostnych wot 14 lět. Wuchadźišćo leži we wotwažowanju a wuspytanju grafiskich srědkow a fascinaciji bjezkónčnych móžnosćow mjez běłym a čornym. Kurs nawjeduje wuměłča Maja Nagelowa, přinošk płaći 10 eurow na wosobu. Přizjewjenja su móžne pod telefonowym čisłom 03591/ 270 870 20 abo e-mailnje na , a to hišće hač do štwórtka.
Wobhladaja sej filmy
Drježdźany. We wobłuku Drježdźanskeho filmoweho festiwala pokazaja srjedu, 14. julija, wot 17 hodź. w Drježdźanskim hrodźe Lingner na Budyskej dróze 132 krótkofilmy z Łužicy. Je to zarjadowanje Sakskeho filmoweho zwjazka hromadźe ze serbsko-němskej filmowej syću Łužycafilm. Po tym budźe składnosć k rozmołwje z awtorami a režiserami na hrodowej terasy. Moderaciju změje Cosima Stracke-Nawka. Zajimcy su wutrobnje witani.
Policija (13.07.21)
Šoferomaj papjery wzali
Bjezdowy. Hnydom dweju wopiteju šoferow je policija předwčerawšim popołdnju lepiła. Pola Bjezdowow zadźeržachu 55lětneho šofera Renaulta, kiž wočiwidnje hižo kmany njebě swoje jězdźidło wodźić. Hižo při prěnich słowach zastojnikam jeho „chorhojčka“ napadny. Pola muža naměrichu 2,6 promilow alkohola w kreji. Swoju jězbnu dowolnosć smědźeše wón hnydom wotedać. Podobnje bě we Wojerecach, hdźež kontrolowachu 51lětneho wodźerja Mazdy. Wón měješe 1,6 promilow alkohola intus. Tež za njeho bě jězba zrazom nimo, nic jenož tón dźeń, ale drje na dlěši čas.
