Z awtom do ponyja zrazyła

Kulow. Njewšědne njezbožo sta so póndźelu­ popołdnju na Mučowskej dróze w Kulowje. Tam bě žona z Toyotu z Wojerowskeje dróhi do směra na Mučow po puću. Nadobo stupi cyle nje­wšědny zawinowar njezbožow na jězdnju – pony. Šoferka wosoboweho awta njezamó hižo borzdźić a zrazy do njeho. Wona so na zbožo njezrani. Tež pony, kotrehož­ bě sej skótny lěkar dokładnje wobhladał, wosta po zdaću njezranjeny. Přiwšěm wučinja wěcna škoda něhdźe 3 000 eurow.

K zazběhej póstneho časa wotměwa so w Budyskej Serbskej cyrkwi prawidłownje prěnju póstnu njedźelu duchowny koncert, tak tež lětsa. A znowa su němscy kaž serbscy wěriwi poskitk dźakliwje přiwzali. Wuhotował je póstny hudźbny nyšpor, ke kotremuž poda tachantski­ farar a prelat Wito Sćapan wotpowědne meditaciske słowa, Bu­dyski smyčkowy kwartet Chordophone. Do cyłka zjednoćeni su jara agilni čło­nojo­ Serbskeho ludoweho ansambla, kotřiž so tohorunja w Smochčanskim Domje biskopa Bena hustodosć anga­žuja. Su to Bettina Witke a Matthias Reichel­ na huslach, bračist Artur Malinowski a cellist Helfried Knopsmeier. Woni wědźachu zaso z derje wupytanymi twórbami wšelakich epochow a stilow připosłucharstwo k rozmyslowanju pohnuć. Přetož­ „dyrbimy akceptować, zo su naše hodźiny, dny, měsacy a lěta zem­skeho žiwjenja wobmjezowane a zo so skónčnje­ zaso do popjeła wró­ćimy“, kaž tachantski farar wuwjedźe.

Budyšin (SN). Zajim za wobydlerski etat města Budyšina – z nim financuja ideje wobydlerjow, kotrež dotal w měšćanskim hospodarskim planje zapřijate njeběchu – je po wšěm zdaću jara wulki. Hač do kónca februara předležeše zarjadnistwu 56 namjetow we wobjimje nimale 100 000 eurow. Přeća sahaja wot podpěry za swjedźenje w měšćanskich štwórćach hač k nowym móžnosćam k posydnjenju a płaća wot 60 hač do 10 000 eurow. Wšitke přeća njebudu wobkedźbować móc. Jónu nimaja za to dosć pjenjez předwidźane, na tamnym boku jedna so tež wo projekty na priwatnych ležownosćach, na kotrež město žadyn wliw nima. Měšćanske zarjadnistwo nětko pruwuje, što je zwoprawdźomne. W aprylu chce financny­ wuběrk města wo lisćinje naprawow doskónčnje rozsudźić.

Němsko-serbski šulski kompleks w Slepom skići wurjadne wuměnjenja

Slepo (AK/SN). Gmejna Slepo jako twarski knjez a šulski nošer chce tamniši nowy němsko-serbski šulski kompleks za prošenych hosći 3. apryla oficialnje wotewrěć. To potwjerdźi wjesnjanosta Reinhard Bork (CDU) wčera na pose­dźenju gmejnskeje rady. Dźeń wote­wrjenych duri samsny dźeń, kaž běštej to šuli připowědźiłoj, po wuprajenju wjesnja­nosty njebudźe. Tajki termin hodźi so pozdźišo nachwatać. „To běše dołhi čas naše najwjetše komunalne twarnišćo. Nimo wšitkich ćežow je so nam poradźiło, časowy a financny ramik předewzaća spjelnić. Dźakowano financ­nemu ramikej bě móžno, na wuwiće płaćiznow za twar a dalše sčasom reagować“, rjekny Bork. Wón dźakowaše so nawodźe projekta a planowanskemu běrowej Bauconcept Lichtenstein (njedaloko Zwickauwa), kotryž bě nadawk přewzał.