Wjacezaměrowu halu w Rownom chcedźa bórze wotewrěć
Rowno (AK/SN). Saněrowanje wjacezaměroweje hale w Rownom najebać koronakrizu dale postupuje. Hižo w juliju chcedźa ju zaso wužiwać, kaž potwjerdźa to wjesny předstejićer Matthias Jainsch w aktualnym hamtskim łopjenu Slepjanskeho zarjadniskeho zwjazka.
Loni w třećim kwartalu běchu z twarskimi naprawami saněrowanja a sporjadkowanja započeli. Byrnjež předpisy a postajenja korony dla wobkedźbować měli, dźěła derje postupuja. „Tak bu mjeztym třěcha wobnowjena a ćopłotna izolacija připrawjena, tež nowe elektrowody leža“, Jainsch pisa. „Zatwarjeny je dale nutřkowny wjerch, a mamy nětko wobswětlenje, kotrež perfektnje funguje.“
Nalětni postrow z klóštra
Kino za cyłu swójbu
Budyšin. Swójbna schadźowanka Rěčneho centruma WITAJ lětsa njebudźe. Město njeje su wšitke serbske swójby na kinowy wječor přeprošene. Sobotu, 27. februara, w 17 hodź. pokazaja na stronje www.schadzowanka.de swójbny film „Gilles“, kotryž hodźi so za dźěći wot wosom lět. Wot lěta 2010 pask w serbskej rěči předleži. Wón powěda stawiznu wo sonach a wužadanjach wobdarjeneho dwanaćelětneho koparja Gillesa. Hłowneho rjeka rěči Jan Brězan.
Jutrowne wubědźowanje
Budyšin. Hišće hač do 19. měrca móža so dorosćeni zajimcy na 68. wubědźowanju wo najrjeńše jutrowne jejko wobdźělić. Kolekcije maja tři jejka, w jednej ze znatych serbskich technikow debjene, wopřijeć a z póštu zapodate być.
Poskići nowy wukubłanski směr
Fleksibelne, moderne a swójbne kubłanišćo we Wojerecach
Wojerecy (SiR/SN). Na kubłanišću za medicinske a socialne powołanja (BMS) na Wojerowskej Friedricha Löfflerowej hasy chcedźa wot měrca nowy wukubłanski směr zahajić. Wučerjo a nawodnistwo zarjadnišća maja najebać masiwne wobmjezowanja nowe ideje a wudźeržuja wobstajny zwisk k šulerjam, zo bychu mjezsobnosć a swójbnu atmosferu dale hajili. Njedawno hakle su młodej maćeri dalokowuwučowanje sobotu dopołdnja zmóžnili, dokelž njehodźeše so wuknjenje hinak zrjadować. „Wažne nam je, zo smy fleksibelni a zo so dźěłowym a wukubłanskim wikam z načasnymi wuměnjenjemi a motiwaciju přiměrjamy“, měni zastupowacy šulski nawoda Torsten Rentsch. Tak posrědkuje Wojerowska BMS šulam regiona nadal tak mjenowane powołanske pakety, zo bychu přichodnych absolwentow wo wukubłanskich poskitkach informowali. „Čas lockdowna zmysłapołnje wužiwamy“, praji sobudźěłaćerka za zjawnostne dźěło BMS Claudia Barthel. Klětu wobsteji šula 30 lět. Mjeztym su tam wjacore sta šulerjow za hladanske powołanja wukubłali.
Młodźinske socialne dźěło za čas krizy wosebje wažne
Budyšin (SN/bn). Pod hesłom „Pro Chance“ skutkujetaj socialnaj pedagogaj Sofija Delanec a Benno Auras w nadawku města wot lěta 2017 jako streetworkeraj w Budyšinje. Jeju najwažniši wobłuk je w teamje mobilne młodźinske dźěło wukonjeć. Mobilny aspekt wšak tuchwilneje pandemije dla wulce wobkedźbować njemóžetaj. Ćim bóle wjeselitaj so nad nowym běrowom, do kotrehož staj spočatk lěta přećahnyłoj.
„Rumnosće na Wonkownej Lawskej, hdźež dotal dźěłachmoj, njeběchu drje njekmane. Přiwšěm skići nowa adresa na Hošic hasy jasne lěpšiny. Běrow je na trochu centralnišim městnje a tuž widźomniši. Na tamnym boku móža młodostni naju nětko přez poměrnje schowany zachod takrjec anonymnje wopytać. Tak hodźa so ewentuelne haćenja a strach wobeńć“, Sofija Delanec powěda.
Poćeženje wobchada dla pomjeńšić
Wojerecy chcedźa swój měšćanski dźěl Kinajcht-Wojerecy wuchod přichodnje jasnje wot přechodoweho wobchada wolóžić. Měšćanska rada je so wčera wospjet z naležnosću rozestajała.
Wojerecy (AK/SN). Na mjenje hary, mjenje střasenjow a měrniši wobchad za Kinajchćanow je nětko zdźěłany wobtwarjenski plan „Kinajchtska wobjězdka“ wusměrjeny. Loni 25. februara bě Wojerowska měšćanska rada za to trěbne wobzamknjenje schwaliła. Na jeje wčerawšim posedźenju rozłoži wyši měšćanosta Torsten Ruban-Zeh (SPD) aktualny staw wobdźěłanja.
Krótkopowěsće (24.02.21)
Harig za procesiony
Budyšin. Křižerske procesiony měli lětsa přewjesć. Za to wupraja so Budyski wokrjesny zwjazk CDU. Kaž jeho předsyda, krajny rada Michael Harig, dźensa zdźěli, je „křesćanske poselstwo runje w tychle ćežkich časach přewšo wažne. Po tym zo dyrbjachu procesiony loni korony dla prěni raz wupadnyć, smy za to, je lětsa zmóžnić. Wuměnjenje pak je, zo so połoženje infekcijow dla dramatisce njepohubjeńši.“
Incidenca stupała
Budyšin. Najebać wjacore přepytowane podhlady njejsu dotal žane natyknjenje z britiskej mutantu koronawirusa w Budyskim wokrjesu zwěsćili. Wčera mějachu tam dźesać nowych infekcijow. Ličba smjertnych padow powjetši so wo jedyn na dohromady 634. Indicenca bě 85,66. W Zhorjelskim wokrjesu registrowachu wčera 53 dalšich natyknjenjow a stupacu incidencu 71,62.
Wosebite česćowanje
Policija (23.02.21)
Psa z tupym předmjetom bili
Rěčicy. 66lětny mějićel psa w Rěčicach dyrbješe minjenu sobotu policiju w Běłej Wodźe swojeje wowčerskeje psycy dla informować a na ranjenje zakonja wo škiće zwěrjatow skedźbnić. Wón bě ju hižo štwórtk na swojej zahrodźe zranjenu nadešoł. Skótny lěkar mužej rjekny, zo bě psa něchtó z tupym předmjetom na hłowu bił. Dotal hišće jasnje rjec njemóža, hač so psyca wustrowi.
Wo zranjenu žonu so njestarałoj
Łaz. Při Třižonjanskim jězoru we Łazu je so njedźelu popołdnju 63lětna ze swojim psom wuchodźowała. Tam nadpadny jeju dalši pos, při čimž so žona zrani. Porik, kotremuž pos słušeše, so bjez toho zo byštaj so wo žonu starałoj, wotsalištaj. Kriminalna policija wobaj padaj nětko přepytuje.
Wjace nowonarodźenych, zdobom pak tež smjertnych padow
Budyšin (SN). W Budyšinje zwěsćeja tuchwilu přiběracu ličbu porodow. Loni w decembru, dźewjeć měsacow po jutrach 2020, zličichu w sprjewinym měsće 48 nowonarodźenych. W decembru 2019 bě jich 29, zdźěli komisariski nowinski rěčnik města Budyšina Markus Gießler. W cyłku je loni 322 holcow a hólcow w Budyšinje na swět přišło. To je 6,6 procentow wjac hač lěto do toho. Móžna přičina toho móhł lońši nalětni lockdown w zwisku z koronawirusom być.
Koronawirus pak njeje so jeničce wo wjace porodow starał. W měsće mějachu loni tež wjace smjertnych padow hač 2019. 694 muži a žonow je zemrěło, 22 procentow z nich w decembru. To je 2,6 króć wjace hač přerězk za posledni měsac lěta.
31. decembra 2020 bydleše w Budyšinje 38 556 ludźi, štož je 1,1 procent mjenje hač lěto do toho. Trend wo pomjeńšenju wobydlerstwa pak je přiwšěm trochu wosłabił. W lěće 2019 zličichu statistikarjo hišće 1,7 procentow ludźi, kotřiž běchu sprjewine město wopušćili. Při tym napadnje, zo su so předewšěm młode swójby z města na wsy Budyskeho wokrjesa přesydlili.
Dale derje wotwažować
Planowanje šulskeje syće Budyskeho wokrjesa delanskich radźićelow wužaduje
Ralbicy (JK/SN). Na dnjowym porjedźe mnohich, tež serbskich gmejnow steja tele dny plany šulskeje syće Budyskeho wokrjesa. W gmejnam předležacych podłožkach k wobzamknjenju wšak wokrjes zawěsća, zo maja wšitke šule dalewobstaće zawěsćene. W trěbnym wobzamknjenju dźe jeničce wo to, zo šulski nošer, přewažnje su to na serbskich wsach gmejny, tele rjadowanje na wědomje bjerje a swoje plany na přichod kubłanišća wusměri.
Serbske a dwurěčne šule maja při planowanju šulskeje syće wosebje wobkedźbować. Hižo zestawa rjadownjow kaž tež jich wulkosć a čarowosć lětnikow ma so runje tak wobkedźbować kaž planowanje trěbnych busowych čarow.
