Sto wobličow k jubilejej
Zrěčenje najprjedy njepodpisa
Wuslědk wobydlerskeho rozsuda njeje doskónčnje jasny
Kulow (AK/SN). Wobydlerski rozsud 9. meje wo škričkowanskim sćežoru w Mučowje z wida města Kulowa hišće žadyn jasny wuslědk wunjesł njeje. Tole rjekny měšćanosta Markus Posch (CDU) na zašłym posedźenju měšćanskich radźićelow. „Měšćanska rada budźe na přichodnym posedźenju 14. julija wo tym rozsudźić. Hač do toho žane wotpowědne zrěčenje njepodpisam“, wón přilubi. Wobydlerska iniciatiwa „Hórnikečanski jězor bjez prudźenja. Žadyn škričkowanski sćežor w Mučowje“ wojuje wo cofnjenje tak mjenowaneho dowolenskeho zrěčenja města ze škričkowanskim poskićerjom. Wona bě tohodla wobydlerski rozsud nastorčiła.
Nadróžne daty digitalnje składować
Radwor (SN/MkWj). Policija je přepytowanja nastupajo powaleny swjaty křiž mjez Kamjenej a Lutobčom zakónčiła, dokelž skućićelow namakać njezamó. Wo tym je Radworska wjesnjanostka Madeleine Rentsch na posedźenju gmejnskeje rady minjenu srjedu informowała. Gmejna chce so nětko sama wo wuporjedźenje křiža starać. Próstwu wo pjenježnu pomoc su mjeztym Załožbje za serbski lud zapodali. Njeznaći běchu křiž njedaloko wopomnišća za zničeny statok Hronow powalili.
Gmejnscy radźićeljo su na swojim posedźenju w sportowej a wjacezaměrowej hali „Slavia“ tomu přihłosowali, zo přistupi gmejna „Digitalnej integraciskej platformje za nadróžne daty“. Z njej móža wšitke dróhi nastupowace daty, mjez druhim tež wobstatk štomow, registrować. Krajnoradny zarjad 90 procentow nastawacych kóštow spěchuje. Gmejna dyrbi 4 700 eurow, rozdźělene na štyri lěta, přinošować. Nimo toho wobzamknychu zapadnu fasadu gratownje Radworskeje wohnjoweje wobory ponowić.
Policija (17.05.21)
W parkowanskim domje znjezbožił
Budyšin. Ćežko zranił je so předwčerawšim 14lětny hólc w parkowanskim domje na Budyskej Wonkownej Lawskej. Kaž policija rozprawja, bě wón na třěchu domu zalězł a přez swětłowy šacht pjeć metrow w schodźišću do hłubiny padnył. Alarmowane wuchowanske mocy so wo znjezboženeho na městnje starachu a dowjezechu jeho do chorownje. Mjeztym wón hižo w žiwjenskim straše njeje. Kak je so njezbožo dokładnje stało, policija nětko přepytuje. Pomhać naležnosć rozrisać móhli młodostni, kotřiž běchu ze 14lětnym hromadźe w parkowanskim domje.
W spěšnym času sej měr popřeć
Wot lěta 1996 ma wosadna cyrkej swjateju Pětra a Pawoła w Hornim Wujězdźe cyle wosebity nadawk. Ale tež nimo toho ma Boži dom někotre wosebitosće, kotrež su hódne, zo sej jón bliže wobhladaš.
Horni Wujězd (UM/SN). Wodnjo a w nocy a sydom dnjow wob tydźeń je daloko widźomna Hornjowujězdźanska cyrkej swj. Pětra a Pawoła wočinjena. Wot 5. meje 1996 słuži wona – jako prěnja w pjeć nowych zwjazkowych krajach a dotal jenička w Hornjej Łužicy – jako awtodróhowa cyrkej. Potajkim móžachu njedawno takrjec slěbornu róčnicu swjećić. „Bě to ideja mojeho předpředchadnika Handrija Blumensteina“, zhladuje farar Marko Mitzscherling na młódše stawizny. Wot toho časa je nimale 200 lět stara cyrkej jako městno nutrnosće a nutřkowneho měra wšitkim pućowacym na bliskej awtodróze A 4, ale tež wšitkim dalšim přistupna. „Tu móžeš so pomodlić, swěčku zaswěćić a so do wopomnjenskeje knihi zapisać“, farar rozłožuje.
We Wojerowskim zwěrjencu je tele dny dorost chinskich leopardow Nala ...
Clemens Hrjehor dostojnje chowany
Na podawki njezabyć
Chcedźa znamjo wujednanja sadźić
Wojerecy (AK/SN). Z wopomnjenskim kóncom tydźenja chcedźa Wojerecy wot 17. do 19. septembra na wukročenja přećiwo wukrajnikam 1991 w měsće spominać. Wodźacy motiw rěka „Wojerecy 1991: Dopomnjenki – Dopóznaća – Perspektiwy“. „Jeno, štóž stawizny přiwozmje, móže puć k wujednanju runać“, podšmórny Wojerowski wyši měšćanosta Torsten Ruban-Zeh (SPD) minjeny pjatk, jako předstaji naćisk k programej wopominjenskeho kónca tydźenja, kotryž wusměrja so na wid woporow – předewšěm tehdy potrjechenych zrěčenskich dźěłaćerjow z Mosambika a Vietnama kaž tež požadarjow azyla. Słowa jimać maja so tohorunja wobydlerjo a po móžnosći tež tehdyši sobuskućićeljo. Tak chcedźa mnohotnosć widow docpěć. Swoje wobdźělenje připrajili su hižo Rostockski měšćanosta Claus Ruhe Madsen (njestronjan), Möllnski měšćanosta Jan Wiegels (SPD) a nawodnica komunalneho integraciskeho centruma w Solingenje Anne Wehkamp. Wšitke tři komuny běchu spočatk 1990tych lět tohorunja wot hidy přećiwo cuzym potrjechene.
Krótkopowěsće (17.05.21)
Dźeń a mjenje schorjenych
Budyšin/Zhorjelc. Ličby na koronawirus schorjenych tež w serbskich gmejnach dale woteběra. W Ralbicach-Róžeńće nimaja wot minjeneho pjatka žanoho schorjeneho. Najwjac mějachu jich z 43 w Malešanskej gmejnje. W Budyskim wokrjesu bě kónc tydźenja 125 nowoinficěrowanych, šěsć ludźi je zemrěło. Po RKI wučinješe tu incidenca 108,1. W Zhorjelskim wokrjesu zwěsćichu wčera 13 dalšich infekcijow, incidenca je 133.
Sotra z nowymi funkcijemi
Budyšin. Přełožowanski program „sotra“ ma nowej funkciji, informuje Rěčny centrum WITAJ. Z e-mailku je nětko móžno wothłós na program dać. Dale móža wužiwarjo dowolić přełožk składować, zo móhli w RCW słowny skład rozšěrjeć a zmylki wotstronjeć. Přełožki wobsahuja za RCW wažne informacije, mjez druhim, kotre zmylki „sotra“ hišće wora a kotre słowa w składźe pobrachuja.
Cyrkwinski zjězd zakónčeny
