Kak často słyšimy a čitamy wo tym, zo kupowanje w interneće małym wikowarjam a přemysłownikam na městnje škodźi. Bjez dźiwa, zo maš druhdy samo špatne swědomje, hdyž něšto w interneće skazaš a sej to domoj pósłać daš. To pak tak w přichodźe hižo być njetrjeba. Nětko móžeš z nakupom w interneće samo lokalnych wikowarjow podpěrać. Tak su nětko wikowarjo z Wojerec a wokoliny na platformje eBay na wosebitej stronje zjednoćeni a tam swoje produkty poskićeja. Narunanki za awta a motorske tam runje tak nadeńdźeš kaž kosmetiske wudźěłki, wšelki grat a wězo tež drastu a wšo móžne druhe. Jeli so ći něšto lubi, móžeš sej to připósłać dać abo sej direktnje we wobchodźe wotewzać. Wotpowědne adresy wězo tež na wonej stronje namakaš. Ja mam to za dobru ideju a tónle poskitk zawěsće tež raz pospytam. A snano so dalše města abo gmejny namakaja, kotrež bychu swojim wikowarjam runje tajke online-wikowanišćo wutworili. Marian Wjeńka

Incidenca bliži so hódnoće 300

Budyšin. Incidenca po Roberta Kochowym instituće je dźensa w Budyskim wokrjesu 280,9. Tam rozprawjachu wčera wo 157 natyknjenjach z koronawirusom. Na tysac wobydlerjow wobličene stejitej gmejnje Worklecy a Kubšicy ze 17 potrjechenymi na čole. We wokrjesu Zhorjelc informowachu wčera wo 135 infekcijach a dalšim smjertnym padźe ze 6. oktobra. Incidenca po RKI je tam dźensa 279,8.

Firmy pytaja fachowcow

Budyšin. We wuchodnej Sakskej bě w oktobrje 16 527 bjezdźěłnych, to je 547 resp. 3,2 proc. mjenje hač w awgusće. Změna porno lońšemu oktobrej je ta, zo je­ ličba bjezdźěłnych wo 1 356 resp. 7,6 proc. woteběrała, kaž Budyska wotnožka agentury za dźěło wčera informowaše. Rozsudne za aktualne połoženje je wulka potrjeba předewzaćow za fachowcami, agenturje předleži 5 500 jobow.

Myto za ciwilnu kuražu

Po wulkim wohenju lětsa kónc apryla w Běłej Wodźe so zawěsćernja spjećuje, nastatu škodu na tamnišim ludowym domje zarunać. Runočasnje pyta město za pjenjezami, zo móhli znajmjeńša wotpadki zrumować.

Běła Woda (CK/SN). Něhdy ze sobustawskich přinoškow dźěłarnistwow natwarjeny ma Běłowodźanski ludowy dom wulki wuznam za město. Při zamiškrjenym wulkowohenju 25. apryla 2021 ćežko wobškodźeny objekt chcedźa zaso natwarić. To znajmjeńša je kruta wola měšćanskeje rady, kaž su radźićeljo na swojim zašłym posedźenju wobzamknyli.

Njehodźi so saněrować

24. łužiska rallye wotměje so wot 4. do 6. nowembra. Na lubowarjow spěšnych awtow čakaja zajimawe wubědźowanja a wosebita nowostka, kotraž je hłownje za młódšich dobra powěsć.

Hamor (AK/SN). Na 24. mjezynarodnej łužiskej rallye wobdźěla so jězdźerjo z Němskeje, Pólskeje, Čěskeje, Danskeje, Norwegskeje, Šwedskeje, Finskeje a Nowoseelandskeje. „Prěni raz budźe jězdźer z Argentinskeje pódla“, zdźěli organiza­ciski nawoda Wolfgang Rasper, předsyda zarjadowaceho towarstwa za rallye a wodosport Club Łužica.

Łužiska rallye je w srjedźnej Europje najwjetša rallye na šćerku. Tónraz změja dwanaće hódnoćenjow na cyłkownje 169 kilometrach. Hižo wjele lět je w Němskej jónkrótna arena wjeršk lěta za jězdźerjow a přihladowarjow. Na připrawjenych přirodnych tribunach fanojo dožiwja, kak wobdźělnicy na přikład z jězdźidłami přez hórku skoča, přez nahłu křiwicu smala abo přez wodu jědu. Mjez fawo­ritami su Anders Gröndal z Norwegskeje kaž tež Matthias Kahle a Christian Doerr z Němskeje. Wšitcy třo su rallye hižo wjacore razy dobyli. Nětko wojuja wo dalše dobyće.