Nadźija na spěchowanje
Kreatiwni w „Krónje“ wustajeli
Awto wjesnjanosty wobškodźene
Bóšicy (FR/SN). Wulki wichor je minjeny štwórtk dopołdnja w Bóšicach hałzy tak mjenowaneho tulpoweho štoma, kiž tam hižo dlěje hač sto lět w knježim parku steji, wotłamał. Wone padnychu na susodnu ležownosć, kotrejež mějićel chce je přichodne dny rozrubać. Dale so w parku brěza wotłama. Na kromje wsy je wichor na ležownosći młodeje swójby płót zatłóćił. A platana na zahrodźe hosćenca „Knježi dwór“ nima hižo wjeršk. Tež tón bě wichorej na puću. Dele padace hałzy njejsu žanu škodu načinili.
Wjac wěstoty za šulske dźeći docpěć
Slepo (AK/SN). Wot Lěska w Braniborskej do Slepoho w Sakskej chcedźa bórze kolesowanska šćežka twarić. Wo tym stej sej město Grodk a gmejna Slepo přezjednej. „Hižo před lětami smy wo tym rozmyslowali. Nětko dóstachmy naprašowanje na iniciatiwu Grodkowskeje staroměšćanskeje saněrowanskeje towaršnosće. Dźe wo nowy šulski kolesowanski pućik z Lěska do Slepoho“, rozłoži Steffen Seidlich, nawoda zarjada za planowanje, twarjenje a hórnistwo Slepjanskeho zarjadniskeho zjednoćenstwa, na zašłym posedźenju gmejnskeje rady. Z Lěska jězdźa někotři šulerjo do Slepjanskeho němsko-serbskeho šulskeho kompleksa. Tučasnje dyrbja ze swojim kolesom hišće dróhu wužiwać.
Hraja zaso škot
Radwor. Přichodny škotowy turněr serbskich seniorow wotměje so jutře, wutoru, w 14 hodź. w Radworskim „Słodeńku“, něhdyšej lutowarni napřećo cyrkwi. Nowačcy su kaž stajnje lubje witani. Dalši turněr budźe w nowembru w Budyšinje, kaž hłowny organizator Měrćin Nowak zdźěli.
Pjenjezy za pišćele přepodali
Wojerecy. Jězorinowa załožba Wojerowskeje chorownje je tele dny z nahladnej sumu pjenjez ponowjenje pišćelow Wojerowskeje katolskeje cyrkwje na Karla Liebknechtowej podpěrała. Čłonaj załožboweje rady Thomas Delling a Uwe Blazejczyk přepodaštaj zastupjerjam wosady symboliski šek w hódnoće 45 000 eurow. Sobudźěłaćerjo Drježdźanskeje pišćeletwarskeje firmy Jähmlich nětko pišćele wurjedźa, trěbne dźěle narunaja a instrument znowa hłosuja.
Wot dźensnišeho puć ponowjeja
Budyšin. Na Hasy Käthy Kollwitz w Budyšinje su dźensa mjez dróhomaj Při rězarni a Jordanowej asfalt ponowjeć započeli. Dźěła traja po wšěm zdaću tři tydźenje, a to w dwěmaj wotrězkomaj. Přijězd do centruma zarjadow pak wostawa dale móžny, informuje měšćanske zarjadnistwo.
Nasyp žadyn škit njepřinjese
Njebjelčanske spjatnišćo wot přichodneho měsaca přetwarja
Njebjelčicy (SN/MWj). Znajmjeńša pjatnaće lět w Njebjelčicach stajnje zaso raz wo tym rěča, kotry přichod drje tamniše spjatnišćo změje. Wot lěta 2017 traje jednanje w krajnej direkciji, nowy nasyp twarić a spjatnišćo zachować. Nětko pak je krótkodobnje cyle hinaše wuwiće wotwidźeć. Konkretne plany je Njebjelčanskim gmejnskim radźićelam na jich zašłym posedźenju nawoda Budyskeje wotnožki krajneho zarjada za rěčne zawěry (LTV) Stefan Jentsch rozłožił.
Wosrjedź Europy a nic na kromje
Budyšin (SB/bn). Němsko-francoski wuběrk (DFA) w Radźe gmejnow a regionow Europy (RGRE) je lěta 1988 wutworjeny gremij, kotryž bu z wotmysłom załoženy, poćahi mjez woběmaj krajomaj na komunalnej runinje pohłubšeć a rozšěrić. Minjeny tydźeń štwórtk a pjatk wotmě wuběrk swoje rjadne posedźenje prěni raz w Budyšinje. „Dźakuju so koleze Alexanderej Ahrensej, so smědźachmy tu z hosćom być. Nastupajo kulturu wopominanja móžemy tójšto wot Budyšina a regiona třikrajoweho róžka wuknyć“, zjima předsyda DFA, Kölnjanski měšćanosta Andreas Wolter wopyt gremija w sprjewinym měsće pjatk w tamnišej sukelnicy. Mjez druhim běchu sej Budyske wopomnišćo wobhladali, so po starym měsće wuchodźowali a so po serbskim w hosćencu „Wjelbik“ pohosćić dali.
Krótkopowěsće (25.10.21)
Incidenca nětko nad 200
Budyšin. Přez kónc tydźenja je incidenca w hornjołužiskimaj wokrjesomaj hódnotu 200 překročiła. Za Budyski wokrjes je Roberta Kochowy institut dźensa 259,7 podał, za Zhorjelski 218,3. Minjeny pjatk je Budyski wokrjes wo 349 dalšich natyknjenjach z koronawirusom a 21 wosobach rozprawjał, kotrež w chorowni lěkuja. We wokrjesu Zhorjelc bě 97 infekcijow, 27 pacientow w klinice hoja.
Přihotuja kursaj
Raduš. Seminaraj wo stawiznach, kulturje, tradicijach, žiwjenju a rěči Serbow přihotuje Turistiski zwjazk Błóta w Radušu. Prěni chcedźa spočatk nowembra wotměć, zdźěla delnjoserbski rozhłós. Myslenej stej kursaj za turistiske institucije, sobudźěłaćerjow hotelow a hosćencow a poskićowarjow wólnočasnych zaběrow. Zapřijaty je zdobom kurs k nawuknjenju wšědnych serbskich wobrotow.
Dobyćerjo wubědźowanja jasni
Policija (22.10.21)
Kwětki kradnyć chcył
Běła Woda. Kwěćel je njeznaty muž předwčerawšim w Běłowodźanskim kwětkowym wobchodźe pokradnyć chcył. Předawarka jeho na parkowanišću před předawanišćom dosćahny a jemu kwěćel zaso wotewza. Paduch pak njepopušći a dźěše za předawarku wróćo do wobchoda. Jako chcyše wona na to policiju wołać, dóńdźe k rozestajenju z mužom. Swědka předawarce pomhaše, na čož njeznaty skućićel ćekny.
