Poskitki z cyłeho swěta měli
Towarstwa dale podpěruja
Z pawšalnym spěchowanjom podpěruja w mnohich komunach tež towarstwa. Jich čestnohamtske dźěło chcedźa w Njeswačidle tohorunja podpěrać, za čož pjenjezy přewostaja.
Njeswačidło (JK/SN). Hižo před měsacomaj běchu so Njeswačanscy gmejnscy radźićeljo na to dojednali, zo wužiwaja pawšalne spěchowanje Sakskeje we wobjimje 70 000 eurow mjez druhim za to, towarstwa podpěrać. Nochcedźa pak jim pjenjezy pawšalnje přepodać, ale nastorčić w nich ideje a projekty. A te chcedźa potom zaměrnje spěchować. Zo bychu towarstwa chwile měli so přihotować a kmany projekt abo zaměr podpěry namakać, přizwoli jim gmejna čas hač do 8. oktobra. Bohužel pak su hač do toho dnja jeničce tři namjety dóšli. Na minjenym posedźenju gmejnskeje rady tuž wobzamknychu, dobu přizjewjenja projektow hač do 31.oktobra podlěšić. Tak so nadźijeja, zo nětko hišće wulki dźěl towarstwow někajku móžnosć namaka, kak hodźeli so pjenjezy zmysłapołnje zasadźić. Kóždemu towarstwu chce gmejna hač do 1 000 eurow podpěry dać.
Za nowy lěs žołdźe zběrali
Skupina dźěći a młodostnych je wčera w Kulowje z cyle wosebitym zaměrom po puću była. Woni wobdźělichu so na prěnim wobswětowym dnju, kotryž bě statny zawod Sakski lěs organizował.
Nowu škitnu hětu při wjesnym haće su nětko w Koblicach pola ...
Za wuwiće spomóžne abo skerje nic?
Slepo (AK/SN). Měła gmejna Slepo požadanje Łužicy wo titul swětoweho kulturneho herbstwa za naslědnu krajinu po wudobywanju brunicy podpěrać? Wo tym chcychu Slepjanscy gmejnscy radźićeljo na swojim zašłym posedźenju zasadnje rozsudźić. Měnjenja pak běchu přewšo rozdźělne.
„Požadanje je jara abstraktne, zdźěla samo nadute“, měnješe radźićel Marco Jainsch (CDU). Jemu njejsu jeno zaměry njejasne, ale tež wuskutki a kóšty tajkeho požadanja. „Kak so wone konkretnje za nas jako gmejna wuskutkuje?“, so Jainsch prašeše. W požadanju, tak měnješe radźićel Thomas Schwarz (CDU), dźe prěnjorjadnje wo jónkrótnu změnu krajiny we Łužicy. Po jeho słowach přinjese status swětoweho kulturneho herbstwa pozitiwne akcenty za region. Tu zesylnja wón identitu a turizm. „Wustupuju za to, zo sej ničo njezatwarimy. Wuskutki tajkeho zamołwjenja dźensa scyła hišće dodnić njemóžemy.“
Krótkopowěsće (20.10.21)
Zaso wjac korona-padow
Budyšin/Zhorjelc. Po kónctydźenskim lochkim zniženju je incidenca w Budyskim a Zhorjelskim wokrjesu zaso raznje přiběrała. Za Budyski wokrjes zdźěli RKI dźensa hódnotu 130,2, wčera zličichu tu 110 nowych natyknjenjow, 17 pacientow hladaja w chorowni. Incidenca za Zhorjelski wokrjes wučinja po RKI 118,1. Zličili su tam wčera 73 dalšich infekcijow, tohorunja 17 ludźi dyrbja w chorowni lěkować.
Dokładniše kontrole
Baršć. Wokrjes Sprjewja-Nysa je připowědźił wot klětušeho rybarjow a wudźerjow dokładnišo kontrolować, zdźěli delnjoserbski rozhłós. Po nowych předpisach maja čestnohamtscy pomocnicy znajmjeńša 20 kontrolow w běhu poł lěta přewjesć. Na jednu tajku dóstanu 20 eurow, tež wudawki za trěbne jězby jim zarunaja. Tuchwilu maja něhdźe dźesać tajkich kontrolerow, dalši su witani.
Ličba wjelkow w Čěskej přiběra
Kapałka wobsteji mjeztym 30 lět
Dušneho zmija paslili
Čorny Chołmc (SiR/SN). Połne parkowanišćo, wjele ludźi a pisane žiwjenje – takle prezentowaše so předwčerawšim Čornochołmčanski Krabatowy młyn. W srjedźišću stejachu tam poskitki za swójby z dźěćimi. Přihotowała bě je sobudźěłaćerka młyna za dźěćace a młodźinske dźěło Magdalena Schaffer. Wona bě sej wumysliła, kak móhli dźěći zhromadnje dušneho serbskeho zmija z mjenom Plon paslić. Za to trjebachu jenož prózdne rólki nuznikoweje papjery, barbjenčki, seršćowcy, barbu, pisanu papjeru a lěpk. Kóždy smědźeše swoju rólku tak wobarbić abo nalěpić, kaž so jemu chcyše. Jednotliwe rólki su na kóncu swójbneho dnja do dołheje šlebjerdy zwjazali. Tak nasta něhdźe pjeć metrow dołhi rjećaz, tworjacy wopuš wulkeho zmija, kotryž ma w młynje nětko wosebite městno dóstać.
Po paslenju móžachu so wulcy a mali wopytowarjo najprjedy raz posylnić, prjedy hač běchu wšitcy přeprošeni swójskeho zmija do powětra pušćić. Při miłym wětřikojtym wjedrje je so to wšitkim derje radźiło.
Dróha zawrjena
Brěžki. Wot wčerawšeje póndźele ponowjeja asfaltowu worštu statneje dróhi S 285 wot wotbóčki při zwjazkowej dróze B 96 pola Noweje Bukojny hač k wjesnej kromje Brěžkow. Twarske dźěła maja hač do 29. oktobra trać. W tym času je dróha po dołhosći 2,2 kilometrow dospołnje zawrjena. Wokołopuć wjedźe přez Mučow a Kulow.
Dźiwadło „wuchodneje identity“
Budyšin. Towarstwo Kamjentny dom přeproša na dźiwadłowy wječor pod hesłom „Kak zdokonjeć spomóžne wuměłstwo za wuchodnych Němcow?“, a to pjatk, 22. oktobra, w 19 hodź. Dźiwadłownik (Theatermacher) Noah Voelker z texaskeho Austina, hrajerka Rika Weniger z Neubrandenburga a choreograf Burkhard Körner z Mittweidy chcedźa ze swojim programom přepytować, hač tajke něšto kaž „wuchodoněmska identita“ eksistuje. Předstajenju přizamknje so zjawna rozmołwa. Zastup při wječornej kasy płaći dźesać resp. wosom eurow za wosoby z prawom na potuńšenje.
Předstaja knihu
Policija (19.10.21)
Z pokradnjenym kolesom po puću
Wojerecy. We wčerawšich rańšich hodźinach kontrolowachu policisća we Wojerecach 36lětnu kolesowarku a jeje třoch muskich přewodźerjow. Při tym wopokazachu zastojnicy dobry čuch. Přetož za kolesom žony policija hižo pytaše, dokelž bě pokradnjene. Při dokładnišej kontroli wačokow třoch přewodźerjow namakachu hišće rozrězanej kolesowej zamkaj. Dokelž wobsteješe podhlad, zo běchu tež tamne kolesa kradnjene, zastojnicy groćane koniki sćazachu a přizjewichu to sudnistwu.
Do kulturneho domu so zadobyli
Biskopicy. Spodźiwnu njedźelnu zaběru wupytało bě sej pjeć młodostnych předwčerawšim w Biskopicach. Woni wočinichu zamurjowane durje kulturneho domu a zadobychu so do prózdneho twarjenja. Pasanća to wobkedźbowachu a wołachu policiju. Što su młodźi ludźo w domje chcyli, njeje znate.
