Budyšin (ES/SN). Spočatk junija ma wěža Budyskeje radnicy dosaněrowana być. Potom róšty zaso wotstronja. W měrcu běchu 56 metrow wysoku wěžu na južnej fasadźe zdźěla zaróštowali, a to hač do wysokosće 30 metrow. Tam je wosebita konstrukcija trěbna była, dokelž běchu na balustradźe a na wodopluwaku škody zwěsćili.

Reparatura bě trěbna, wšako je so wodopluwak pušćeć započał. Tež balustrada wokoło wěže a jeje jednotliwe dźěle dyrbjachu ponowić, dokelž so dźěle zor­nowca wotpukachu. Z pomnikoškitneho wida měješe so originalny wodopluwak zachować. Tak jón najprjedy wutwarichu a po tym z nowymi woclowymi dźělemi zaso při wěži připrawichu. Tež na jed­notliwych dźělach balustrady bě ponowjenje trěbne. Wone běchu zdźěla ze šćěpjelom podkładźene, zo bychu samsnu wysokosć měli. Tón pak je mjeztym dodźeržany.

Wjacore přeńdźenja zwěsćili

Krušwica. Na zwjazkowej dróze B 115 pola Krušwicy su policisća wčera rano awto marki Opel Astra kontrolowali a hnydom wjacore přeńdźenja zwěsćili. Pólski šofer njeměješe žanu jězbnu dowolnosć, steješe pod wliwom drogow a měješe nimo toho 0,8 promilow alkohola w kreji. Tež awtowej čisle k Opelej njesłušeštej. A skónčnje namakachu ­specialny grat, z kotrymž hodźa so pod jězdźidłami katalyzatory wotrězać. Dokelž njebě na městnje jasne, komu awto słuša, je policisća sćazachu.

Pandemija so na přemysłowy dawk w gmejnje njewuskutkowała

Rakecy (JK/SN). Wo wužiwanju tak mjenowaneje komunalneje pawšale Sakskeje k sylnjenju wjesneho ruma we wobjimje 70 000 eurow je Rakečanska gmejnska rada wčera rozsudźiła. Ju chcedźa znowa dźělić. Tak chcedźa 63 000 eurow za saněrowanje zakładneje šule wužiwać. Z 3 500 eurami podpěraja towarstwa gmejny. Zbytk 3 500 eurow je předwidźany za projekty a iniciatiwy na wsach gmejny, kotrež přinošuja k lěpšemu wjesnemu žiwjenju. Kaž wjesnjanosta Swen Nowotny (CDU) radźićelam zdźěli, je pawšala hižo dóšła a hodźi so zasadźić.

Někotři radźićeljo so prašachu, hač je so pandemija na dochody z přemysłoweho dawka w gmejnje Rakecy wuskutkowała a hač dyrbjachu firmy insolwencu přizjewić. Swen Nowotny pak móžeše ­na dobre a stabilne wuwiće dochodow z přemysłoweho dawka w gmejnje pokazać. W lěće 2018 měješe wona 875 000 eurow z přemysłoweho dawka, loni 871 000 eurow. Pandemija njeje mjenje dochodow zawinowała. Firmy dale dźě­łaja, insolwency žane znate njejsu.

Wojerecy (SN/MWj). Za wobydlerski etat města Wojerec je so minjenu póndźelu wothłosowanska doba zahajiła. Hač do 7. junija móža wobydlerjo města a přisłušnych měšćanskich dźělow sobu rozsudźić, kotre projekty maja so zwoprawdźić. Wothłosować smě kóždy, kiž je 16. žiwjenske lěto dokónčił, a ma tři hłosy. Te hodźa so jeničkemu ­namjetej dać abo na tři wšelake namjety w měsće a na wsach rozdźělić.

Hłosy za město a wsy budu separatnje wuličene. Z toho zestajeja prioritnu lisćinu, kotruž potom we wobłuku přewostajenych pjenjez zwoprawdźa. Wothłosować hodźi so tež online na stronach města Wojerec. Wažne je, zo wobydlerjo swój hłós hač do 7. junija wotedadźa. Pozdźišo dochadźace lisćiki njehodźa so wobkedźbować, měšćanske zarjadnistwo informuje.

Na wuběr steji 37 wšelakich idejow. Identiske abo podobne namjety zapřijachu do jednoho. Wosom razow dyrbjachu takle postupować. Na lońšim wothłosowanju wo wobydlerskim etaće bě so wjace hač 2 400 ludźi wobdźěliło. ­Najwjace hłosow dóstachu tehdy hrajkanišća w Nydeji a Kinajchće kaž tež při Wojerowskim wobydlerskim centrumje Piwarska hasa 1.