Policija (14.10.21)
Zawinowar po njezbožu pomhał
Běła Woda. Po wobchadnym njezbožu předwčerawšim w Běłej Wodźe je 60lětny muž 81lětnej žonje pomhał. Wona bě z kolesom po Młynskej po puću, jako 60lětny ze swojim Opelom do njeje zrazy, dokelž njebě po wšěm zdaću předjězbu kolesowarki wobkedźbował. Při tym so wona zrani. Muž dowjeze ju na to ze swojim awtom do chorownje. Wo njedowolene wotsalenje z městna njezboža so w tym padźe njejedna, dokelž je muž žonje swoje personalije zdźělił.
Koncertuja w cyrkwi
Budyšin. Ansambl The School of Night wuhotuje přichodny Budyski komorny koncert zajutřišim sobotu, w 19.30 hodź. w Marje-Marćinej cyrkwi na Bebelowym naměsće. Na wopytowarjow čakaja w atmosferje Božeho domu jendźelske spěwy, zanjesene na lutni (Laute). Cyłk The School of Night bu 2005 załoženy. Zastupne lisćiki poskićeja w Löbnerec hudźbnym domje na Kotołskej a w turistiskej informaciji na Hłownym torhošću. Skazać hodźi so lisćik tohorunja pod telefonowym čisłom 03591/ 534 412. Při wječornej kasy płaća kartki 18 eurow, potuńšene 15 eurow. Koronowe postajenja maja so wobkedźbować.
Wustajeńca přistupna
Kamjenc. Pućowanska wustajeńca wo česćowanju swjateho Bosćana w Chróšćanskej wosadźe je hišće hač do njedźele, 7. nowembra, w Kamjenskim sakralnym muzeju cyrkwje swjateje Hany přistupna. Boži dom je wot póndźele do pjatka stajnje wot 10 do 18 hodź. kaž tež sobotu a njedźelu wot 11 do 16 hodź. zajimcam přistupny.
Puć dale zawrjeny
Měli wo zjednoćenju rozmyslować
Trjebin (AK/SN). W lěće 2021 je Trjebinska gmejna dotal solidnje a dokładnje hospodariła. Wo tym informowaše komornica Dana Piehl gmejnskich radźićelow na jich zašłym posedźenju. W zarjadniskim wobłuku maja tuchwilu nadbytk něhdźe 70 000 eurow, w zamóženskim samo něhdźe 100 000 eurow. Wo dochodowym a wobrotowym dawku kaž tež wo klučowych připokazankach komornica porno tomu žane informacije podać njemóžeše.
Zhorjelski wokrjes je lětuši hospodarski plan gmejny schwalił. Financne połoženje je stabilne, Daniela Piehl wuzběhny. Kak so wone přichodnje wuwije, pak hodźi so ćežko rjec. Likwidne srědki tuchwilu hišće maja. „Ručež zrěčenje gmejny z energijowym koncernom LEAG wuběži, hodźa so móžne rizika lědma posudźować“, komornica rozłoži. Prawniski dohladowanski zarjad je tohodla wospjet dobrowólne zjednoćenje gmejnow Trjebin a Slepo poručił.
Domaška chce znowa nastupić
Zarjadniski zwjazk Při Klóšterskej wodźe klětu předsydu woli
Pančicy-Kukow (SN/MWj). Po sydom lětach skónči so 31. julija 2022 hamtska doba předsydy zarjadniskeho zwjazka Při Klóšterskej wodźe Měrka Domaški. Tale tema drje njesteješe na dnjowym porjedźe wčerawšeho posedźenja zhromadźizny zaměroweho zwjazka, kotraž so prěni raz w ponowjenych rumnosćach běrowoweho twarjenja w Pančicach-Kukowje wotmě. Přiwšěm zastupjerjo pjeć sobustawskich gmejnow wo tym porěčachu. Na pokiw Tomaša Bjeńša (Ralbicy-Róžant) mjenujcy měli wo tym tak zahe kaž móžno rěčeć, zo bychu dosć wulku ličbu zajimcow docpěli, kotřiž móhli so za tule „wurjadnu a derje płaćenu funkciju“ přizjewić, Bjeńš wuzběhny.
Natwarja nowe busowe zastanišća
Rakecy (JK/SN). Za klětuše wólby wjesnjanosty gmejny Rakecy je tamniša gmejnska rada na swojim wčerawšim posedźenju prěnje zakłady wobzamknyła. Termin postajichu na 20. měrca. Móžne druhe wólbne koło budźe 10. apryla. Jednohłósnje wuzwolichu radźićeljo na namjet wjesnjanosty Swena Nowotneho (CDU) nawodnicu financneho zarjada gmejny Francisku Pfeiffer za předsydku wólbneje komisije. Přisydnikow wólbneje komisije a jich zastupjerjow su frakcije gmejnskeje rady sami nominowali. Z tym je wažny krok za komunalny wjeršk přichodneho lěta sčinjeny. Mjena kandidatow, kotřiž so nimo tuchwilneho wjesnjanosty wo zastojnstwo požadaja, njejsu hišće znate.
Röhrscheidtowa kupjel w Budyskej Strowotnej studni dóstawa tuchwilu ...
Ćežke njezbožo na wobjězdce
Zaso raz chromi
Chcedźa wobzamknjenje zběhnyć
Frakcija Zelenych w Budyskej měšćanskej radźe chce docpěć zběhnjenje wobzamknjenja hłowneho wuběrka sprjewineho města, kiž je za to, Bismarckowy pomnik na Čornoboze znowa stajić.
Budyšin (SN/JaW). Rozsud hłowneho wuběrka města Budyšina, na Čornoboze pomnik za Otta von Bismarcka znowa stajić, je runje tak kaž w zjawnosći tež na wčerawšim wuradźowanju měšćanskeje rady debatu zbudźił.
Budyski wyši měšćanosta Alexander Ahrens (SPD) informowaše wo tym, zo bě w naležnosći „razny list z Budyskeho Serbskeho instituta dóstał, na kotryž tež wotmołwi. Ahrens na to wobzamknjenje zakitowaše, prajo, zo měli wosobu Bismarcka widźeć w zwisku z časom jeho skutkowanja. Wón njezataji, zo měješe Bismarck zawěsće tež słabosće, předewšěm w postupowanju mjeńšinam napřećo, štož mjenowaše wón „politiku z drjewjanym hamorom“. Zdobom pak Ahrens wuwjedźe, zo njesměli jenož na špatnosće zhladować. „Sym za pomnik hłosował“, wyši měšćanosta přizna. „Bismarck pak njeje tema za kulturny bój.“
Krótkopowěsće (14.10.21)
Status hosći kontrolować
Budyšin. W Budyskim wokrjesu su wčera wo 75 natyknjenjach z koronawirusom informowali. Incidenca po RKI wučinja tu dźensa 107, we wokrjesu Zhorjelc 95,4. Tam su wčera wo 52 dalšich infekcijach rozprawjeli. Budyski krajnoradny zarjad skedźbnja na winowatosć zarjadowarjow, hosćencarjow a hoteljejow, status hosći jako testowanych, wustrowjenych abo šćěpjenych kontrolować.
Haninu medalju dóstali
Drježdźany. Wjele lět čestnohamsce skutkowacych je sakska socialna ministerka Petra Köpping (SPD) dźensa w Drježdźanach z Haninej medalju počesćiła. Mjez wuznamjenjenymi su Steffen Handrick z gmejny Dobruša-Huska, w njewotwisnym zwjazku seniorow aktiwna Annette Kluge a Maria Kulessa, kotraž angažuje so w pomocnej słužbje maltezow. Wobě stej Budyšance.
Pólsko-sakski forum zahajeny
