Kózły za třěchu pozdźišo dóstanu
Kubšicy (CS/SN). Dźěła na najwažnišim inwesticiskim objekće Kubšiskeje gmejny, powjetšenju Zakładneje šule Bošecy, dale derje postupuja. Přitwar je w hrubym hotowy. Wot spočatka meje nastawa mjezytwarjenje. Před tydźenjom je metalotwarska firma aluminijowu a škleńčanu fasadu nowotwara zhotowjeć započała. Po tym maja so samsne dźěła na mjezytwarje zahajić.
Poprawom chcychu dźensa staru třěchu wotnošować započeć. Dokelž pak kózły za nowu třěchu hakle z časowym zastatkom dóstanu, dyrbjachu tónle termin na 31. meju přestorčić, zdźěli wjesnjanosta Olaf Reichert (njestronjan).
Historiska bróžnja wuchowana
Na Šusterec statoku w Trjebinje nastanje dalše twarjenje. Hač do pózdnjeho lěća natwarja tam pod pomnikoškitom stejacu bróžnju, kotraž je wjele lět na hinašim městnje stała.
Trjebin (JoS/SN). Skónčnje tak daloko je. Wjace hač sto lět stara tykowana bróžnja z bywšeho Trjebinskeho wjesneho dźěla Za Goru (Hinterberg) dóstanje na Trjebinskim Šusterec statoku nowy domicil. Natwariła bě ju před dobrym lětstotkom Jurkojc serbska swójba na swojej ležownosći. Jako bě jasne, zo dyrbješe so Za Goru brunicy dla zminyć, da Redec swójba bróžnju pod škit pomnikow stajić. Zaměr bě, rědke twarjenje dalšim generacijam zachować. Ale kajki móhł jeje přichod być a předewšěm hdźe? Rozrisanje nańdźechu w Trjebinje. Tamniši Šusterec statok je połny stawizniskich zajimawostkow. K bydlenskemu domej ludoweho herca a dudaka Hanza Šustera by so snano tež Redec bróžnja hodźała.
Bjez procesionow putnikowali
Po lońšej přestawce swjatki póndźelu zaso kemše na putniskej łuce
Róžant (SN/MWj). Při nic tak horcym wjedrje kaž zašłe lěta su so wčera stotki wěriwych ze wšitkich serbskich katolskich wosadow na putniske kemše do Róžanta podali. Hinak hač zwučene drje žane procesiony do Róžanta kročili njejsu. Njeličomni kemšerjo pak dojědźechu sej z kolesom k hnadownemu městnu abo wotstajichu awta we wokolnych lěsach a posledni čwak puća nóžkowachu. Zdźěla dźěchu tež mjeńše horstki ludźi zhromadnje a so při tym róžowc modlachu, kaž skupina Wotrowčanow.
Na putniskej łuce samej mějachu přitomni hygieniske postajenja wobkedźbować, mjez druhim nahubnik wužiwać a wotstawki dodźeržeć. Wonkowny wobraz bě tajki, zo bě snano hišće wjace kemšerjow hač minjene lěta. Najskerje pak zaležeše to na tym, zo so woni žadaneho wotstawka dla na łuce bóle rozdźělichu.
To bych sej přał
Wo diskriminaciji Serbow w slědźenju mało znate
Berlin/Drježdźany (SN/at). Što ludźo w Sakskej jako diskriminaciju zaznawaja, a w kotrych žiwjenskich wobłukach su tajku nazhonili? To stej dwě ze sepje nadrjadowanych prašenjow Němskeje centrale za slědźenje na polu integracije a migracije (DeZIM-Institut) w aktualnej studiji „Diskriminaciju dožiwił/a?!“ Wšako jewi so diskriminacija za mnohich ludźi w Němskej jako wšědna woprawdźitosć, kaž slědźerjo nastupajo wobsah swojeho předewzaća pisaja. Online přewjedźene naprašowanje je na to wusměrjene, nazhonjenja z diskriminaciju w Sakskej wotkryć. Na zakładźe empiriskeje wědy chcedźa wědomostnicy specifiske poručenja jednanja zdźěłać, kotrež hodźa so w swobodnym staće zeskutkownić. Za to trjebaja diferencowany wobraz wo žiwjenju wot diskriminacije potrjechenych wobydlerjow w swobodnym staće.
Krótkopowěsće (25.05.21)
Stabilnje pod marku 100
Budyšin. Wot pjatka hač do wčerawšeje swjatkowneje póndźele zwěsćichu w Budyskim wokrjesu 173 natyknjenjow z koronawirusom. Ličba smjertnych padow je wo šěsć na 890 rozrostła. Roberta Kochowy institut mjenowaše dźensa incidencu 74,4. W Zhorjelskim wokrjesu běštej hač do wčerawšeho dwě nowej infekciji. Incidenca je po RKI tam dźensa 49,9, prěni raz pod marku 50.
Nowy tachantski kantor
Budyšin. Nowy tachantski kantor Budyskeje wosady swjateho Pětra budźe wot 1. awgusta Kamil Maksymilian Kulawik. Pólski cyrkwinski hudźbnik skutkuje tuchwilu hišće w Stuttgarće a je sej jako nadarjeny improwizator kaž tež seriozny interpret klasiskeje pišćeloweje hudźby dobre mjeno zdobył. Wón naslěduje wulce zasłužbneho cyrkwinskeho hudźbneho direktora Friedemanna Böhmy, kiž bě so hižo loni na wuměnk podał.
Serbske zynki w Złym Komorowje
Policija (21.05.21)
Zadobywarjow wuhnał
Nowy Łusč. Kedźbliwy wobydler je minjenu wutoru w Nowym Łusču móžnemu padustwu zadźěwał. Njeznaći běchu so tam něhdźe w 14 hodź. na dwór ležownosće a do dźěłarnje dóstali. Přitomny wobydler słyšeše wottam njezwučene zwuki, wuhlada zadobywarjow a jich z dźěłarnje a dwora wuhna. Po rozprawje policije žana škoda nastała njeje, přiwšěm kriminalisća pad nětko přepytuja. Štóž je něšto wobkedźbował abo podhladne widźał, njech so pod telefonowym čisłom 03591/ 35 60 abo w jednym z policajskich běrowow přizjewi.
SAB spěchowanje schwaliła
Zakładnu a wyšu šulu w Ralbicach dale digitalnje wuhotuja
Ralbicy (JK/SN). Za digitalizaciju Ralbičanskeje Serbskeje zakładneje a wyšeje šule je rada gmejny Ralbicy-Róžant wuhibki stajiła a wčera wobšěrny paket wudawkow wobzamknyła. Nadawk za nakup digitalnych taflow dósta firma Schröder-Systeme z Drježdźan, kotraž bě zarjadniskemu zwjazkej Při Klóšterskej wodźe na wupisanje nadawka najpřihódniši poskitk zapodała. Delanscy radźićeljo chwalachu dobry rozsud komisije zwjazka, najmodernišu techniku za wuhotowanje šulskich kubłanišćow nakupić dać.
Njedźelu k sportnišću
Němske Pazlicy. Kohož swjatkowny wulět powjedźe zajutřišim, njedźelu, do kónčiny wokoło Kamjenca, móže sej mjez druhim do Němskich Pazlic dojěć. Tamniše sportowe towarstwo přeproša zajimcow wot 10 do 18 hodź. k swojemu sportowemu a wólnočasnemu centrumej, hdźež poskićeja jědźe a napoje.
Ludźi darmotnje poradźuje
Kamjenc/Njebjelčicy. Wokrjesny radźićel Lěwicy a prawiznik Hajko Kozel poskići přichodny tydźeń dwójce darmotne socialne poradźowanje, a to štwórtk, 27. meje, wot 16 do 17.30 hodź. we wobydlerskim běrowje Lěwicy na Budyskej dróze 8 w Kamjencu a pjatk, 28. meje, wot 14 do 15.30 hodź. na Njebjelčanskim gmejnskim zarjedźe. Ćežišćo budu aktualne dźěło- a socialnoprawniske wuskutki koronapandemije. Tež wo wšěch dalšich temach Hajko Kozel ludźi poradźuje. Zajimcy měli sej za wobaj dnjej pod telefonowym čisłom 035932/ 363 727 termin dorěčeć.
Boža mša na putniskej łuce
Nowu dźěłowu skupinu wutworili
Chrósćicy (SN/MWj). Nimo třoch wuběrkow ma Chróšćanska gmejnska rada nětko dalšu dźěłowu skupinu. Wona zaběra so z wobhospodarjenjom wodźiznow, z přirodnym wočerstwjenjom a z přirodoškitom. To je gmejnska rada na swojim wčerawšim posedźenju wobzamknyła. Dźěłowej skupinje přisłušeja nimo wjesnjanosty Marka Klimana (CDU) Benedikt Wjenk, Jan Wjesela, Uwe Macka, Michał Wowčer a Marian Korjeńk. Woni změja mjez druhim wo tym rozmyslować, kak najlěpje rěčki a hrjebje hladać, zaworane pólne pućiki wozrodźić abo štomy a kerki škitać. Uwe Macka napominaše, so tohorunja z něhdyšimi a snano zabytymi kemšerskimi šćežkami zaběrać a snano tež pomnikoškit sobu zapřijeć. Gmejnska rada nochce do dźěła mjenowaneho cyłka wobsahowje zasahnyć. Skerje měł sej tón sam swoje nadawki stajić.
