Z policajskim čisłom jězdźił

Oberlichtenau. Při kontroli mopeda předwčerawšim w Oberlichtenauwje so policisća njemało dźiwachu. Na jězdźidle bě wopačne čisło přičinjene, mjenujcy tajke, kotrehož kombinacija pismikow „DD-Q“ je zasadnje za policajske jězdźi­dła w Swobodnym staće Sakskej rezerwowana. Dokelž bě moped nimo toho tak přetwarjeny, zo by trochu spěšniši był, jón zastojnicy sćazachu. 17lětny wodźer změje so nětko mjez druhim falšowanja wopismow a přeńdźenja přećiwo zakonjej wo winowatostnym zawěsćenju dla zamołwić. Zwotkel wón policajske čisło měješe, njeje znate.

Němske Pazlicy. Wjacore dyrdomdejske prózdninske přebytki za dźěći a młodostnych chcedźa lětsa w dožiwjenskim campje při Němskopazličanskim wulkim haće přewjesć. Na zajimcow čakaja tam najwšelakoriše zaběry w přirodźe, při wodźe a nad njej. Mjeztym zo su pře­bytki za młodostnych hižo wukniho­wane, maja za dźěći hišće swobodne městna, a to w času wot 10. do 14. awgusta kaž tež wot 24. do 28. awgusta. Internetnje přizjewić móža so zajimcy w syći za dźěćace a młodźinske dźěło pod .

Wulka Dubrawa (CS/SN). Z móžnym rozšěrjenjom terena biosferoweho rezerwata Hornjołužiska hola a haty su so čłonojo Wulkodubrawskeje gmejnskeje rady na swojim zašłym posedźenju zaběrali. Teritorij, 1997 w jeho dźensnišej formje wutworjeny, dyrbja mjeztym nowelěrować, rozłoži dr. Jan Peper ze zarjadnistwa biosferoweho rezerwata. Z dohromady 59 wsow přisłuša škitanej kónčinje tež dźesać z gmejny Wulka Dubrawa. W jeje radźe, kotrejž wšitcy wjesnjanosća přisłušeja, su wo rozšěrjenju hižo rěčeli. Jako wosebje škitanja hódne wobhladuja tři na dźensniše hranicy rezerwata mjezowace kónčiny. Jónu je to sprjewina nižina wokoło Delnjeje Hórki, kotraž saha hač do Załhowa (Salga) a Klukša a je tuž teritorij Wulkodubrawskeje gmejny. Płonina je něhdźe 260 hektarow wulka. Dalša kónčina, kotraž by wot rozšěrjenja potrjechena była, je 100 hektarow wulki teritorij wokoło wětrnikoweje hory pola Brěmjenja. Tón wopřijima jako wosebitosć orchidejowu łuku. Třeća kónčina stej tak mjenowany motorowy hat a pěskowa hora pola Chrósta (Crosta) z cyłkownej płoninu je 19 hektarow.

15. meje je so lětuša kupanska sezona při Bjerwałdskim jězoru zahajiła. Tež tam maja ludźo škitne postajenja korony dla dodźeržeć. To samo kontroluja, kaž bě nětko słyšeć.

Hamor (CK/SN). Při temperaturje dwanaće stopnjow drje tuchwilu jenož ći najzmužićiši do Bjerwałdskeho jězora du. Dowolene pak je to wšitkim. Wšako je so kupanska sezona po koronowych předpisach 15. meje zahajiła. Z profesionelnym rjedźenjom su minjeny tydźeń 7,5 hektarow wulke pobrjóžne wotrězki za tekstilne kupanje, FKK a psy pola Hamora, Delnjeho Wujězda a Klětnoho přihotowali. Hač do hłubokosće 20 centimetrow su wšón pěsk přesali a tak zbytki cigaretow, wěka piwowych blešow a dalši drobny njerjad wufiltrowali. Gmejna Hamor płaći za to štyricyfrowu sumu pjenjez.

W běhu sezony sobudźěłaćerjo komunalneho twarskeho zawoda wšědnje na pobrjoze papjeru, bleše a wotpadki zběraja. Dokładne rjedźenje wotměwa so kóždej dwě lěće. Tak wobstajnje to při tamnych wodźiznach łužiskeje jězoriny hišće njepřewjeduja.